' ශ්වේත ද රක්ත ද නේක පැහැ ගත්තද සහස්‍ර පත්‍රයෝ නම් සහස්‍ර පත්‍රයෝම වන්නාහ. '
_♡♡♡♡♡♡♡♡♡♡♡♡_
ටොශිරෝ මිසුශිමා වෛද්‍යවරයා ශල්‍ය මේසය මත දිගා කළ තරුණ කාන්තා මළසිරුර දෙස බලාගත් වනම දිගු කල්පනාවකට පිවිසුණා. වයස හතලිස් පහක පමණ කෙසඟ මුහුණේ රැලිවැටුණු නළල මත රැදුනෙ බැරෑරුම් ප්‍රශ්නයක්.
" දැන් ඕක වලදාමු නේද දොස්තර මහත්තයා? Burry woman.." ජපන් ජාතිකයාට තේරුම් ගැනීම පහසුව වෙනුවෙන් ඉංග්‍රීසියෙන් දන්න වචන ගලපාපු මිනිහට ප්‍රතිචාරයක් ලැබුනෙ නෑ. ආරාගෙන ආව බඩ දෙපාවලට තවත් දරාගැනීම අපහසු බව දැනුනු මනුස්සයා දිහාවත් හැරිල නොබලපු වෛද්‍යවරයා ඇගිල්ලකින් ඔහුට පිටව යන්න සංඥා කර ශල්‍ය උපකරණ කට්ටලය ලං.කරගත්තේ පශ්චාත් මරණ පරීක්ෂණය ද සිදු කිරීමේ අදහසින්. නිහඩ සන්සුන් වෛද්‍යවරයාගේ පිටුපාල සිටි කොන්ද දෙස මොහොතක් බලා ඉදපු ඔහු හැරිලා පිටව ගියා.
සොදුරු ගැහැණියකගෙ නිරුවත් මළ කයේ ඇති කැලැලක කොනේ සැත්කම් පිහිය තියලා තදකරපු වෛද්‍යවරයාගේ මුඛාවරණය සීතල වෙමින් ඇති රුධිරය වෑස්සිලා පැල්ලම් කළේ තෙතබරිත හඩක් නඟමින්.
_♡♡♡♡♡♡♡♡♡♡♡♡_
" මල් කොල්ලා... මේ නෙලුම් කීයද? "
" මලක් විස්සයි මහත්තයා.. "
" එතකොට සිගරට් එකකට මල් කීයක් විකුනගන්න ඕනැද?.. "
" දන්නෑ මහත්තයා.. පොඩි ළමයි සිගරට් බොන්නෑනෙ. "
" ඇත්තට? "
මෝටර් බයිසිකලයෙන් බැහැලා පාර කොනේ තියාගත්ත මල් පහන්තිර ලෑල්ල ඉස්සරහින් අඩියක් දෙකක් කැරකුණ තරුණයා බිමට නැවිල යමක් අහුලාගන්නවා නෙලුම් බලා උන්නා.
සිගරට් කොටයක්.
ඒක නෙලුම්ගේ මුහුණ ඉස්සරහට ගෙනාව තරුණයා සිගරට් කොටේ නෙලුම්ගේ කටේ එබුවේ කොල්ලව අල්ලලා අත්වල හිර කරගෙන එක අතකින් කොල්ලගෙ කට හිර කරල වහගන්න මොහොතකට කලින්.
නෙලුම් දැගලුවා. අත්ලෙ දත්වලට අහු කරගත්ත හම කොටසක් අල්ලල තදින් හපලා දාපු කොල්ලා හැඩිදැඩි තරුණයා අඩපණ වුනු හැටියෙ ඒ ග්‍රහණයෙන් මිදිලා සිගරට් කොටේ කෙල ගහල දැම්මා.
