وقعت في حب لاعب.

p13

الطريق خلي يرحون الناس واحجيلكم..
رحت لغرفة بنت خالتي والكل بالمضيف وديسولفون ويضحكون وكل اهلي موجودين
جنت اريد اكعد عدهم بس الغصة بيه واخاف يحسون..
ضليت ابجي واشهگ بحسرة على الديصير بيه...
_ليش اني.. ليش مو اختي ليش مو بنت عمي ليش اني الزوجوني ليش كل الديصير بيه اني شسويت..!

كل ماتذكر نظراته الي وقرفه مني كأنما ديشوف فدشي كل مقرف ومقزز بوجهي..
احاول ارتب وانظف نفسي واهتم بروحي يصير اسوء من قبل..!
شسوي حتى يرضى..؟
مسحت دموعي ورتبت نفسي.. ورا شوي دخلت بنت خالتي..
ليلى: شبيج شو جيتي على غفلة..!
_ارجع؟
ليلى: لا ولج موقصدي بس جيتي فجاة استغربت!
_ماكو شي بس اشتاقيتلكم وصارت مشدات بسيطة بيني وبين ابراهيم ضجت وكلت اجيكم
ليلى: شكو اكو احد مضوجج مزعلج
_لا بس اني نفسيتي تعبانة وابراهيم ديطلع هواي ميحط وقت الي فَ متضايقة.. لتخافين مشاكل عائلية تصير بين كل زوجين..
ليلى: تمام لعد نامي هسه حتى بليل نسهر ولتنعسين..
_تمام..
نمت وكعدوني بال11 الليل.. سهرنا وضحكنا للامانة البنات فتحو نفسيتي بش بقت غصة ابراهيم بگلبي
وبعدني افكر شسوي حتى يتقبلني..
ماخابرني ولا سأل علي حتى!
مر اسبوع على جيتي لبيت اهلي واستغربو ليش بقيت كل هالمدة وميدرون حتى اني مادري..!
جنت كاعدة اتعشى ومتونسة واضحك معَ اهلي
اجاني ابن عمي يركض جاب تلفوني ديدك..
شفته ابراهيم..
رحت للغرفة بوحدي فتحت الاتصال..
ابراهيم: حضري روحج نص ساعة واصل..
_بس دقيقة
مخلاني احجي طفى الخط بوجهي ومهرفت شسوي..
هسه هالانسان هم يستحق ارجعله!؟.
رحت حضرت روحي ولملمت غراضي وودعت اهلي ووصل نزل سلم على كل اهلي وجان جايبلهم غراض ومتسوك للبيت لشهر ليكدام...

صعدنا بالسيارة وحرك..
ساكتين والسيارة هدوئ.. معجبني الوضع وكلت خلي احجي..
_احد مضوجك؟
ابراهيم: فكري بروحج وعوفي الناس بحالها وبطلي تدخلين بشي ميعنيج..
_انتَ كلتها فكري بروحج واني دافكر بيك.. ابراهيم ليش ميعنيلي هلشي انتَ زوجي..! انتَ منتبهه التصرفاتك..؟
تصرفاتك حتى الطفل ميسويها!

ابراهيم: سدي حلكج والزمي حدودج..
اني ممزوجج لسواد عيونج لو ما امي حتى بوجهج ما اباوع.. وانتِ تدرين اني احب مريم لتسوين روحج غبية..!
ومريم اذا بعد ضايقتيها بس الله اليدري شسوي بيج.. اخليج تشتهين الموت ومتلكي..!

سكتت لان ادري الحجي ميفيد ورح يسكتني وماكدرله..
وصلنا للبيت واني طول الطريق ساكتة ومادري شحجي واشكي لمنو..
دخلت للبيت وابراهيم راح لاصدقائه..
رحت عزلت الجنطة وسبحت وركضت لفراشي مشتاقتله..
نمت نومة حتى اهل الكهف منايمته..
كعدت شفت ابراهيم ديتعطر ومتكشخ..
الساعة 8 الصبح..
_وين
ابراهيم: معليج
لفيت راسي وكملت نومتي..
كعدت الساعة 3 الضهر
رحت غسلت اسناني وسبحت ومشطت شعري ورتبت روحي وطلعت للحديقة..
بقيت صافنة واشوف الفراشات الي بالحديقة شلون تفتر..
دخلت للبيت ورحت للضالة اتابع مسلسلي..
كملت حلقتين ورحت للمطبخ اطبخ..
كلت يجوز شوي يحن من يذوق طبخي..
رحت خليت تمن ولحم على النار وكعدت اتابع المسلسل..
صار المغرب رحت وصليت وكلت اروح اشوف الاكل
اللحم صاير اسود عبالي مستوي ولازم هيح يصير لونه..
التمن فاهي جان وكلت اخلي ملح..
خليت اكثر من خمس ملاعق..
رحت رتبت السفرة ورتبت روحي وكعدت انتظر ابراهيم..
رجع للبيت راح سبح واتعطر واجا..
داباوع لحلكه ومتحمسة يذوق الاكل..
اول ماحطه بحلكه نعابير وجهه تغيرت كأنما ماكل شي كلش مطيب
ابراهيم: هاي شمسوية..! تريدين تموتيني؟
_ششكو
كلت خلي اجرب دشوف صدك!
اكلته ومتحملت رحت اتقيأت
_كلت اسويلك اكل معرفت هيج رح يطلع..
ابراهيم: لو نايمة احسنلج.. ميجي منج غير وجع الراس
الله ورطني بيج..!
طلع من البيت معصب..
ضليت ابجي واتشاهك..
گلبي وجعني وماكدر اتنفس من ابجي..
غسلت المواعين وكل الاكل زتيته..
رحت صليت وغسلت اسناني ووجهي.. ونمت..
حرفيا كل وقتي نوم وماكو افرغ مني..
لو مبقيني عند اهلي احسنلي
كعدت من النوم على صوت التلفون الي صوته يكعد حتى الميت..
مباوعت على اسم المتصل لان النوم جان بعيني..
رديت وجان صوت ابراهيم..
ابراهيم: حضري روحج فد ساعة واصل ورتبي روحج
انفجعت وطفى الخط بدون ميخليني احجي..
رحت غسلت وجهي واجيت اتمكيج والبس..
كملت بنص ساعة وكعدت انتظر..