دابرة الشطر "الرئيس202"

البارت السابع ⁷

بسم الله الرحمن الرحيم
-
صلوا على سيدنا محمد وعلى آله الطيبين الطاهرين
-
رواية: دابرة الشطر 202
للكاتبة: سوس الشمري
__________________________________
مثل تابوت فارغ انشمر بالكاع
ومن انترس فوك متون حطوني
يشبكوني وتطيح دموعهم فوكاي
شايل كل عزيز وما يحبوني
مصلاية انفرشت بكعده مالت كيف
خلص كيفهم وبعيد شمروني
جنطة سفر ويه الشارد ومرتاح
ومن خلصت العازة تراب ترسوني
ليل وانكره وبلا ذنب لا صوج
ومهيج الالام الخلك سموني

قراءة ممتعة جواهر روحي🎀

(تغاضوا عن الاخطاء الاملائية ان وجدت🦋)

على بركة الله نبدي روايتنة🔥

____________________________________

وتين:

يمة وتين!!!!!....

الصوت وراي بس مالي واهس اشوف احد راسي عل القبر ودموعي على ترابة امسح بايدي على التراب وانه اتخيل اخوي هسه هنا هذا الحنين هسه هنا تاليتة شسوي يا روح اختك يا ضي عيوني اقتل روحي واكلهم يحطوني يمك والله صار يوم انتَ ما موجوده وكلبي جمر ما تطفة

انحطت ايد على كتفي كمت بخفه بس اشوف منو هاي شفتها كانت مرت عمو اسعد عيونها مملي دموع ودمعة واكعة علي خدها

باوعتلها ببرود جسمي بارد كلبي بارود وروحي تشعل بي بس ما مبين علي اباوع لعمو اسعد وراها مرتجي على السيارة ويفر بيدة

تبارك: يمة وتين حاجيني بيج شي كومي ولج يمه ليش نايمه هالشكل بالكاع بعد عمتج ولج يا روحي انتِ والله دتعذبين اخوج هيج

ناضرت لعيوني الي ما بيها قلة دمعة بس مو عيوني تبجي لا كلبي كلبي نار ودموعي تحرك بي مدا يهدأ

وتين: عمة تبارك

تبارك: روح عمتج يبعد عماتي

حضنتني حيل عمة تبارك غريبة مو من كرايبنة شافها عمو اسعد بالسوك تشتري وعاجبتة شايلة حنان العشيرة كلها ما اعرف ولا ادري ليش هيج تحبني بس حرفيا لما كانت امي تروح لبيتهم اول ما تسال علي واذا كالتلها امي ما اجيت تضوج

وتين: عمة كلبي نار

تبارك: سوده علي ولج يمة كومي وياي يبعد عمتج بس كومي والله باجر اجيبج

وتين: عمة تدرين اسمع امي تتوسل بعمو اسعد تكلة يريد يندفن بالنجف روح مفرفحة على ابا الحسنين تدرين شكاللها هههههه عمة يكللها هوه داز علي عمة اخ انفاسه وما ساندوا وسوو الي يريد عمة شسوي والله نار بكلبي نار ولج عمة

تبارك: حسبي الله عليهم حسبي الله ولج يا روح عمتج كومي وياي ولج عمه

وتين: عمة ما اروح عمة ساجر وحيده هوه يكول ما احس بالراحة بس من انتٌ يمي ولج عمة