أحببت نجمًا لا يريد سمائي

[ 2 ]

وعند هيام
أم هيام دخلت عند هيام الغرفه : وش فيك يابنتي
هيام بأنهيار : يمه سمعتي وش يقول ابوي بيزوجني سلطان ! يا يمه تكفين كلميه مابيه مابيه
أم هيام مسكت يد بنتها : يابنتي انتي تعرفين ابوك لو حط شي براسه يسويه وخلاص وسلطان شخص كويس عادي واذا على امه طنشيها وبيعيشك بعيد عنها
هيام وهي فاقده الامل انها تقنعهم ماتبيه : يمه مو عن امه بس انا مابيه مابيه
أم هيام : وش اسوي طيب بأبوك مصر ولا يبي يغير رأيه
هيام بتأفف وبكي : يالله
أم هيام : خليك جاهزه بكرا ترا بيجون ويخطبونك وبشوفك الولد
ماردت هيام على امها
امها تركتها لوحدها و ودها تمنع الزواج بكبره و ودها تعلم هيام ان جدتها طلبت ذا الشي
وعند هيام الي عجزت تستوعب ومنهاره وبوسط انهيارها نامت ولا حست بنفسها
وعند أبو هيام اخذته الهواجيس وشلون بيجبر بنته على شي هي ماتبيه ومصر ان يجبرها
اليوم الثالث
صحت هيام على صوت أمها
أم هيام : قومي يابنت تجهزي شوي جايين
هيام بتأفف : طيب قايمه
قامت وتجهزت بدون نفس
أم هيام بصدمه : يابنت وش اللبس ذا ماينفع تعالي البسي ذا
هيام بعناد : لا مااابي
أم هيام : قلت البسيه
هيام بتأفف : طيب
راحت الام ولبست هيام ونزلت
عند ابو هيام
وهو يسلم على اخوه أبو سلطان وسلطان : أرحب يا أخوي حياك اجلس
أبو سلطان وهو يجلس : الله يحيييك
أبو هيام : كيفك ياولدي سلطان
أبو سلطان عطى نظره لسلطان ( يعني ابتسم )
انتبه سلطان لأبوه
ورد ببتسامه خفيفه : بخير
أبو هيام : عاد انا استأذن اروح انادي البنت
راح ينادي هيام
عند أبو سلطان
أبو سلطان : احنا بنقوم وبنخليك مع البنت انتبه وتعدل
سلطان بتأفف : زين
عند أبو هيام : يابنتي يلا انزلي جو
هيام بتوتر : طيب طيب نازله
نزلت هيام مع أبوها ودخلت وكانت متوتره
هيام بتوتر : اا سلام عليكم
أبو سلطان : وعليكم السلام هلا هلا ببنيتي
كلهم ناظرو وردو السلام الا سلطان منزل انظاره ولا يبي يناظر
تقدمت هيام تسلم على خالها وجلست
أبو هيام : حنا بنتركم لوحدكم وبنروح
أبو سلطان : اي يلا ياخوي
طلعو كلهم ومابقى الا سلطان وهيام وهيام متوتره ناظر فيها سلطان وسرح ومرت دقيقه ولا تكلمو
سلطان بتردد : ودي اعرف ليش ابوك وابوي مصرين
هيام طالعت فيه : حتنا
ورجعو سكتو ودخلو عليهم وانبسطت هيام انقذوها
أبو سلطان وانظاره على أبو هيام : متى ودك نسوي عقد القرآن
أبو هيام : والله مادري بس اسبوع كويسه
أبو سلطان : اي كويسه يلا عاد حنا نستأذن
أبو هيام وهو يوصلهم للباب : فمان الله
وعند هيام للأن متوتره واتوترت زياده يوم عرفت ان اسبوع ويسوون عقد القرآن وهي ماهي مستعده للأن
وباليل
تجهزت هيام وفتحت الباب لبنات خالاتها بحماس لان هم الوحيدين الي يغيرون جوها ونفسيتها
هيام وهي تفتح الباب : وحشتتووني
ضحكو وحضنو بعض
أنوار بضحك وهي تحضن هيام : مسرع اشتقتي
هيام : والله اشتقت مره
ليان بضحك : يلا عاد بنجلس عندك الين ماتندمين انك اشتقتي
الكل ضحك
هيام : لا شدعوه يلا ادخلو بس
دخلو وجلسو
هيام بضيق : يابنات تدرون ان خالي خطبني لسلطان وأبوي وافق واليوم جو وخطبوني
ليان بصدمه : منجد!!!
أنوار : يوه غريبه من خالي يجبرك على شي ماتبيه
ساره : الله يعني فيه زواج قريب
هيام : اسكتي ذا همك والله يابنات ماعرف انا مستغربه بعد وكل مافتكر إنهار
ليان : اف عاد خالي دامه مقتنع وش يخليه يكنسل الحين
أنوار وهي تبي تغير الموضوع : يابنات خلونا نتفرج شي
ليان : اي يلا
قامت أنوار تشغل شي يتفرجونه وقامو يتفرجون وانسدحو وكملو ونامو بنص الفلم
ساره : ياويلي نمتو بنص الفلم وسحبتو علي وش اسوي الحين انا يالله
ماعندها حل الا انها تنام وفزت على صوت جوال هيام
ساره وهي متجهه لهيام تصحيها : هيام قومي يابنت جوالك يدق فجعني
قامت هيام بتأفف : اف مين يدق الحين بنص اليل
اخذت الجوال والرقم غريب ردت عليه
هيام : الو مين معايا
سلطان : هيام انا سلطان
فزت هيام : اا سلطان كيف جبت رقمي
سلطان : مو مهم من وين جبتو الحين انتي وين
هيام : بالبيت
سلطان : انا جايك الحين ابيك بموضوع
هيام بأستغراب : وش كيف ماقدر البنات عندي
سلطان : عادي انزلي الحوش
هيام وهي تقفل المكالمه : طيب
لبست هيام جاكيتها عشان البرد
ليان بأستغراب : وين رايحه
هيام : بنزل اجيب شي واجي
ليان : طيب
هيام نزلت تحت تنتظره بالحوش
وصل سلطان ودخل
هيام بتوتر : وش فيك
سلطان : اسمعي
هيام : ايش
سلطان : كلنا نعرف ان اهلك اجبروك علي وانا بعد هيام بأستغراب : طيب ايوه
سلطان ببتسامه : حلو طيب خلينا نتفق على خطه نقنعهم ان مانناسب بعض
هيام : شلون
سلطان : بالبدايه هما يحسبونه عناد فيهم يعني لازم نكون قدامهم اننا تقبلنا بعض بعدين نبدأ نسبب مشاكل بين بعض قدامهم وهم بنفسهم يبعدونا عن بعض بس قبل مانتزوج عشان لا يصير فيه طلاق
هيام : طيب
وهم يتفقون على الي بيسوونه سمعت صوت هيام وفزت وركضت وتخبت وراه
سلطان استغرب ان طلعت قطوه
سلطان : يابنت اطلعي قطوه
هيام بخوف : لا لا فكني منها ماحبها وخرها عني وخرها
ضحك سلطان على خوفها بسبب قطوه وراح عند القطوه ومسكها
سلطان : تعالي امسكيها مافيها شي تخوف
هيام : لا لا وخر
سلطان بضحك : دلع صدق
هيام بعصبيه : مالو دخل !
سلطان : هدي وش فيك عصبتي
هيام وهي متجهه للباب بتطلع : خلاص اتفقنا على كل شي بطلع بردت مع السلامه
سلطان : مع السلامه
راح سلطان وطلعت هيام ورجعت فكت الجاكيت وانسدحت ونامت
اليوم الثالث
صحت ومالقت احد اتصلت عليهم
هيام : بنات وينكم سحبتو
أنوار : شفناك نايمه ومابغينا نزعجك ورجعنا
هيام : زين
قفلت المكالمه وراحت عند أمها
هيام : يمه اليوم وين بنروح
أم هيام وهي تسوي القهوه : عندنا استراحه ابوك بيجمع فيها اقاربك يبشرهم انك خطبتي
هيام : يمه شدعوه مالها داعي
أم هيام : انتي بنييتنا الوحيده شلون ماندلعك
هيام بخجل : اجل انا بروح اتجهز
ام هيام : زين
هيام راحت تتجهز ومجبوره تبين انها راضيه عشان تكمل الخطه الي خططوها هي وسلطان وبرضو عشان ماتعكر مزاجها ولبست فستانها الازرق على ألوان السماء والنجوم المخصر مفتوح من الصدر شوي ومفتوح من الاكتاف واليد وطويل
جهزت وحطيت ميكب وكل شي ونزلت عند امها كالعاده توريها شكلها
هيام : وش رايك
أم هيام ببتسامه : تجننيين كالعاده
هيام ابتسمت ولبست عباتها ونزلو السياره
هيام بالسياره تناظر بالشباك وتهوجس ان شلون بتمثل انها راضيه مع شخص عانت منه
عند الاستراحه وصلو
التفت لهم أبو سلطان وناظر بسلطان على انه يروح يساعدهم
لاحظ سلطان نظرات أبوه وقام
سلطان : عطني اشيل عنك ياخالي
أبو هيام وهو يعطيه الاغراض : جزاك الله خير
دخلو جوا هيام فكت عباتها
دخل سلطان يحط الاغراض وأنتبه للبنت الي معطيته ظهرها سرح بفستانها الازرق وشعرها الناعم وشكل جسمها لفت هيام وانصدمت من نظراته
هيام بفجعه : يمه وش تسوي انت هنا
سلطان بتوتر وعلى طول صد : اسف مانتبهت
ماردت هيام وراحت
وراح سلطان وللأن فباله التفاصيل البسيطه الي شافها لكن بالنسبه له ابد مو عاديه راحت كل الافكار ببالها من يوم ماعرف انها هيام وجلس يسولف مع الباقيين عشان يشغل تفكيره
وعند الحريم
أم هيام وهيام سلمو على الكل والكل استقبلهم ماعدا أم سلطان ( فوز ) من قهرها على الي صار
طنشتها هيام وماعطتها أي رده فعل وراحت تجلس
شغلو اغنيه فزي له يا أرض
أنوار وهي تقنعهم يقومون : هيا تكفون عاد ذي ماتتفوت قومو يلا هيام يلا ساره يلا ليان
هيام وهي تقوم ترقص عشان أنوار : يلا عشانك تعالي
وقامو يرقصون وتمايل ورقص هيام ودلعها وشكلها وانجذاب الباقيين لها
وعن شعور فوز بقهر وحقد ورفعت جوالها بشويش تصور هيام وهي ترقص ومو منتبهه لها هيام
وخرجت برا وكانت متردده تنشرها بقروب العائله ولا لا ( هم عندهم الاقارب كلهم قروب واحد للعزايم ) ونشرته ودخلت داخل
عند الرجال
سلطان شاف اقاربه منفجعين من الي شافوه بالجوال ومعصبين رفع جواله وناظر وانصدم وفز عند الحريم سريع ولقى أبوه وخاله سابقينه
سلطان بعصبيه : وينها ذي وش قله الادب فضحتنا
فزو الحريم من الصراخ وراحو يشوفون وش السالفه
أم هيام : وش صار وش فيه
أبو هيام بصراخ : وين هيام
أم هيام : داخل
أبو هيام : روحي ناديها بسرعه
راحت تناديها وجت مفجوعه من شكل امها
هيام : وش فيه يبه وش فيك تصارخ
جا لها سلطان وسحبها قدام الكل بعصبيه ودخلها السياره ومشى وماعطى أي رد لهم
والكل مستغرب ومعصب
هيام بخوف والدمعه بعينها من عصبيته : وش فيك
مارد سلطان ومستغرب من الي قاعد يسويه لكن عصبيته تغلبت عليه ومسك القير بقوه وأسرع وخافت هيام وسكتت عشان لا يفرغ غضبه عليها
وصلو وسكر السياره وصرخ بوجها : وش سويتي انتي قلنا بنخرب الي بينا عشان يقتنعون ونفترق بس مب كذا !
هيام بأستغراب : وش سويت ماسويت شي والله
سلطان : تستهبلين
فك جواله و ووراها الفيد وانفجعت هيام وجلست تبكي
سلطان : تبكين على وش بالضبط
هيام : مو انا الي نشرته والله خايفه ارجع وابوي يذبحني
سلطان بعصبيه : وشلون مو انتي مين اجل
هيام : والله مو انا
جلست تبكي هيام وخايفه من أبوها
اما سلطان الي مستغرب من رده فعل هيام ومين الي نشره اذا مو هيا والف سؤال براسه وحاير ليش سوا كذا وقال : خلاص بكلم خالي انا ونشوف مين الي نشرها وبطلع الي بالقروب عشان لا يرجعون يشوفونه
ماردت هيام وجلست تبكي
بذا الموقف مايعرف سلطان ليش وده يحضن هيام ويواسيها لكن ماهو بقادر أتصل عليه أبوه ورد : هلا يبه
أبو سلطان بصراخ : وينك وين وديت البنت
سلطان : يبه هد معايا البنت السالفه طلعت مو بيدها مو هيا الي نشرته برجعها لا هديت الحين منهاره ونامت مقدر ارجعها وذا وضعكم معصبين
أبو سلطان : خلاص انا بهدي ابوها ورجعها لا تتأخر عشان لا يفرغ غضبه فيك
سلطان وهو يناظر هيام : طيب سلام
قفل الخط وجلس بحيره وش يسوي وكيف يكتشف من الي نشره
صحت هيام ولقت سلطان نايم ولاف وجهه بالشماغ ومتكتف ترددت تصحيه وجلست تهوجس ان الشخص الي قدامها هي الي عانت بسببه وتذكرت كل شي وحطيت يدها على وجها وبكت صحى سلطان على صوت بكيها
سلطان وهو ينزل الشماغ من وجهه : وش فيك تبكين
نزلت يدها من وجها ومسحت دموعها : لا بس افتكرت الي صار امس
تنهد سلطان وقال : ما عليك تلاقين لا رجعنا هدا الوضع
هدت هيام ورجعو البيت وصلها سلطان لعند البيت واستقبلهم أبو هيام وناظر فيها وعيونها تلمع وماسكه الصيحه مد حضنه لها وركضت لحضنه وأنهارت : يبه والله مو انا ماسويت شي
أبو هيام وهو يطبطب على رأس بنته : حصل خير حصل خير يابنتي اعرف مو انتي ليش كل هالبكي معقول هيام بنت فهد تنهار على شي ماسوته
مسحت دموعها هيام ورفعت راسها وابتسمت له
أما سلطان اكتفى انه يشوف حنية أبوها لها وهو مبتسم
أبو هيام وهو يناظر سلطان : تفضل حياك ياسلطان داخل
سلطان : لا لا ياخالي اعذرني يوم ثاني ان شاء الله
أبو هيام : شكرًا لك على الي سويته مشكور
سلطان : مابينا ياخالي وبعدين هيام خطيبتي بساعدها أكيد
ناظرت فيه هيام وجمدت من الكلام
أبتسم أبو هيام وقال : مع السلامه فمان الله
سلطان وهو متجهه للباب : مع السلامه
دخلت هيام عند امها وطاحت بحضنها
أم هيام ببتسامه : هلا هلا بوحيدتي هلا بنيتي وحشتيني
هيام ابتسمت وهي تحضنها : والله اكثر يا يمه ماتدرين شكثر كنت مشتاقتلكم وشايله همكم تدورون علي
أم هيام : والله خفنا عليك وين رحتي
هيام : يمه رحت مع سلطان
أم هيام : زين اشوا
وعند سلطان رجع من البيت تعبان و وده بس ينام لكن حصل بوجهه أمه
أم هيام وهي متجهه له : وينك وين كنت وين رحت معاها وش سويتو
سلطان مستغرب من اسألة امه : يمه اخذت البنت وهديتها وبس ورجعنا
أم هيام بحقد : وليش ان شاء الله تهديها طبيبها النفسي انت
سلطان بتأفف : يمه خلاص تكفين فكيني تعبان وابي انام
مشى وترك أمه وراح غرفته ينام
أم هيام بعصبيه : وجع مدري وش سوت هالبنت فيه رغم الي صار متمسك فيها !!
وعند هيام الي عجزت تطلع الافكار من راسها ان مين الي نشر الفيد و شلون مانتبهت له وجا ببالها زوجة خالها ( فوز ) لكن على طول شالت الفكره من بالها لان مستحيل تتجرأ تخاف من خالي يدري
وسرعان ماغفت ونامت
صحت على صوت البنات حولها
ليان وهي تهز هيام : يابنت قوووومي نروح السوق شبكتك قربت
صحت هيام بتأفف : يالله مافيني
ساره : اقول قومي
هيام وهي تقوم من السرير : طيب
راحت بدلت هيام ولبست عباتها ونزلو وراحو السوق
أنوار وهي تأشر للمحل : ذا المحل الي بنستلم فستانك منه
دخلو جوا والكل متحمس الا هيام
ليان بحماس : الله ذا الفستااان
أنوار وهي تاخذ الفستان : اييي
طلبو من هيام تلبسه وبالقوه راحت تلبسه وخرجت لقتهم جالسين ينتظرونها وانصدمو من شكل الفستان عليها
راحت أنوار تحضنها وتضحك : يااااي الفستااان يموووت
ليان وهي تتقدم لهيام : مرره والله صادددقه
جالسين يتأملون تفاصيل الفستان وعلى لون هيام المفضل أحمر
وهيام ماتنكر ان عجبها الفستان فقط ومو العريس
هيام : يلا بروح أبدل
الكل : يلا
بدلت وخرجو متحمسين
ورجعو البيت واشترو أكل وجلسو ياكلون
وعند بيت أبو سلطان
أم سلطان ( فوز ) الي كعادتها مو متقبله شي لكن محد عطاها وجهه