شفته دمعن عيونه فقدت ماعرفت شصار بعد
كعدت اسمع اصوات يمي بس مااكدر افتح عيوني وعطشانه
سمعت الدكتوره تكول لاابراهيم
دكتوره : للاسف بعد ماتكدر تمشي وكانت حامل بس للاسف سقطت وهم لكينه اثر بجسمها يعني ضاربينها وخيطنه راسها 5 خياطات
سمعت ليش صرخ رج المان رج خفت فتحت عيوني كوه شفته عيونه حمر ويصيح
شنو سقطت وشنو ماتمشي لعد المن يخليكم اهنا غير تعالجون المريض لو بس سوالف وضحك
شفت اجت امه تركض ودكتور دخل يهدون ببراهيم كال الدكتور
انطيك علاج الها وهم نسويلها عمليه بس مو هسه اقل شي 6 اشهر ولازم تستمر بالعلاج بهاي الفتره
هدء ابراهيم كوه وهمه طلعووو بس هوه بقى كلت بصوت كوه ينسمع
فد فدوه مي اريد
هوه بساع باوعلي واجه يركض شال بطل مي وكعدني يشربني وراسي لافينه شفت عيونه مدمعه اول مره اشوفه هيج كلت بغصه ودموعي تنزل
ليش هيج سويت بيه دموتني وخنتني طول عمري ماراح اسامحك
حجيت هيج وبجيت ودرت وجهي مااحس اله حضني حيل ودموعه اصب ويحجي بقهر
والله مادري بنفسي والله مادري شبيها مااسيطر مو اني والله مو بيدي احس شي يتحكم بيه والعباس اموت بدونج واصلا مادري شلون خذيت نور تعرفين شصار بيه
من شفتج طايحه والله كلت اموت لو صار عليج شي
ولا تخافين والله اخليج ترجعين تمشين
يحجي ودموعه اصب دفعته وكام واني كاعده طلع ورجع بيده كرسي متحرك
دمعت عيني من شفت الكرسي هاي تاليتي اجه هوه مسح دموعي وكال
والله اخليج ترجعين تمشين لا تبجين والله دموعج يحركن كلبي
شالني وحطني بالكرسي وعدل شالي وطلعني وراح جاب علاج واجه صعدني بالسياره وساق وصلنه شالني دخلنه
شفت اهل نهله كلها اهنا ونور واكفه ماحجو شي هوه صعدني فوك ونومني على جربايه وراح طلعلي ملابس تراك نيلي وملابس داخليه حتى استحيت
اجه شالني ودخلني للحمام راد ينزعني ملابسي دفعت ايده وكلت
اني اسبح
هوه ماحجه شي طلع واني سبحت ولبست البدي بس شلون البس بقيه الملابس مااكدر واستحيت صحت
ابراهيم
بساع انفتح الباب شافني ولبسني ملابس وشالني ويبوس بكصتي بس شعري اخاف ماغسلته لان مخيط
نومني على جربايه راد يطلع صحت
انطيني الدبدوب انومه يمي
مادري شبي عض شفته وراح فتح الكنتور وجابلي الدبدوب حضنته وهوه دخل للحمام اني نعست وجسمي كله يوجعني نمت
