ريڨـيوهـات ليـل _ لدعـم هـواة الكـتابـة

|رجـل الخـطـايـا الصـعـبـة لـ محـمد تامـر|

رواية "رجـل الخطـايا الصعـبة"
الكاتب "محـمد تامـر"
الرواية "46 صفحة، 8 مشاهد" "السرد والحوار فُصحىٰ"

فى بداية الرواية الكاتب بيعرفك طريقة السرد عن طريق" ملحوظة" مهمة وفى نهاية المُلاحظة كتب جُملة راقت لي بشدة :-

"إذا أعجبك فلا بأس وإذا لم يعجبك فلا بأس برضو!"

إللي هو عاجبك ماشي مش عاجبك ماشي برضو مش عاوز صداع _ أنا كاتب رايق مش فاضيلك _ جُملة حسيتها لذيذة وكأن الكاتب بينكش القارئ عادي.

نيجي بقىٰ للإهداء الكيوت أوي، إهداء مميز جداً بجد دايماً بيلفت انتباهي الإهداء وطريقة كتابته، بس كاتب الرواية قدر يعمل لنفسه إهداء ثابت لشخص مجهول لم يلتقي به بعد ومن وجهة نظري دا إهداء جامد جداً للرواية وكان فيه كمية لطافة تحسسك إللي هو أنا هقرأ الرواية عشان الإهداء وفى نفس الوقت إهداء مختلف ومميز.

فكــرة الروايــة :-
"بين جُدران الوحدة والعقاب."
جُملةً تصف حال قـاتـل مُتسلسل سُجن بعد قتله العديد من البشر، مريضـاً نفسياً مُصاب بمرض القـتل مُـتـعطش للـدمـاء، وعقله يُبرر جـريـمته تلك عن طريق قـتل المُفسدين؛ ليستيقظ ضميره بنهاية الأمر عن طريق قتـله لشخصٍ برئٍ، تتزاحم الأصوات برأسه ولا سبيل لهروبه من سيطرةِ عقلهِ عليه.
ببساطة كان البطل تجربة لسياسيين عاوزين يحافظوا على سلطتهم خرجوا من السـجن عشان يحقق رغباتهم لحد ما "انقلب السحر على الساحر".
كان فى أفكار كتير حلوة أسلوب مميز طريقة مثالية لـكتابة روايات الجـريـمة "أكيد مش هقولها عشان محرقش الرواية لكنها أفكار تستحق المدح والثناء."

المشهد الأكثر إيلاماً لـي حينما قـتـل "مالك" الصحفي "نضال" ليخبره "نضال" جُملةً مؤلمة :-
"أرجـوك.... توقف، إنها.... تُحـبني! لا تمنعنـي.... إياها!"  < قمة الحُزن والأسىٰ على نِضال وحبيبته ليه كدا يا أستاذ كاتب ليه؟ >

النهاية الدرامية الأكثـر من رائـعة :-
كانت نهاية من وجهة نظري سينمائية جداً وعادلـة بالنسبةِ لـي لن أحـرقها بالطبع ولكنني لم أرىٰ نهايةً بهذه الروعة من قبل، فالكاتب قد أجاد حقاً صُنع نهايةً مُرضية إلى حد ما لخلاص ذلك الشر.

الرواية قصيرة مش مملة خالص الكاتب يجيد اللعب بالألفاظ والكلمات والتعبيرات التي كانت أكثر من ممتازة، السرد والحوار تًحفة أخطاء إملائية تكاد تكون معدومة أصلاً إللي هو حتىٰ لو فيه من كتر الاندماج فى الرواية والأحداث مش هتاخد بالك، الكاتب موهوب ولغته قوية وممتازة.

قصور الرواية من وجهة نظري الخاصة "إللي هى متعتبرش قصور أصلاً" :-
السرد زي ما قولت كان ممتاز لكن كنت حاسه إني عاوزة أحس أكتر بمشاعر البطل واضطراباته النفسية كان ممكن شوية وصف أكتر للنقطة دي على وجة خاص، عامةً لو الوصف يكون أكتر شوية من كدا يبقىٰ كله هيبقىٰ تمام، مشاعر خطيبه "نضال" المُضطربة كان رده فعلها غير مقنعة بالمرة _بالنسبة لي_ فى مثل هذه المواقف يعني.

نقطة تانية مهمة جداً ضايقتني "الإلـه" تفسير الكُرسي بتاع الحُكم على إنه إلـه الحاكم، وأن القائد ومالك كلاً منهما إلـه نفسه، مش بعيب على حاجة أكتر من قسوة الفكرة ذات نفسها من وجهة نظر الكاتب قد تكون حقيقة فى ناس فعلاً كدا تخلوا عن إيمانهم فى سبيل أشياء دنيوية فانية، لكن كان ممكن الكاتب يوصل الفكرة دي بأسلوب آخر غير إنها "إلـه".

تصنـيف الروايـة :-
سياسـية، جـريمـة، فلسفية، أكشن.

تقييمي للرواية :-
تاخد 10 / 10 ونجمة ☆ حرفياً، ودا إللي أنا متوقعاه للكاتب محمد تامر فى المستقبل إن شاء الله.
الرواية من الملحوظة للإهداء للأحداث لشخصية البطل والفكرة ذات نفسها عملوا رواية قوية جداً، بالتوفـيق للكاتب.

الرواية pdf هتلاقوها على موقع FOULA BOOK تقدروا تحملوها وتقرأوا تعتبر من أفضل الروايات إللي قرأتها لحد الآن هى ورسالة انتحار.
هسيبلكم لينك الرواية فى الكومنتات.

-------------------------------------

{ اللَّهُمَّ صَلِّ وَسَلِّمْ وَبَارِكْ على نَبِيِّنَا مُحمَّد.}

أتمنى لكم قراءة ممتعة♡."

دُمـتـم بـخـيـر♡."