مُبْهَمُ رَمَادٍ

Part 5

. بسم الله الرحمن الرحيم .
مُبْهَمُ رَمَادٍ
رَفَل آل نُعَيْم
Part 5

.
.
.

رواسن..

طلعنا اني وامي بسيارتها متوجهين للكليه،
وصلنا وبعدنا بالسياره ولمحت رجال شكله
مو غريب عليه.. بس تقربنا اكثر تذكرته هاذه
نفسه رَجب الي اجه الفجر البيتنه وحجه ويا
أمي، استغربت وجوده هنا، وضاق صدري
بمجرد ما شفته، تقرب علينا وسلم، رديتله
السلام بس متوتره وهوه ضل صافن بتعابير
وجهي احس عبالك كشفني وعرف شايفته
قبل.

مشى أمامنا واحنا نمشي ورا، وهوه يمشي
ويسلم عبالك رئيس الوزراء، و مبين هنا كلهم
يعرفونه ويگفون يسلمون عليه، هزيت ايدي
ما عاجبني الوضع وماما باوعتلي مستغربه،
اداركت الموضوع بسرعه قبل ما انكشف
وسويت نفسي ما اعرفه

رواسن: ماما منو هاذه الزلمه؟

مريم: صديق قديم اعرفه

رواسن: و وجوده هنا صدفه لو انتي طلبتي منه؟

مريم: اني طلبت منه يجي حتى يساعدنا

رواسن: ليش يساعدنه داخلين لحرب احنا؟ هوه تسجيل بكلية حالي حال اي بشر

مريم: عيب رواسن هسا يسمعج فوگ ما جاي لهنا وتارك اشغاله واعماله واحنا الي ما راضين!

رواسن: جيته من الاساس ما الها داعي، اموري اني احلها ما طلبت مساعدته

باوعتلي بطرف عينها ما عاجبها كلامي واردفت

مريم: ترا ما اتزوجه بدال ابوج لتخافين

رواسن: محد يمنعج ماما هاذه حقج، بس اصبريلي اربع سنوات اتخرج واسكن ببيت وحدي واتزوجي براحتج

مريم: ليش ماماتي راح ياكلج؟

رواسن: يعني ناويه تتزوجينه ماما؟!!

مريم: مو دائما من تجي سالفة زواجي تگولين من حقج، وصحيح من حقي بعدني صغيره وحلوه ليش ما اتزوج

ما اعرف شلون اجتي ببالي هالفكره
وكأنو كلام هذاك المجهول سيطر على
عقلي وافعالي، وردت اكتشف ردود
أفعالها اكثر، والمصيبه انو مثل كل مره
يطلع هالمجهول كلامه صحيح

رواسن: ما بيها شي، اذا تگولين مستعجله عالزواج اتزوجي ماما، بس المشكله ما عندي احد اروح يمه بهاي الفتره واهل بابا يستحون ويبقون بعيدين مني واهلج ما اعرفهم، واني مستحيل اعيش ويا رجل أمي
سكتت شويه واسترسلت سويت نفسي افكر
رواسن: أو الاحسن اروح يم جدو نذير اعيش، بالاخير حفيدته اني ما اتوقع
يرفض.. شتگولين؟

بمجرد ما نطقت هالكلمات توقفت
امي عن المشي وتبسمرت بمكانها
ورجب مثلها التفت يباوعلي مصدوم.