أم حاضنة

حلقات 5~16

#بقلم_هاندا
5
قتلها فهيمة بصح يلزمني نخدم اكي تعرفي الوضع تاع الدار لازم نلحقولو المبلغ سينو رايح يدور علينا رانا ف الريسك (هو خويا مسكين تالمو خايف على الدار خلاني انا ومرتو نخدمو بش نلمو شوي وندفعو لهذاك الرخيس الطماع لي دار علينا بعد ما قبض السوارد مكان لا عقد لاحتى وثيقة تثبت ملكية الشقة هاذي ونفس الوقت يكون ولد صاحب بابا الشيخ وطيح خويا ف الشبكة وكي سقسينا عليه عرفنا بلي ميسواش وايسكرو )..-هاندا ريفالدا للقصص_ . بقيت ليلة هاذيك نطلع ونهبط قيستها من كل الجوانب عيطلي حب يعرف الرد حشمت نهدر معاه سيرتو مين عرفت نيتو موالفة نحكي معاه نورمال بوجه صحيح بصح اليوم مشي كيف كيف خليتو يصوني مبعد بعتلي ميساج قالي (ردي ي عيون الريم ) قريتو تبسمت وهذا لي قالي منعرفش نعبر ضهر نزار قباني وانا نضحك زاد بعتلي واحد كاتب فيه (سحر عيناك أهلكني أيتها الفاتنة) ي ربي وشبيه هذا ليوم دخلت فهيمة لقاني مكمشة ونقرا تالمو هدرت معايا مسمعتهاش حتى ساورتلي بيديها قاتلي -سي الهادي وقيل ثقلها اليوم -ااااه الهادي اوااه ايه وش قلتي مسمعتكش ضحكت عليا بالصوت خرجت وخلاتني انا طفبت تلفون معرفتش وش نرد عليه رحت توضيت و صليت دعيت ربي يفرجها وييسرها قررت غدوة نخبرو بصح حشمت شغل دخلها ديراكت مفهمت راسي من رجلي ، عيطولي نتعشا كي كملنا غسلت الماعين بصح شوفات خويا ليوم وتروني جاتني مرتو قاتلي الهادي هدر مع خوك وقاله حاب نجيب تاع الدار ونخطب بصح هو قالي شوفي معاها قبل الا قبلت جيت نردلها دخل خويا ي ربي حشمت شغل مش موالفة نحكي معاه ف الأمور هادو قالي سلمى راه جاني خطاب فيك انا حطيت راسي وكمل يهدر مبعد قالي وش قلتي الا مكيش قابلة غدوة نردلو متخمميش نطقت فهيمة قاتلو -علاه متقبلش خويا الهادي أنا نضمنلكم فيه متربي وعندو الكلمة في دارهم كلمتو لي تمشي قالها مهما يكون رايها هي لي يهمني وخرج ، حكمتني قعدتني قاتلي ها وش قلتي سكتت -يسما نفهم بلي قابلة -قتلها إيه قابلة -ي عمري بالبركة دك نخبر عبد العالي ونجي ،راحت هي زاد جا خويا قالي -صح راكي قابلة قتلو -لي تشوفو انت -لالا لي تقوليه انتي علاه انا لي رايح نتزوج بيه القرار قرارك انتي واحنا علينا نحترموه قتلو راني قابلة قالي فيها خير ان شاء الله وزيدي خممي منا لغدوة عندك الوقت ... لغدوة وقت الغداء زاد عيطلي ومهزيتش عليه بعتلي ميساج قالي -هزي( عليا اوموا نهدر معاك ) وليت نضت رحت للشمبرة ورفدت قالي -سلمى خوك راهو ردلي الجواب حببت نقولك بلي السمانة هادي نجيب تاع الدار اسكو راكي واجدة ولا سكتت قالي اهدري علاه ساكنة ولا حشمانة ا سيدي معليش يقولو السكوت علامة الرضا وانا نحسبها موافقة منك هكذا ،، كي لقاني مبكمة قالي هيا تهلايلي في روحك بصح كي نعيطلك هزي عليا لاشتا تبقاي ساكتة هنا انا ضحكت سمعني قالي هاه اوموا سرقت منك ضحكة اليوم ... فاتت سمانة جاو شافوني هو وخوه ومرت خوه هذا مكان ، ذاك النهار تزينت على غير عوايدي جيت تحفة غير دخل شافني معرفنيش قالي غدوة نعقدو قتلو -اييي علاه مز وب هكذا -قدم توال وذني وهمسلي -راني ساخف عليك سلمى راكي تهبلي نزيد شوي هنا نفضح روحي -وش راك تقول احشم شوي حسيت بالسخانة تخرج مني ضحك و مدلي سوارد قالي حق الشوفة تاع هاد الوجهه باسني من خدي ولا نقول خطفها وراح خرج خلاني نمروح ،،،-هاندا ريفالدا للقصص_ زدنا يامات عقدنا وفتحنا كلشي جاز بالخف كان مزروب عليا وانا زدت تعلقت بيه وعرفت عليه بزااف أمور وهو منحكيش مغرقني بحنانتو صح جامي حبيت من قبل ولا تحرك هدا القلب بصح الهادي كان هو الأول في حياتي وفي قلبي طول هاد الفترة يعاملني مليح وبلا منحكي على جهازي أكل هو لي جابهولي حاجة مشريتها من السوارد تاع الشرط كي سقسيتو خطرة على يماه وخواتاته قالي بلي راهي في فرنسا عند خوه والبنات يسكنو بعاد على هنا وباباه متوفي عايش مع خوه ومرتو برك الأغلبية يماه متهبطش للبلاد (وياريت بقات تم ومهبطتش) ،،،، اليوم فهيمة كان عندها رونديفو دخلت بسمانة شهرها خرجت معاها للطبيبة واحنا راجعين عيطلي نومرو تاع خويا قتلها عبد العالي راهو يعيط هزيت عليه بصح لي جاوبني واخد آخر ....
#بقلم_هاندا
6
قلت الو قالي عبد العالي ###### يقربلك قتلو خويا سكت مبعد قالي اختي خوك دار اكسيدون وراهم هزوه لسبيطار الا عندك خوك خلاف ولا باباك خبريهم قتلو كيفاش وشبيه خويا مكملتش هدرتي وفهيمة خطفتلي تلفون قاتلو -فهمنا وش كاين وشبيه عبد العالي أنا نرجف نستنى فيها كش متقولي حتى لقيتها طاحتلي في الأرض وطاح من يدها التلفون وهي ثقيلة معرفت وش ندير الحالة لي فيها قلبي مفجوع على خويا وزادت هي منعرف وش صرالها تلمو زوج نسا عندي وراجل قتلهم عيطو لومبيلونس ونبكي ولا داك راجل عيطلهم طحت في لرض نفطن فيها محبتش ودموعي يسيلو تفكرت الهادي عيطتلو ونبكي مفهمش بالسيف قدرت نهدر قالي وين راكم قتلو توال الطبيبة الفلانية قالي -متتحركيش اني جاي ربع ساعة بش جات لومبيلونس تهزها ومزالت دايخة فطنت غير شوي وعاودت داخت خفت بزااف عليها وعيني دور من ومن وقتاش يلحق حتى قالي داك فرملي شكون تطلع معاها قتلو انا ، طلعت وحاكمة يدها ونرجف عيطلي الهادي قتلو راني رايحة لسبيطار معاها ،،،هاندا ريفالدا للقصص ،، وصلنا دخلوها ديراكت رحت لريسابسيون نسقسي على خويا بالسيف لقاو اسمو كان لحق الهادي شافني قالي فهيمة كيفاش قتلو منعرف راهي لداخل - معليش كوراج يكون السكر برك قتلو خويا دار اكسيدون كي سمعت داخت -كيفاش وش راكي تقولي وقتاش دارها -قبيل عيطولي ونضت نبكي ولا حضني ليه قالي -سلمى كوراج راني معاك عمري إن شاء الله ميكون غير الخير -الهادي عيشك حابة نشوف خويا تعيش -ي عمري اصبري نسقسي ، ولا هدر مع تاع ريسابسيون قالوله بلي راه كومة غير سمعت هاد الكلمة زيرت عليه ونبكي قتلو نقدر نشوفو قالي مستحيل سلمى شهدي واستغفري قعدني على كرسي تم وراح جيهة الاستعجالات تبعتو نطمن عليها شفتهم دايرين عليها وهي مزال دايخة ثار فينا هذاك الطبيب -يالله اخرجو من جبدني معاه قاعد يكالمي فيا ملقيت علامن نخمم سبحان الله قعدت ف الأرض عاود نوضني قالي سلمى كوراج وشبيك هكذا ولا دختي هو يهدر وانا نشوف في الأرض دور بيا انا قتلو رايحة ندوخ شدني ليه وقعدني جا اونفاس ليا قالي اتنفسي مليح وعيط على وحدة فرملية جات قالها شوفيها ولات عاونتني دخلت قاستلي لطنسيو لقاتها هابطة ..كي حسيت روحي مليحة خرجني فاتت ساعتين واحنا نستناو هو رايح جاي وانا من الخلعة لي بزاف جاني القيء كي شافني مطابسة قالي وشبيك سلمى قتلو نخرج برا ، كي خرجت رديت كامل ليسطومة جابلي الماء غسلي وجهي قالي متبقايش لداخل جو سبيطار زاد عليك هيا تروحي للطمبيل واستراحي قتلو -كيفاش راهم قالي فهيمة راهي مليحة فطنت وخوك مزال قتلو نروح نشوفها-لوين تروحي رايحين يدخلوها للبلوك تزيد خافو على لي ف كرشها -كيفاش ياك مزال بش تولد قالي -هذا وين كنت مع الطبيب حالتها مش مستقرة السكر بالسيف هبطوه وخايفين ع البيبي رايحين يزيدوها سيزاريان ، حكمت في راسي ي ربي وش هاذ النهار ، دخلني للطمبيل وسكر عليا قالي منطولش ونجي راح دخل وانا على أعصابي وحد الساعة مهم أذن العصر بش جا كان يهدر بالتلفون طل عليا من الكارو قالي -عندك المفتاح تاع الدار -ايه علاه ، طلع ديمارا قالي نروحو نجيبو قش البيبي دك الستة يدخلوها تزيد حركتلو براسي وندعي ربي يسلكها هي والبيبي ،غير وصلنا طلعت وهو معايا مدخلش بقا ف الباب يستنى لقيتها موجدتهم ف الفاليزة شغل كانت حاسة هزيتها كما راهي وخرجنا ، غير لحقنا شفت خوه تم بيسك نعرفو سلم عليا وجبد على جهة منعرف وش يهدرو انا رحت دخلت وحدي نحوس كي قريب نوصل عيط عليا قالي وين رايحة نتي جا لحقني حكمني من ذراعي ورجعني للطمبيل نزل الفاليزة ودخلها وانا قلبي على خويا اليوم حسيت وش معناه اليتم مكنتش نحس بيه من قبل بكيت غاضني وخايفة عليه كش ميصرالو#بقلم_هاندا
7
فاتت الخمسة ولحقت الستة وانا قلبي مكوي ندعيلهم في زوج يسلكو بصح قلبي مكانش مطمني حاسة بحاجة مش مليحة بصح بقيت غير نستغفر كي أذن المغرب لقيتو جا عندي قالي عمري مبروك عليكم راهي زيدت وجابتلكم طفلة -صح الحمد لله ي ربي الحمد لله ودك نقدر نروح نشوفها قالي مزال راهي مزال مخدرة وطفلة حتى لغدوة بش نقدرو نشوفوها عدت نبكي ونشهق قالي سلمى متبكيش عمري افرحي ببنت خوك وادعيلهم قتلو تعرف اليوم حسيت باليتم تاع الصح طول عمري خويا مغطي عليا وواقف عليا ، لاح يدو على كتافي وجبدني ليه قالي وش الهدرة هاذي وانا وين رحت متزيديش تقولي هكدا سلمى بقا يكالمي فيا جاه تلفون قالي اصبري نهز على محمد (خوه) هدر معاه ومبعد قالي هيا تروحي دك منقدرو نديرولهم والو الدعاء برك ، ديمارا طول للدار كي هبطت هبط هو تان قالي هاتي المفاتح وانا نتكركر حالي مهدود ، فتح باب الدار دخل دار دورة مبعد قالي روبوزي دك نخرج نجيبلك عشا ونجي قتلو ميش نافحتلي بقا يشوف مع الدار قالي راني لتحت ف طمبيل أرقدي واستراحي متخافيش حركتلو براسي قالي سكري الباب مليح والى كش محتاجتي عيطيلي اوكي ...
راح خرج وانا بدلت قشي لبست بيجامة شعلت لاتيلي يوانسني وحكمت بللاصتي كل شوي يعيطلي يسقسي حتى رقدت الصباح فطني هو كي عيطلي نضت مخلوعة رفدت عليه قالي حلي الباب ،رحت فتحت لقيتو جاب فطور مدهولي من الباب قالي افطري كي تكملي وجدي روحك نروحو لسبيطار كان يبان مش راقد خلاص عينيه ناعسين قتلو اسمحلي حيرتك معايا عقد حواجبو قالي علاه انا شكون حتى تقوليلي اسمحلي حطيت راسي قالي يالله افطري راني لتحت ...
رحت لبست و وجدت روحي هزيت وحدة كرواسون هابطة ونوكل لقيتو طالع ف الدروج قالي بالخف وجدتي حكمت فيه وهبطنا ديمارا ديراكت لسبيطار دخلت سقسيت على خويا قالولي مزال كما راه ، البارح حاولت نشوفو مقدرتش حتى الهادي محبوش يخلوه ، رحنا منين فهيمة دخلت شفتها كانت راقدة وصفرا كما القارس شوية وجابتلي الفرملية الطفلة ي عمري مشاء الله بسم الله هزيتها بين يدي قد الكمشة و الهادي معايا قالي هاتيها هنا مديتهتلو أذنلها قالي ياك انا خالها في بلاصت باباها (تقول كان حاس بلي هو لي رايح يكون عوض ل باباها) فرحت من الجاست تاعو كي قالها رنيم قتلو-اسمها رنيم؟؟ قالي هكذا جات في بالي منعرف فهيمة كيفاش سماتها سقسيت الفرملية قاتلي مزال مسماتهاش بصح لازم تعطوها اسم قتلها نقدر نسميها قاتلي نتي وش تكوني -عمتها ، قاتلي شوفو معاهم لهيه قتلها باباها راهو كومة قاتلي ارواحي تبعيني حطيت الطفلة توال امها ورحت معاه قالهم نسميها رنيم وانا تان وافقت جبد الكارني كان عندو بيسك البارح كانت حاطاتو ف الفاليزة مدولهم سماوها وتكتبلها الإسم هذا .هاندا ريفالدا للقصص ... الطفلة خرجتها انا ومعرفتش كيفاش نديرلها مزية هو عيط لمرت خوه جاتني للدار وهي بقات تنعتلي كيفاش نقمطها وهكذا فاتو يومين نتعذب فيهم رنيم تبكي بزاااف والهادي هبلتو معايا ونفس الوقت ميقدرش يدخل عندي للدار ، خويا مزال كما راه وفهيمة حالتها مش مليحة صح فطنت وحوست على بنتها كي سمعت حطيت الطفلة عند جارتنا ورحت عندها كنت صورتها بش تشوفها كي دخلت عندها سبحان الله تبان مش تاع الدنيا صفرا كي شافت بنتها ف الفوطو هبطولها الدموع وسقساتني على خويا قتلها راهو مليح متقلقيش روحك قاتلي راني حاسة بحاجة-فهيمة خلاص مديريش هكذا ف روحك شدة وتزول لازم توقفي على روحك بنتك تستنى فيك قاتلي توحشت نشمها قتلها بربي انشاء الله كي اليوم ،،،، خرجت من عندها نبكي دمعة وخنونة وش هاد الحالة لي وصلنا ليها ....#بقلم_هاندا
8
رحت طليت على خويا مسكين راقد في وسط لي زاباراي ملفوف من راسو يا رب وأعطيني قوة الصبر منا تشوي ومنا تكوي عيطتلي جارتي قاتلي بنت خوك راهي تبكي محبتش تسكت ، خرجت بالزربة لقيتو يستنى برا قالي -وشبيك -والو رنيم راهي تبكي محبتش تسكت ، ديمارا بيا كي وصلنا انا هبطت الأولى طلعت عند الجارة كانت فاحمة قتلها يكثر خيرك طاطا قاتلي ي بنتي ملقيت وش نديرلها وقيل عندها لي غاز هبطتها ودخلتها فقدتها كوش ناشف وهي مسكتت حتى حمارت وليت نبكي معاها والله معرفت كيفاش ندير ، سونا الباب رحت فتحت كان الهادي ووجهو أصفر وعينيه مدمعين قالي مزال مسكتتش -ايه بلاك عندها لي غاز قالي دك نديها توال حنان (مرت خوه) -علاه تديها سكت ودخل للكولوار قالي سلمى فهيمة ربي يرحمها جبدت عليه -وش راك تقول انت كيفاش هدا وين كنت عندها الهادي لي فيا يكفيني والله ماو وقت تمسخير عاود حكمني قالي سلمى الحاجة هاذي مش تع تمسخير قتلك فهيمة هدا وين ماتت قلبها حبس بقيت تايهة وصوت الطفلة يصادي ف الدار حطيت يديا على وجهي ونشهق هو ملقا يسكتني ولا يسكت الطفلة طحت في لرض ونعدد بالصوت حتى هبطت عندي الجارة-وشبيك سلمى غير الخير خبرتها ولات تسكت فيا خرج هو من الشمبرة هاز الطفلة ويبكي طابس عندي قال للجارة ابقاي معاها حتى نجي .. تلمو عليا الجيران وانا في حالة حتى جا هو عيطلي من الباب بالسيف حاكمة الوقفة سقسيتو على رنيم قالي راهي لاباس سكتت عند حنان متخمميش عليها وليت تحضنتو زير عليا قالي سلمى كوراج عمري كوراج كي شاف النسا جبدني عليه قالي عيطيلي لكاش وحدة هنا كبيرة نهدر معاها تخبرني وش تحتاجو وليت رحت لجارتي قتلها ارواحي بقات تهدر معاه ولا قالي خلاص دك انا ندبر راسي. ،، رحت حكمت كوانة مزية الجيران يكثر خيرهم يعرفو بلي يتاما ومعندناش لي يوقف معانا هما لي قامو بالجنازة وكلشي طبخو كل وحدة وش عاونت وانا قلبي يدمي على فهيمة خلاتني وراحت كن غير وصاتني ولا شافت بنتها ، دخلت لشمبرتها وجيت فوق السرير ونبكي عيطتلي حنان مرت خوه عضمتلي الأجر سقسيتها على رنيم قاتلي متخمميش عليها راهي ف الحفظ والصون تشكرتها...فاتت ديك الليلة حزينة لغدوة كي دخلوها طحت على نعش تاعها ونبكي جهلت تاع الصح كانت اختي لي مجابتهاش يما نبكي عليها ونبكي على خويا وعلى بنتهم ونبكي على حالي صوتي يسمعوه من الحومة برا حتى طلع لعندي هزني من وسط الغاشي ودخلني للشمبرة سكر عليا وخرج سمعتهم يكبرو باين مخرجينها فتحت الباب لحقت عليهم ف الدروج قريب طيشت روحي هبطت حفيانة والنساء يجبدو فيا حتى داوها طحت في باب الباطيمة ولات الجارة عاونتني طلعت عطاوني ماء وسكر بيسك دخت ..هاندا ريفالدا للقصص ...فاتت ساعة لقيتو عيطلي هزبت عليه قالي ارواحي توال الباب هزيت روحي نتمايل رحت عندو جبد الباب ورايا وحضني سلم على راسي قالي -كوني قوية هاذا قضاء ربي انا تان راهي ختي بصح وش نديرو هاذي حكمة ربي الموت حق علينا كامل قتلو -بقيت وحدي قالي مكيش وحدك راني معاك سلمى متضعفيش علابالي تحبيها بصح لازم توقفي على روحك وعلى الملايكة هاذيك ،شاف مرا داخلة ولا جبدني عليه قالي ادخلي وبعد من الباب اهبط ...
حطو جام ف الحلقات9
راحت فهيمة وخلاتنا انا وبنتها وخويا اليوم عندو 20يوم حالتو مش مستقرة خلاص صرالو نزيف داخلي ف الرأس ... قاعدة وحدي ف الشمبرة هازة رنيم في يدي كانت رقدت حمد لله حطيتها ف سريرها الصغير وبقيت نتأمل فيها سبحان لي خلقها مالقري مزالت صغيرة بصح فيها شبه تاعي تبان بنتي حطيتها في بلاصتها و سكرت باب الشمبرة ونضت للدار نفرز فيها من يامات الجنازة تخلطت حالتي وحالة الدار كل حاجة مهي ف بلاصتها كلشي مرون وموسخ انا حيلي مهدود الطاقة لي عندي جهد بش نقوم برنيم بيسك ليل كامل نبقى ساهرة معاها والنهار نرقد معاها ونوض معاها حتى ماكلتي مفرطة فيها شيانت حالتي دارولي لي ساغن من قلة النوم والحزن والبكاء نضل نخمم على هاد الملايكة خويا راقد ف الإنعاش مهوش جايب خبر للدنيا ولا لواش صرالنا ، فرزت شوي برك كي كرهت حبست شفت روحي ف المرايا نخلع رحت دوشت ومشطت شعري كان وقت المغرب سونا الباب رحت نفتح كان الهادي قتلو ادخل علاه تبقى ف الباب قالي -منيش حاب ندخل تعرفي هدرة الناس مهم هاكي شدي عليا -الهادي علاه راك تقضي شكون راه ياكل اصلا قالي راني نشوف في حالتك كيفاش امشي دك ديري العشا واتعشاي قتلو مهيش نافحتلي -والله كما تحبي انتي وقيل مكيش تشوفي كيفاش رجعتي بقيت نشوف معاه قالي -تبقاي تبلڤي فيا هكذا نهجم عليك اني هابط ويا ويلك مديريش وش قتلك نريشك كما الجاجة كي ضحكت ضحك هو تاني قالي علاه حارمتينا منها دخل راسو باسني من جبهتي وهبط ...دخلت القضيان لداخل درت العشا قيسي برك وسمعت رنيم ناضت رحت توالها بدلتلها درتلها حليب مزية راهي تسكت هاد ليام خليتها ف بلاصتها طفيت على العشا حطيت شوي برك كليت وغسلت طبسي ملي بقيت وحدي عدت نخلي لاضواو شاعلة نخاف من الضلمة ،،، حكمت بلاصتي ورنيم فاتحة عينيها وانا نكوناكتي عيطلي ابال ماسنجر هزيت عليه قعدنا نشايخو ،،،هاندا ريفالدا للقصص وهكذا فات شهر حتى وصل النهار لي خبرونا من سبيطار بلي خويا توفى تم زتد مات النص مني هبلت وجهلت بكيت عيطت خبطت راسي للحيط هذا راهو خويا هذا راهو العزيز هذا راهو السند تاعي لي مخلانيش نحس بلي يتيمة مقدرتش مقدرتش نتقبل موتو بلاك فهيمة حزنت عليها وبكيت بصح خويا راني انهارت وتدمرت موتو جاتني صدمة قوية بزااااف لدرجة فقدت عقلي هذاك النهار الناس كامل تبكي على حالتي كيفاش ، رحت لسبيطار نحوس نشوفو ونسلم عليه ونقولو بلي انزادت عندك طفلة حبيت نهدر معاه جهلت حتى درتلهم مشاكل داخل سبيطار ولات فوضى والهادي مقدرش يكالميني ولا هزني بين يديه قالي لوكان عرفت ديري هكذا والله منجيبك هنا كتفني ودخلني للطمبيل وانا نفرفط ....غير وصلت للدار ثرت نحوس على رنيم من النهار هذا ولات بنتي ومسؤوليتي ودنيتي وحياتي ....فاتو اربع ايام على جنازتو عيطلي نومرو يبان من الخارج هزيت عليه قالي -سلمى عظم الله اجركم ختي انا الحسين ضحكت وحد الضحك عمري ضحكتو قتلو حسين خويا هههههه والله كيفاش تفكرت بلي عندكم خت بقا يراوغ ف الهدرة قتلو يكثر خيرك كي عيطتلي ونتمنى متزيدش تعيط وكوبيت عليه درتلو ف بلوكي خويا ههههه استكثر حتى يسقسي ويطمن على خوه كي كان ف الكومة وكي مات مقدرش يريزارفي ويهبط يحضر جنازة خوه هذا زعما لي كنت نقول فيه الشوا والدوا خير من لخربن ضهرو كامل كيف كيف إن شاء الله تنقارضو كما راكم ....