أم حاضنة

حلقات 17~25

#بقلم_هاندا
17
هو راح هبط وانا قتلها شفتها الصباح خارجة بلبس فاضح حبست توالها طمبيل  ركبت وراحت قاتلي موالفة مش غير اليوم هاذيك جيب الفضح  وخوالها ميحبوش  كي جي هنا دايما يتبعوها صحابها يضالو مقاريين توال الدار والهادي شحال  من مرة يحكمهم هنا يستناو فيها يدخل يزرقها بالضرب قتلها وهادو ميروحوش لديارهم على حسب وش راكي تحكي راهم عايشين معاكم قاتلي وي عايشين هنا  تشوفي نادية هادي الا روحت يومين جي تقعد سمانة هنا حتى ولادها الصغار تخليهم عند جداهم جيب معاها غير العود هاذيك قتلها وراجلها قاتلي يخدم كوميسار كاره من جدها  فالأول كان يجي هنا هو ف الحق ناس ملاح وولد ناس بصح هي مجرجراتو حتى كره عندو عامين مجا مدخل هنا  حتى وتبقى شهر ميحوسش عليها  قتلها فريمون راني مشوكية منهم   ناضت قاتلي راني عطيتك نبذة عليهم بش تولي تعرفيهم وتعرفي كيفاش تعيشي معاهم وانا ننصحك متخالطيش جدهم ابقاي جابدة روحك تربحي راحتك  قتلها ان شاء الله  ،  راحت هبطت وانا قلت ندير العشا  خممت تدير شربة ونزيد معاها سوفلي بصح معنديش الفرينة بدلت رايي درت شطيطحة لحم زدت مارينيت سكالوب  بقات الكسرة عيطت لحنان قتلها نجي ندير كسرة معنديش طاجين هنا قاتلي ارواحي  ،ستنيت شوي بش  طفيتلها هزيت رنيم وهبطت لتحت لقيتها غير هي ف الكوزبنة تهنية منهم  شفتها واقفة مع العشا غاضتني من برا ديراكت  للشقا قتلها انا ندير الكسرة فرد مرة وليت شمخت قيس 4 قرسات  وطيبتهم قتلها الا شفتي ميكفوش  نزيد قاتلي زيدي زوج ياسر وليت زدت زوج قرصات دخلت ديك لولو  تولهت رقبتها كامل زرقة ي خاه هادي وش كانت دير عفتها جات تمس ديراكت ف الكسرة بدوك الضفار  مبعد هزت قرسة كاملة دارتها ف طرشونة ودارت آبال فيديو تهدر مع صاحبها قدامنا لا حيا لا حشمة وتقولو شوف الكسرة  سمعتو يقولها باينة مكيش نتي لي درتيها بقينا نشوفو معاها  خرجت للحوش وتقولو أرواح توال بورتاي نمدلك قرسة  كي شافت امها دخلت كوبات وجات حطت ديك القرسة  وخرجت ، نضت انا هزيت وحدة خلاف درتها ف طرشونة قتلهم صح عشاكم انا نطلع نطقت نادية قاتلي وش درتي عشا قتلها شطيطحة   قاتلي بعتي شوي ل لولو  قتلها معليه ميكون غير خاطرك  هزيت رنيم وطلعت لقيتو معيطلي شحال من مرة ونسيت نهبط تلفون معايا عاودتلو قالي وش درتي عشا قتلو شطيطحة علاه قالي جاي صاحبي يتعشا وعرض روحو بفمو قتلو مرحبا بيه دك نشوف كشما نزيد وخلاص قالي أوكي نتكل عليك ، وليت تفرفشت العرضة تاع الغفلة دير التوتر  رحت زدت شوي فريت وسلاطة منوعة قليت سكالوب والكسرة عارفة متكفيش هبطت عند حنان قتلها جاي صاحب الهادي مدتلي قرسة خلاف وقاتلي دك نزيد نبعتلك شوي قراتان قتلها يعطيك الصحة  ،طلعت وجدت الطبالة تاع الصالو ستيكيتها مليح جبدت سرفيس آسيات جديد  وكلاس عيطتلو قتلو اكم جاين قالي وين وجدتي قتلو ف الصالو  -وينا صالو -قتلو عندنا لفوق قالي -لالا هبطي لتحت انا صاحبي منطلعوش لفوق موالف نجيبو لتحت قتلو معليش ، وليت هبطت كلشي لتحت قاتلي حنان علاه قالك يجي هنا قتلها ايه - ولات عاونتني ستفناها من كلشي  وبقينا نستناو دخلو زاد جا محمد   واحنا حطينا ف الكوزبنة  هاذي تتمخزر مع هادي سيرتو ميمي وجها مقلب الهدرة  ومشنفة منعرف علا واه ماكلة والرقاد نتلاقاوها غير ف الطابلة توكل  وزيد مش عاجبها الحال قاتلهم منين موالفين حنا نوكلو ف الكوزبنة وش هاد الطبيعة قاتلها نادية  ميمي كولي وسكتينا عيشك  ،  كي يكونو خاوتهم هنا يولو كي ستاوت#بقلم_هاندا
18
فاتت الليلة هاذيك والهادي عجباتو الماكلة والكسرة قالي يعطيك الصحة  .... وهكذا فاتت ايام تقريبا نفس الروتين حب ودلال معاه خياته منهبطش بزااف وساعات منهبطش خلاص باليومين ، اليوم عندنا شهر على زواجنا  ويماه تعطلت ف ريزارفاسيون تاعها  واليوم توصل هنا وقلبي مش مطمني خفت بزااف منها بيسك أكل يبانو يهابو منها ،، دوشت وشورت شعري لبست روب ف الفار فيها حرج خفيف قلت نستقبل فيها العجوز مهما يكون راني عروس  لبست لرنيم ونرجف تالمو خلعانة الغدا ومدرتش  والهادي  الصباح كان قالي نروح  للمطار نجيبها ملي خرج معيط لدك ، راهي 12  جات عندي حنان لقاتني لابسة قاتلي هكذا خير كنت رايحة نقولك البسي حاجة ثقيلة قتلها  جيت مليحة قاتلي توووت تهبلي مبعد تولهت قاتلي ديري ذهبك قتلها عندي غير مقياس وسلسلة خفيفة قاتلي معليش ديريهم دك نجيبلك سلسلة خشينة من عندي  راحت جابتهالي قتلها يكثر خيرك قاتلي تغديتي قتلها تأمني بربي والله مكليت لقمة قاتلي اهبطي اتغداي معانا قتلها  خلي دك ندير ساندويتش خفيف قاتلي خلعانة قتلها شوية -يا المهبولة نورمال بالعكس ملازمش تبيني روحك ضعيفة هادو لازم تقابليهم بوجه تاع بلاندي ويا ربي تسلكي معاهم قتلها زيديلي انتي ضحكت قاتلي انا نهبط نوجد روحي تان  ، راحت وانا غديت رنيم  وعيطتلو قالي رانا قريب نوصلو سمعتها ديجا تهدر توالو ،،،، ربع ساعة سمعت الحس والهدرة والعياط لتحت  عرفتها وصلت  صوت بناتها واصل لفوق  كرشي وجعتني  جا دخل عندي شافني بقا ساكت مبعد تبسملي قالي الله يبارك على الوردة تاعي تهبلي  هيا تهبطي راهي جات الهانية  فات للشمبرة هز رنيم حكمني من يدي وهبطنا قلبي يدق يدق كي وصلنا للصالو دخل هو ودخلت معاه كانو كامل مستفين لداخل  وهي عينها عليا منكدبش تبان حطة وكلاس كنت نسخايل فيها عجوز ضهرت ضاربة الحطة  سلمت عليها ياخي زغرتتلي  زدت سلمت على راسها قاتلي اقعدي توالي قعدت وهي تكيل فيا قاتلو معليهاش ضحك هو  مبعد شافت ف رنيم قاتلو تاع من هاذي الطفلة قالها بنت فهيمة ربي يرحمها سكتت  وبدأت تسقسي فيا وبناتها لاصقين فيها قاتلي اهدري علاه ساكتة قالها -حشمانة منك شفت في حنان وجها اصفر قارس  قاتلها وانتي كش مجاب ربي ولا مزال حطت راسها وناضت قالها الهادي ما وش هدرنا حنا على الطبيعة  هاذي خلي المخلوقة في حالها علاه مكرهتيش من هاد الموضوع قاتلو علاه تاني قلبي مشوي على وليد نشوفو قالها لي يسمعك يقول راكي عايشة هنا قاتلو هكذا أنا كي نجي نهدر ابقى سكت فيا  قالها ما انا كي نشوفك بديتي تخرجي الحدود نسكتك  كيفاش  المخلوقة قاعدة تحرجيها قدامنا مزية محمد مش هنا  قاتلو هات الطفلة هاذيك نسلم عليها  ولا مدهالها قاتلو متشبهش لمها هاذي  فهيمة كحلوشة قالها تشبه ف عمتها وغمزلي قاتلو شكون عمتها هاذي قالها عروستك  هاذي بنت خوها ياك فهيمة  كانت متزوجة بخو سلمى شافت فيا -صح قتلتا ايه ربي يرحمهم وجاتني الدمعة   مبعد قالها ما الطفلة هادي منا وجاي راهي بنتي انا لي نربيها ومستكلف بيها  وراهي امانة تاع فهيمة  عقدت حواجبها   وتشوف مع الطفلة مدتهالي وناضت  قاتلو الحقني عندي هدرة معاك  شفت خياتو الضحكة الصفرا على وجوهم  وليت نستغفر نطقت ميمي قالت اليوم وين استراحنا  جات الهانية ونورت علينا الدار وتضحك ....#بقلم_هاندا
19
كنت كما الحجرة يبست حاسة بلي رابحة تصرا حرب هنا ونظرات العجوز وكيفاش  تبدل وجها وكيفاش تصدمت  كانت باينة   وزيد هاد السوسات قاعدين اونفاص ليا وجوهم تعبر على الغيرة لي ف قلوبهم  شوية هكذا بدات لاصوات تعلا نسمع فيه هو أكثر شيء يعيط وهي تان  وحد ربع ساعة وهما هاكداك ولات ميمي قالت لنادية -اكي تشوفي زهر ماما ساعة مكملتش ملي دخلت لاقاوها المشاكل دك تطلعها لاطونسيو وناضت تأفف كي شفتها راهي تشارشي هزيت الطفلة ونضت غير جيت طالعة ف الدروج شفتو  خرج  مزعف وخبط الباب راح للصالو ملقانيش زاد خرج شافني  حابسة ف الدرجة غير ملامحو كأنو مصرا والو  تبسم و جا باسني من راسي قالي -لاباس بقيت نخزر فيه قتلو انت لي وشبيك كنت تعيط راني سمعتكم جا يردلي خرجت يماه شافت فينا وجات قاتلو مزال مكملتش هدرتي قالها-يما روحي تريحي راكي عيانة غدوة ونهدرو   خرجو لبنات وحدة تقولها ماما بالعقل راهي تطلعلك لاطنسيو ولخرى بقات تعوج في فمها قالي هيا اطلعي راني جاي طلعت للدوزيام ايطاج  وحبست نسمع فيهم عاودو كروشاو هو ويماه  تقولو  الهادي قتلك كلمة ومنعاودهاش هاذي تاع تربي بنت الناس في داري انا منقبلهاش الا هي عمتها انت متقربلهاش  تروح تشوف لمن تمدها تتربى علاه فاتحة ميتم انا هنا  ولا عيط عليها قالها  استغفري استغفري علاه هاذي بنت شكون حتى نخليها تتربى عند الناس هاذي راهي بنت ختي فهيمة قاتلو فهيمة مشي ختك مجبتهالكش من كرشي  ماتت ومزال خر.... لاسق فينا  بكري باباك حب يلسقهالي هنا ودك انت جبتلي بنتها تربيها  قالها يما تزيدي تجبدي المرحومة راني منتفاهمش معاك قليل مدرتي فيها وراحت مامبا مطلبتيش منها السماح  ودك زدتي حقرتي بنتها  شوفي كلمة ونقولهالك نزيد نسمع كلمة على هاد سوجي راني الهادي وتعرفيني  قاتلو يسما انت راح تكسرلي كلمتي في داري ولا كيفاش  رحت وخطبت بدون علمي وفوتهالك وزيد جبتلي وحدة منوالا وقلت معليش هو لي حب ودك نزيد نسمع بلي مربي بنت الناس  ولا يخبط ف لي قدامو قالها الرب العالي عندك 70سنة مزلتي نتي نتي يما بيضي قلبك شوي  وراني نشوف ولاد الناس راهم اكل هنا  نطقت ميمي قاتلو -الا راك على ولادي انا راني بنت الدار منيش برانية مجبتش  ولاد الناس قالها نتي بالذات  نزيدك يومين نلقاك هزيتي ولادك وامشي لدارك  مخلية راجلك عايش كي العازب  و زاد دار لنادية  قالها ونتي تاني كيفها راكم درتلو تبهديل قاتلو -علاه ا الهادي الهدرة هاذي وانا وش قلت  ياك وش تهدر انت انا نقول إيه وحاكمة فمي وقدري قالها راني هدرت ولي نسمع منها كلمة على الطفلة وسيرتو نتي يا يما الدار نقلبها عليكم  ، شفتو طالع زربت انا طلعت نجري قريب طاحتلي رنيم وعينيا مغرغرين غاضني كلامها هاذي سم يقطر والله مضنيتها حقودية هكدا الله يرحمك  ي فهيمة ،  وصلت لباب الدار لقيتو لحقني عرفني بلي سمعت بيسك فيا طبع انا منعرفش نخبي المشاعر سيرتو كي نكون قلقانة وزعفانة نبان في وجهي قالي أدخلي نهدرو  هز رنيم وانا دخلت  ساكتة ديراكت قعدت ف السرير وحطيت راسي  جا قعد توالي قالي -وشبيك -والو  سكن ومبعد قالي علابالي سمعتيها بصح يما هكدا تهدر مبعد تنسى مديريش عليها مزال موالفاتكش برك قتلو الهادي اسمحلي وقيل درتلك مشاكل هزلي راسي قالي وش هاد الهدرة متزيديليش نتي تاني هبطت دمعتي قتلو متفهمنيش بالغالط بصح كلام يماك قاسي بزااف  ولا يستغفر جبدني ليه قالي -سلمى شوفي فيا  وليت هزيت عيني قالي -انا نهار مات خوك وش قتلك سكتت قالي اهدري قتلو قتلي بلي منا وجاي انا هو حياتك  -هيه وقتلك تاني بلي رنيم راهي بنتي  في بالك هدرة يما رايحة تأثر عليا بالعكس  وزيد غير راهي تهدر من الغش بيسك علابالها معندها متقضي بكلامها معايا  والا كش مقالتلك مترديش قتلو -متقلقش روحك الهادي باسني قالي وانا علاه حبيتك غير على رزانتك ونعرف عقلك كبير  ولا باس رنيم وباسني قالي وش درتي غدا قتلو والله مدرت -معليش دك نخرج نجيب حاجة نوكلوها ....
اتفاعلو في الحلقات بنات  طلعوهم#بقلم_هاندا
20
بعد مخرج حطيت رنيم ف مشاية تاعها و  نحيت الروبة هاذي زعما لبستها بش نستقبلها عجوزة الشر هاذي لبست بيجامة وقعدت نعاود في هدرتها وفي هدرتو قلت والله منحطها في راسي  تكيت ف بلاصتي  نسمع فيها صوتها طالع لعندي مزالت تغلي  ،، وحد نص ساعة دخل الهادي جاب بيتزا  قالي ارواحي توكلي  رحت هزيت ترونش نوكل فيه ونخمم كيفاش نتعامل مع الهانية هاذي علابالي مهيش رايحة تسكت ورايحة تعاودلي نفس الهدرة، فيقني كي قالي متخمميش  بزاااف سلمى قتلو اااااه والو مكنتش نخمم قالي نقراك من ملامحك تبسمت قالي وراس الزينة تاعي لي تقلقك قوليلي عليها والبنات راني نقولهالك من اليوم لي توصلك اعطيها بصح متضلميش برك  ولي وصلاتك متسكتيلهاش  نعرفهم  قتلو ربي يخليك ليا عمري على هاد الكلمة هزني كلاني بالبوس ودخلني للشمبرة كمل عليا ... لليل كنت ندير ف العشا  وهو كان ف الصالو طبطب الباب راح هو يشوف سمعت صوت يماه دخلها قاتلو وين راهي مرتك هاذي  علاه متهبطش لتحت خرجت انا من الكوزبنة اصطنعت إبتسامة مزيفة وقتلها-اهلا بيك خالتي شافت فيا من فوق لتحت  قاتلي انتي من غدوة تهبطي لتحت طيبي مع لخرى انا منحبش الطابلة خاوية نحب نشوف ولادي قدامي شاف فيا وغمزلي قتلها ميكون غير خاطرك  قاتلو راني لتحت وهبطت قتلو  وش تقصد يماك قالي خليها تهدر موالفتني نوكل معاها قتلو نورمال مفيها والو نولي نطيب هنا ونهبطو لتحت نوكلو قالي علاه عليك الشقا هذا دك نهدر معاها  ولا راح هبط  افففف العجوز هاذي تبان ميش ساهلة  ..كمل العشا ودوشت رنيم  تفكرت حنان مسكينة مهدرتش معاها مالي نشعتها الصباح مطليت عليها  عيطتلها مهزتش عليا  زدت عاودتلها هزت عليا من صوتها باينة ميش مليحة  قتلها راني جاية  غير  هبطت لتحت قابلتني ميمي خزرت فيا وتشنفت  رحت انا عند حنان كانت ف شمبرتها كي شافت رنيم قاتلي شفتي الملايكة هاذي ومسلكتش منها قتلها حنان ميغيضكش منها  نورمالمو راكي والفتيها قاتلي هدرتها والفتها بصح علابالي دك يجي محمد تعاودهالو  سمعناها تعيط قاتلي راهي بدات  قتلها انا نطلع لفوق جيت نطل عليك برك خير متزيد تنشعني انا تان راهي متسببة عليا  وليت خرجت تلاقيتها في وجهي لابسة الأحمر  شبحت فيا عينيها  قاتلي روحي عاوني نادية فالعشا علاه واقفة تشوفي فيا هكذا  قتلها انا عشانا درتو لفوق راهو يطيب قلتها بنيتي برك وهي  حلت عينيها فيا -ايواااا انا وش هدرتلكم اسمعي ي بنت الناس انا طابلة تاعي منحبهاش تخوى فهمتي  قتلها كما تحبي  شافت مع رنيم قاتلي وهاذي لي ف يدك قتلها وسمها رنيم حركتلي راسها  جبدت للحيط ونمشي دخلت للكوزبنة لقيت نادية دايرة يد على جنبها ومعصبة راسها  دخلت الهانية قاتلها وين راهي لخرى  قتلها انا  راهي مريضة راسها يوجع شعلت فيا - روحي عيطيلها نعرفها  تشتي تسيتيت نهدر معاها كلمة تولي دير هكدا  جيت نروح حبستني بيدها تامنوني حسبت روحي ف الكازيرنة  راحت ليها للشمبرة  قاتلي نادية راكي تشوفي يما هكدا يعني إلا حبيتي تهني راسك لازمك تراضيها  وتكسبيها قتلها علاه انا هازتلها العصا  راني غي اليوم تعرفت عليها  ،دخلت حنان قالت لنادية  خطيت  يوم برك من الكوزينة خرجتوها فيا  شمرت مسكينة ولخرى طلقت من يدها وخرجت قتلها وشبيهم هادو قاتلي اسكتي برك  الهانية  كلي تلبس الأحمر هكدا  سكت ملقبت وش نزيد نهدر،   بقيت نشوف وين نحط الطفلة ونعاون شوي  جبت طابي حطيتها فوقو شمرت انا تان نخدم ونكالمي في روحي سمعت الهادي يعيط عليا من فوق بلاك طلع و ملقانيش تم غسلت يدي هزيت الطفلة وطلعت قالي -انتي وين كنتي حكيتلو قالي ابقاي هنا متهبطيش قتلو خلي نهبط نعاون المغبونة هاذيك راهم كلاوها قالي دك يجي محمد ونهدر معاه يشوفهم حل هادو لي مخليهم يطغاو عليها..#بقلم_هاندا
21
وصل وقت العشا عيطلي قالي اهبطي اليوم تتعشاي لتحت وليت هزيت وش درت عشا  وهبطت للكوزبنة كانت حنان واقفة مع محمد شكيت كانت تشكيلو  حطيتها وخرجت رحت للصالو كانو قاعدين شافني الهادي قالي وين راهي رنيمو  قتلو دك نجيبها ولا ناض قالي ريحي اني طالع ،  قعدت  وهي مترأسة الطابلة والشر يخرج من عينيها  يا يما هادا اكل على طفلة ملايكة ربي يهديها  كانت تشوف معايا مبعد دخلت لولو  هدا وين صايرت من برا جرات تحضن فيها وهي تان باين علبها مدللتها قاتلها -اي جات حفيدتي الزينة وبقات تمدح فيها ولخرى طلقت روحها  وبقات لاصقة فيها  ، دخل محمد ومرتو زاد جا الهادي  نضت أنا نسربي العشا كي وصلت توال ميمي جيت نحطلها جبدت الطبسي ساحت مرقة على الطابلة دارتها بالعاني  دارتلي بيدها مكان لاه فت عليها وحطيت لديك الكانيشة حكمت بلاصتي  بداو يوكلو كي كملو انا لحت لقمتين اصلا منين رايحة تهبط  والهادي ناض هو الأول قالنا بصحتكم   كانت رنيم  هازة مغرفة وتخبط بيها نطقت ميمي قاتلي منا وجاي هاذي حطيها في بلاصتها مجيش تحطيهالنا في وجوهنا ف الغدا والعشاء  وناضت لولو تضحك لعبولي على المورال جيت نردلها مبعد قلت خلي اليوم يفوت  على خير هزيت الطفلة وجيت طالعة شافني فايتة  قالي سلمى  محبيتش نرد عاود عيطلي وليت هبطت قالي وشبيك -والو  -هاتي رنيمو هنا مديتهالو وطلعت  درتلها وش توكل وهبطت قتلو رايحة نعطيها قالي اقعدي شوي دك نطلعو كان غير هو ف الصالو جاي طويييل فيه جهة فوتايات  ومن جهة آخرة صالة مونجي فيها سفرة يعني كي تكوني ف قاعدة جهة فوتايات متسمعيش وش يهدرو جاي واسع بزاااف،،،   قعدت جات توالي نادية قاتلي وشي هذا  توكلو وتنوضو يالله ماعين شكون رايح يغسلهم طل عليها قالها علاه بنتك وش راهي دير قاتلو هي راهي عيانة قالها علاه وش راهي دير  روحي قوليلها قالك نوضي اغسلي مواعين   عجبني كي قصفها،  نادية تخاف شوي من الهادي راحت قاتلها ولخرى بدات تعيط منغسلش جات العجوزة قاتلو علاه مرتك لواه جبتهالي قالها شكون قالك جبتهالك جبتها لروحي انا شافت فيا  قاتلي انتي كي نكون نهدر مع ولادي تنوضي مشي حتى نقولك ، هزيت الطفلة ونضت   شفت لولو وامها متلاسقين  كي شافتني قاتلها وهاذي علاه متغسلش  انا منيش خديمة عليكم ودك نعيط لبابا   خرجت حنان قاتلها خليونا من الحس والعياط دك نغسلهم غاضتني قتلها حنان دك نجي نعاونك  وليت رجعت عندو  مديتلو الطفلة ورحت للكوزبنة  بديت نغسل انا وهي حتى كملناهم ،  دخلت ميمي رمات طبسي تاع بنها كان يوكل فيه بعد مكملنا وسيقنا وكي عادت خارجة من الباب سمعتها كي قالت ياخي نشاشف  انا تم خبطت فروطوار وحكمتها توال الباب -اسمعي انتي من قبيل وانتي تشارشي وش تحوسي عندي عيطت بالصوت-ياااااااو الهااانية اجري اجري مرت وليدك رايحة تضربني حليت عينيا قتلها وش راكي تهدري انتي خرج محمد جا شاف فينا قالها مزلتي في عوايدك  ولخرين مسمعوهاش قاتلو راني نهدر معاها ، قالها مكنتيش تهدري كنتي تعيطي  راحت ولا قالي سامحيني اختي قتلو مشي مشكل  جات حنان قاتلي علاه وش كاين قتلها والو  ورحت هزيت رنيم طلعتها وعشيتها وهكذا فاتت هاذ الليلة ، لغدوة نفس الروتين الصباح منهبطش والعشرة نهبط ندير العشا ونتعشاو كيف كيف  وهكذا زاد فات شهر والعجوز هي هي كلامها يسم بصح لحد الآن مهدرتليش على الطفلة   اما بناتها روحو لديارهم  هاد الفترة تهنينا منهم بقات غير هاذيك الكانيشة هنا نهار يديها الليل يجيبها،،، وخوالها كل يوم العياط عليها سيرتو الهادي  وهي ف الفترة هاذي تعود تستناه يخرج يخدم ودير رايها تلبس المعري وتخرج .....