دخيل في بيتنا

البارت الثامن

دخيل في بيتنا
البارت الثامن
جمانه السعيدي

سعاد...خلصت الفاتحه   ورجعنا اني ومحمود حسره علينا
نحجي اي حجايه سوا
مرات يكتبلي بورقه   وينطينياها   بسكوت

مره اني كاعده بلمطبخ  اني وغفران ودخل  علي 
كعد بلمطبخ  يمنا وضل يسولف ويضحك
يريد بس يجذب انتباهي  اله
يريد بس احجي  ويااا
اني من شفت محمود وكمت احجي وياا    عندي الكلام صار اله طعم ثاني
كلامه راقي  حلو  احسه يفهمني من اول كلمه احجيها
بس علي احسه   غبي يدور مواضيع يحجي بيها
ومن يحجي كلامه مابي طعم
كلامه مايشدني  لو حجى
نزل محمود  يريد يسبح   واجا ياخذ صابونه من المطبخ
شاف علي كاعد ويسولف  ويضحك
وهو تخبل

اشرلي تعاي  وراي
اخذ الصابونه وطلع
اني طلعت من المطبخ  ورا امشي واتلفت  خاف غفران تشوفني
محمود...بصوت ناصي    ليش كاعده بلمطبخ
سعاد...جاي احضر العشى
محمود...وهذا التحفه شعندا جاي
سعاد...هو كل يوم يجي   منا لمن تخلص اجازته ويلتحق
بلجيش يله اخلص
محمود....لا ترحين بلمطبخ   منا لمن يروح
سعاد...والعشى
محمود...مانريد سم أليوم   يله امشي ادخلي بلغرفه وسدي الباب  بعد لا اطلعين

جمانه السعيدي
سعاد...ضحكت   مشيت دخلت للغرفه  التفتت لكيته  واكف يتاكد راح ادخل للغرفه
اشرلي ادخلي

كل الي بلبيت محد كان شاك مجرد شك اكو شي بينا اني ومحمود
بس غفران  مشغله الرادار  علينا

بعد وفاة جدي بست اشهر لحكته بيبي     اقصد ام ابوي
بس سمعت  الخبر
بمكان مااحزن   اريد اسكت من الضحك
اذكرت  دعاء محمود عليها
الكل انخبص بلخبر  وراحو البيت عمي  ماعدا محمود كان نايم
صعدت دكيت الباب
سعاد...محمود اكعد دعائك  استجاب
اريدك تدعيلي
فتح عيونه مستغرب اني بغرفته وجاي اكعده
غمض عيونه ورجع فتحهن
محمود.... سعوده   شكووو  اي دعاء
سعاد...بيبي ماتت
محمود...ياا بيبي
سعاد...ام ابوي   انت مو دعيت عليه   دعائك استجاب
محمود...كعدت على حيلي      لا بلله   تحجين صدك
سعاد...الضاهر السما جانت مفتوحه  من دعيت  بذيج اللحظه     لو  داعيلنا   مو احسن
محمود...شوكت ماتت
سعاد... صار ساعه   وكلهم راحوو
محمود... اريد جاي علما اسبح  واروح وراهم
سعاد...اي صار
جمانه السعيدي
نزلت قبله خدرت جاي وهو نزل دخل للحمام
راسا دخلت عليه غفران   همزين نزلت   لو جايه  وكامشتني
فوك   تخليهم يدفنون وياا بيبي

غفران....ليش مااجيتي
سعاد...وبيتنا منو يبقى بي
غفران...محمود  وين
سعاد...يمكن بلحمام
غفران....ترحين للفاتحه
سعاد...اي اذا انتي تبقين بلبيت اروح
غفران...اني مااعرف شبيه  شو دايخه  وتعبانه نفسي تلعب

يمكن حامل  لان نفس اعراض الحمل
سعاد...اي بيه الخير  انشاء الله    اذا تبقين بلبيت اروح اني