အခန်း(၅) အဖွဲ့ထဲသို့ ၀င်ခြင်း
ချီကျယ်ချန်နှင့်ရှန်မင်ဖေး မြင်ကွင်းမှ ထွက်သွားသည်အထိ လိုက်ကြည့်ပြီးနောက် ၀မ်ဖုန်အစည်းအဝေးခန်းသို့ ပြန်လှည့်လာခဲ့၏။
ကုဖန့်သည် မနက်ဖြန်၌သုံးရမည့်ပစ္စည်းများအားစစ်ဆေးနေဆဲဖြစ်ကာ သူဖတ်ရှုပြီးသည့် စာရွက်စာတမ်းများအား တစ်ဖက်တွင်စုပုံထားသည်။
"ဘာလို့ရှန်မင်ဖေးကို ပွင့်ပွင့်လင်းလင်းမပြောလိုက်တာလဲ"
၀မ်ဖုန်သည် သူ့ဘေး၌ထိုင်ကာ အလုပ်လုပ်နေသည့်အဖွဲ့ထဲသို့၀င်ပူးပေါင်းလိုက်၏။
"တကယ်လို့ သူသတိပြန်ရသွားတဲ့အချိန်ကျ ကသိကအောက်ဖြစ်စရာကြီး ဖြစ်မနေဘူးလား"
"ကျွန်တော်သာအမှန်အတိုင်းပြောလိုက်ရင် သူလန့်သေသွားမှာတောင် ကြောက်ရတယ်" ကုဖန့်ဂရုမစိုက်စွာ ပြောလိုက်၏။
"ကျွန်တော်နဲ့ သူငယ်ချင်းဖြစ်ခဲ့တယ်ဆိုတာကိုတောင် သူနားမလည်နိုင်ဖြစ်နေတာ ချစ်သူတွေဖြစ်ခဲ့ဖူးတယ်ဆိုရင်တော့ ပြောကိုမနေနဲ့တော့"
"ဒါ အကြောင်းပြချက်ပေးချင်ရုံပဲမလား" ၀မ်ဖုန်ကပြော၏။
"သူတစ်နေ့တော့ သိကိုသိသွားမှာပဲလေ။နောက်ကျမှသာသိရင် ပိုလို့တောင် လန့်သေမသွားနိုင်ဘူးလား။မင်းသူ့ကို စောစောစီးစီး ပြောပြလိုက်တာ ပိုကောင်းပါတယ်ကွာ။စောစောသိတော့ စောစောစီးစီး လက်ခံနိုင်သွားတာပေါ့"
"ဒါဆို အဲဒီတစ်နေ့က ဘယ်တော့မှရှိမလာဘူးဆိုရင်ရော"
ဤစကားအားကြားပြီးနောက် ၀မ်ဖုန် ကုဖန့်အား အလန့်တကြားဖြင့် လှမ်းကြည့်လိုက်၏။
"မဟုတ်ဘူးလေဗျာ အစ်ကို၀မ်ရ"
ကုဖန့် ရုတ်တရက် သူပြောလိုက်သည့်စကားသည် အနည်းငယ်အဓိပ္ပါယ်နှစ်ခွထွက်နေကြောင်း သတိထားမိကာ ကူကယ်ရာမဲ့စွာဖြင့် တစ်ချက်မျှရယ်လိုက်ပြီး——
"ကျွန်တော် ပြောချင်တဲ့အဓိပ္ပါယ်က သူ့ကိုတစ်သက်လုံး မှတ်ညဏ်ပြန်မရပါစေနဲ့လို့ ကျိန်ဆဲချင်တာမဟုတ်ဘူးလေ"
YOU ARE READING
Xuan Er Bu Jue (MM translation)
Romance"နောက်တစ်ကြိမ် အစကပြန်စခဲ့တာတောင် ကိုယ်မင်းကိုချစ်မိနေတုန်းပဲ" ရှန်မင်ဖေး × ကုဖန့်
