Xuan Er Bu Jue (MM translation)

Part 6

အခန်း(၆) အဖွဲ့ထဲသို့ ၀င်ခြင်း

ချန်ချွင်းရှန်းသည် လည်ချောင်းတစ်ချက်ရှင်းကာစကားစမြည်ပြောနေကြသည့် သရုပ်ဆောင်များအား ၀င်ဟန့်လိုက်ပြီး 《Chasing the Night》 ၏ ဇာတ်ညွှန်းရှင်းလင်းချက်အား တရား၀င်စတင်‌လေတော့၏။

《Chasing the Night》သည် မျက်မှောက်ခေတ်ကိုနောက်ခံပြုထားသည့် သည်းထိတ်ရင်ဖိုရုပ်ရှင်ကားတစ်ကားဖြစ်ပြီး ယင်းမှာ လုပ်ရိုးလုပ်စဉ်ကဲ့သို့ပင် ဇာတ်လိုက်မင်းသား၏အဖွဲ့သည် အရန်အမှုများကိုဖြေရှင်းရာမှ အဓိကအမှုကြီး၏သဲလွန်စကိုရရှိသွားပြီး ထိုမှတဆင့် နောက်ဆုံးတွင် အဓိကအမှုကို အဖြေရှာဖော်ထုတ်ကြသည့် ဇာတ်လမ်းမျိုးသာဖြစ်၏။

ဤရုပ်ရှင်၏ အဓိကဇာတ်ဆောင်အဖွဲ့အား အမျိုးသားနှစ်ဦးနှင့် အမျိုးသမီးတစ်ဦးပါဝင်သည့် ဂန္တဝင်မြောက်သော 'သံမဏိတြိဂံ' ပုံစံဖြင့် မြင်တွေ့ရမည်ဖြစ်သည်။ ရှန်မင်ဖေး သရုပ်ဆောင်ရသည့် အဓိကဇာတ်ကောင် လျိုစွင်းယွမ် သည် ရာဇဝတ်‌ရေးရာစုံစမ်းစစ်ဆေးရေးဌာန၏ အဖွဲ့ခေါင်းဆောင်တစ်ဦးဖြစ်ပြီး၊ ကုဖန့် သရုပ်ဆောင်ရသည့် လီကျစ် မှာ လျိုစွင်းယွမ်၏ လုပ်ဖော်ကိုင်ဖက်ဖြစ်၏။ ရွှီကျားကျားက မူ ထက်မြက်ဖျတ်လတ်သည့် အမျိုးသမီးမှုခင်းဆရာဝန် ရွှီထင် အဖြစ် သရုပ်ဆောင်မည်ဖြစ်၏။ သူတို့သုံးဦးကြား၌ သူငယ်ချင်းသံယောဇဉ်သက်သက်သာရှိပြီး မည်သည့်အချစ်ဇာတ်လမ်းမျိုးမှ မပါဝင်ပေ။ ရွှီထင် နှင့် လျိုစွင်းယွမ်မှာ ငယ်သူငယ်ချင်းများဖြစ်ကြ၍ လီကျစ်နှင့် လျိုစွင်းယွမ်တို့ နှစ်ဦးကမူ တစ်ဦးအပေါ်တစ်ဦး နားလည်မှုလွဲခဲ့ကြသည်များကို ပြန်လည်ဖြေရှင်းပြီးသည့် ရဲသင်တန်းဆင်း ညီအစ်ကိုများဖြစ်၏။

ဇာတ်လမ်းအစ၌ ဇာတ်ဆောင်သုံးဦးမှာ လူစုံနေဦးမည်မဟုတ်ဘဲ လီကျစ်သည် ဒုတိယပိုင်း သို့မဟုတ် တတိယပိုင်းအကုန်လောက်မှသာ စတင်ပါဝင်လာမည်ဖြစ်၏။ ထိုအချိန်တွင် သူ၏ပြန်လည်ရောက်ရှိလာမှုနှင့်အတူ လျိုစွင်းယွမ်နှင့် အကြီးအကျယ် စကားများငြင်းခုံကြရာမှတစ်ဆင့် နှစ်ပေါင်းများစွာတိုင် ကြာမြင့်နေပြီဖြစ်သော အမှုဟောင်းများ တစ်ခုပြီးတစ်ခု ပေါ်ပေါက်လာကာ အဓိကဇာတ်အိမ်ကြီးလည်း စတင်မည်ဖြစ်၏။