Xuan Er Bu Jue (MM translation)

Part 2

အခန်း(၂)ငြင်းခွင့်မရှိတဲ့ တောင်းဆိုမှု

"ငါနားမလည်ဘူး"

၀မ်ဖုန်၏မျက်ခုံးနှစ်ဖက်သည် ထိစပ်လုမတတ်တွန့်ချိူးသွား၏။

"နားမလည်ဘူး။ ရှန်မင်ဖေး ဘာလို့သဘောတူလိုက်တာလဲ။မင်းတို့ငါ့နောက်ကွယ်မှာ ခိုးပြီးအဆင်ပြေနေကြတာလား"

ဟွာယင်း Entertainment ၏ ရွှေအဆင့်မန်နေဂျာတစ်ယောက်ဖြစ်သည့် ၀မ်ဖုန်သည် ကုဖန့်ပွဲဦးထွက်ချိန်မှစ၍သူ့အားတာ၀န်ယူခဲ့သည်မှာ ယခုနှစ်အပါအ၀င်ဆို ဆယ်နှစ်ပင်ရှိခဲ့ပြီဖြစ်၏။ 'ဘုန်းတော်ကြီးဦးခေါင်း မကိုင်ကောင်း' သကဲ့သို့ မည်သူမျှအလွယ်တကူထိပါးခွင့်မရှိသည့် ဟွာယင်း၏ရွှေအဆင့်၀န်ထမ်းသည်ပင် ယနေ့မှာဖြင့် ပထမဆုံးအကြိမ် ကပ်‌ဆိုက်ရပေတော့မည်။

"ဒီလိုကြောက်စရာကောင်းတာကြီးတွေ မပြောစမ်းပါနဲ့ဗျာ" 

အိပ်ရေးမ၀သေးသည့် ကုဖန့်တစ်ယောက် ပြင်းပြင်းထန်ထန်တုန်လှုပ်သွားရကာ ထိတ်လန့်မှုအနည်းအကျဉ်းကိုပင် သည်းမခံနိုင်ဖြစ်နေ၏။

"ဒီနှစ်တွေထဲ ကျွန်တော်သူ့ကိုတွေ့ရုံနဲ့တင် ခေါင်းကိုက်နေရတာ...ဘယ်လိုမျက်နှာနဲ့ သူ့ကိုရင်ဆိုင်ရမလဲတောင်မသိပါဘူးဗျာ"

ရည်းစားဟောင်းတစ်ယောက်အနေနှင့်ဆိုပါက ရှန်မင်ဖေးသည်  အကောင်းတကာ့အကောင်းဆုံးသူတစ်ယောက်ဖြစ်သည့်တိုင် တစ်ချိန်ထဲမှာပင် နောက်တစ်ကြိမ်ထပ်မဆုံချင်တော့သည့် သူမျိုးလည်းဖြစ်၏။

ဤကဲ့သို့ လမ်းခွဲပြီးနောက် ကဏ္ဍအားလုံးမှာကိုယ့်ထက် အစစအရာရာတိုးတက်လာသည့် ရည်းစားဟောင်းမျိုးနှင့် မည်သူကမှထပ်ဆုံချင်မှာမဟုတ်ပေ။

ရှန်မင်ဖေးဆိုသည့်သူဟာ လမ်းခွဲပြီးသည်နှင့် တစ်ပြိုင်နက် ရုပ်ရှင်ဧကရာဇ်ဆုကိုရခဲ့ရုံသာမက တစ်နှစ်မပြည့်ခင်အချိန်၌ပင် သူ့မူလကုမ္ပဏီဖြစ်သည့် ထျန်းယင်း Entertainment နှင့် စာချုပ်ဖျက်ကာ သူ့ကိုယ်ပိုင် ရုပ်ရှင်နှင့်ရုပ်မြင်သံကြားကုမ္ပဏီကိုထူထောင်ခဲ့၏။သူ၏ သက်မွေး၀မ်းကျောင်းအလုပ်သည်ပင် တစ်နေ့တခြားတိုးတက်ကြီးပွားလာကာ အမြင့်ဆုံးအထွတ်အထိပ်သို့ ချက်ချင်းရောက်ရှိသွားခဲ့သည်။