رواية أحن الأماكن لقلبي
Jawhara
الرابع عشر
ـــــــــــــــــ
قهار /
كاعد افكر باللي سويته من يومين وكلامي وية ام وائل وتهديدي الها ولزوجها حتى تسوي اللي اريده وبعدما انطيتهم مبلغ مالي حتى اتاكد مراح يفكرون إلا أن أكون راضي عالراح تسوي ام وائل ،، بعدما اجاني اتصال من جهة اتعامل وياها بعدما وصيت يزودوني بأي معلومة تخص الاسم اللي انطيته وبعد كم يوم اتصل علية موظف بالاحوال الشخصية كال هذا الاسم ضمن قائمة أسماء استخراج بدل ضائع ، نطاني معلومات عن اسم الشخص اللي متكفل بإتمام المعاملة شكرته واني انهي المكالمة ورجعت اتصلت بشخص علاقتي بي جيدة وعدنا تعامل بفترة من الفترات قدمتله مساعدة
قهار بعد السلام وسؤال عن الأحوال بين الطرفين / ابو سند محتاجك بشغلة واريد وكفتك وياية
ابو سند / تبشر يا بوتن وانا حاضر باللي تريدو
حك حاجبه وهو يسند ذراعه على مكتبه / نقيب فاتح ال عزام ابن عمك مو ؟
ابو سند / اي عضيدي وابن عمي وخال الجهال
قهار / تمام ، اريد اعرف شنو علاقته بالبنت اللي اسمها راما جلال ال.. يمشيلها معاملة تخص اصدار بطاقه احوال شخصية
ابو سند ضيك عيونه مستغرب سؤاله / بنت يتيمه حب يساعدها ، بوتن شنو سبب سؤالك هذا ؟!!
قهار بتأكيد وثقة / البنت تخصني تكدر تكول خطبتها من أهلها ، أما مايخص الهوية ترى مابيها داعي يركض بالدوائر لأن هويتها موجودة عندي ، البنت أنهزمت لأن تريد تتصرف بكيفها وهي يتيمة ولزوم نحافظ عليها واني إن شاء الله متعهد لأهلها بس أعثر عليها اتزوجها تعرف يعني من باب هي يتيمة وتحتاج من يسندها لأن عايشة أبيت ابن عمتها وهو بعد متوفي باقي بس زوجته وأطفالها
ابو سند داخ بكلامه لأن اللي حجته عمتهم الحجية يختلف عن كلام قهار بوتن
ابو سند / كفو منك ، وهذا بميزان حسناتك
قهار / اللي اريده مكان البنت اذا تعرفه خاطر تجي ام وائل تشوفها وتحجي وياها تعرف لأن هي اللي جانت عايشة ابيتها
ابو سند / تمام سجل العنوان
بعدما أخذ العنوان وشكره أنهى اتصاله وعيونه بيها بريق غامض ، نهض من مكتبه وهو مقرر يسوي اللي برأسه طلع بسرعة من الشركة بدون ما ينادي الحرس اللي اغلب الوقت يرافقونه
بالطريق لبيت ام وائل اتصل على صادق اللي تأخر عليه / وينك صادق ! ؟
صادق / اني قريب على بيت ام وائل اراقب المكان ، وحدك لو وياك حرس ؟!
قهار وعينه بمراية السيارة / سيارة احمد طلعت وياية ، اكو شي غريب عدهم ، طلعت من بيتها ؟!
أنت تقرأ
أحنٌ ألاماكن لقَلبي
Romanceكل المدن تتساوى إذا دخلناها بتأشيرة حزن ، وكل آلمك يتفجر إذا شكوته لميت وأخبرته ما فعله الاحياء بك ، لذا اتمنى ان لا اتعلق بأحد سوى ألمي .
