كان جالس بالصالة وماسك راسه تعب من التفكير اللي سووه اهله فيه محد يسويه للحين ما تخطى ورغم انه سوا اللي يبونه بس ماقدر يسامحهم وقطعهم
شوي وتذكر كلام زوجته قبل الحادث بدقايق اعتبر كلامي وصيه لك
تنهد بضيق : ليتني اقدر ليتني اقدر ي نورة
نزل من الدرج هو وزوجته وبنته
رند: اي ادري بس مدري احس ودي نطلع شوي نغير جو عمي
سلطان: ان شاءالله يرضى
رند: ان شاءالله وبعد عشان شمس شايف شلون حالتها صايره لا تأكل ولا تشرب حتى الجامعة ماقامت تروح
سلطان: أجلت لها هالفصل لان وضعها مو بعاجبني وشرحت الموضوع ل عميد الجامعة
رند: زين سويت الله يكثر من امثالك ي سلطان
ابتسم لها وشاف ابوه لحاله: مساك الله بالخير يبه
بو سلطان رفع راسه: هلا هلا مساك الله بالنور وشلونك رند
رند: الحمدلله عمي
ترف ركضت لجدها وشالها وهي باست خده
بو سلطان: وشلونها حبيبة جدها
ترف: بحيل"بخير"
رند: اقول عمي
بو سلطان: قولي يبه
رند: م ودك نطلع نغير جو شوي
بو سلطان: لا اطلعوا انتم
ام سالم اللي جتهم ومعها الخدامه ماسكه صينية الشاهي والقهوه: وانت على هالحال من ماتت نوره يعني حتى أنا م مليت عينك ي بو سالم
بو سلطان بحده: انتي آخر من يتكلم طيب
ام سالم: وليه ان شاء الله حلال عليها وحرام علي
بو سلطان: المره تحت التراب وللحين تتكلمين عنها ي مره خلاص عاد
سلطان تنهد : اي يبه وش قررت
بو سلطان وقف: مشينا يبوك وعلم اخوانك يجون
ام سالم: عيالي ما يروحون مكان
بو سلطان: اجلسي انتي وعيالك وابلعوا تراب طيب / وطلع وهو معصب
رند بهمس: روح ل عمي انت وانا بنادي الباقي
سلطان شال ترف: طيب/ وطلع
راحت فوق ودقت باب غرفة شمس: شموس
شمس: ادخلي رنود
دخلت: بنطلع قومي عمي ينتظر تحت
شمس: ماودي والله
رند: اقولك كلنا عمي يبينا البسي عباتك استعجلي
شمس: هففف طيب طيب
طلعت من عندها ودقت على اختها تعلمها وماهي إلا خمس دقايق وكل عيال ام سلطان تحت
ريناد بهمس لاختها: عيال عمتي صيته وين
رند: عمي يبينا حنا بس
هيام: اي احسن والله ان استغفر الله بس ماودي اهرج
ريناد ضحكت: اي احسن خلك ساكته ان تكلمتي جبتي العيد
ضحكت هيام: لبى اللي فاهمني
مشاري: يبه م ودك نعلم سالم وخالد وطيف ووصال
بو سلطان: لا ما يحتاج ماني ناقص بربرة ام سالم
كل واحد ركب سيارته وطلعوا
شمس: يبه وين رايحين
بو سلطان: ل مطعم امك كانت تحبه
شمس: في شي ودك تقوله لنا صح
بو سلطان: اي في
شمس: طيب يبه
قاطعها: ادري تبين تروحين ل فزاع بس نخلص من هالموضوع بجيبه لك ابشري
ابتسمت: يلبى اللي فاهمني
ابتسم لها: لبى قلبك
سعود: يبه يبه يبه يبه
بو سلطان: خيييير وش فيك انت
سعود: شف شف كيف يعاملها وكيف يعاملني يبه أنا ماكل حلالك وانا مدري ولا وش
شمس: يالغييييره
بدر: لا كذا كثيييير ي بو سلطان ترا حنا بعد محتاجين دلع
ضحك: ابشروا
_________
في الديرة
وصل بو فارس وزوجته ووليد وخواتهم الهنوف وأمل
بو فايز: يالله انك تحيهم ارحب ارحب ي بو فارس ماعليك باس يأهلا
بو فارس: البقى ي بو فايز البقى يخوي وشلونك
بو فايز: بصحة وعافيه الحمدلله
الجد بو مترك: يأهلا بولدي
راح وباس راس ابوه: وشلونك يبو مترك عساك بخير
الجدة صدت عنه
ضحك بو فايز: ي بو فارس الوالده قبل الوالد لا تنسى
بو فارس ضحك وباس راس امه: السموحه ي ام مترك حقك علينا
الجد: ابك ي مرة الأبو قبل
الجدة: لا قالوا امك ثم امك ثم امك ثم أباك يلا هش
ام فارس ضحكت: وهي صادقة
وبعد السلام والسؤال عن الحال جلسوا الحريم بالصاله والرجال ف الحوش
______
بيت الجد بو محمد
ام تركي: سلمى يمه اخوك م وصل للحين
سلمى: لا يمه للحين م وصل
ام تركي ضربت كفوفها ببعض
الجدة ام محمد: هذا يوم انك تخلينه يسوي اللي يبيه قلت لك امسكي ولدك ي مره
ام تركي: يمه يا حبيبتي ترا رجال طول وعرض تبيني امسكه واخليه يجلس ف البيت
الجدة: اي امسكيه وخليه ف البيت
سلمى بفرح: وصل وصل
الجد بعصبية: وينك م تستحي انت مخلي امك تحاتي
تركي باس راسه: السموحه يبوي حقك علي والسموحه ي يمه
ام تركي: وينك ي يمه ابطيت
تركي بهمس لامه: عند فارس حفيد بو مترك
شهقت
الجدة: وش فيك
ام تركي :لا يمه صرصور مر من قدامي خرشني /ودزت ولدها وبهمس: امش امش لا بارك الله فيك من ولد /ودخلوا
سلمى: تريك وش عندك بيت عمي بو مترك انت تدري لو جدي درا وش بيصير
تركي: ادري بس اللي للحين عجزت افهمه خالي مو تزوج بنت صديقه وصار عندهم عيال
ام تركي: اي
تركي: كم سنه مرت ليه مخاصمين بعض للحين
ام تركي: مدري بس ي يمه طلبتك تكفى لا عاد تروح والله ان درا جدك بيوقف قلبه
تركي: تطمني ما بيوقف وغير كذا ام فارس تسلم عليك وتسأل عنك انتي وبنتك
ام تركي: يحليلها والله ليتني اقدر اروح
سلمى ابتسمت: وش رايك اروح أنا
ام تركي ضربتها بكتفها: اهجدي اقول
سلمى مسحت ع كتفها: احح يعور ترا وبعدين الصدق ينقال جدي ماله حق يزعل من عمي بو مترك والله انه يحليله ما سوا شي حشى اكثر من مدري كم سنه وعشان انه بس زوجه يزعل كل هالزعل امحق
ام تركي قرصتها: بنت تراك تتكلمين عن ابوي اللي يكون جدك احترمي شوي
تركي: وبعدين تعرفين شيبان اول اي شي ما يرضيهم يزعلون ولا ينسون
سلمى بزلة لسان: ليت جدي بو مترك وش زينه ولا يعرف الزعل والجلسة معه تونس
ناظرتها ام تركي بصدمه: تجلسين عنده ايا اللي م تستحين
بلعت ريقها: لا وين يمه اصبري اممم بقولك/ وتنحاش
تركي: اييي يمه وانكشف المستور كلنا نزورهم ومخبين ع بعض
ضحكت: اي والله وانت صادق الله يهدأه ابوي بعد يلا يمه رح نام ومره ثانيه علمني ان بغيت تروح لا تخليني احاتي ولا تخليني اسمع كلام يضيق الخلق
باس راسها: ابشري يمه / وراح
_______
أما عند بو سلطان وعياله
وصلوا المطعم اللي كانت امهم تحبه ودايم يروحوله
بو سلطان: ي عيالي أمكم تركت وصيه وكأنها حاسه انها بتروح وتتركنا
سلمان: وش هي يبوي
بو سلطان شبك يدينه ونزل راسه وتنهد: مثل م كلكم تدرون وش اللي عانيناه أنا وأمكم من زمان من جدكم
سلطان: ندري يبوي وصارت قطاعه من فتره
بو سلطان: اي يبوك أمكم طلبت اني اروح الديرة وأعدل الأوضاع وننهي القطاعه
مشاري: نروح يبوي ليش لا والصدق طولت القطاعه امي معها حق
شمس مسحت دمعتها اللي نزلت: نروح يبه اليوم قبل باكر
سعود وبدر: نروح احنا
سلمان وسلطان: وحنا بعد
ابتسم ل عياله ومسح دمعته بطرف شماغه
شمس ضحكت بوسط دموعها: بو سلطان التاجر يبكي افا
ضحك وضحكوا عياله
________
صباح اليوم الثاني
الكل كان جاهز ونزلوا تحت
وما يحتاج نقول لما درت ام سالم انهم رايحين الديرة بدون علمها وش سوت
ام سالم بعصبية: وليه ان شاء الله لا يكون أنا وعيالي مو مالين عينك ي محمد تروح وتتركنا هنا من يومك ما تشوفنا شي بحياتك ماتت نورة ولا فكرت فيني ولا تطمنت عن صحتي هذا انت من يومك ما بتتغير ولا رح تتغير
مسك راسه من كثرة كلامها وبصوت هادي يعكس الغضب اللي بداخله: روحي اجهزي انتي وعيالك ننتظركم احنا
ام سالم: غصبن عليك بتنتظر وغير كذا بنتك مابيها معنا بالسيارة السيارة يالله منها تكفيني أنا وبناتي
شمس: تطمني ما يشرفني اكون معك بنفس السيارة اللي يحفظ اخواني مهم مقصرين معي تقلعي انتي وبناتك
ام سالم: شايف شلون تكلمني ي محمد يرضيك
بو سلطان بصراخ: اسسسكتتتيييي واذلفييي اججههزززييي خخللااااصصص عععاااددد
بلعت ريقها وراحت فوق تجهز
بو سلطان التفت ل شمس: وانتي ي شمس احترمي زوجة ابوك وتبقى بحسبة امك
شمس: تخسى وتعقب تكون بحسبة امي هذا اللي ناقص/ وطلعت عنهم
هز راسه بيأس من مشاكل بنته وزوجته
خالد: ماعليه يبه اصبر عليهم فتره وتعدي
سالم: لا يغرك كلامهم تراهم مثل الام وبنتها بيهدوا وبترجع الأمور ل مجراها
طيف: يبه احنا جاهزين ترا
بو سلطان: امك ووصال جهزوا
وصال نزلت: جاهزين
بو سلطان: شيخه زوجتك خلصت ولا باقي
سالم بصوت عالي: شششييييخخخخهههه
شيخه وهي نازله وتسحب شنطتها الكبيرة: ساعدني بدل الصراخ
مسك راسه: وشوله كل هالأغراض كل ابوها خميس جمعه والسبت راجعين
شيخه: حتى ولو
وبعد صراخ وهواش وضرابه كلن ركب سيارته واتجهوا للديرة
ف سيارة سلمان:
سلمان كان ماسك ايد ريناد ويبتسم لها
ريناد بحيا: سلمان انتبه للطريق
سلمان باس ايدها: من عيوني
ريناد: اقول سلمان
سلمان: قولي جعل م يقول غيرك
ريناد: بس عشان اكون فاهمه الموضوع عدل من اللي قطع الثاني جدك او عمي
تنهد: ابوي قطع جدي لما جبره يتزوج صيته أصلا وقتها قاله إذا خذيتها ماني جايكم
ريناد: ايييي
سلمان: خليها على الله ان شاء الله جدي يسامح ابوي ع هالقطاعه
ريناد: ان شاء الله
رهف: بابا
سلمان: ها ابوي انتي لبيه ياروح ابوك
رهف ضحكت
ريناد: ياحبها لك مناشبتني فيك
مسك ايدها وبأسها: تغارين ياقلبي
ريناد: اي أغار
ضحك
________
في سيارة سعود كان معه بدر وشمس
شمس: ي جماعة تهقون جدي يسامح ابوي
بدر: نقول ان شاء الله
سعود: الله يهدأه ابوي بعد يعني تروح وتتزوج وتقطع ليه
بدر: بس لا تنسوا ان تزوجها غصبن عليه يعني عشان امي اللي طلبت منه مو عشان كلام جدي
شمس: الله يعين بس الجانب الحلو اني متحمسه صراحه ل الديرة واجوائها
سعود: اييي خير ان شاءالله محد يدري وش ممكن يصير
بدر: إلا انتي ماعندك جامعه
شمس: لا سلطون اجل لي هالفصل والصدق مالي خلق ادرس ولا لي خلق ل شوفة الجامعة
_______
وصلوا الديرة
ام سالم: عساك تذكر بيت اهلك ي بو سالم
بو سلطان: اذكره
طيف ابتسمت: كل هالسنين ما نسيته
ابتسم لها: محدن ينسى بيت اهله لو مر دهر ي بنتي
اتجه ل بيت ابوه ووقف سيارته وعياله وقفوا وراه
نزل ونزلوا عياله الشباب
سلطان: ها ابوي ندخل
بو سلطان شد ع ايده: ندخل / ودق الباب
طلع تركي اللي بحياته ماشاف خاله بس يعرف ان له خال
بو سلطان: سلام عليكم
تركي: عليكم السلام يا هلا
بو سلطان: بيت بو محمد
تركي: وصلت حياك الله
بو سلطان ابتسم: يحييك ويبقيك بس عندنا حريم يبوك
تركي: أنادي الوالده الحين حياكم /وراح ينادي امه
دخل بو سلطان وعياله
وجت ام تركي مغطيه وجهها بس انصدمت لما شافت اخوها وبعدت الغطا عن وجهها وبصدمه: محمد
ناظرها: نهله
ضمته بقوه ودموعها نزلت: هلا ب اخوي هلا بالعين ونظرها هلا ابوي انت
باس راسها: هلابك يقلب اخوك انتي وشلونك عساك طيبه
تركي كان واقف مصدوم
ام تركي: بخير يبوي انت بخير وينك يخوي وينك ماصرت تجينا
بو سلطان: حقك علي يخيتي حقك علي
ام تركي مسحت دموعها : اقلطوا اقلطوا
بو سلطان: سلمان ناد عمتك وخواتك
سلمان: ابشر/ وطلع يناديهم
بو سلطان : ابوي وامي موجودين
ام تركي: موجودين حياك ادخل
دخلوا بو سلطان وزوجته وعياله وحريم عياله
ام تركي: يممههه ييبببههه
الجدة: وش عندك ي بنت ترا نسمع
ام تركي: جا محمد يمه جا محمد
شهقت: وش تقولي
ام تركي: والله ي يمه جا اخوي
الجد: وش جابه بعد هالسنين
بو سلطان: سلام عليكم
الجد: وش جايبك جاي تشوف متنا ولا باقي
باس راسه: الله يعطيكم طولة العمر
الجده: وينك ي يمه وينك قطعت اهلك عشان اللي ما تتسمى
بو سلطان بحزن: يمه طلبتك طلبتك لا تتكلمين عنها
الجد: طبعا ما ترضى بس ترضى تقطع اهلك
بو سلطان: عطتكم عمرها ي يبه
انصدموا
الجد بلع ريقه: من متى
بو سلطان: من شهور يبوي
الجده: أنا لله وانا اليه راجعوا الله يرحمها
بو سلطان:هذيلا عيالي يبوي منهم المتزوج وعنده عيال ومنهم يدرس ومنهم يشتغل
ام سالم باست راس الجد: عرفتني ي عمي
الجد: وشلون م أعرفك وانتي بنت الغالي
بدوا العيال يعرفوا عن انفسهم للجد وبعدها الحريم دخلوا الصاله
سلمى سحبت بنات خالها: ما تصدقون وش كثر فرحانه ان لي بنات خال ي ناس وش ذا طفشت بنت لحالي
طيف ضحكت: يحليلك والله
سلمى: والله يا انها بتصير فعاليات دامكم جيتوا
رند بهمس ل ريناد: حبيتها ترا
ريناد بنفس الهمس: حتنا
سلمى: إلا انتم خوات
ريناد: حنا
سلمى: اي
ريناد: أنا ورند خوات
سلمى: تشبهون بعض مره
رند: وماخذين اخوان توأم
سلمى: ي عمييي حركااتتت
هيام: وماعندك خوات ي سلمى
سلمى بوزت: لا امي م جابت إلا أنا وتريك وابوي توفى من زمان
شمس: الله يرحمه
سلمى: امين ويرحم امك
الكل: امين
سلمى: عاد أقولكم بس م تضحكوا علي
شمس: قولي
سلمى: خالتي صيته أنا قد شفتها من فتره بس م توقعت انها زوجة خالي
وصال توترت امها كانت تجي الديرة بس بدون ما تقول لاحد: اظن مشبهه عليها يمكن وحده من خالاتي
سلمى: لا يبعدي أنا م اشبه أنا متأكده وغير كذا ترا أنا هنا نقالة علوم الديرة ما يطوفني شي ف إذا قلت هي يعني هي
شمس: غريبه اللي اعرفه ان امهم م تجي هي بعد قطعت اهلها مو كذا ي وصال
وصال بتوتر: اي اي
سلمى ناظرتها ب استغراب: غريبه حتى انتي احسني شفتك
وصال: مشبه علي وعلى امي بعد
سلمى شكت بنفسها: يمكن مايندرى
________
بو سلطان: يبه تسامحني
الجد : ان كاني بسامحك ف بسامحك عشان المرحومه اللي تركت وصية وعشان عيالك اللي مالهم ذنب مهو بعشانك يعني
باس راسه
الجد: بسبتك صارت قطعه بيني وبين بو مترك
بو سلطان: بصلح الوضع وترجع علاقتكم أقوى من قبل
الجد: خير ان شاءالله قم ي تركي واعزم اهل الديرة علمهم ان محمد رجع ل ديرة اهله
تركي قام: ابشر بس اعزم بو مترك
بو سلطان ناظر ابوه بترجي
تنهد: أعزمه أعزمه
ابتسم له
الجد شمقه
بو سلطان تنهد
مشاري: اصبر جاي عندك
تركي: حياك / وطلعوا
الجد: للحين قلبي شايلن عليك شيل لا تحسبني اصفحت وعفيت
بو سلطان: يبوي ماودي اقول وش سويت فيني عشان خليتني اقطع
الجد بعصبية: أبوك أنا لو اقول أكل تبن تقول ابشر
تنهد: ابشر
سلطان: بس يا جدي
بو سلطان ناظره بنظره خلته يسكت
______
ف الديرة
كان مشاري وتركي يمشوا ويعزموا الناس
وصلوا ل بيت الجد بو مترك
تنهد ووقف فتره
مشاري: بيت من هذا
تركي ناظره: بيت الجد بو مترك اللي راح وزوج امك لأبوك
مشاري: زين ما سوى الصدق وين بيلقى ابوي احسن من المرحومه يلا دق
دق تركي وانفتح الباب
تركي: هلا فويرس
فارس: يولد وش جايبك ف عز النهار انت تدري لو جدك درا وش بيصير
تركي: يدري م عليك
شهق: قول والله
تركي:والله والله وحتى عازمك انت واهلك كلهم خالي محمد رجع
فارس: اسألك بالله
مشاري ضحك: رجع وانا ولده امش علم اهلك وتعالوا للعشا
فارس من فرحته قفل الباب بوجههم ودخل يعلم اهله
تركي بصراخ: اياللي م تستحي
ضحك مشاري
تركي : امش انت الثاني م غير تضحك
________
الليل
والكل مجتمع بيت الجد بو محمد
ف المطبخ البنات والحريم بالصاله والرجال منقسمين اللي بالمجلس واللي بالحوش
شمس: اقول سلموه
سلمى: قولي
شمس اشرت على وحده جالسه جنب وصال: من هذي
سلمى: ايييي بنت خالتها هذي
شمس ب استغراب: اول مره أشوفها
سلمتي تعرفيهم
شمس: اي امها المصون م غير تزوج بناتها وعيالها لهم
ام تركي دخلت: وين العشا ي بنات اخلصوا
شمس شالت الصينيه: جيت عمتي جيت/ واخذتها داخل
الجدة ام محمد: زين بتجي ي ام مترك
ام مترك: تقلعي بس مهو بعشانك والله جيت عشان وليدي المسكين اللي راحت زوجته بسببكم
ام محمد: يمره صلي ع النبي وشوله هالكلام الحين
ام مترك: خلني ساكته احسن
وجت شمس وحطت الصينيه قدامهم
ومر اليوم بدون اي احداث تذكر
_______
قامت من نومها وكان فجر ومحد قام بعد طلعت الحوش يازين جو الفجر بااارد منعش خذت لها نفس طوييييل شوي وسمعت صوت وانحاشت داخل وبعدها قررت انها ترجع تكمل نومها
الساعه ٦:٣٠
كانت سلمى بالمطبخ تسوي الفطور وامها تسوي القهوه
سلمى: اقول يمه اروح اصحي شمس
ام تركي: مدري وانا امك يمكن مهي بحلوه
ويسمعوا صراخ
سلمى تركت اللي ب ايدها وراحت داخل
كانت ام سالم تصرخ على شمس عشان تقوم
وشمس تتمدد ولا هامها
كتمت ضحكتها ورجعت لامها
ام سالم: قووووممميييي اااقققوووولللل
شمس بصوت مليان نوم: قمت قمت
دخلت طيف: يمه وش هالصراخ اتركي البنت بحالها
شمس قامت: مالت عليك م تخلين احد ينام/ ودخلت الحمام أكرمكم الله
ام سالم ناظرت طيف بحده: لا تتدخلي انتي فاهمه
________
اما في بيت الجد بو مترك
فارس: يبه بروح المزرعه اتطمن عن الخيول والصقور
بو فارس: روح يبوي
وليد: اصبر بجي معك
فارس: انتظرك
الهنوف: م ودكم تأخذوني معكم
أمل: وانا بعد
ام فارس: اصبروا اقول عمي والله ان جتني فكره وش زينها
الجد: قولي
ام فارس: دام الأوضاع هدت بينك وبين عمي بو محمد وتعشينا عندهم البارحه واستانسنا
الجدة قاطعتها: اخلصي
ضحكت: ابشري وش رأيكم نعزمهم ع الغدا ف المزرعة
الجدة: فكرتن زينه وش رايك ي بو مترك
الجد: ماعندي مانع علمهم ي بو مترك
فارس: تبشر على هالخشم
الجد: عليه الشحم
طلع فارس وراح لبيت الجد عبدالله يعلمهم عن العزيمه وبعدها راح هو ووليد المزرعه
_____
وليد: يزين هالصقر م ودك تبيعه
فارس: موب لي لو الود ودي بعته من زمان
وليد: لمن اجل
فارس: مدري عطاني إياه سطام يقول الصقور عنده ماتوا وهالصقر غالي بالحيل
وليد طلع الخيل من الإسطبل: اقول فريرس وش صار ع المسابقه اللي كنت بتدخل فيها
فارس: الأسبوع الجاي يخوك وانا أتحسبها هالاسبوع
وليد: ايييي اجل وش رايك نتسابق
فارس: ماعندي مانع/ وراح يجيب خيله
_______
وصلوا العيلتين ل المزرعه
الهنوف: سلموووههه
سلمى: هنووووو/ وضموا بعض
الهنوف: واخيرا ي شيخه بيتسامحوا تعبت أشوفك بالسر
ضحكت: اي والله اسمعي تعالي أعرفك على بنات خالي
الهنوف: وينهم حركات عندك بنات خال
سلمى: من قدي يشيخه هذي شمس وهذي طيف وهذي وصال
الهنوف سلمت عليهم: تشرفت وانا الهنوف وهذي اختي أمل
أمل: يا هلا فيكم
شوي وسمعت صهيل
شمس: عندكم خيول
أمل: وصقور بعد تعالي
راحت عندها
أمل: المزرعه هذي ل اخوي فارس الصدق هو مو صقّار بس الناس تحط صقورها عنده لكنه خيال ويشارك ف مسابقات وكذا
شمس: اهااا يشيخه ع طاري الصقور يا اني اشتقت ل ورعي من زمان ما شفته
امل: وصلنا / واشرت لها: هنا الصقور وهناك الخيول
شمس راحت عند الصقور
امل: بنت اسمعي خذي راحتك محد هنا أنا شويات واجي
شمس: طيب/ وراحت امل
ناظرت الصقور ولمحت واحد مميز عن الباقي شوي وفتحت عيونها على وسعها: فززااااعع
____
وليد :تكفى دخله انت
فارس: بداخله رح مالت عليك
ضحك وراح داخل
دخل الخيول الإسطبلات وطلع شوي ولمح احد واقف استغرب من اللي واقفه وماسكة الصقر
كانت ماسكه صقرها فزاع ودموعها تنزل مسحت عليه وبدون شعور قالت
ياليت عندي جناحين وأطير
ولا أدوس الأرض وانتي تحتها
فارس: صح لسانك ي بنت ابوك لكن وش عندك ماسكتن هالصقر اتركيه
التفتت له: صح بدنك لا صار لك وقتها اهرج ي ولد الديرة/ ومشت ومعها صقرها
________
تسريب البارت الرابع
رمت الصحن بقوه وبصراخ: خلاااااصصصص اااسسسككتتتييييي يكككففييييي الله يييلللعععنننككك وووشش تتتبببيييي مممننيييي اننتتتييي وووشششش ما عندك ضمييييررر مااااتتتعععبببتتتيييي واانننتتتييي تتتكلللمممييييي عععلييييهههاااا
: خلاص تكفين اهدي اهدي
: ااككرررهههكككك لييييتتتكككك تتتممموووتتتتييي الله يييلللعععنننككككك
مسكت بطنها بقوه وبكت
.
.
.
نوقف هنا
رأيكم وتوقعاتكم
الكاتبـة شيهانة🦅✍🏻
