Isang hapon, habang naglalakad tayo,
hawak hawak mo yung rosas na ibinigay ko sa'yo
nung tinanong mo ako kung bakit.
Kung bakit ko ito ginagawa.
Natawa ako at biniro ka pa na gusto kitang
maging hardinera kaya kita bingyan ng
isang pulang rosas na tinabasan ng tinik
Ngunit hindi mo yata nakuha ang biro
O hindi mo pa rin naiintindihan
Dahan-dahan lumabas sa iyong mga labi
ang mga salitang hindi ko akalaing maririnig ko galing sa'yo
Binulong mo sa'kin na natatakot ka
Natatakot ka na baka kunin ko ang iyong puso
Na kapag hawak ko na ay walang awa kong dudurugin,
Aapakan, paglalaruan at kapag nagsawa na
Saka ko iiwan.
Kumunot ang aking noo, napapikit at humingang malalim
Naiinis ako. Naiinis ako kasi...
Naiinis ako kasi nadadayaan ako.
Kasi nung unang beses mong sinabi
sa'kin kung ano ang iyong paboritong libro
hiniwa ko na ang aking dibdib
Nung una mong sinabi na delubyo ang buhay mo
Ibinuka ko na ang aking dibdib
Nung tinuloy mo pa ang iyong pangungusap
nung ipinagpatuloy mo pa ang pagsusulat sa akin
ng mga linya ng titik na bumuo ng mga salita
na ibinuhat ako sa langit
Kinuha ko ang aking puso at inabot sa'yo.
Heto sabi ko, kunin mo ang aking puso
Heto ibinibigay ko sa'yo. Ikaw na ang bahala
gawin mo ang gusto mo, durugin mo,
apakan mo, paglaruan mo,
o... patibukin mo gaya ng pagpapatibok mo sa iyong puso
Pero ikaw...natatakot ka na baka kunin ko ang iyong puso
Samantala ang puso ko, inaabot ko na sa'yo
Pero di mo man hinahawakan, hinahayaan mong nakatiwang-wang, natutuyo
Sinagot mo ako. Sabi mo, paano ka magmamahal kung
sarili mo di mo kayang mahalin
Natawa ako kasi ako nga nagawang mahalin ka.
Hindi ba't sumagi sa isip mo na baka kailangang
may magmahal muna sa'yo para lalo mong maintindihan
na kung yung iba, kaya kang mahalin bakit ikaw pinipigilan mo
ang sariling mong puso sa pagtibok.
Heto ibinibigay ko na ang puso ko.
Ikaw na ang bahala.
Baka sa pusong iyan matutunan mo na hindi delubyo ang buhay mo
kung hindi isang malawak na dagat
punong-puno ng bagay na kamangha-mangha
kahit minsa'y malupit
Heto ibinibigay ko na ang puso ko.
Para di ka na matakot kung kunin ko man ang puso mo, para patibukin.
BINABASA MO ANG
Oxford Comma
RandomThis is a collection of some weird stories that popped into my mind or some thoughts that just beg me to write it. Some can be in Tagalog or in English. I hope you could enjoy! :)
