قــــوة الضمائــــــر ... طارق اللبيب

5

بعد الزول فات .. وجدو دخل البيت..  امو قالت ليهو ده منو ياجدو؟.. قال ليها ده الامين .. قامت ملكة سمعتو .. قالت اعوذ بالله .. ودي اول كلمة تقولا مركبة تركيب بطريقة صحيحة .. امها قالت ليها صدقتي والله يابتي .. اعوذ بالله .. لكن ماشاء الله الكلمة دي جبتيها زي ماهي ..
اها ستو قالت لي جدو تعال وراي ..
وكت دخل معاها المطبخ .. قالت ليهو عشان ملكة ماتسمعنا ..
ده جا ليشنو ؟ .. قال ليها  جاء عشان يعمل لينا تخويف .. وقال لي فضل اسبوع من المواعيد ..
وقال عندو شاهدين بحلفو على انو ابوي استلم منو 15 مليون .. قالت ليهو كدي اليجي الاسبوع..  يحلها حلال العقد ..
وشغالة في شغلتها .. وشغالة بتوفر في القروش ..
يوم من الايام دي ستو حست انها متضايقة وحزينة ..وفاقدة الخير وشايفة الدنيا دي مسيخة مسيخة .. قالت استغفر الله العظيم .. وقامت  مشت تفتش لي للمصحف بتاعها..
عشان تقرا ليها قران يخفف عليها شوية..  مالقت المصحف .. قدر ما فتشت نهائي مالقتو .. مع انو الصباح كان بتقرا فيهو ..
لي حكمة يعلمها الله ..
دخلت الغرفة بتاعتها هي وزوجها الله يرحمو..  وجرت السرير على الدولاب .. ونزلت المصحف حق الخير..  من راس الولاب ..
ونفضته كدا بيدها .. من ذرات الغبار..  العالقة على غلاف المصحف ونفختو ..
و قعدت في السرير .. وفتحت المصحف .. كانت بتحب سورة الكهف لانو الخير كان بقراهو كتير ..
فتحت سورة الكهف..  لقت في ورقة مطبقة مختوتة في نص المصحف .. بالتحديد بين الصفحتين 293 - 294 .. نهاية الاسراء وبداية الكهف .. طلعت الورقة..  وقفلت المصحف براااحة كدا .. وختتو جنبها في السرير..  وفتحت الورقة ..
لقت فيها الحسابات بتاعة الخير .. واستلافاتو من الامين ومصطفى ومن واحد اسمو صلاح خليل .. سبحان الله .. لاصلاح لامصطفى مافي زول ظهر قال عايز حقي ..
والحسابات بتاعة الامين .. كانت فعلا 15 مليون .. شالا منو على تلاتة مراحل .. مرة شال 6 ومرة 4 ومرة 5 ..
وسدد منهن 4 مليون في ستة شهور .. سبحان الله .. الكلام كلو مفصل .. يعني فعلا الامين طالب من الخير ال11 مليون .. وبرضو الخيرمتدين من مصطفى 2 .. ومتدين من واحد اسمو صلاح خليل مليون واربعمية ..
نادت جدو قالت ليهو تعال شوف .. وادتو الورقة وقرا الموضوع .. قال ليها اسمعي يا امي .. معناها الزول ده كلامو صح .. وياها القروش الدايرها من ابوي .. لكن نحن الورقة دي المفروض هسي مانطلعها..
لاننا لو طلعناها .. القاضي حيحكم علينا ببيع البيت ..
قالت ليهو ياخوي الحق حق .. حتى لو بعنا البيت..  وبي باقي قروشنا نشتري لينا قطعة ..نعمل فيها راكوبة ان شا الله .. لكن مابننكر حق الناس .. ربنا ينجينا من حق الحرام ياولدي ..
قال ليها انا ماقلت ليك ننكرها ..بس على الاقل مانعترف بالموضوع ده هسي في الوقت الراهن .. ولمن تتوفر عندنا القروش .. نحن نديها ليهو .. ونكون سددنا ديونا وما ضايقنا روحنا ..
قالت ليهو الفيها خير ربنا يسويها ..كدي النصبر ..
جدو وامو بتكلمو مع بعض..  كدا سمعو صوت ملكة .. قالت ليها امي تعالي شوفي ..الاتنين نططو عيونهم .. قالت ليهو دي ملكة؟؟
قال ليها ايوة ياهو صوتها .. والله قالت (امي تعالي شوفي) ..
وقامو جارين الاتنين على الاوضة الراقدة فيها ملكة .. لقوها واقفة وماسكة في الحيطة..  بيدينها الاتنين .. يعني متكلة علي الحيطة كدا وبتمشي بالحطة .. وقالت لامها انا يا امي قمت براي .. قالت ليها ماشاء الله يا ملكة..  كمان لسانك طلق كلو كلو ..
فجأة كدا ملكة قعدت في السرير..  وقعدت تبكي .. وقالت لي امها انا مشتاقة لابوي يا امي ..انا مشتاقة لابوي .. ابوي الحصل ليهو شنو؟ ياجدو؟؟ ابوي وين ؟؟
قالت ليها هسي انتي ياملكة .. ارتاحي شوية .. بعدين انا بقول ليك .. ابوكي ربنا اصطفاهو .. وايامو كملت في الدنيا .. كل حي مصيرو الزوال يابتي ..
قالت ليها بس انا ماعارفة الحصل بعد داك شنو؟.. احكي ليك يا امي الحصل علينا؟؟
قالت ليها اخدي ليك رقدة ياملكة..  وبعدين احكي لي .. وجدو يعاين لي اخته ويتبسم ومدمع من الفرحة .. وماقدر يتكلم طلع برة بكي بكي .. وقش وشو عشان يخفي اثار البكا..  الحركة دي عند امه .. كل ماتبكي سريع بتقش دموعة بي طرف توبها..  وتخاف من زول يشوفها بتبكي .. المهم   ستو مشت تابعت العمل طول النهار..  المراة دي ماشاء الله لابترقد ولا بترتاح ..
وملكة قعدت تقرا .. في ايات من راسها ..وتتحصن..  بعد شوية بقت بتقول في اسماء ناس .. زميلاتها وبنات الجيران. وشغالة تقول هويدا؟؟.. اي هويدا ..  نانسي . مودة .. كوثر..  هالة.. بهجة . سهير . وو ..
وكت تلقى روحها جابت الاسم صح..  تاخد ليها بسمة وتهز راسها ..
ولسع الكولة الملبسنها ليها في رقبتها..  ما طلعتها .. قالو بتطلعها بعد تلاتة شهور ..
العصرية كدا..  الحبشية جات جابت القروش بتاعة الكسرة ..  وجدو طلع مشى لي حمودي ..
وستو جات قعدت مع ملكة .. وملكة بدت تتكلم وتحكي لي امها .. مع انو كلامها مامرتب مية المية .. لكن مفهوم جدا ..
قالت ليها انا وابوي ركبنا الحافلة .. وابوي كان بتونس معاي .. بقول لي انتي متذكرة بنات عمتك ديل ؟ قلت ليهو ايوة..  انا صغيرة لمن جينا الخرطوم هنا..  زمان متذكراهم .. لكن هسي ناسية اشكالهم .. وطبعا بكونن كبرن ..
بس الاولاد ما متذكراهم .. قال لي خلاص الليلة بتشوفيهم .. وبقى يتكلم معاي عن عثمان .. ومشاكلو الكانت مع عمتي خديجة .. وانو هسي الحمد لله اتفاهمو وبقو رايقين وحلوين
وبيتهم كله سعادة ح تصلي وح تشوفيهم ..
وانا كنت متشوقة لمتين اصل عشان اشوفهم واتونس معاهم .. لاني مشتاقة لاي زول ببقالي ..
اها ابوي طلع تلفونو..  وبقى يتكلم مع الامين .. وانا وكت عرفتو بتكلم مع الامين اتضايقت وجاتني غمة وخوفة .. ونحن فوق كبري شمبات .. قصاد نص الموية انا كنت بعاين للبحر .. وابوي بتكلم
بس حسيت ليك بالحافلة دي لفت جاي ولفت جاي .. وتاني زي الفي زول شالا وجدعها .. وحسيت باحساس زي المرجحانية .. وحسيت بانو ابوي مسكني عليهو ..بعدها حسيت بي ضربة قوية في راسي
وحسيت كانو مخي مرق بي نخرتي ..
بس تاني ماعارفة الحصل شنو..  لقيت نفسي مافي .. اول يوم اصحى من الدوخة لقيتك انتي بتبكي .. وماقدرت اسألك اقول ليك انتي مالك؟ .. ولقيت نفسي مابقدر اقوم .. ومابقدر اتكلم .. وكل يوم كان نفسي اشوف ابوي..  بس مابلقاهو معاكم في البيت ..
وعيونا اتملن ووقفت من الكلام..  وبدت تبكي .. انا يا امي عرفت انو ابوي وقعت بيهو الحافلة .. انا ليه  ما موته؟؟ .. انا عايشة لشنو تاني بعد ابوي ؟  يا ريتني لو مته انا..  وابوي عاش ...
ستو قالت ليها استغفري الله العظيم يابتي .. ده حكم ربنا مابنقول فيهو كلام ..
قالت ليها يا امي الحصل شنو؟ انا لمن كنت مغيبة من الوعي الحصل شنو؟ .. قالت ليها الحصل كتير يابتي ..
الحصل ينكتب في رواية ويحكوهو للناس ..  قالت ليها ابوي لقيتوهو وين ؟؟ واتلقى ولا ما اتلقى؟؟ قالت ليها ابوك اتلقى .. والحمد لله مات احسن موتة ..وعلى حسن الخاتمة .. مصلي الصبح وقاري القران ..  ومات سعيد ومبسوط
ونحن راضين منو وبنحبو كلنا .. ماقصر فينا .. حياتو معانا كانت زي ايام الربيع .. قصيرة وجميلة وسعيدة ..
خلاص يا الملكة النقوم اشوف الحاصل شنو؟..  قالت ليها انتي يا امي ليه بتعوسي كتير كدا .. قالت ليها اصبري كلو بتعرفيهو..  لمن تقومي علي حيلك تساعديني ..
اها يازول جدو لمن مشى لناس حمودي..  لاقى معتصم اخوهو داك الشغال في الامن ..معتصم كان بلبس طالع  قال ليهو اها ياجدو..  كيفك وكيف ناس البيت؟؟
والله انا كل يوم اقول اجي غاشيكم واشوف اخباركم لكن زي ماعارف شغلي مافي يدي ..
جدو بدا يحكي ليهو في قصة الامين .. معتصم بعد ماكان طالع قلع جزمتو وقعد .. وانتبه للقصة شديد.. جدو حكى ليهو اي حاجة..  بس ماحكا ليهو انو لقو ورقة في نص المصحف .. مكتوب فيها تفاصيل الديون وكدا .. ماعارف جدو فهمو شنو ..
معتصم قال ليهو والله ماكنت بفتكر انو في مخلوقات بالشكل ده في البلد دي .. لكن اقول ليك كلام .. والله الزول ده بكون استأجر ليهو شهود زور .. اصلا بقو اليومين ديل شغالين الشغلة دي .. الشهادة بي ميتين وخمسين .. الواحد يحلف فوق المصحف بي ميتين وخمسين عليك الله دي حالة دي .. والله انا بقول المفروض الشهود يكونو بمواصفات خاصة ويخضعوا لقوانين صارمة .. لانو ديل انتفت فيهم صفة العدالة .. وبقت تضيع حقوق كتيرة بسبب شهادات الزور
.. لكن انا بوعدك ح اتابع معاك القضية دي .. بي طريقة انت ذاتك تحتار فيها ..  بعدين انتو تبيعو بيتكم ليه ؟ انت ناسي حاجة مهمة جدا يا جدو..
انت ناسي نحن عملنا ملف عن الحادث .. وفيهو التقرير الطبي ؟
الكلام ده فيهو دية ح تطلع من شركة التأمين المؤمنة على الحافلة
يعني ح تجيكم قروش تسدد الدين ويكون فيها باقي ..
قال ليهو بس المشكلة في الوكت .. الزول ده ما اير يدينا فرصة .. نحن الزول ده لو ادانا فرصة
برانا بنسدد ليهو القروش بتاعتو .. لانو هو فعلا عايز قروش من ابوي .. والكلام ده قالو لي عم مصطفى ..
معتصم قال ليهو انا احتمال ينقلوني كادوقلي .. لكن والله لو بقيت قاعد في البلد دي اجهجهو ليك جهجهة الزول ده لامن يعرف حاجة ..
لكن انا حتى لو مشيت بوصي ليهو الزملا .. ويقومو بالللازم ماتشيل هم ..
المهم يازول مرت الايام والشهر انتهي .. ويوم من الصباح جاهم معلن من المحكمة .. شايل ورقة باسم اسرة المرحوم الخير يوسف
بتكليف ممثل الاسرة بالحضور في المحكمة يوم الاحد ..
الى اللقاء ..