قــــوة الضمائــــــر ... طارق اللبيب

13

الصديق قال ليهو ياجدو.. انت شافع ولا حاجة؟ .. انا كل مرة بعاين ليك شغال..  بشوفك انت اكبر من عمرك .. ويزيد اعجابي بيك .. هسي من اول ايام داير تعملا شفقة وخوف..  على ناس بيتك.. خلي الامور على الله واتوكل .. على الاقل اصبر لمن تشوف الحاصل شنو بالتلفون .. لو حاجة بتستدعي انك تمشي امشي ..
وعلى كل حال..  انا الاسبوع الجاي .. ماشي الخرطوم.. ولازم اغشاهم في طريقي ماتشيل هم .. جدو قال لي جدا ان شاء الله..  بصبر لغاية المساء..  اشوف الحاصل شنو .. اصلا ما ح أقدر اسافر الا بكرة ..
المهم المساء .. ماقدر يمشي على ابوحمد .. غايتو مشى كدا على جيهة الشرق..  قالو في تلة كدا..  الزول لو طلع فوقها .. الشبكة بتجمع .. اها يازول شحن رصيد كويس .. الرصيد كان غالي .. الرصيد في قبقبة سعروضعف الرصيد العادي .. غالي زي كل شي غالي.. جدو اتصل على  اتصل على امه .. فعلا جدو كان مقلق شديد..  .. وخايف على اختو..  تكون انتكست..  او حصل ليها حاجة .. لكن اصلا ماكان خاتي..  انو الحكاية في الوالدة .
الخط شبك معاهو وامه ردت .. قال ليها كيف الحال يا امي؟ .. اها عليك الله..  احكي لي الحاصل عليكم شنو؟..  لانو لو دسيتي على..  انا بعرف بي احساسي..  وباكر بخلي الشغل واجي مسافر ..
قالت ليهو خلاص كويس .. انا بحكي ليك الحاصل علينا..  وانت احكي لي الحاصل عليك .. قال ليها جدا .. والله اوريك كل كبيرة وصغيرة شحنت رصيد كفاية ..
قالت ليهو اانا حصل لي اجهاض..  ووو..  المهم حكت ليهو الحاصل بالتفاصيل ..  وقالت ليهو من نعم الله علي .. انو الحكاية دي حصلت في نفس اليوم الانت رسلت فيهو القروش ..
قال ليها الف سلامة ليك يا امي .. الحمد لله .. ان شاء الله ربنا يجعله ليك ذخر في الجنة.. ان شاء الله بس ماتعبتي واتألمتي .. ياريتني كنت معاك ..الظروف فرقتنا الحمد لله على كل حال ..ستو سكتت ساي .. وخنقتها عبرة من كلام جدو ..
قال ليها طيب احكي ليك انا .. طبعا" يومي الجيتك قلت ليك سيد الصالون فصلني..  من الشغل .. اتصل علي عم الصديق ود السيد وقال لي تقابلني .. وفعلا لاقيتو عرض علي الشغل..  واشترط على اني ما أكلمك..  وقال لي امك بتفتكر اني مشفق عليكم .. ومابتقبل احسان من زول وكدا.. وانا وعدتو اني ما اقول ليك..  وفعلا كتمت عنك .. وبعد ركبنا مشينا .. ظهرلي الزول ده في الشارع اطيب مخلوق انا لاقيتو في حياتي .. ياخي الزول ده عطوف لي درجة..  انا مالاقتني .. نحن في الطريق لاقينا كلب .. واقع برفس من العطش .. الصديق وقف العربية وسقا الكلب من موية الصحة ..
وقعد لحدي ما الكلب شال حيلو وقام جارى .. حتن الصديق  اتنفض من التراب ..وجا ركب  في العربيه ..طبعا نحنا طلعنا من الخرطوم بي طريق التحدي ..ومرينا فوق شندي والدامر ..وفطرنا في  عطبره طوالي اتحركنا من عطبره شمالا" ..
وبعدا اتوجهنا لمناطق الرباطاب .. ووصلنا ابوحمد..  بعد تعب عجيب .. وابوحمد طبعا..  هي مركز الرباطاب .. والمدينة بي سبب الدهب ازدهرت ازدهار شديد خلاص .. وبقت ماقارة لي عطبرة ولا شندي .. والبضايع فيها راقدة ووافرة  ..اي شي يخطر على بالك .. بتلقيهو في ابو حمد .. في حاجات تتلقي في ابوحمد في الخرطوم مابتتلقي ..
الصديق قال لي خلاص يايوسف نحن وصلنا المنطقة ..
عارف يا يوسف المنطقة دي..  اكتر منطقة اتكرمت على السودانين الغلابة..  والكانت ضايقة بيهم المعيشة..  ربنا من خيرو وكرمو.. فتح ليهم المنطقة دي .. طلعت كميات من الدهب بالاطنان .. شي ما يخطر على بالك..  ولابتقدر تتخيلو ..الحمد لله انا واحد من الناس .. الجو المنطقة دي..  والله التتعك الرمادة ماعندي .. لكن ربنا فتحها علي .. واشتريت البيوت وبنيت العمارات ..
وعملت عمايل .وجبت اولادي الاتنين هسي بتلاقيهم هناك ..ماسكين الشغل في امان الله .. وان شاء الله انا بتوقع..  انت ربنا يفتحها عليك فتحا"..  ما كنت بتحلم بيهو ..
البلد دي  يا يوسف بلد كريمة..  وناسها كرما .. وارضها كريمة .. ونخلها كريم .. البلد دي بلد ربنا راضي عليها .. غايتو يا امي الزول ده..  قال لي جنس كلام زرع جواي .. امال الدنيا كلها ..
اها يا امي .. وصلنا ابو حمد الساعة 4 عصر تقريبا .. ومشينا لي بيت سمح خلاص..  في حي من احياء ابوحمد .. قاعدين فيه عذابة كدا.. الصديق  قال لي ده بيتي .. والاولاد ديل اولاد بلدنا..  وفيهم ناس شغالين معاي .. نحن بنبيت هنا..  وباكر الصباح بنقوم نمشي الخلا .. محل الدهب..
البلد يا امي بقت بلد رأسمالية .. غالبية المحلات محلات صياغة وبنوك .. ومضاربات مالية .. بالمليارات التقيلة .. والله تشوفي زول ماشي مغبر..  ولابس ليهو سديرية..  ولافي ليهو شال رمادي .. يقولو ليك ده راس ماله 15 مليار .. لامن تجيك خلعة من الارقام.. غايتو ما شاء الله ..
اها يا امي..  طبعا بيتنا اليوم داك .. في المدينة ابوحمد .. والصباح بدري اتحركنا..  مشينا على الحتة الفي الخلا الاسمها (قبقبة) دي .. درب كلو رمال..  وخلا وشوارع مفرعة .. ولو العربية ما شادة ح يلها..  حتغرس في الرملة لامن يقلعوها الركاب .. وفي بكاسي شغالات مواصلات..  من ابوحمد لي قبقبة .. الراكب بي خمسين .. ولو راكب قدام مع السواق بي سبعين .. ههه .. غايتو انتي براك قلتي لي وريني اي حاجة صاح؟
اها طبعا ماشين في الخلا ده..  لاقتنا سلسلة جبال كدي..  اسمها جبال 10 كلها رمال ووحل .. وشي كدي اول مرة في حياتي..  اشق الدروب دي ..و كل مرة عم صديق بقول لي قربنا قربنا .. لغاية ما جاتنا كيمان بتاعات تراب كتيرة شديد .. والكوم قدر الجبل .. انا قلت ليهو ديل شنو ياعم صديق؟ .. قال لي ده تراب الحفر .. دي عمايل البشر وكت تكون كايسة الغنى .. 
شوية كدا بدت تظهر لينا ملامح الناس من بعيد .. هناك تشوفي بوكلن شغال في بير .. ستو قالت ليهو بوكلن ده شنو؟..  قال ليها الكراكه .. وتاني كدي تشوفي لودر شغال يضري في التراب فوق الغربال ..
قالت ليهو لودر؟؟ قال ليها ايوة اللور ؛الجرافة، زي البجيبوها في التلفزيون بتهدم في بيوت الفلسطينين..
بعد داك دخلنا قبقبة البقولوها .. حلة كاملة..  لا ليها اول ولا ليها اخر ..
وسوق ودكاكين ومطاعم . وتلاجات..  ومحلات بيع الرصيد وطلمبات بنزين .. ودنيا قايمة بي حالها .. والناس دي حايمة ولايصة بالخلا زي النمل ..
وانا طبعا" مطير عيوني وبعاين للوضع ده .. مشينا طوالي للخيمة بتاعة عم صديق .. خيمة ليها راس وقعر .. وفيها بنيان .. ومكيفات
وصفرة للاكل وكل المسلزمات السكنية .. في نص الحلا دع تصدقي؟
قال لي اخد راحتك شوية يايوسف ..وقوم معاي عشان تشوف البلد..  والحاصل فيها .. وانا طبعا حيلي ومهدود..  وجسمي مكسر..  من السفر..  لكن ماحاسي بي اي تعب..  من المفاجأة بالوضع الجديد ده .. اصلا ماكنت متخيل السودان ده..  فيهو حاجات زي دي .. الناس ديل كلهم مغبرين .. ولافين روسهم بالشالات ..
اها في ولدين كدا واحد قدري..  والتاني اصغر مني بشوية .. جو داخلين شايلين حجارة ..
عم صديق قال لي لي اولادي .. اشرف واكرم .. الكبير ده اشرف..  والتاني البغسل في وشو داك .. اسمو اكرم .. جو سلمو علي .. قال ليهم ده ود عمكم الخير يوسف .. اعز اصدقائي من حلة كدا .. ابوهو اتوفى قريب .. وهو بقى شايل البيت..  وجاي يترزق معانا ..
قالو لينا ماتطلعو الفطور جاهز .. عم صديق قال ليهم..  امشو جيبو لينا زيادة فطور من المطعم .. المهم غايتو فطرنا .. وقمتا مشيت مع عم صديق..  وبتفرج في المنطقة دي..  حكاية كدا ماتتخيليها..  الا لمن اجي احكي ليك قدامك .. الابيار والغرابيل والطواحين .. وغسيل الدهب بالزيبق..  وحاجات كدا الا اكون جمبك حتى تستوعبيها ..
اها تاني يوم طوالي عم صديق قال لي..  امشي مع اشرف يوريك شغل الجهاز .. والليلة شغلك بالجهاز ..  مافي وقت ابدا طوالي ..
في جهاز كدا ..
بكشفو بيهو الدهب من داخل الارض..  اسمو جي بي اكس .. فيهو زي عصاية كدي .. وفي اخرها في صحن يشبه الدش الصغير .. ماشفتي في التلفزيون الجهازات البفتشو بيهن الالغام ديل؟
قالت ليهو اها .. قال ليها بس نفس الشي .. اول مايكون في دهبة الجهاز بعمل صوت.. طيط طيط .. بس توقفي الجهاز..  وتبحتي تحت تلقي ليك دهبة..  على حظك كان صغيرة كان كبيرة .. ويصادف تلاتة يوم ماتلقي ليك تسالية .. ويصادف تلقي حاجة تريحك في حياتك ..
انا علموني شغل الجهاز .. وبقيت باري اللودر .. الحتة البجرفها بمشي بفتش وراهو ..
اليوم الاول لغاية المساء جهازي ده مبكم ماقال بغم .. لمن زهجت..  وقلت دي شغلة فارغة ساي .. تاني يوم من الصباح مع اول جرة طلعت لي حجير صغير كدي .. كل الناس المعاي باركولي .. قالو لي دا اقل حاجة 15 جرام .. ولمن عم صديق شافو اتكيف..  لمن اتاثر وقال لي انت يازول شكلك مرزق .. خلي الجهاز ده معاك واشتغل .. نحن مامحتاجين ليهو .. امشي بيع القطعة دي شوفها بتجيب لك كم ..
هنا عم صديق باح لي بسر .. قال لي يايوسف احسن الشغل ده ولاشغل الصالون بتاع الحلاقة؟؟ .. قلت ليهو ولا مناسبة ياعم صديق ..
قال لي انا عايز اكشف ليك سر يايوسف.. انا الوصيت قسم بتاع الصالون يطردك .. لانو شغل ميتان..  ومابعيشك عيشة الرجال ..
انا طبعا" يا امي..  بقيت  اضحك..  لامن قعدت في الواطة .. من طيبة الراجل ده وذكاهو وقلبو الرحيم .. المهم شلت دهبي ..
ومشيت بعتو..  ورسلت ليك القريشات..  والباقي معاي ولسع شغال بي جهازي..  بس داير دعواتك ..
اها كدي قصرت معاك؟؟ رصيدي قرب يخلص .. موش اديتك الصورة كاملة؟؟ ..
قالت لي والله زي التقول سافرت معاك..  ماخليت شي..  ربنا يوفقك بس اول من تقرب مواعيد الجامعة .. دايراك تجي راجع على دراستك .. انا طبعا زي ماعارف..  كدي طلعت من الحبس .. بعد ما جناي مرق..  تاني الحبس انتهى .. من باكر بقوم اتابع شغلي براي .. وان شاء الله .. ما بحوجك للتعب القدر ده .. صاح شغل الدهب سمح واي شي..  ومافي شي في البلد دي اغلى منو ..
لكن حاجة بتاعة مجازفة بي حياتك .. وصحتك .. وفي النهاية حظ زي ماقلت..  يوم تجيب ويوم تخيب ..
ان شاء الله  ربنا يوفقك..  خلي بالك من نفسك..  وماتحوم كتير في الشمس .. واتلف كويس من هواء الليل والزيفة .. التهاباتها كعبة .. قال ليها ماتشلي هم..  في اولاد حايمين هنا اصغر مني .. والله الواحد فيهم يهد الجبل ..
طيب يلا انا كل يوم خميس..  زي الوقت ده بتصل عليك .. قالت ليهو الخميس بعيد علي .. قال ليها غير الخميس..  لو لقيت فرصة بدق ليك ..اتوادعو الولد وامه..  والمكالمة انتهت ..
باكر الصباح الصديق ..  قال لي جدو اها يايوسف خليت السفر ؟ الظاهر اتصلت علي الوالدة وطمنتك .. قال ليهو اي والله بس كان حصل ليها نزيف .. وفقدت جناها ..ده كل الحصل .. لكن هسي كويسة وطمنتني ومافي داعي للسفر .. لكن هي شكلها مامطمنة..  وشفقانة .. ..
قال ليهو هي امك كانت حامل؟؟ .. قال ليهو ايوة ..
كنا متوقعين يجينا اخو .. لكن الله ما اراد..  الحمد لله ..لكن هسي الوالدة كويسة والله..  انا بعرفها من صوتها ..
بعدين طبعا" امي عرفت..  اني سافرت معاك .. وسألتني وحكيت ليها .. الصديق قال ليهو تعال يايوسف تعال وراي .. مشى معاهو.. بقو ماشين وبتكلمو .. قال ليهو اها يايوسف.. امك وكت عرفت انك مشيت معاي..  قالت شنو؟
قال ليهو بالعكس والله.. على عكس الكلام الكنت انت خاتيهو في راسك ..
قالت لي ده زول بنعرفو.. وبنطمئن ليهو .. وارتاحت جدا.. لمن عرفت انا معاك ..
قال ليهو وماقالت ليك عني اي حاجة ؟؟ قال ليهو زي شنو يعني؟ .. ما بتذكر غير انك صاحب ابوي القديم وجافي .. قال ليهو فعلا والله جافي .. لكن انت براك شايف الحاصل .. والمشغلة..  انت عارف يا يوسف .. كل ماقروشك كترت..  كل ما مشغوليتك زادت
وبالك انشغل..  ونفسيات بقت على الهبشة .. والله انا زمان وقتي الكنت مفلس .. بالي رايق .. اكتر من هسي..  رغم المعاناة ..
اها هسي انت اكرب ايدك .. طلع ليك قريشات تاني .. انا في بداية الاسبوع الجاي..  بسافر الخرطوم .. شايل لي بضاعة ..(يعني دهب) .. وبمشي بغشى ناس البيت .. طلع ليك قريشات اوديها ليهم ..
قال ليهو انا هسي معاي كاش.. مليون ونص..  ممكن توصلها ليهم معاك ..
طبعا" هنا الصديق اتيحت ليهو الفرصة انو يقابل ستو .. ويشوفها بعد السنين دي كلها ..
الى اللقاء .