قــــوة الضمائــــــر ... طارق اللبيب

11

ستو ياجماعة بالها بقى مشغول من جيهة ..ومطمئنة من جيهة اخرى.. وعندها شعور كدا ما مفهوم ..
اما محاسن مرتاحة شديد في بيت ستو .. وستو مخلياها في البيت بي راحتها .. حتى الجوطة بتاعة الاطفال ..ستو ما بتتكلم فيهم .. ولا بتشاكلهم.. بس تعاين ليهم وتتبسم .. ولمن تكون ستو نايمة .. والشفع يكوركو.. وستو تصحى من النوم .. بي سبب الازعاج .. محاسن بتتضايق من الاولاد شديد .. ومرات بتضربهم
وستو بتشاكلها ..
تقول ليها تاني لو ضربتي الاولاد ديل.. انا بزعل منك .. انا حاسة بيهم زي اولادي.. خليهم يجوطو .. البيت بيتهم .. خليهم يحسو بالراحة .. وما تحسسيهم بالحرمان .. خليهم يحسو البيت بيتهم .. انا ما مزعجني بي حاجة ..
ومحاسن تعاين لي ستو كدا ترمي ليها دمعة ..
محاسن بقت كل الوكت مهتمة بي ملكة .. ومناها انو ملكة تمشي زي الناس وترجع لي دراستها .. لانها طولت في الرقدة دي ..
اما الكسرة شغالة والعواسة شغالة .. وستو اصلا ما بتخلي محاسن تعوس ليها .. الا لمن تكون عيانة.. ولاعندها حاجة .. ولا بتطلب منها تشتغل ليها.. الا محاسن تقوم براها تشتغل الحاجة العايزة تشتغلها ..
اها يوم من ذات الايام.. محاسن مشت الزلط  قدام.. تجيب ليها حاجات للمطبخ .. لاقاها ولد  سيد البيت.. الكانت مأجراهو .. اسمو نصر ..وابوهو موكلو على الايجارات .. اها لاقاها.. قال ليها انتي يامحاسن مشيتي وين؟.. قالت ليهو والله قعدت مع ناس ستو..  مرت الخير الكلها  الخير ..
وقعدوني معاهم في بيتهم.. لاقرش لاتعريفة .. وانا واولادي ناكل ونشرب .. والله ربنا يبارك فيهم ..
قال ليها وراجلك الخنيتة طار وين؟ ..قالت ليهو والله قال مسافر.. لكن ماوراني محلو .. قال ليها انا عندي باقي قروش عندكم.. وانتي مرقتي قبل ما تديني قروشي .. انتي موش شهرين مادفعتو؟
قالت ليهوبس اخر مرة.. انت قلت لي امرقي لي من البيت ..انا ماداير منك لاقرش لاتعريفة ..
قال ليها كذابة ..ماقلت ليك.. قالت ليهو والله والله.. اعدم شبابي ووليداتي.. انت قلت لي كدا ..
قال ليها يازولة افرضي قلت ليك ..هسي انا داير حقي .. قالت ليهو انت كان قلت ..كان ما قلت ..انا ماعندي والله.. لاقرش لاتعريفة . قال ليها والله انا بجهجهك يامحاسن .. احسن ليك تديني قروشي ..
قالت ليهو خلاص اديني رقم ابوك.. اكلمو بي ظروفي.. ولو ما عفا لي بدفع ليك .. قال ليها لالا ما بديك ليهو .. قروش الايجار من نصيبي انا .. وابوي متنازل لي منها ..
موش ابوي قال ليك انا موكل ولدي نصر؟ ..قالت ليهو ايوة قال لي .. قاليها طيب تتصلي عليهو تاني ليه؟
اديني قروشي يامحاسن.. قبل ما اعمل ليك فضايح ..
قالت ليهو تعمل لي فضايح تسوي شنو يعني ؟؟ .. قال ليها والله امشي لي ستو.. واقول ليها انتي بتجيني وتشيلي مني قروش .. وعندك معاي قصص .. واقول ليها طلعي المراة من بيتك .. بتعمل ليك اشانة سمعة واطلق خبرك في الحلة ..
قالت ليهو عليك الله يانصر.. ماتبقى زول مابتخاف من الله..
انا والله لو اديتني فرصة .. بديك قروشك ..بس تطلع ستو من الحبس ..وانا امشي اشوف لي شغل ..ان شاء الله اشتغل في بيوت الناس بسدد ليك ..
المراة طبعا خافت شديد .. ونصر شاف الخوف فوق عيونها .. قال ليها اقول ليك حاجة ظريفة طيب  ؟
انا القروش بخليها ليك.. لكن بعدين بجي غاشيك.. تمشي تنضفي لي البيت .. بس ماتجيبي معاك اولادك .. طبعا" محاسن طوالي فهمت قصدو .. قالت ليهو اجي يانصر؟
انت مابتعرف محاسن بت ضيف الله ولاشنو؟.. هووووي اعمل حسابك.. والله انا احرقك حي .. وحست بالحقارة من الود الحقير ده .. هو اظنو اصغر منها بي قريب عشرة سنة .. قال ليها ولاتزعلي.. ولا شي ..وانا ما جابرك ولا مصر عليك شديد يعني .. هو في النهاية خيار .. لو قبلتي  خلاص ..لو ماقبلتي  جيبي لي قروشي لو ماجبتيهن ماتلوميني .. ومشى طوالي ..خلاها ليك فوق جمر .. محاسن المسكينة مشت البيت بقت خايفة.. انو الزول ده يجي يبوظ سمعتها لي ستو ويكذب فيها ده زول مابخاف الله .. وقالو (المابخاف الله خاف منو)..
في الاول قالت انا امشي اسبقو.. واكلم ستو بالموضوع.. قبل ما يسبقني .
وتاني خافت .. وبقت قاعدة في البيت متوترة .. وطبعا" ستو مشغولة ما جايبة ليها خبر.. لكن ملكة لاحظت  ليها .. قالت ليها انتي مالك يامحاسن؟؟  شايفاك ماطبيعية ؟؟
قالت ليها لالا مافي حاجة .. وعاينت كدا بالباب.. لقت ستو مشغولة وبعيدة..
قالت لي ملكة والله يا ملكة.. انا في مشكلة .. ولد سيد البيت داير مني حق شهرين .. وفي الاول خلاهن لي .. هسي جا قال لي يا بتجيبيهن لي.. يا بتكلم في سمعتك .. او كداكدا .. المهم حكت ليها ..
ملكة قالت ليها ..بالله شوفي الكلب !!!.. اريتني كان بقدر اقوم.. والله كنت مشيت اديتو كف.. فوق وشو القبيح ده ..
انتي بس كلمي امي .. قالت ليها انا خايفة امك تقوم تلتزم ليهو بالقروش ..وهي ماعندها.. يادوب قروش الكسرة مكفيانة معيشتنا .. انا والادي ضيقنا عليكم عيشتكم ..
ملكة قالت ليها يخسي عليك يامحاسن .. هسي ده كلام تقوليهو؟؟ .. اول انتي وادلادك منقصين شنو؟.. ربنا يحفظم ليك .. اسمعي كلامي  انا بكلم امي براي بالموضوع ده .. انتي خليك بعيد .. قالت ليها والله انا بخاف من المشاكل يا ملكة ..
ملكة طوالي قالت ليها امشي نادي لي امي.. وماتجي معاها انتي .. محاسن مشت قالت ليها.. ملكة بتناديك ياستو؟
قالت ليها هسي انا مافاضية ليها .. اخلص وامشي ليها .. ملكة كوركت لي امها ياااامي .. عليك الله تعالي بي سرعة .. ستو قامت من الشغل ومشت ليها تنقنق .. غايتو الزول معاكم مايعرف يشتغل مالك ياملكة ؟
قالت ليها الكلام مهم ومستعجل ياست الحبايب .. ولو ماكدا مابنزعجك يا ستو الغالية ..
اقعدي شوية بس .. عارفة هسي لمن محاسن طلعت تجيب الحاجات ديل.. لاقاها نصر ولد سيد البيت الكانت مأجراهو ...... وحصل حصل حصل ..
ستو قالت شوف بالله شوفي الكلب ؟؟ عليك الله جد يا ملكة ؟؟ قالت ليها يهديك محاسن امشي اسأليها .. ستو مشت لي محاسن قالت ليها انتي يامحاسن.. بتخافي من كلام الولد الهايف ده ؟ خليهو يتكلم البصدقو منو؟؟ نحن عارفنك انتي شنو؟
قالت ليها .. وانا واثقة من نفسي ياستو .. لكن (العيار المايصيب يدوش) ..
ماعايزة الناس ديل يجيبو سيرتي .. قالت ليها طيب اصبري لي .. نلكم ليهو معتصم يوضبو ..
بتعرفي ناس التومة؟.. ام الاولاد ديل ..ناس حمودي صاحب جدو .. واخوه الاكبر منو اسمو معتصم .. والا .. عايني .. لالالا دقيقة ..اقول ليك حاجة اصبري اصبري.. انا تلفون معتصم عندي .. من زمن الحادث ..
قعدت تقلب في تلفونها ..واتصلت عليهو.. ومشت بعيد.. اتلكمت معاهو قريب العشرة دقايق.. تحكي ليهو في الحصل بالتفصيل ..
قال ليها ماتشيلي هم يا ام يوسف .. والله الموضوع ده بنهيهو ليكم الليلة ..
معتصم الكارب ود الاصول .. طوالي من حتتو ديك وساق معاهو اتنين من الزملاء.. وركبو عربيتهم ومشو .. المكان البتواجد فيهو نصر .. لقوهو قاعد مع ست الشاي معاهو اصحابو .. نادوهو براحة مسكوهو.. ركبو في العربية .. وودورو .. وقالو ليهو معاك ناس الجهاز.. اي فرفرة ماتلوم الا نفسك .. ومشو بيهو حتة هو ذاتو .. ماعارف ودوهو وين ..
وبقو يتونسو مع بعض .. واحد قال للتاني نستعمل المقص؟؟؟ قال ليهو لالا الكماشة قاعدة .. التالت قال ليهم  مافي داعي للدم ياجماعة .. كهربا ..كهربا بس ..
ونصر منطط عيونو.. يعاين ليهم وعارفهم بعملوها .. لكن هم كانو بهددو ساي ..
هنا معتصم اتكلم ظهر ليهوو .. قال ليهم ياخي الزول ده جارنا.. مافي داعي للبتقولو فيهو ده .. اسمع يانصر ..
كيفك وكيف حالك ياخي ؟ ياخي جزاك الله خير.. قالو اتنازلت من ايجار شهرين للمراة المسكينة الاسمها محاسن ..
قال ليهو اي والله .. المراة مسكينة .. وانا قلت مافي داعي الزول يطالبها وهي ماعندها .. قال ليهو طيب عليك الله ..لو سمحت تاني لو لاقيتا في الشارع.. ماتتعرض ليها.. ولا بي كلمة .. اتفقنا؟؟ ..
قال ليهو والله العظيم تاني.. لو لاقيتا ماشة بي شارع.. امشي بالشارع التاني ..
معتصم قال ليهم  ياجماعة.. الزول ده خلوهو اليمشي.. ده زول من جيرانا.. وابوهو راجل عزيز علينا .. قالو ليهو امشي اركب في العربية ..الله مرقك ..
ولاقال ليهم انتو جبتوني لشنو.. شكلو فهم الحاصل ..
ولاصدق انو مرق منهم ..ركبو في العربية.. ونزلوهو في الكبري ورجعو..
ومعتصم اتصل على ستو.. قال ليها كلمي اختك.. قولي ليها تاني الزول ده ما حيلاقيك في شارع واحد.. خلاص اديناهو الدرس الاول ..
قالت ليهو انت تسلم يامعتصم.. وتسلم البطن الجابتك .ناس الامن يا زيك كدا .. يا مافي .. ناس الامن موش زول منفوخ في الفاضي ويطلع بطاقتو لليسوى والمايسوى .. عشان يخوف الجهلا..
ناس الامن هو الناس البجيبو الامن .. زيك كدي وزي اخوانك المعاك ..  قال ليها ولو يا ام يوسف.. نحن  في الخدمة في اي لحظة ..
كيف الشغل ماشي معاك؟ طبعا نحن بيتنا كلو بياكل كسرتك يوميا .. ماشاء الله شغلك نضيف .. قالت ليهو عليك الله .. ؟ والله ربنا يديكم العافية.. وبالهنا ان شاء الله ليك ولي ناس بيتك ..
اها طبعا طبعا" ستو بشرت الملكة.. وبشرت محاسن.. انو الموضوع ده تاني انتهى.. ونصر اصبح في خبر كان ..
يازوول محاسن دي والله اتكيفت كيف .. قالت ليها انا ياستو.. لازم اكون يوم من الايام ..عملت لي حاجة كويسة ..وانا ماخاتة بالي ..عشان كدا ربنا رحمني   قدر الرحمة دي .. انا ياستو ربنا ختاكم لي في طريقي .. ربنا ياستو يرفع مقامك.. ويوفق اولادك .. قالت ليها امين بي حياتك وانتي طيبة يامحاسن ..
ملكة قالت ليها ياامي غايتو معتصم ده.. نحن ماعارفين نعمل ليهو شنو؟ الزول ده وقف معانا كتير .. من الحكيتيهو لي داك ..لغاية هسي الزول ده ..ماشاء الله ..بالجد زول بقيف مع الضعفاء ..
قالت ليها خلاص ياملكة نعرسو ليك؟؟  شايفاك ماسكة سيرتو نص ساعة .. قالت ليها .. وانا اطول يا امي؟؟ .. منو البقبل ليهو واحدة ماشة بي عصاية ..
وكان لي معتصم ..والله انا من زمان شايفاهو زول شهم وكريم ومؤدب اكتر من حمودي .. لكن انا مع شنو؟ والدايرني منو يا امي؟؟ ..وسرحت بعيد .. محاسن تعاين ليها ساكت متأثرة ..
هنا محاسن قالت ليها . هوي  يا الملكة.. والله انتي تجيبي معتصم وستين معتصم.. وهسي انت بتمشي.. وبتشوفي الجماعة بتكسرو فيك كيف .. انتي ماشاء الله .. كل يوم ماشة في تحسن ..
محاسن ..
بعدين المساء قالت لي ستو انا ماشة اجيب لي لبن.. لي الوليدات ديل
..قالت ليها هاك جيبي لبن كتير.. هم يشربو ..ونحن نتعشى بي عيش بي لبن .. شالت منها القروش ..وطلعت مشت طوالي لي ناس معتصم في البيت.. سألت من معتصم ..
قالو ليها طلع هسي بجي .. قالت ليهم برجع ليهو بعد ربع ساعة .. مشت اشترت اللبن.. وجات غاشية معتصم .. لاقتو في الشارع قالت ليهو .. اولا انا بشكرك لي وقفتك معاي .. وانك حميتني من من الولد ده .. والله ان شاء الله ما يسلم لك عدو .. وانا ماعارفة اشكرك كيف ؟ لكن هسي عندي معاك موضوع تاني .. ودايرة تلفونك لاني مابقدر اتكلم معاك كدي في الشارع ..
قال ليها ان شاء الله خير .. قالت ليهو خير والكلام فيهو السر والجهر .. قال ليها سرك في بير.. اتفضلي ملاها تلفونو .. كتبتو وقالت  ليهو انا بضرب ليك بالليل متاخر ومشت ..