قــــوة الضمائــــــر ... طارق اللبيب

24

بعد تلات شهور ..
يوسف .. الامورو ماشة معاهو كويس الحمد لله .. من زمان سدد قروش الصديق على داير المليم .. وسدد اربعة اقساط  في البوكلين ..باقي ليهو واحد ..
وراكب ليهو بوكسي .. ووضعو فوق حد التصور ..زواج الملكة ومعتصم باقي ليهو اسبوع .. لاتو اتاجل شهر نص ..ويوسف ح يوكل حامد على الشغل ويمشي .. اول شي مشى كلم الصديق .. قال ليهو الملكة ح نزوجها بعد اسبوع .. وانا عايزك تكون في محل ابوها .. وتكلم اشرف واكرم ياهم اخواني البقيفو معاي .. انا ماعندي اقرب منكم ..
قال ليهو والله يايوسف انا من ذات نفسي .. والله ان بقيت الموت واقف لي فوق خشم الباب..  الا احضر زواج الملكة .. لكن اشرف واكرم ديل..  الا تدعيهم براك ..
قال ليهو يازول مامشكلة..  لكن اكرم انت موش قلت لي في البلد..  مع الوالدة . قال ليهو انت اتصل كلمو كان جاي مافي مشكلة ..
يوسف قال ليهو لومك علي .. اكلمهم الاتنين وانا واثق بجو ..
المساء يوسف مشى  الخيمة..  في الوقت البكون فيهو اشرف قاعد .. ولقاهو قال ليهو اشرف ..  انا جيت ادعيك لزواج اختنا ملكة .. بعد اسبوع .. ياريت تشرفني لانك انت في مقام اخوي .. وكلمت الوالد .. اشرف قال ليهو يازول مافي عوجة..  بنجيك تب انا وابوي .. يعني الجمعة الجاية؟
قال ليهو ايوة بس الجمعة الجاية .. واديني تلفون اكرم اكلمو.. ولا بتكلمو لي انت .. قال ليو ماتشيل هم..  بكلمو ليك انا ان قدر يجي الحمد لله..  وان ماقدر تكون انت عملت العليك ..
يوسف ماشاء الله .. مغرق امو في القروش غراق .. وست الجيل بقت من النسوان الربنا فتح عليهم فتحأ من عنده ..
وجهزت لي بتها من كل كل شي..  اي شي نقص من معتصم .. ست الجيل تمتو..  زي الراجل البتم لي بتو ..
ولا قالت ليهو ده شوية ولا ده كتير .. معتصم زول اصلي .. وموظف حكومي ودخلو محدود .. وابوهو واخوانو وقفو معاهو .. لكن تكاليف الزواج في العاصمة شي لايطاق .. ولا يمكن الزول يتخيلو ..  لكن ست الجيل كانت قدر العشم ..
وقدر ما ملكة تنقنق في حاجة .. تقول ليها اسكتي ياملكة .. الزي معتصم ده.. الناس بتخسر فيهو الملايين .. وفيهو ماخسارة .. لانك انتي بتشتري راجل .. والقروش بلا راجل شن طعمها؟ .. وبتعرفي كلامي ده لمن عرسك يتم وتبقى معاهو ..
اها ياجماعة .قولو لي النسوان البحرضن بناتن علي العريس .. وينقنقن في الهينة والقاسية .. والواحدة تمسخ على بتها العرس .. وتكرها في راجلا من اول يوم .. ست الجيل ما منهن ديل .. ما ها المراة الشنافة .. ولا ها البتقلب خشمها .. وتسخر من الشي البسيط . دايما باسمة وهاشة وباشة .. ورضيانة بالقليل والكتير ..
ست الجيل بت العمدة .. كل حرف يتقال عنك انتي اكبر منو ..
ياست الحيا  المليانة طيب وقناعة ..
ساخية وطيبة فيك الدنيا كابة متاعا..
ساقياتك تشيل قدر البحر في ساعة ..
غرقانات جروفك ومويتن ترراعة ..
يوسف وصل الخرطوم..  وكان واقف على زواج اختو .. من مجاميعو..
والمناسبة كانت لامة .. واكتر الناس الكانو موجودين من اهل معتصم .. لانو يوسف مادعى اي زول لزاج اختو .. عندهم عادة الزول مابدعي لزاج البت بدعي لزواج الولد ..
الا اصحابو واخوانو .. والناس القراب شديد .
عمك الصديق وولدو اشرف .. قاعدين .. وصلو قبل الزواج بي يوم ..
ويوم الزواج الساعة 11 كدا..  وصل اكرم ومعاهو اختو الوسطانية ..اسمها دعاء
والدعوة كانت فطور .. في بيت ناس معتصم ..  وست الجيل اهتمت بي اولاد صديق اهتمام شديد .. وكلما تلقا ليها فرصة لمن يكونو شغالين مع يوسف التجهيزات  تتونس معاهم وتهظر بي خفة دمها المعروفة ....  وتتونس مع البت .. وتضحك وتتبسم معاها .. ونادت اكرم واشرف وقعدت معاهم قعدة طويلة وسألتهم من اخبارهم ومن يوسف معاملتو مع الناس كيف  .. وقالت ليهم .. يوسف بحكي لي عنكم كل خير .. حتى اني اتمنيت الاقيكم .. والحمد لله ربنا قسم لينا الشوفة ..
طبعا ياجماعة الجية بتاعة اكرم واختو دي..  عندها هدف كبير .. اللهو شنو؟؟؟
بنشوف ... المهم الناس عقدو بعد الفطور .. عند ناس معتصم  وقالو بعد صلاة الجمعة العريس واهلو .. جايين للغدا عند ناس يوسف .. والقايم بالوليمة  في الخدمة محاسن الاصلية .. وجماعتها الشغالين معاها..  ظبطو غدا زي الغدا ..
المهم بعد الناس مافطرو..  والجمعة قربت..  والجو هدأ شوية .. ستو دخلت علي اوضتها .. تعبانة وعرقانة ومرهقة .. دايرة تاخد ليها راحة .. يادوب ما الناس صلو..  وتقوم تقيف على الغداء .. في زول دق الباب
قالت ليهو منو قالت ليها انا (دعاء) بت الصديق .. قالت ليها اتفضلي حبيبتي ..
دخلت قالت ليها ياخالتو امي عايزة تتكلم معاك .. قالت ليها حبابها امك بثينة بعرفها شديد ..
البت اتصلت على امها وادت التلفون لي ستو ..
بثينة قالت ليها ازيك ياست الجيل .. قالت ليها اهلا اهلا بيك يابثينة ..قالت ليها بتك ان شاء الله سعيد وبخيت عليها..  وربنا يسعدها ويهنيها ..
قالت ليها بحياتك وانتي طيبة..  والعقبى لي وليداتك وبنياتك ..
قالت ليها يا ست الجيل..  انتي مراة كبيرة .. وعندك اولاد . ويتك يهدي عرست..  وولدك بقى لي العرس .. عليك الله مالك دايرة تخربي علي حياتي؟ .. وتشتتي على اسرتي؟ .. عليك الله السلطك على صديق ده شنو ؟ الموضوع ما انتهى من زمان..  وكل واحد فيكم مشى اتزوج .. وقلتو خلا رضينا بالقسمة .. ده شنو البسوي فيهو ده ياست الجيل؟؟ شغل الجهل والمراهقة ده ؟؟
ست الجيل تسمع فيها ساكتة..  خلتها لامن تمت كلامها ..
قالت ليها والله يابثينة..  اعدم وليداتي انتي غلطانة . والله الصديق حاشاهو مابجيب فوقك مراة .. لاست الجيل ولاغيرها .. والله يابثينة .. ماحصل يوم الصديق نضم معاي في موضوع زي .. وحات الله الخلقني يابثينة .. انا الصديق لي كم وعشرين سنة ماشفتو بي عيني ..
وهسع الليلة لاقيت اولادك التلاتة .. صديق مالاقيتو .. ولارسلت ليهو اسلم عليهو..  ولاجاني بارك لي ..
بعدين انتي بتعرفيني من المدرسة ..  انا مابكضب .. الصديق لو طلب مني طلب زي ده .. انا برفضو والله..  لاني مابرضى اجي فوقك ضرة..  بعد الخوة البين ولادك وبين يوسف ولدي .. نحن ناس بنقدر العشرة ..
قالت ليها ماتكضبي يا ست الجيل..  ولدك رسل ليك قروش.. مع صديق .. وصديق سلمك ليها .. والخبر وصلني .. قالت ليها فعلا ولدي رسل قروش..  والصديق جابن في البيت..  لكن  مالقاني ..اساليهو..  قول ليهو شفت ستو؟ لاقتك؟؟ .. ليك كم ماشفتها؟؟ .. اسمعي منو براك ..
بعدين انا عاهدتك..  عهد الله ورسوله .. والله   اموت .. ويشيلوني جنازة .. انا مابجي فوقك ضرة .. ده كلام شليهو من راسك..  وابقى لي اخت انتو ناس ماساهلين .. انا يابثينة خلاص حياتي عديتها..  مع الخير ود يوسف .. وقسمتي معاهو اكلتها .. وباقي حياتي ده داير اخليهو لي وليداتي..  اصلو العمر بقى عقاب ..
وشكرا ليك .. انك رسلتي وليداتك..  جونا وشاركونا..  ربي يبارك في ايامكم .. والله كنت بتمنى انك تجي معاهم .. لكن قالو لي عيانة ربنا يعجل ليك بالشفاء ..
قالت ليها امين .. ياست الجيل اعفي لي .. والله بس كنت فاهمة غلط..  وظنيت بلا اتاكد .. قالت ليها السماح ياحبيبتي..  ربنا مايفرق بينكم بي شين .. وتبقو لي وليداتكم طيبين ان شاء الله..  اها ودعتك الله .. لمن انتهت المكالمة .. ستو مدت التلفون لي دعاء  لقت البت بتبكي ودموعا ديل نازلات اربعة اربعة .. قالت ليها مالك حبيبتي .؟؟ قالت ليها والله انا ماكنت قايلاك كدي ياخالتو . قالت ليها قومي قومي غسلي وشيك ..
واتجهزي الناس ديل مايجو يلقو وشك محمر ومورم .. البت بقت تعاين لي ستو وتتبسم ..
ستو حست احساس حقيقي..  انو الصديق في يوم من الايام..  ح يجي يطلب يدها .. وماعندها شك في الموضوع ده..  وحضرت نفسها لي ردة الفعل المناسبة .. وجهزت كلامها تب ..
وقامت على شغلتها .. وناس العرس وصلو والغدا دور .. والناس اتغدو .. فضلة خيركم .. وعملو مناسبة مظبوطة ..
والعصرية الناس اتفرقو ..
العصرية كدا .. الصديق كورك لي بتو .. في الفاصل البين الرجال والنساء .. يادعاء .. جاتو .. قال ليها نادي لي خالتك ست الجيل .. ابارك ليها .. البت جات كلمت ستو..  قالت لي ابوي واقف ليك بي جاي .. قال داير يبارك ليك ..
ست الجيل دي قلبها عمل شحححح .. لامن حيلا برد .. وخافت خوف عجيب .. لامن استغربت في روحها .. وبقت تقول هسع انا مالي؟ زول داير يبارك لي .. دي شنو البشتنة الماعنها طعم دي؟ ..
لبست توبها واتقنعت ومشت عليهو ..
الصديق وكت شافها .. بق يبلع في ريقو..  وريقو ماداير ينبلع .. وحس بانو داير يقع من طولو .. وغلبو يقول ليها كلمة .. بسس عاين ليها مرة واحدة..  وقبل على الحيطة .. والبت دعاء . واقفة هناك .. تعاين لي ابوها ولي ستو .. قال ليها كيف حالك ياست الجيل؟ .. الف مبروك للملكة ان شاء الله ربنا يسعدها .. قالت ليهو الله يبارك فيك يا ابو الرجال .. ان شاء الله انت ربنا يبارك في ايامك..  ويمتعك بالصحة والعافية .. السويتو معانا مو هين .. ربنا براهو بجازيك .. وماقصرتو انت واولادك..  لي مشاركتكم في فرح الملكة ... قال ليها سلمي لي عليها..  وباركي ليها بالنيابة عني .. قالت ليهو يصل ان شاء الله .. مع السلامة..  مع السلامة .
الصديق رجع الصالون بتاع الرجال..  وحس انو هندو حمى عديلة .. مافيها اتنين تلاتة .. وماكان بتحيل انو ستو في نفس جمالا الخلاها فيهو قبل عشرين سنة .. وشافة زايدة نيران .. التقول هي العروس ما ام العروس ..
المهم يازول  المساء عملو زفة العروس..  بي العادة السودانية .. والعريس ساق عروسو .. والموضوع انتهى ..
باكر الصباح .. الناس ديل كلهم قامو على سفرياتهم .. والاولاد الانين جو وودعو ستو وساقو اختهم..  وابوهم سافر مع اشرف واكرم سافر مع اختو ..
ومشو بي نفسيات غير النفسيات الجو بيها ... بعد تلات يوم من الزواج .. يوسف سافر الخلا .. وطبعا" ما اشتري بيت لي اختو .. لانو معتصم كان معترض .. وقال نحن ح نسكن في بيت ابوي .. وعندو قطعة شغال فيها ..
اها يازوووول بعد اسبوع من الزواج .. وستو قاعدة في البيت براها .. بيت حدادي مدادي .. لامعاها شريك ولا انيس ..
يوم بالليل امكن الساعة 11 اتصل عليها صديق السيد .. سلم عليها..  وهي ردت عليهو بي نفس النبرة الرسمية المعروفة ..
قال ليها والله ياستو انا من يوم شفتك يوم العرس .. و  لاتاريخ اللحظة دي .. لا اتهنيت بي اكل لابي نوم ..
باختصار ياست الجيل بت العمدة ..انا بطلب يدك على كتاب الله وسنة رسوله..
الى اللقاء ..