قــــوة الضمائــــــر ... طارق اللبيب

21

جدو يومو المشى سجل البير في المحلية .. لاقاهو واحد اسمو ايوب .. وعرض ليهو بوكلن جديد بالاقساط .. ويوسف قبلو طوالي .. بدون مايرجع لي حامد ويشاورو .. وطبعا" الخطوة دي فيها مجازفة كبيرة ربنا يستر .. المهم
مرت الايام وجدو شغال شغل جد .. وبعيد كل البعد عن الصديق واولادو .. بس مرات بمشي لي صديق في القهوة يتونس معاهو ويرجع .. وصديق عارفو انو متحاشي الاولاد ..
ويوسف متواصل مع الوالدة .. ومراسيلو ما انقطعت وبقت بي كميات كافية بالاضافة لي .. التوريدة حقة الوكلين .. وحساب التوفير ..
يوم من ذات الايام جنابو معتصم لاقى ملكة ماشة في الشارع .. لاول مرة .. قال ليها ماشة وين .؟ قالت ليهو الليلة ان شاء الله اول يوم لي في المدرسة والسنة دي ان شاء الله ممتحنة .. قال ليها لكن المدارس بدت من زمان .. قالت ليهو ان شاء الله بحصل ..
قال ليها وانا؟
ضحكت ومشت .. اليوم كلو مبسوطة .. المساء طوالي دق ليهم الباب .. فتحو ليهو .. محاسن طبعا مشغولة .. واستلمت الشغل كلو ..وستو بقت مدير لايعمل .. بس عندها الكشكوش .. والتمويل ^_^ ..
اها معتصم قال لي ستو انا يا ام يوسف الانتظار طال علي والليلة شفت ملكة طالعة على المدرسة.. الموضوع ده حدو وين؟
قالت ليهو مدرسة شنو؟ ملكة كان حضرت السنة من اولها.. ماعندها عمار في المدرسة .. ومابتجيب شي .. انت يازول كلم اهلك لزوم تاخد رايهم وتعال لي ..
وبقت تضرب لي يوسف .. وتلفونو مقفول .. اول من دخل الشبكة ولقى امو ضاربة ليهو .. رجع ليها قالت ليهو اسمعني كويس .. معتصم اخو حمودي صاحبك .. قال داير ملكة انت رايك شنو؟ قال ليها وملكة رايها شنو؟
قالت ليهو طبعا" موافقة .. وماعندها اي مشكلة وواقعة بيهو البحر .. قال ليها على بركة الله .. انا ذاتي ماعندي مانع.. الزول راجل .. وزيو في الحلة ذاتو مافي .. ان شاء الله ربنا يتم ليهم على خير .. قالت ليهو خلاص انا بكلمو يتصل عليك .. ويكلمك براهو .. انا زي الماكلمتك . قال ليها خليهو يتصل علي يوم الخميس المساء ..
المهم ستو منتظرة معتصم بي خبر اهلو .. واهلو باركو الموضوع . وفرحو جدا .. لانو الخير وستو.. سمعتهم في الحلة زي الدهب.. مافي كلام .. والبت ذاتها مهذبة ومعروفة ..
قالت ليهو انا كلمت جدو.. قلت ليهو معتصم بضرب ليك .. قال ليك اضرب ليهو يوم الخميس المساء .. وفعلا يوم الخميس معتصم ضرب ليهو .. وجدو بارك ليهو الموضوع .. وقال ليهو مافي زول ممكن يحفظ عرضي وانا غايب زيك ..
ان شاء الله ربنا يسهل ليك ويتم ليك عل خير .. وانا فوضت امي تقوم بي كل مايقومو بيهو الرجال ..
في واحد من اقرباء الخير اسمو عباس .. ساكن في الشقيلاب .. جاء يوم زيارة في البيت .. ولاقى ستو .. وقال ليها طبعا انابكون عم الاولاد ديل .. وداير ملكة لي ولدي ..
الكلام ده بعد ما معتصم ادوهو الكلمة.. والموضوع خلص .. ستو قالت ليهو .. طيب ياعباس كدي النسألك .. انت هسي بتعرف لينا شنو؟
عارف ظروفنا ؟ نحن ناس فقرانين ومفلسين .. قال ليها ماشاء الله احمدي ربك.. يا ست الجيل .. قالو ولدك في الدهب فات الوراهو والقدامو .. وهسي انا سمعت انو اشترى ليك بيت هنا في ام بدة ؟ قالت ليهو .. الكلام ده انت بتجيبو من وين؟..
قال ليها في زول شغال معاهو هناك ..من اولاد جيراني هناك في الشقيلاب ..
وقالو داير يشتري لي اختو بيت في السامراب .. طبعا الكلام ده كلو ستو ماعندها منو خبر ..
قالت ليهو الحمد لله والله ياعباس .. بس الكلام ده انا ماعارفاهو
قال ليها .. الكلام ده قريب في الاسبوع ده .. معناها داير يعملا ليك مفاجأة .. قالت ليهو يعني انت جيتنا لمن عرفت انو وضعنا اتصلح .. وينك زمان ياعباس؟؟
لمن اولاد اخوك كانو مجهجهين .. ومديونين .. وقريبك الخير متدين قروش قدر الليلة وباكر ..
المهم ياعباس انا مابقول ليك رافضة ولاقبلانة..
يهدي ملكة شوفها .. تعالي يا الملكة .. عمك ده .. ود عم ابوك طوالي وداير يتكلم معاك ..
قال ليها ازيك يابتي .. قالت ليهو اهلين ياعمو .. قال ليهو والله انا جيت اطلبك لي ولدي .. قالت ليهو للاسف يا عمي انا مخطوبة ..
قال ليها طيب امك من قبيل ماتقول لي كدي؟؟ مالا بتلف وتدور؟؟ .. قالت ليهو امي عايزة الكلام يجي مني انا .. اناست الموضوع احتمال اغير راي .. واقبل بي طلبك موش وارد ؟
قال ليها فعلا وارد .. قالت ليهو بس ماعندي رغبة اغير راي من معتصم ..
غايتو الزول قنع وقام مشى .. وقال لي ستو اعفي لينا في الفات.. لكن تاني مابنتقطع منكم ..
بعد طلع ستو قالت ليها شفتي ياملكة؟ .. ديل اهل ابوك .. مابعرفو لينا اي حاجة .. ابوك حي وبعد مات مافيهم زول جانا زيارة .. ولا سأل مننا .. هسي بمجرد ماسمعو بي نجاح يوسف .. بدو يجو .. غايتو ناس زمنا ديل يالطيف منهم ..
مابقدروك الا لمن يكون عندك قروش .. قالت ليها يا امي قولى مابقدروك نهائي.. بقدرو القروش بس .. ويومك التفلس تاني مابتشوف فيهم زول ..
طبعا ستو اصلا ابت تكلم ملكة بي قصة انو يوسف اشتري بيت.. قالت لامن أتاكد من يوسف براهو.. حتن اطلع الخبر لانو مامعروف الخبر ده جاي من وين ؟
يوسف اول اتصال لي امو قال ليها انا جاي الخرطوم.. لاني اشتقت ليكم واشوف الحاصل عليكم شنو .. وعندي كم حاجة كدا ..
برضو ابت تسألو من موضوع البيت الجديد ..
بعد اسبوع حامد استلم الادارة.. ويوسف سافر الخرطوم .. وجاء لي ناس امو .. ولقى امو ظبطت بيتها .. وبنت برندة .. وعملت بياض وبلاط .. ونقاشة .. واشترت تلاجة جديدة .. والبيت متغير كلو كلو ..
ولقى ملكة شغالة تكنس في البيت .. قبل مايسلم على امو مشى على ملكة كدا.. مسكها من يديها.. بقى يعاين ليها من فوق لي تحت .. لامن عيونو اتملن دموع ..
وحتن سلم عليها .. بالاشواق الحارة .. والمشاعر الصادقة بين الاخوان اولاد الام ..
وسلم علي امو سلام يبكي الحجر .. اول مرة يفارق امو فترة قدر دي .. ويسلم عليها ويقعد يعاين ليها .. وتاني يقوم يقلدها يسلم عليها
..
سأل من محاسن .. قالت ليهو محاسن والله اصلها مابتقعد في البيت.. ساكة الشغل بس.. وانا حامياني ادخل لي ابرة في خيط.. قايمة بالشغل من مجاميعو .. قال ليها انت خلاص بعد كدا ترتاحي وتقعدي زي السلطانة .. اشتغلتي مافيهو الكفاية.. اشتغلتي لامن فقدتي جناك الفي بطنك ..
قالت ليهو اها انت خبرك شنو؟ .. وامورك الجايها شنو؟ ان شاء الله تتسهل .. المهم قال ليها انا عندي كم حاجة كدا وراجع ..
اولا" انا اشتريت ليك بيت في الشارع الرابع من هنا .. ودفعت فيهو عربون .. هسي جاي اشوفو وتوريني رايك لو نفع بنكمل البيعة .. ولو مانفع نشوف غيرو.. البيت ده مابتناسب مع السلطانة .. قالت ليهو انا بيتي مابمرق منو ..
قال ليها البيت ده عايزين نخليهو لي محاسن واولادها .. تقعد فيهو وتلقى راحتها براها.. وتقوم بي حياتها وخصوصياتها .. بدل ماتحس انها قاعدة مع الناس
قالت ليهو انت قايل محاسن زي محاسن الزمان .. ماشاء الله بقت البلزها مابرميها .. وانا مابقدر افارقها .. قال ليها بس انتي ماعارفة الحاصل ..
الكلام جاييك .. انا سمعت انو راجل محاسن قاعد ليهو مع ناس في عد حسين .. وعايز امشي اجيبو لي اولادو .. ويقعد في بيتو ..ومحاسن بتعيشو تاني .. رايك شنو ؟
قالت ليهو والله لكم انت تراك جاي بي راي كبير .. النشوف محاسن رايها شنو؟ حتن بعد دام انت تتصرف .. قال ليها لالا .. خلي الموضوع يجيها مفاجأة ..لانها كدا بترفضو ..
خلي الكلام يجي منو هو .. مايجي مننا نحن .. انتي بس خليني انا بتصرف .. هسي انا معاي قروش موديهن لي الامين .. قالت ليهو الامين .. شنو كمان ..؟
قال ليها الامين صاحب ابوي الكان اشتكانا في المحكمة في قروشو .. قالت ليهو هو موش قال عفاها لينا؟
قال ليها بس نحن القروش اتوفرت عندنا .. وانا ما اكذب عليك والله لغاية هسي موقفو حارقني .. ولو ماوديت ليهو قروشو مابرتاح ..
جات محاسن وسلم عليها وطايبها .. وقال ليها وين الاولاد؟ قالت ليهو في المدارس ..
قال ليهم انا ماعندي وكت بطلع طوالي .. اتصل علي واحد بتاع امجاد
ومشى للامين .. بصراحة لقى الامين فعلا محتاج للقروش حوجة ماسة .. لانو شغلو ضرب الواطة .. ولقاهو شغال مع زول بتاع مكتب عقارات .. المهم الحصل للامين مافي داعي ليهو .. ود قانون سماوي.. البخيل ربنا بهلك مالو.. والكريم ربنا ببارك ليهو ..
ومرة قال اللبيب .
الصدقة ان بقت بي السر تكون مقبوله..
بتجيب ضعفها واضعاف دبول ودبولا..
والربطة البتسكن في الخزن مطبوله ..
ربنا بهلكا .. وتكمل بلا يحسبولا.
على كل الامين ربنا فرجها عليهو في لحظة احتياج.. ودي برضو انا بعتبرها بي سبب انو سمع كلام امو .. وعفى باقي القروش لي ناس يوسف ..
المهم جدو بعد مشى من الامين .. اتصل على واحد كدا.. وقال ليهو اديني تلفون عوض .. عوض ده زوج محاسن الهارب من العدالة ههه .. اقصد الهارب من المسؤلية ..
قال ليهو انا بديك تلفون واحد اسمو محجوب.. هو قاعد معاهو .. شال منو التلفون ومشى عد حسين .. المهم يازول وصل على حسب الوصف .. واتصل على محجوب .. ومحجوب قال ليهو الزول ده من جا هنا مافي زول سأل منو ؟ انت منو ؟
قال ليهو اصبر النصلك .. قال ليهو اسرع الزول ده احتمال يطلع .. المهم وصل .. وسلم على عوض وقال ليهو عرفتني ياعوض قال ليهو ابدا" ماعرفتك .. قال ليهو انا يوسف جدو .. ود الخير وديوسف ساكن في الشارع القدامكم هنا في ام بدة .
قال ليهو انا ماكنت ساكن ام بدة اصلا .. قال ليهو ياخي .. انت كنت ساكن بي اولادك وهسي اولادك معانا في البيت ..
قال ليهو انا ما متزوج اصلا.. ولاعندي اولاد.. محجوب قال لي جدو انت يا خينا تكون غلطان الزول ماعندو اولاد ..
قال ليهو ياعوض .. نكرتا محاسن.. ونكرت ونكرت اولادك؟ سبحان الله .. قال ليهو محاسن دي منو يازول؟ ..
انت لو عندكم مراة مسكينة .. ولا راجلا ميت ودايرين تزربقوها فيني .. انا ماعندي ليها شي .. والله انا حق العشاء في جيبي مافي ..
قال ليهو يا استاذ محاسن بقت شغالة بالملايين.. مامحتاجة ليك.. وعندها بيت .. احتمال قريب يكون ملكها .. بس والله نحن كنا دايرنك ترجع لي اولادك.. لادايرين منك قرش لاتعريفة .. ولو غالباك العيشة .. محاسن بتعيشك ..
المهم ياعوض انا بمشي.. وبخلي ليك تلفوني .. وتلفون محجوب معاي .. اذا غيرت رايك وداير اولادك اتصل علي .. عشان اوريك تلقاهم وين ؟.. كتب ليهو الرقم في ورقة وعوض استلمو ..
وودعهم وفات .. اها عوض ما قعد كتير بعد جدو .. طلع طوالي ومشى على محل بتاع رصيد.. قال ليهو عليك الله اتصل لي على الرقم ده .. سريع عليك الله
اتصل جدو رد .. قال ليهو يوسف تعال لي راجع انا في الحتة الفلانية .. المهم يوسف قال لي بتاع الامجاد ارجع .. مشى ليهو
قال ليهو يايوسف ادفع للزول ده حق المكالمة لو عندك .. بعد يوسف دفع .. عوض قال ليهو انا راجع لاولادي ..
يايوسف الناس الانا قاعد معاهم ديل.. انا مفهمهم اني ماعندي اولاد .. انا يا يوسف والله طلعت من البيت .. لانو كل شي غلبني .. وماقادر استحمل اشوف اولادي جيعانين وعريانين.. وانا ماقادر اسوي شي .. قلت اخليهم لي الله وافوت .. قال ليهو عليك الله ياعوض ده حنكك؟ غايتو انا اولادي لو ماتو قدامي مابفوت اخليهم .. اموت معاهم .. لكن اقول ليك .. احسن حاجة انك خليتهم لي الله.. لانو ربنا ماقصر معاهم.. وعاشو عيشة احسن من انت معاهم..
وهسي انا خايف انو محاسن ماتقبلك .. ولو مشيت ليها تطردك عديل
عشان كدا لو داير ترجع لاولادك .. خلي بالك معاي في الخطة ..
الى اللقاء ..