قــــوة الضمائــــــر ... طارق اللبيب

25

ستو قالت ليهو حبابك..  يا الصديق ود السيد .. انت اصلا كنت في يوم من الايام مناي في حياتي .. لكن الظروف اختلفت .. والقسمة فرقتنا .. وتاني مابنتلم .. انا يا الصديق اولادك وصلوني في بيتي..  وشايفني زي خالتهم اخت امهم  .. وانا بقيت في مقام الوالدة ليهم  .. مابقدر اجي   ضره فوق امهم .. وابشتن ليهم حياتهم . انا يا الصديق بعد الخير ود يوسف مات..  انا مت معاهو..  انسى الماضي وعيش .. والكلام ده تاني ماتجيبو فوق خشمك..  النبقى اخوان ..
قال ليها انتي لو عارفة العلي..  مابتقولي كلامك ده ..
لكن الحمد لله نقول شنو غير الله غالب .. قالت ليهو اديك المختصر المفيد..  والله لو بقيت انت يا الصديق اخر راجل في الدنيا..  انا ما بقبل بيك ..
الصديق قال ليها ليه الاصرار ده .. الرفض ساكت بقنعني وتاني مابرجع ليك .. خلاص بعد ستو حلفت .. قنع .. وغير رايو منها نهائي ..
وكلم يوسف .. قال ليهو بالمناسبة .. انا طبعا" اتصلت على امك .. وقلت ليها كيت كيت .. عشان انت تكون عارف..  ومايصلك الكلام من ورا .. وامك قالت لي وقالت لي .. طبعا" يوسف اتبسط من موقف امو بسط شديد  من جواهو .. وقبل على الصديق .. قال ليهو طبعا" انا قلت ليك الكلام عندها هي ست الشان .. مع اني عارف انو ده موقفها .. مرت الايام .. صديق عايز يمشي   لي اهلو..  ويشوف بثينة بقت كيف .. ساق معاهو اشرف وجو ..هناك صديق  لقى الوضع متغير تغيير شديد .. 
طبعا الاولاد من سافرو من العرس .. بحكو لي امهم عن  ستو وطيبتها وحنيتها وكرمها .. ودعاء حكت المشهد لمن  صديق كان واقف مع ستو..  وهو ببارك ليها في عرس بتها .. جنب الباب .. وعكست ليها كيف المراة دي مهذبة..  وعندها اخلاق ..
بثينة قالت ليهو خلاص خلوني انا .. امشي اقعدو معاها هي وكت عاجباكم كدي .. بكري قال ليها انا عايزك في كلام برانا يا امي..  اطلعي برة يا دعاء .. انتي يا امي قلتي المراة دي وولدها .. داخلين على ابوي دخلة طمع .. والله المراة دي ماعندها طمع..  بالعكس زولة كريمة .. في واحد هناك من جيرانهم.. اسمو عوض .. بحكي لينا انا واشرف . قال جدو وامو عملو معاهو كيت كيت ..
حكا ليها كل الفلم .. بعد كدا يتخيل ليك كيف انو جدو وامو يكونو خاشين على ابوي طمع؟ ..
وانتي قلتي المراة دي كعبة..  واخلاقها ماتمام..  وعندها علاقة بابوي .. الكلام ده اسألي منو دعاء..  الناس ديل ماعندهم اي علاقة بي بعض ..
قالت ليهو انت يا اكرم .. عايز تصل لشنو ؟؟
قال ليها اذا كان ابوي فعلا عايز الزولة دي .. انتي المفروض تقبلي وماتعارضي ماتبقى انانية وتظلمي ابوي .. لانو ابوي ليهو سنين قاعد كانه مامتزوج  .. وانتي عيانة.. ابوي عمرو كلو يخدم فينا ويسعد فينا .. ليه نحن مانفكر فيهو  هو..  ونحاول نسعدو باي حاجة .. قالت ليهو المشكلة انو ابوك ناكر المراة دي ..  وقال مافكر في  الموضوع .. قال ليها عشان خاطرنا نحن انت أساليهو .. قالت ليهو انتو منو؟ .. قال ليها ده راي انا ودعاء .. قالت ليهو كويس اليجي اشرف..  ان قال زي كلامكم ده .. انا تاني ماعندي كلام ..
وكت  الصديق واشرف وصلو ..وسلمو عليها..  واطمنو على صحتها .. الصديق مشى الديوان واشرف .. قعد متوتر وقال لي امو يا امي .. ابوي ده والله محتاج يتزوج ..
وانا شايف انو لو هو عايز ستو دي انسب انسانة .. تكون في حياتنا .. كلامك عنها طلع كلو كضب .. الله يسامحك .. انتي عارفة يا امي ابوي في الشارع كلو بشكي وببكي .. انو ماعندو حظ في الحياة.. وما حاسي بي طعم السعادة .. وبدعي ليك ربنا يشفيك ويقومك بالسلامة ..
بثينة سكتت مسافة وقالت ليهو شكلكم كلكم متواصين علي ومتفقين بالتلفونات ..
امشي نادي لي ابوك من الديوان .. قال ليها ابوي معاهو ناس.. قالت ليهو اول ما يمشو..  خلي ابوك يجيني .. اها لمن الصديق جاها ..
قالت ليهو..  انا عايزة اسألك يا الصديق .. ستو حكت ليك اني اتصلت عليها ؟؟
قال ليها ابدا" والله ..
قالت ليهو  ..انا طبعا" اتصلت على ستو..  في تلفون دعاء بتي واتكلمت معاها..  كلام زي الحنضل .. والله ماردت علي بي كلمة .. غير ما عاهدتني انها ماممكن تجي ضرة فوقي .. لاني زي اختها .. قال ليها والله اول مرة اسمع بالكلام ده  متين؟..  قالت ليهو يوم العرس .. لكن اسمع يا الصديق..  انا غيرت راي .. ومافي داعي انا اكون انانية بي سبب الغيرة .. انا عارفة نفسي عذبتك معاي كتير .. انا هسي اديتك الاذن .. ورضيانة امشي اعقد عليها .. واولادي كلهم ده رايهم ..
قال ليها ياحليلك يا المسكينة .. انتي قايلاني انا راجي رايك وراي اولادك .. انا براي اتصلت عليها تلفون .. وطلبتها على كتاب الله وسنة رسوله .. بس هي رفضت وحلفت قالت لي لوبقيت اخر راجل في الدنيا انا مابقبل بيك .. ولاعندها رغبة في زواج من اساسو ..
اتاريك انتي السبب يابثينة الله يسامحك..
اشرف قال ليهو يابوي .. ستو .انا بقدر اقنعها .. دعاء قالت ليهو هوي انت شنو كمان؟؟ والله انا دي البقنعها ..
الصديق قال ليهم لاتقنعوها ولاشي..  انا ذاتي صرفت النظر عنها..  والموضوع ده تاني ماتفتحوهو ..
بثينة قالت ليهو كويس..  حتى لو ما ست الجيل .. انت لازم تتزوج.. اي مراة تاني ..
لانو كدا حرام وانا مامرتاحة نفسيا" .. انت لو بتعزني ريحني..  انا حاسة اني بقيت انانية .. لتل معذبة يا صديق ..
وانت شايفاك كل يوم نفسياتك ماشة في الارض .. قال ليها مافي مشكلة يا بثينة..  انتي رايك يمشي .. وامانيك بحققها ليك ..
قالت ليهو مدينة بت ميمونة..  راجلا طلقها لانها مابتلد .. وانت ما محتاج لي جنى .. وهي محتاجة لي راجل يكون ليها ضرا .. رايك شنو؟؟ .. قال ليها مافي مشكلة .. نمشي باكر نطلب مدينة  بت ميمونة من ابوها .. تاني في شنو؟
وفعلا باكر الصباح الصديق ساق اشرف..  ومشى لي والد مدينة وطلب .. واداهو طوالي بدون تردد .. ومدينة وافقت..  وحددو العقد بعد اسبوعين .. والصديق قال لي اكرم .. افصل جزء من البيت ده .. مع الاوضة الشمالية دي..  وجهزو بي سرعة ..
المهم الصديق ظبط امورو وسافر ..
بعد اسبوعين الصديق جاء .. ومعاهو اشرف وجدو وكم نفر كدي .. جدو لاول مرة يزور بيت ناس الصديق .. وشاف بثينة .. وقعد اتونس معاها ..
ومبسوط جدا .. بي زيارتو ليهم .. ومن هناك اتصل على امو..  قال ليها .. انا في بلدكم  يا امي .. نحن مشينا مع عم صديق .. الليلة زواجو ..
قالت ليهو سجمي يتزوج كيفن.. ومرتو عيانة؟ .. قال ليها .. والله ياهو الحاصل .. الراجل عايز يمارس حقو الدستوري.. ومن حقو طبعا" ..
سبحان الله ستو بعد المكالمة دي ..حست بي غم عجيب في قلبها .. لامن بكت .. واخدت راحتها في البكاء .. لانو البيت فاضي ..
على كل حال..  الصديق عرس مدينة بت ميمونة .. وستو مرقت بي قد القفة .. بس ارتاحت من الشكوك والظنون والعذابات النفسية الحاسة بيها ..
وجدو ذاتو مبسوط من الخطوة دي .. لانها ازالت من جوتهو عب نظرات ناس اشرف .. المهم
مرت الايام وعجلت الحياة دورت..  زي المافي شي .. والشغل تمام .. وصديق شوية الدبرسة خفت منو .. بس برضو تحس بالحزن  الفي عيونو مازال ..
معتصم وملكة في اتم الصحة والعافية .. وكل يومين تلاتة بجو ياخد ليهم يومين مع ستو في البيت .. وملكة عايزة تقعد مع امها .. ومصعتصم عايز يقعدها مع اهلو .. في الأخير ستو حكمت قالت ليهم نقسم الاسبوع .. تلاتة يوم معاي .. وتلاتة يوم في بيتك .. والجمعة بالبدل .. ووافقو الاتنين ..
الليلة جدو دفع القسط الاخير في البوكلن..  وبقى حقو .. والشغل ماشي .. يعني مازي زمان لكن الحمد لله . وعوض راجل محاسن شغال معاهو ..
ووضعو تمام .. وماشي كويس شديد .. ومحاسن ماسكة المناسبات .. وبقت من المشهورين في امدرمان .. في تظبيط الوجبات ..
حمودي اخو معتصم صاحب جدو .
خطب ليهو واحدة من بنات الحلة .. لكن وضعو متأزم..  لانو حايم بي شهادتو..  ومالاقي شغل .. واقترحو عليهو يسوق ركشة .. وهو رافض .. قال ليهم اسوق ركشة وانا عندي بكلاريوس؟
قالو ليهو ياهو البلد دي ماشة كدا بالبركة .. وشكلو ح يوافق لانو ماعندو حل ..
ومرت الايام والشهور .. بعد سنة من الكلام ده .. جدو امو اصرت عليهو يتزوج .. قال ليها جدا ما مشكلة .. بتزوج ... لكن البت العايزها انا احتمال انتي ماتوافقي بيها .. قالت ليهو الكلام كلامك انت .. انا عايزة اعيش معاها.؟ انت قايلني من الحريم الجاهلات؟ الواحدة تقعد تتسيطر في اختيارات اولادها .. دي حياتك وانت المسؤل منها .. قال ليها ياسلام عليك يا ام يوسف .. بس انا خايفك تنطي من كلامك ده .. بثبتي علي كلامك؟؟ ..
قالت ليهو بس انت قول ..داير منو ؟
قال ليها دعاء بت عمي الصديق .. بت ادب وجمال واخلاق .. وابوها راجل .. ونسب الزول يتمناهو .. قالت ليهو .. تاااااني يايوسف ؟ تااااني داير تشربكنا في ناس صديق؟ .. دعاء مافيها كلام والله .. لكن بثينة ما بتقبل بيك .. بثينة بتكرهني .. قال ليها انتي بس وافقي .. والباقي خليهو علي انا .. قالت ليهو ناس الصديق باب..  وانا قفلتو بي طبلة ماتفتحو لي تاني يا جدو .. راعي لي مشاعري انا .. المهم انا مارضيانة..  والموضوع ده اقفلو مني ..
الى اللقاء ..