إنهيار

الجزء 16

بكري : ما ببعيها يا ابوي ، لان المدرسة بعيدة و انت كمان ما جبتها لي عشان تبعيها

اسماعيل : كمان بترد لي الكلمة بالكلمة ، اسمع هنا من الليلة قرش واحد ما بديك ليهو و مش قدرت تجيب العجلة ، جيب حق قرايتك كمان

بكري : انت اصلا بتدينا يعني !! ، مجوعنا طول اليوم ، حارمنا و كل الناس عارفنك بخييل و بيقولو لي ابوك بخييل

اسماعيل : كمان بتعلي صوتك علي ، دا اخر تريبة امك ليك

اسماعيل يضرب بكري ضرب شديد و يجو البنات و امهم عشان يحجزوهو منو و البنات يسوقو بكري للغرفة للتانية

اسماعيل : اطلع برا من البيت دا ما عايز اشوف وشك تاني

هناء : استهدى بالله يا راجل و العن الشيطان ، حيمشي وين يعني

اسماعيل : ولد يعلي صوتو علي ما بقعد لي في البيت دا

هناء : انت الكبير خليك اعقل و عايز تخت راسك برأس شافع

اسماعيل : دا بقى اطول مني ، قال شافع قال و كمان ما بخجل يقول عايز قروش و هو عندو عجلة ، هسي قروش العجلة دي لو كان خلاها لمدرستو ما كان احسن

هناء : العجلة دي جابها ليهو خالو و كمان المدرسة بعيدة و الولد تعب من المشي كداري

اسماعيل : انتي بتحرشيهو علي و لا شنو

هناء : ما بحرشو لكن دي الحقيقة ، انت ليه ما بتحن عليهم الاولاد ديل ، نفسي اعرف!!!

اسماعيل : بطلي نقة يا مرة قبل اكشطك كف هسي و انا كلامي ما بغيرو ، الولد دا ما عندي ليهو قرش تاني

هناء : حسبي الله و نعم الوكيل ، حسبي الله ونعم الوكيل و تمشي من جنبو

في الجانب الاخر

نسرين : ما تزعل يا بكري ، دا ابوك و ما صاح تعلي صوتك عليهو مهما يعمل

بكري : هو مش ابوي طيب ليه ما بعمل زي الاباء و ليه ما عايز يجيب لي الحاجات زي بقية الاولاد

نسرين : ابوك بكون ما عندو ، و لو عندو ما ببخل علينا

بكري : عندو لانو اصلا ما بصرف علينا ، طيب بودي قروشو وين !!

نسرين : ما معروف الحاصل عليهو شنو ، اعذرو

تجي هناء داخلة

هناء : ما تزعل يا ولدي من ابوك و حاجات مدرستك دي انا بجيبها ليك

بكري : حتجيبيها لي من وين يا امي

هناء : بتصرف ، انت ما تشيل هم

بكري : لا يا امي ، انا حأجمد السنة دي و حاشتغل عشان اوفر حق قرايتي

هناء : اوعى تعمل كدة يا ولدي ، و الله ما حارضى عنك لو عملت كدة

بكري : لكن ابوي ما حيدفع قال و انا عارفك ما شغالة و القروش العندك اديتيني ليها اجيب بيها العجلة ، حتجيبي من وين يعني

هناء : ما عارفة لكن بتصرف و ربنا بفرجها

بكري : خلاص انا حأبيع العجلة يا امي ، عشان اقدر اتم السنة دي و ابوي بطريقتو دي ما حيصرف علي تاني حتى لو دخلت الجامعة ، عشان كدة خليني اجمد السنة دي عليك الله و اشتغل و امتحن السنة الجاية

هناء : لا اوعك تبيع العجلة و كمان ما حتجمد السنة و لو عايز تشتغل اشتغل في الاجازات بس

نسرين تقاطعهم : يا امي خلاص انا بحلها ، انا حامشي السوق ابيع التلفون دا و اصلا انا ما بحب الجلاكسي و حأجيب لي ربيكة اتواصل بيهو

هناء : انتي مجنونة 😳 ، التلفون دا يادوب جابوهو ليك و عايزة تبعيهو !!

نسرين : ☺ ما مشكلة يا امي ، و القرش الابيض لليوم الاسود ، في النهاية كلهم تلفونات و الغرض التواصل بيهو بس ، انا حأشتري تلفون صغير و ابيع دا

هناء : ما عارفة اقول ليك شنو والله ، بالجد نفسي ما احرمكم من حاجة و اجيب ليكم اي حاجة نفسكم فيها لكن العين بصيرة و اليد قصيرة و تبكي هناء

نسرين : ليه تبكي يا امي و مفروض انتي تقوينا 😭

هناء : سامحوني يا اولادي

نسرين و اخوانها كلهم يعقدو يبكو مع امهم لانو حاسين بظلم كبير

نسرين تقش دموعها و تستغفر ربنا و تمشي السوق عشان تبيع التلفون و تمشي معاها عبير و في الاثناء دي يتصل عليها مصعب

مصعب : الو نسرين ، كيفك

نسرين : اهلين مصعب ، الحمد لله بخير

مصعب : وين انتي ، جنبك جوطة شديدة

نسرين : انا في السوق برجع ليك بعد اصل البيت ان شاء الله

مصعب : طيب كويس

يتبع...