عبير : انا ما بعاين للزي عمر دا ، انا عايزة واحد شغال و هيبة و عندو عربية و عمارة حقتو براهو و يغرقني دهب و قروووش كتيييرة تعوضني حرمان ابوك لينا
نسرين : احلامك بتوقعك على رقبتك و بتتكسر و بالجد خايفة عليك ، المرطبين ديل بعاينو للناس الزيهم و نادرا يعرسو واحدة من الطبقة العادية ، عشان كدة احلمي على قدرك يا اختي و عمر الرافضاهو دا يمكن لو وافقتي بيهو ،، اهلو يعاكسوك و يرفضو كمان و احتمال بسيط يوافقو
عبير : ما تخافي علي و شوفي لو ما جبتو ما ابقى اسمي عبير ، لكن ما عمر !! ، حأجيب فارس احلامي
نسرين : الله يحفظك يا اختي و يديك الفي مرادك و تعالي هنا مليون مرة قلت ليك الطرحة دي جيبيها لقدام لانو شعرك كلو برا و ما صاح تظهريهو ناسية انو كل شعيرة بي جميرة
عبير: الطرحة ما بتثبت يااااخ
نسرين : امسكي الدبوسة دي نشوفها حتتفك كيف تاني و اتحشمي يا مرة ههههههه
عبير : يمرمر راسك دا هههههه
، يلا انا ماشة و حأغشى الولدين الشاكلوك ديل بس وصفيهم لي
نسرين : شايفة الولدين ديك اللابس قميص اسود و التاني لابس ابيض ، ديل هم لكن ما تساليهم لانو بكونو شافوك و استنتجو اي حاجة لانو من قبيل بعاينو لينا
عبير : كويس و تمشي و لمن تجي جنب محمد و علي تقول ليهم
عبير : خلو الناس في حالها و بطلو حركات النساوين دي لانو النساوين كمان خلوها و تمشي تخليهم
محمد يقول لعلي
محمد : منظرنا بيش بقى
علي : يلا نعتذر لنسرين
محمد : كويس
محمد و علي يمشو لنسرين
محمد : و الله ما عارف اقول ليك شنو ، بعتذر كتير والله على الحصل قبيل
علي : نحن ما كنا عارفنك تؤام عشان كدة اعذرينا
نسرين : حتى لو ما كنت تؤام ، دا ما بديكم الحق انو تحاسبوني و تجو تكوركو فيني قدام الناس كأني مجرمة و بت ما نافعة
محمد : والله متاسفين جدا
نسرين : حصل خير ، المهم اتاكدت اني صاح لمن رفضت امشي معاك الكفتريا و عن اذنك لان الاستاذ جاء و عايزة اتابع المحاضرة
علي : بنتمنى تقبلي اعتذارنا
نسرين : العفو و العافية
محمد يطلع على قاعتو و زعلان من نفسو و قال حيعمل المستحيل عشان يرجع ثقة نسرين فيهو و تسامحو من قلبها
عبير تمشي قاعتها و تلاقي سجود
سجود : اها وريني الشمار يا بت
عبير : شماااار شنو !!!
سجود : شمار عمر ، كان عايزك في شنو !؟
عبير : ايوااااا عمر ، قال بحبني و انا رفضت
سجود : اااااه الحمد لله
عبير: قلتي شنو !!
سجود : قصدي كويس انك رفضتي ، دا زميلنا و مشوارو طويل
عبير : اي عشان كدة رفضت
سجود : على فكرة معتز امس ، انبهر بيك
عبير : انتي جادة 😍
سجود : اي والله جادة ، و كمان قال حيجي يوصلني كل يوم بس عشان يشوفك
عبير : عشان يشوفني بس 😍
سجود : نفسي تكوني زوجة اخوي و ان شاء الله يحصل بينكم نصييب
عبير : 🙈🙈 انتي بالجد اعز صحبة لي و حبيتك من اول يوم شفتك
عبير قالت في نفسها مع انو مرات ما بطيقك لكن ما دام عايزاني لاخوك حتتبقي حبيبتي و اعز صحبة و شكلك نظرتي فيك انك مغرورة غلط كانت و سرحت انو اتزوجت معتز 💑 و لابسة الدهب و العربية اخر موديل
سجود بينها و بين نفسها مسكينة يا عبير ، بتحلمي تعرسي اخوي ، يا مقطعة يا ام جزمة واحدة ، تشميهو قدحة ،،، و انا مبرووك لي العربية 😁
..
يتبع...
