عاشروهن بالمعروف
الجز 3
اخذت اجازه من المعمل وبقيت اشرح رياضيات معظم الأوقات امها تبقى يمنا بس هم مرات تعوفنا لوحدنا نوال چانت ذكيه وتستوعب بسرعه بس تكره الرياضيات وهو منو يحبه عرفتها اكثر وعرفتني واقتنعت بيه زوجه أكثر مو بس الجمال يخلي الرجال يحب البنيه ويتعلق بيها مرات الضحكه الادب خفة الروح احنا عايشين بلد الفرح بيه محسوب والانسان من يرجع للبيت يريد گدامه انسانه شوفتها تنسيه الهم نوال من هذا النوع حركه خلاله دمها خفيف
منگدر نحچي اني وياها اخاف امها تسمع بس اكتب الها على الدفتر كتبتلها
احبچ
احلف
وعيونچ
راح ارسب من وراك
مترسبين جاوبي گتبت احبچ لاتتهربين
جانت جريئه گالتها ماكتبتها احبك
اكيد اذا يختارون اسعد شخص بالعالم اكون اني خلص الاسبوع بسرعه واستقبلتني امي تحقيق بالي مو يمها
مذكرات نوال (والنبي راح
ارسب من ورا قاسم )
وخلصت الامتحانات وحددنا موعد الخطوبه امها ماخلت شي ماطلبته وامي ماخلت شي ماعترضت عليه ومع ذلك تمت الخطوبه بهاي الفتره بدت الحرب الكلاميه بين العراق و الكويت والوضع متازم كلشي غالي وطلبات مرت عمي كل يوم تزيد اني ونوال اتفقنا اسوي كل الي تطلبه امها مقابل تتحمل امي ماهمتني الديون والسلف والفلوس الي اخذتها من اخواني نجحت نوال واختارينا شهر الثامن للزواج ثاني يوم بهذا الشهر العراق دخل الكويت اني چنت بالبصره اخذت اجازه ردت اروح لبيت عمي حتى اگلهم بعد اسبوع الزواج امي أصرت تروح وياي وراحت حددنا الموعد وترخصت من عمي اطلع اني ونوال وافق بس امي رادت تروح ويانا
بالله هاي صايره شتسوي تروح ماادري اني طالع ويه خطيبتي امي شكو حمايه مگدرت اكسر بامي گدامهم وگتلهم نروح الكاظم نزور طلعنا نوال مبين خايفه من امي هواي وگوه تطلع الحچايه وامي حچيها الها كل بسامير واحنا اثنينه ساكتين بعدين نريد نرجع نوال گالت اول يوم العرس انبات بالفندق امي ردت عليها انتي تخافين تستحين حتى تريدين العرس بالفندق وابني مديون عليمن هالمصاريف مو كافي مادري شسويتي وخليتيه يعوف مي افتهمت قصد امي من جيتها وياي عدها امل تخرب هالزواج امي اسلوبها وي كل الچناين هيچ لكن نوال زايد وياها وتعرفون ليش نوال ظلت تبچي بالشارع ومتقبل تتحرك من مكانها ظلينا اني وامي نصيح عليها الناس تتفرج علينا واحنا بالشارع صعدنا تكسي مقبلت تحچي وياي وحتى بالعشى مشفتها بس ماوصلت الي صار لأهلها
بصراحه اني كان اكون عادل بين الاثنين لكن لو صاف ويه نوال تكبر المشكله ويتاجل الزواج اجى موعد عرسنا بيوم العرس نوال مريضه وماخذيها للدكتور فلوانزا ودرجة حرارتها عاليه منگدر ناجل لان عمامي واصدقائي والكل مستعد اني اول واحد باولاد عمي ياخذ بت عمه لان احنا مشاكل وممتصافين ونوال گدامها ايام سوده ويه امي وبقت حتى بالزفه متحچي وياي جنت حاجز
بالفندق مثل مارادت وزفونا للفندق المرض مبين عليها والزعل حاولت احچي وبچت
احسن ابچي هذاك اليوم مگدرت امسح دموعچ هسه اگدر كافي نوال امي گالتها بدون قصد وتندمت من وصلنا للبيت شوفي هذا اليوم راح نتذكره طول عمرنا تريدين تتذكريه تگولين چنت ابچي وماحچي ويه قاسم ومزاعلته ومريضه
وجوعانه همين اريد اگول
هسه انتي هذا الهامچ
لعد ابات جوعانه
صار هسه انزل واجيب كل الي تريديه
وتعوفني وحدي اخاف
قفلي الباب موتنامين وتخليني ابات بالشارع
والله تستاهل تبات بالشارع
نزلت چبت اكل واكلنا وسولفنا الادويه ماثره عليها تزوجنا وهي متدري
الصبح حچيت وياها علمود امي لازم تتحمل وگالت تتحمل
قاسم انت فاس وگع بالرأس امك راح تلعب بيه طوبه بس اتحمل لان حبيتك
دگولي كاتله روحچ عليه
محد كاتله روحها غيرك حتى ابوي يگول قاسم ذابح روحه صدوك عمي مچذب ذابح روحي عليچ
مرت يومين من زواجنا بدون مشاكل باليوم الثالث تابع
