عاشروهن بالمعروف
الجزء 7
هاي التكملة
نوال عرفت بيه شي هاي عشرة عمر من النظره تعرف شبيه نوال دائما من تشوفني مهموم تجيب بطانيه ونگعد گبال التلفزيون نتغطى ونظل نسولف ونتفرج تلفزيون ونغفى بمكانه يمكن هاي اخر مره راح نگعد هاي الگعده سوا
شبيه الحلو صار يومين مهموم
ماكو شي نونه بس نصي التلفزيون وخلينا نسولف
اوكي سولف
تدرين اني شگد عمري
عزا بس لاعيد ميلادك واني ناسيه
لامو عيد ميلادي قصدي اني كبرت ولو صاير عدنا طفل من اول چان هسه بالابتدائيه
انت گلت اريد الطفل من عندچ مو من غيرچ وتدري ماخليت شي ماسويتها حتى يم سكة القطار گاللولي نامي وسويتها
نونه احنا بغربة واثنينه يرادلنا طفل
قصدك نتبنى طفل
شنو نتبنى الي اتبناه شعرف عنه وحلالنا يروح لواحد مو من صلبي
لعد شتريد قاسم شنو الحل
ترددت اگول حظنتها لان اعرف راح تصيح وتنهار
نونه خلي اتزوج وحده تجيب النا طفل وانتي ربيه
رادت تگوم والدموع وگعت على قميصي مو دموع نار
نونه اسمعيني زين انت حبيبتي ومستحيل وحده تاخذ مكانچ لو تخلف عشره اني ماراح اخذها لان انتي مقصره وياي ولا محتاج زوجه محتاج طفل يشيل اسمي وكبري وعجزي
وخر عني قاسم والله حرامات العشره وياك لوانت مريض چان ظليت عمري كله خدامه جوا رجليك ياالله شگد غبيه اني وينه حچيك الي وعودك شسويتلك اني يعني هم محرومه من الأطفال وهم تجيب وحده تاخذ رجلي وتقهرني هي تخلف واني لا
نونه والله الوضع مراح يصير هيچ وحده هي مستعده تنطيچ الطفل
يعني عندك وحده ومخطط وياها منو احچي
صديقتچ سعاد
صدوگ تحچي ليش هيج شسويتلكم اني تريد تنتقم مني وتواعدها من وراي
لا مواعدها ولا شايفها قسما بالله قبل يومين اجتي عليچ وگالت تزوجني اجيب طفل لنوال وتريد بس رجال يصرف عليها
لا اريدك ولا اريد طفل من هاي السافله طلگني
نونه لاتتخبلين لو اموت مااطلگچ
مثل ماگلت لو اموت مااتخلى عنچ هذا شرطي متگدر تتزوج اذا متطلگني طلگني وهسه الليله مابات هنا وياك
وصعدت لغرفتها حضرت جنطه واسمع صوت بچيها وتسب وتغلط على سعاد وعلى اليوم الي تزوجتني بيه سمعتها تگول هذا ابن عمي وهيچ يسوي مخليتها تطلع گتلها هذا بيتچ اني اطلع گالت روح بات يم سعاد بلكي اليله تحبل وتجيبلك طفل ظليت واگف گبالها وعيني عليها ظلت تبچي وگعت على القنفه اخذتها بحظني واحس بحرارة دموعها ودگات گلبها يريد ينفجر ماحچيت وياها وبقينا نايمين بنفس مكانه
مرت اسبوعين متحچي وياي ولاتگعد يمي ومن ادخل البيت تصعد لغرفة ثانيه متطلع منها ورا الاسبوعين رحت لغرفتها گتلها اسف خلص انسي الموضوع گالت
مااگدر انساه بس انت طلعت من گلبي ومالي اي علاقه بيك كمل حياتك ويه سعاد انت ماتستاهل احزن عليك حتى شوف ياوقت تريد تروح للمحامي حتى نقدم اوراق الطلاك وگلي شوكت تريد تتزوج حتى اسافر اريد اروح للعمره حتى ربي نسيتها وظليت اركض علمود ناس متسوا
نونه اني ماطلگج بس على الورق لان ميصير زوجتين تعرفين
والله تطلكني على الورق على غيره تحلم بعد اصير لك زوجه
والله احبچ
تبرى منك الله
مااگدر اكتب مذكراتها بهاي الايام صعبه حتى اني ماتحمل اقراها بس اذا اكو شخص مذبوح فهو نوال واني الي ذبحتها
رحنا ثاني يوم للمحامي من انطاها توقع الورقه ضميت كلمة طلاق بايدي حتى متنقهر من تشوفها وفعلا ماتحملت ورادت توگع من وكفت ودفعتني وطلعت لحگتها بالسياره وصلت للبيت تعيط اعياط اخذت جوازها سألتها وين مسافرة گالت للعمره وسافرت وعقدت على سعاد شيخ لان إجراءات الطلاك تاخذ وقت واخذتها للبيت
سعاد اكبر من نوال وطبعها يختلف وماعندي اي مشاعر اتجاهها واني اتفقت وياها متسبب اي مشاكل لنوال وتبقى نوال زوجتي وام البيت الي صار بيني وبين سعاد بذيچ الليله شي بعيد عن الحب مثل الواجب اريد اسويه وانتظر نتائجه
گعدت الفجر عندي صديق هو زوجته راحوا عمره اتصلت بيهم حتى اسال عن نوال گالوا زينه طلبت الرقم مالتها مگدروا يجيبوه وعرفت بعد العمره تروح للسيده زينب
كرهت روحي اكثر وسعاد مصيبه وجبتها لروحي فكرت اگلهااذا يصير عدنا طفل تنطينياه واطلگها وماعندي مانع اصرف عليها طول العمر بس ترجع نوال متلگاها هنا چانت تشوفني ادور رقم نوال حتى اطمئن عليها ماتحملت سعاد وتعاركت وياي
ترى دور العاشق الولهان ابد ماليگ لك انت طلگتها وتزوجت عليها جوز منها احسنلك
لاتتصورين بيوم اعوف نوال لوتجيبين عشر اطفال
يمعود انت عفتها وماصدگت اني گتلك اتزوجني واجيبلك طفل صح انت حبيتها بس حبيت روحي اكثر خليتها تكعد وتتعب وبيت ومحل وشهاده ومن ماگدرت تجيبلك طفل بدلتها چنت اگللها هذا الحچي وهي متصدك تگول قاسم يحبني اكثر من نفسه غبيه
عرفت ان سعاد مقاصده الستر من هذا الزواج بگد مارايده تحطم زواج صديقتها نوال واني ساعدتها على هذا الشي
مرت شهرين ونوال ماكو خبر منها عرفت هي تتصل بالمحل ويحولولها فلوس اخذت الرقم واتصلت بيها اول مسمعت صوتي سدت التلفون
تابع....
