Mga Tula Ng Isang Huwad Na Makata

Papel at Tinta

Sa blankong papel tayo nagsimula

Malinis, walang bahid at wala kang makikita

Hanggang sa dumating ang tinta

Na syang nagbigay-buhay sa istorya nating dalawa

Nagsimula sa mga simpleng salita

Na napunta sa mga pangungusap na mahaba

Unti-unti, tayo'y nakabuo ng mga talata

Hanggang sa nauwi sa mga kabanata

Habang tumatagal ang pagsasama

Napupuno ng salita ang bawat pahina

Kumakapal na pala ang ating nobela

At hindi tayo nauubusan ng tinta

Sa bawat salita'y nanunuot ang ligaya

Sa bawat pangungusap ay bumabalot ang tuwa

Sa bawat talata tayo ay masaya

Masaya tayo sa bawat pahinang nalilikha

Syempre sa bawat istorya hindi lang puro saya

Mayroon ring dumarating na mga problema

Habang tumatagal ay dumarami sila

Unti-unting nakakaapekto sa masaya nating istorya

Dito na magsisimula ang pagkasira

Mawawalan na nang rima ang mga talata

Mapupuno na ang papel ng malulungkot na salita

Na syang papatay sa ating magandang simula

Mga salitang hindi na kayang mabura pa

Mga pangyayaring hindi na maitatama pa

Unti-unti nating mararamdaman ang pagbabago

Mga pangungusap ay magiging magulo

Bawat talata ay magkakasalungat na

Pagkakasunud-sunod ng mga pahina ay wala na

Hanggang sa hindi na tayo magkaintindihan

Hindi na tayo magkasundo kahit isang pahina lamang

Kung dati'y sabay nating ninanamnam ang bawat talata

Ngayo'y magkahiwalay nating binabaybay ang bawat pahina

Habang ako'y pilit na bumabalik sa simula

Ikaw naman ay nagmamadali at pawakas na

Ang istorya natin ay magwawakas na pala

Akala ko'y magiging masaya ang pagtatapos ng ating nobela

Ang ating tinta ay naghihingalo na pala

At wala na tayong papel na masusulatan pa

Siguro nga hanggang dito na lang tayo

Pero ayoko sanang ganito ang pagtatapos natin

Umaasa pa rin akong muling mabubuhay ang ating tinta

At sumulat sa papel ng "Itutuloy..." pa.