توأمي ولكن أنا غير و مالي مثيل

تكملة بارت ١

في البيت الكبير ذو الثلاث ادوار أشرقت الشمس على ناس ترسم البسمة على وجههم صحت الصباح وصارت تتمغط وتحس بنشاط،
: أصبحنا وأصبح الملك لله،، قامت ودخلت الحمام ( اكرمكم الله) وخذت شور ولفت الجلال و صلت وعدلت الجلال ونزلت على المطبخ
وسمعت صوت أعز إنسانة على قلبها: صلحي القهوة يا أندريا ! مو كذا!! ياربي على هالخدم!! يعني لازم الواحد يسوي كل شي بنفسه؟!!
قربت وباستها على خدها: صباح الخير يا احلى جدة في الدنيا!
الجدة: هلا وغلا بروح جدتها هلا بالشيخة دانا!
دانا: ههههههه وش دعوة يالغالية ؟ شيخة مرة وحدة!!
الجدة: ايه!! وشيختهم كلهم بعد!!
دانا: وش فيك يا تاج راسي زعلانة؟
الجدة: من هالخدم رفعوا ظغطي من ساعة احوس معهم علشان قهوة لجدك وهذولا بقر ما يفهمون!!
دانا: هههههه خلاص يا قلبي إنتي انا الحين اسويلك احلى قهوة!
الجدة: جعل عيني ما تبكيك يا بعد قلب جدتك!!
بدت دانا تسوي القهوة وتسولف مع جدتها،وفجأة!
جتهم تركض ومعاها عبايتها: صبااح الخيير!! وبدت تاكل بفجع!!
الجدة وعيونها طالعة: هوو!! شوي شوي يا مدى لا تموتين!! اللي يشوفك يقول ما شفتي اكل من قبل!!
مدى: جدتي!! الله يهديك الحين تصكيني بعين وأموت!!
الجدة وهي تمد عصاها عشان تضربها: ياللي ما تستحين تقولين عن جدتك كذا!!
دخلت الثانية: عادي يا ام الجدد ترى الدنيا ما تسوى خليك ريلاكس يا حلو!
الجدة: كملت والله! مدى و أسير اجتمعو!! عز الله رحنا ورا الشمس!! وبعدين وشو ام الجدد؟! احترميني يا بنت!
أسير : جدجد لا لا احنا كذا مراح نتفاهم أبدا!!
الجدة وهي تضربها بالعصا: جدت ركبتك ياللي ما تستحين !! والله الشرهٓ على بناتي اللي مخلينكم على حل شعوركم!!
مدى: ما خبرت ان احنا صلع ومحلقين شعورنا!!
أسير : اي والله شكل جدتي خرفت!
الجدة بعصبية : خرفت علومك ياللي ما تستحين!!
دانا: هههههه ما عليك منهم يا جدتي ترى هم بس يبغون يرفعون ظغطك!!
عهمالجدة: حسبي الله ! رفعوا ظغطي صدق!
دخلت وهي تحب راس أمها : مين اللي رفع ظغطك يالغالية؟!
الجدة: بنتك و بنت اختك! في احد غيرهم؟!
سلماء: أسور وش مسوين في جدتكم إنتي و مدو؟؟
مدى ببراءة: ما قلنا شي!! أصلا احنا نحب جدتي فديت هالعيون الكحلية!
أسير وهي هي تغمز: وانا أقول جدي وش لون طاح بغرامك يا حلو!!
الجدة: وقص في لسانك إنتي وياها! صدق اللي اختشو ماتو!
سلماء و دانا: هههههههه
الجدة و هي تلتفت لسلماء: الا وين اختك و عيالها وباقي عيالك؟؟
سلماء: العيال زي العادة عند أبوي، ونجود وبناتها شوي ونازلين
نجود وهي تدخل: مين اللي سال عني؟؟
الجدة بحب : تعالي يا قلب اميمتك جنبي افطري
نجود وهي تبوس راس أمها : صباح الخير يالغالية.
الجدة: صباح النور والسرور.
دخلوا وهم يتناقشون: المنطق العلمي يقول غير كذا!!!
: لا لا التحليل يقول الكلام وماله علاقة بالمنطق!!
الجدة تطالعهم باستغراب وهي مو فاهمة شي!: وش تقولون أنتم !؟ وليش ما تصبحون ولا تسلمون ؟ داخلين على كفار؟؟
روابي: آسفة جدتي صباح الخير.
رواء: صباح الخير
الكل:صباح النور
رواء: أقولك في كتاب فرويد المعلومة غير صحيحة !! ويفسر التصرف والنتيجة بطريقة ثانية!!
روابي: بس لو حسبناه بالمنطق تكون النتيجة إيجابية!!
مدى : وش عندهم فرويد و أفلاطون يتهاوشون؟؟
رواء: إنتي جاهلة!! والتحليل النفسي يقول ان إنتي من نوع الفئة من الناس اللي استيعابها بطيء فانطمي!!
أسير: هيي!! كلش ولا مدو لا تغلطين يا فرويد النفسية!!
روابي تهز رأسها بأسف: جهلة والله جهلة يختي الحسابات تقول ان عددهم قاعد يزيد!!
رواء: ايه ادري بس..
الجدة: خلاص! والله ما اعرف وش تقولون؟!
دانة:لا تعورين رأسك يا جدة بهالمواضيع!
الجدة هزت رأسها وسكتت
سلماء: اسور وين اختك هبة؟
هبة تدخل : صباح الخير
مدى: هبة سؤال يطرح نفسه من هالحيوان اللي حط الكسور والجبر ودي لو اشوفه وأقطعه بعصا خيزران.
هبة بثقل: والله لو إنتي فالحة في الرياضيات ما قلتي كذا!!
أسير: ما في احد قدك! مدرسة رياضيات والله استغرب كيف لحد الحين ما انتحرتي؟!
هبة: الجهلة هم اللي يقولون هالكلام!!
مدى: أقول أسورتي تدري وش ودي؟
أسير : وش ودك يا قلبي؟
مدى: ودي اشوف هذا الي اخترع الجبر والكسور وأتوطى في بطنه أصلا مفروض الرياضيات بس ضرب و جمع وطرح!!
الجدة: وليه إنشاءالله؟
أسير : علشان نحسب الفلوس.
الجدة: والله عاد من كثر فلوسكم!! ما في جيوبكم الا قمل روسكم!
الكل: ههههه
وظلت السوالف والضحك لحد ما يجي وقت الروحة على المدارس و الأشغال.
حبايبي ابغا رأيكم لحد الحين للرواية! رأيكم يهمني كثير وتعليقاتكم تشجعني اكتب زيادة!