بقلمي ام مريم اماسي الليل
ريم : ماما حبيبتي خلصت هسه اني بالطريق
الام:شنو صار وياج
ريم :اخذت المستمسكات الي احتاجها من الجامعه بس طلعوا روحي
وودعت الاساتذه لهذا السبب اتأخرت ليضل بالج قلبي يله لازم اسد الخط حتى اخذ تكسي
تكسي👋🏻👋🏻👋🏻 المنصور قريب على نادي الصيد ..... اصعدي
صعدت اول شي خطر بالي اتصل على ضحى الو
ضحى:الو هلو ريم
ريم :هلو اگلج شصار من ابن عمتج فدوه ماعندي وقت بعد ٣ايام طيارتي
ضحى :والله وصيته ومردلي خبر لليوم
ريم :ضحى ورا امل لو اشوفلي احد ثاني يدورلي على شقه
ضحى :اني اشوف لو ادورين بالنت احسن لان الصدك ما اتوقع يساعدج
ريم :ليش اخاف عباله راح ادفعه الايجار
ضحى:هههه لا بس هو نحس وتربية برا صارله سنين متعلم على طبع الانكليز
ريم:اني هم ما اريد مساعدته هالانكليزي مالتكم اليوم اكعد ادور بالنت
ضحى:اني هم اليوم اسأله بلكت لگى شقه قريبه عليه او يكدر يساعدج ينطيج عناوين مواقع ايجار شقق
ريم:يله بكيفج بس ما اريد اخجلج مو تگولين نحس اخاف يفشلج
ضحى:لا اخلي ابويه يحجي وياه لان يستحي منه
ريم :يله انتظر منج خبر .....عبالي اكدر امرلكم اليوم بس ما اللحك بعد ان شاء الله امرلكم اسلم على خالتي وعمو قبل ما اسافر
ضحى:لا احنه نجي نشوفج ان شاء الله
ريم :براحتكم يله حبي راح اوصل للبيت باي ///باي
ريم: وصلت للبيت استلمتني امي( دكتوره نسائيه) لازم تعرف ادق التفاصيل
عكس ابويه (جراح ) وطبعا اني مجبوره انطيها هالتفاصيل حتى ترتاح ومتبقى كل شويه جايتني تسألني على شغله الى ان اجتي ريام (طالبة طب )اختي خلصتني لان راح تستلمها
دخلت لغرفتي لزمت الورقه الي كاتبه بيها مخطط بكل تفاصيل تخص سفري من الملابس الى اخر شي ممكن احتاجه خلال سنوات دراستي( دكتوراه في الهندسه المعماريه) بلندن
وشطبت على كلمة مستمسكات ووثائق ارتاحيت لان ما بقى الا امور بسيطه
طلعت اللابتوب ادور على شقق للايجار قريبه على الجامعه لكيت كم وحده كتبت تفاصيلهم اخذت صوره للتفاصيل ودزيتها لضحى بمسج
هلو اكلج لكيت شقق بس اريد منج ادزين هالصوره لان عمتج شنو ينصحني بأي منطقه واي شقه منهم واهم شي تگليله اريد مكان بي عرب وقريب على الخدمات والجامعه
رجعت ضحى جاوبتني تمام دزيتها من يرد ادزلج الرد
بقيت اروح اجي انتظر مسج شفت المده طولت گلت استغل الوقت احضر غراضي ....حضرت غراضي وهذا الانكليزي ما رد لان دزيت اكثر من مسج لضحى وكل مره ادزلي بعده ما ردلي خبر
الى ساعة ٢ الفجر دزتلي
يگول اكو شقه بعمارتي بيها مؤجر يطلع بعد عشر ايام متكونه من غرفة نوم وصاله مفتوحه على المطبخ وحمام ومخزن صغير مؤثثه حتى اذا تريديها يوقع عقد ايجار من هسه وهو يدفع بين ما انت تروحين وتنطي المبلغ
ريم:اي فدوه هسه دزيله خلي ياخذها واني احجزلي كم يوم بالفندق بين ميطلع المؤجر
ضحى:قبل يوم من سفر ريم بت خالتي وصيت ابن عمتي يوسف
عليها بمسج دزلي رد
عزيزتي ضحى ان شاءالله ما اكون بمساعدتي جبت لنفسي مشكله لان الحقيقه الي كدرت عليه سويته وما اوعدج اكدر اقدم مساعده مره ثانيه للي اسمها ريم لان ما احب اختلط ولا عندي وقت وما احب المشاكل .....لذلك اعتذر
من قريت اجابته ....اف شكد نحس والله شكلي اني الي جبت لريم المشاكل من وصيتك تشوفلها شقه
ريم :قصتي تبدي من يوم الي ركبت طياره وودعت اهلي وبلدي
وكل الي احبهم حتى اخذ الشهاده وارجع ادرس بالجامعه
وصلت مطار عمان .....بقيت بي ساعات الى ان صار موعد طيارتي للندن .....وصلت لمطار لندن هيثرو الفجر .... انتظرت استلام الحقائب الى ان اجتي كل الجنط اخذتهن ورحت اشتريت خط حتى اتصل بأهلي أطمنهم ......خلصت اخذت تكسي للفندق
طول الطريق جان المنظر والشوارع والابنيه عباره عن لوحه كلاسيكيه ذكرتني بألافلام الاجنبيه الي جنت اتفرجها وصلت للفندق ..... اول ما دخلت للغرفه واستلمت الجنط اتصلت بأهلي بقيت كم دقيقه من حسيت امي راح تدخل بالتفاصيل گتلها حبيبتي باجر نحجي حاليا مدا اشوف من التعب
گلتلي يله روحي نامي .....خليت راسي على المخده مكعدت الا ساعة ٥ العصر ..... غسلت وبدلت ملابسي وندلت اتمشى بالشارع وبنفس الوقت اشوف كافيه اكل بيها لان اعرف الاكل اغلبه مو حلال بالمطاعم لذلك كلت انزل واشوف بلكت الگى مطعم عربي طلعت التلفون وسويت بحث شفت كافيه قريبه رحت عليها طلبت اكل وگهوه بارده (ice coffee )من خلصت صار عندي فضول اروح اشوف العماره الي راح اسكن بيها لا قريبه من مكان الفندق مشي ساعة .... من دا امشي جنت اتفرج على الناس والابنيه جان عقلي كله ويا التلفون بعد ما دخلت اسم الشارع طلعلي مخطط الطريق على الگوگل الى ان وصلت الشارع ما منتبهه ونسيت عدهم ممنوع العبور الا من تصير اشاره المشاة خضره وتتوقف السيارات ونسيت هم عدهم السير بالعكس لان سياراتهم الستيرنك من جهة اليمين .....عبرت واسمع هورن خلاني اغمض عيني واتخيل نفسي متت وصعدت روحي للسما ......من سمعت واحد يحجي ويايه بالانكليزي بعياط مفتهمت منه شي مو لان ما اعرف لغه بس من الارتباك
والرهبه
اجى سالني بالانكليزي ووجهه متذمر وعصبي اريو اوكي ....بدون وعي مخليه ايدي على صدري جاوبته يس أم فاين ....بعدني ممكمله مشى وعافني .... گلت شكد عديم احساس فوكاها گالب خلقته
التفت عليه مبتسم رفع حاجبه عراقيه شكيت هالملامح عربيه مره ثانيه انتبهي
ريم :فتحت عيني من الصدمه لان طلع يحجي عراقي ..... وعرف الي حجيته ...رجعت على الرصيف
ركب سيارته وطلع بدون حتى ميباوعلي بين ما صارت الاشاره خضره مشيت ويا الناس وصلت للعماره شفتها من برا حبيت المكان لان قريب عليها كوفي شوب وسوبر ماركت ومواصلات
خفت ارجع مشي للفندق اخذت تكسي ....صح مكلف بس روحي اعز كلت بين ما اتعود على الشوارع ..... هالايام من اروح مكان بعيد اخذ تكسي افضل
