قلب الصخر

الجزء السادس عشر

البارت السادس عشر
قلب الصخر

ريم ...
حسيت اني طايرة على غيمة ... و عطر طيب سكن رياتي و هدأني و خلاني ابتسم ... فتحت عيني ... و لگيتني نايمة على صدر صخر ... و عطره الرجولي ميهلني اگوم ... محاوطني بذراعه و نبضه لحن هادي استلذيت بسمعي اله ... و انتظام تنفسه مثل موج البحر بليلة ربيع تبث الحياة و ترطب قلب ميؤوس بامل و فرحة ...
ظليت اباوع على ملامحه و هو نايم ... و ابتسمت لاني صرت مرته فعلياً ... و حبيت اسلوبه المتفاهم البارحة .. و شلون خلاني اني اطلب منه يطيب جروحي و بهداوة حط عليها مثل الحمامة الي  تحاوط صغارها ...
فتح عينه و تململ بنومته .. جان يباوعلي و ابتسم .. بس ابتسامة غير عن كل المرات و نصه على جبيني وباسه و طال ببوسته ... وحضني حيييل ... گلي ااااااااخ ... ريم حوريتي ... صباح الخير و العافية ... صباحي نوّر بطلتج ... حمامة و رفرفت بسماي ... عشگتج موش حچاية تنكال .. عشگتج حياة وبيها ألفه ...
ضحكت كتله انت شاعر ..؟ گلي البارحة صرت شاعر ... انه ما شاعر و لا حاس بحياتي بمرة غيرج .. والبارحة حسيتج و شعرت بحبج بذر و نبت بحشاي و ما ممكن ينقلع فد يوم ... كتله كلامك يدوووخ خاف هذا بس حچي ..؟ ( اني مصدكة بي بس حبيت الاطفه ..) كلي. انه ما اغتريت فد يوم و تباهبت بصفة عندي ... بس من اليوم انه بيج مغرور ... و كبرياء و انفة ... انت وسام و على صدري اتزين بعشگج و لو رايدة هسة اصرخ گدام هلي و قريتي و كل عشيرتي و اگولن احبنهة يا ناس انه عاشگ هالبنية و سودني حبها ... كتله هههه صدگت و الله و ترة اني مصدگتك من البداية بس حبيت اشوف بعيني .. كتله صخر ... كلي روحه و عقله و گلبه گولي بعد كل هلي ... كتله اوعدني متفارگني ... گلي شلج بهالحچي يا جمارة الگلب ... كتله اوعدني و طمني ... جان يبوس شافافي وكلي و حگ من جمع راسي و راسچ بالحلال و خله نيران گلبي بماي شفافج تطفى .. ما اعوفنچ لو على گطع النفس ...، بسته من صدره و حضنته حيييل ...
ورة دقايق و احنه طايرين بسما العشگ... گلي گومي نسلم على الناس الي بالبيت و ندخل نسلم على امي .. ريم غزالتي ... امي ترة رح تشد وياج شوي .. اتحمليها لاجلي .. و لخاطري ..
هزيت راسي و كتله اي ... تؤمر ... گلي شحلاتها بحلگج ... و باسني و كمت لبست و تعطرت و هو رايح جاي يباوعلي و عينه تبث حب ... و مبتسم ... اخذت المشط و صرت امشط  بشعري جان يجي و كلي انطيني مشطتج ... كتله ليش ..؟ 😳گلي جيبي ...
انطيتهيا و فرد شعري على چتوفي و صار يبتسم اكثر و حط المشط و بهداوة و تناغم  صار يمشط  شعري و يتغزل بي .. كلي هذا ليلي ما اريد فد يوم تكصينه ابد ... ابتسمتله كتله بعيني ...
اني مشدوهة بحنيته و باهتمامه بتفاصيلي كله ...
نساني كل ايام عمري و صفر العداد و بده بي من البارحة ...
اخذت المشط منه و حضنته حييل .. كتله الله لا يفاركنه ...
تبسم و ردني ان شاءالله ..
طلعنه برة و لگينا نسوان خواله و خالاته و بناتهم و چناينهم و جهال كوومة ... عرفني عليهم و سلمت ... بيهم الحبتني رأساً و بيهم الغارت من عيون صخر من يباوعلي ... و بيهم الي حسدتني على اهتمامه ... و اخيرا. كملنا و دخلنا لام صخر  ... جانت كاعدة و متچية ايدها على عوچية خشب ... دارت وجهها لغير ناحية .. و كالت شجابك يا صخر انه موش كايلة ما اريدن اشوفك و اخذ هالبنت و اطلع... هو اشرلي بعيونه حتى اطلع برة ... واني هزيت راسي و طلعت ...