قلب الصخر

الجزء الثالث عشر

الفصل الثالث عشر
قلب الصخر

ريم ...
اني فزيت كتله وانت بهالشكل؟؟؟
كلي اني طالع هسة مد ايده و كلي اسنديني ... سندته و حضني ...و حسين من الجهة الثانية ... گلبي يخفق كلش قريب علية و خشونته حسستني بالامان و فززت كل قطرة انوثة بيه غافية ... حسيت شي يوجعه لان عصر ايدي حييل و رغم هذا مكال  ااااخ .....
كتله ليش طلعت مو ميصير ... كلي لازم اتم زواجنا لان راضي ما يكعد راحة ... اجة رفل ع السريع كال وين رايحين هو باوعله كله طالع عندك مانع ...؟

صخر ...
طلعت من المستشفى على مسؤوليتي ... لان بعده الجرح اخضر ... بس النومه مو الي .. لازم انفذ الي براسي ... قبل ميجبرني احد على واقع ميعجبني ...كتله حسين اخذ السويج و ودينه لبيتي ...
وصلت للبيت و نزلوني ريم و حسين طبيت لكيت خال ريم و ابنه الجبير ... خالها  ملامحه متغيره ... موش هذاك الانسان الطيب ... الي وافق على كل تصرف انه اتصرفته ...
كلي اريد احجي وياك شيخ ... كتله انطيني مهلة اليوم و باجر يصير خير ...
كلي لا ما تتحمل حجايتي تبات ... نظرات سامر الي و لريم غريبة حسيت بنيران گلبه لسعتني  ... كلي خالها  ...
خلينه نهدي اللعب و الزفة شوية نأخرها و اشرلي بعيونه على ريم ...
انه افتهمت يريدون يحجون وياي بموضع ريم و نسبها ...
كتلهم ثواني ...
رحت للغرفة و وياي ريم ... كتلها انت ابقي هنا ...
رحت كعدت وياهم و بدوا يتناوبون بالضغط علي ... خالهه كال ريم لازم ترجع ويانه لبغداد و ما اله داعي نكبر الموضع ترجع حياتكم مثل قبل ولا كأنه شفتهة ولا ابد ... سامر أيده و كال اي واني رح افهمها الموضوع و ابوية هم و بطريقة متخليها تنصدم ... و منبقيها هنا ... ناخذها برة لان شسوي بأب ما شافته سنين و ام مريضة عليشة ع المهدئات و حبوب الحالات النفسية ...؟ و شسوي بنسب ما رح يقدملها و لا ياخرلها ....
كتله ... يواشك يالمعدل ... لا تلدغ بحجايتك ... ثمن كلامك ...
اولاً ريم ابوها جاسم سلمان غانم و غصباً ع اليرضى و الميرضى و ثانياً نسبها رفعة راسها .. وهي بنت شيوخ لازم ترجع لاصلها و هذا ما بي كاف لام ..
ثالثاً و الاهم ريم مرتي و ما اطلگها نهائي ... جان عندي قرار ان بعد ما اكمل الفصل و تهدا الطلايب اطلكها و اخلِ سبيلها ... بس انه مرتي ما اتنازل عنها و اليعجبه اهلاً و سهلاً و المايعجبه براحته ... و هذا كلامي الاخير .. وكفت و اباوع عليهم ... و همه يبادلوني النظرات ...
وكف سامر و كلي ... لا تشوف نفسك عريس و مصدكها ... زواجك باطل يا شيخ ...
كتله و ليش باطل ... اني بحضور والدك عقدت و هو و اخوك شهود ... و برضاة ريم ما غصبناها ..
كلي.. طبعاً شتريد دكول ريم ... وافقت لان انت سويت هالحركات كلها علمود تاخذها ...
انه شبت النار بيه و صرت بركان على وشك الانفجار ..عيوني ما كمت اشوفن بيها ... و جرحي ينبض الم و ما درتله بال ... بكد ما جرح وجولتي هالاعفس ... اندفعت اله و جريته من ياخته و عيني يتطاير منها الشرار ... كتله .. انت لو موش بيتي و ضيفي جان عرفت شاسوي بيك ... هاي الحجاية مرة ثانية كن دكولها افنيك و ما اخليلك حتى اثر ... اذا انت عندك هيج نوايا  فمو كل الناس مثل نيتك  ...
ثار هو هم وجرني من ياختي و صرنا راس براس و عيني و عينه يبثن نيران لو تطلع من عدنه جان حركت البيت كله ... خال ريم يجر بابنه و يكله ابني مو وكتها ...
هديت ياخته و حطيت بنظر الاعتبار همه ضيوفي ... كتله انه لخاطر والدك رح اتركك بس الك عندي حساب بس موش هالوكت ...
عدل ثيابه وجان يكول .. اني رح اصارح ريم ... و اكوللهة الحقيقة ... وهي بهذاك الوقت تختار مصيرها لانها بالغة سن الرشد ...
كتله و اعصابي وصلت ذروتها ... اياااااك ثم ايااااك ... ان سمعتك كايللهة فعقابك على ايدي و الوان ... و بعدين شوف دا اكللك و احذرك ... ريم حرمتي ... و انت ما تحللها ... ما تكعد وياها ابد و ان شفتك تحجي وياها ما تلوم الا نفسك ... و افضل ترجع مين ما اجيت لان سالفتنه انتهت ...
خال ريم كال يعني شنو ياالشيخ تطردنه .. كتله انه موش طبعي اطرد ضيفي .. بس ابنك داس بمصاريني و انه ما ارتاح لوجوده ببيتي و مرتي ما يحلله... ويالخال انت على راسي اشيلك ..
كلي لا لهنا وبس كافي اهاين ... اني طالع بس قبلها اخذ بنتي ما ابقيها هنا ...
وراح للغرفة الي بيها ريم ...