قلب الصخر

الجزء التاسع

البارت التاسع
قلب الصخر

صخر ...
حسيت بتعب ... رحت لغرفتي و نسيت ريم بيها ... فتحت الباب و لا يا ربي .... انه شسويت ... لگيتها شالحه هندامها و باقية بقطعة وحدة و مو مسترة ... هي شهكت و غطت نفسها بايديناتها ... وانه ارتبكت و طلعت من الغرفة و نار بصدري ... انه اغم ... اي والله من دهر طرك يا صخر ... انت موش تدري هالبنت بالغرفة ... دك الباب هي هاي اصولك ..؟
تانيت دقايق و جان ادكها الباب ... ما سمعت حس ... انه محتاج اخذ هندام نظيفة من الكنتور و البنت خجلت .. عفية عليك صخر چا والمحاظرة قبل شوي الي لقيتها ع البنت وينها ..؟ هسة شحدكولن علي... مراهق ... ما عندي اصول ...؟ تربات غجر ...؟
كالت تفضل ... انه فتحتها بهداوة و ما باوعت عليها درت وجهي للناحية الاخرى و كتلها سامحيني انه نسيت انت موجودة ...من التعب ... من رخصتج رح ادخل اخذ شكم غرض و اطلع ... ما جاوبت بس شفتها متلفلفة و لابسة حجاب ... اخذت من الكنتور الي اريده و درت وجهي لغير صفحة و كتلها باجر نروح لهلي من الصبح اريدج كاعدة و متحضرة ... و خاف امي تسالج شي كلشي لا تجاوبينها ... كوليلها اسالي صخر ... فهمتي ...؟ مظطر اخذج لهناك و عگب باجر زفتنه ... و رح اسويها چبيرة حتى الكل يعرف انت منو ... و صخر ابن جبار تزوج ...
حتى ما علي حجة لو واحد من اهل راضي تعرضلج و انه فنيته ... و عفتها و مشيت ...

ريم ....
من طب عليه و اني جنت دا ابدل ... عزة غديت نملة 🐜والله من الفشلة .... هو ارتبك و ع السريع طلع ...... لبست هدومي و شالي شديته زين ....   رجع  دك الباب مرة ثانية و تاناني اكوله تفضل ... فتح الباب و دخل ياخذ غراض ... وكلي باجر يوديني لاهله... و حذرني من امه ... شما تحجي ما اجاوب و اذا سالت شي اكولها سالي صخر ... يا ربي ظاهر امه مو هينة لذلك حذرني ... نمت و سلمت امري لالله بس حسيت روحي مختنكة و لازم احجي وية امي دكيت قبل ما انام ... و سولفتلها و بجيت و هي هم بجت و رادت تجي و ابوية ما خلاها .... وراها سديت التليفون و نمت شوية مرتاحة لان حجيت وية امي و  كلام صخر هم ريحني ...

صخر ...
صبحنا الصبح و شفت خال ريم كاعد صافن يضرب اخماس باسداس ... جان يكلي ابني انت بتت هنا ..؟
كتله اي عمي لان كرابتي و ولد اعمامي بيت اهلي و متروس فرجعت هنا نمت ... كتله بس ترة سدك امين لان صعدت فوگ بالسطح نمت ... هو اطمئن و ملامحه لانت من شاف ريم طلعت من الغرفة ركض عليها و جرها حضنها و باسها من راسها و كعدها بصفه كلها شلونج باباتي اليوم ... هزت راسها كالت بنبرة حزينة ... زينة الحمدلله ...
كتله عمي رايدك بموضوع من رخصتك ... كال اي كول ... كتله لا على انفراد.... كلي اي ابني جيت ...
وكام و طلعنا  للطرمة ... كتله عمي انه فكرت ... انت جيتك وياي للفصل موش بصالحنه ... كال لييش؟ كتله لان اكيد اكو ناس من هلي و بالخصوص عمي جاسم ... رح يعرفوك انت اخو فطيم ... ما اريد تنكشف سالفة ريم هسة ....و احنه بهالوضع ... انه اكول خليك هنا بالبيت و رح اخذ ريم و اروح ... هو خاف و راد يعارض بس شفته سكت و درس السبب ...كال ولو صعبة عليه بس ميخالف لاجل ريم اتحمل ....ريم ليش تاخذها ...؟ كتله عمي انه زفتي على ريم باجر ... شلون انزف و هي ما شايفها احد من هلي .. هاي من غير رح يكلولي شلون خطبتها و احنه ما عدنه علم ... بس انه رح اسكتهم كلهم بحجايتين ثلاث .... انت لازم تحط نفسك بمكاني ...
دخلت للغرفة و جانت ريم مو بيهة اخذت هندامي و عباتي و غترتي .. و طلعت ابدل ...
كملت و جيت عليها كتلها كملتي ..؟ جانت خايفة و دمعتها بطرف عينها ... كالت اي .. كتلها دقيقة و اجي ...
رحت خابرت حسين ... كتله حسين بسرعة تجيبلي عبا من حرمتك و تجي ... كلي شيخ المن .. كتله انت ليش تصير اغم احياناً ..؟ انه بيا حال و انت تستفسر ... ؟ تعلم بعد عمك شيل الاسئلة وياي و خليك تنفذ و بس ....
كلي حالاً جاي ...
اجة لان مو بعيد على بيتي ... انطاني العبا و جان اصيح لريم ... كتلها تعاي رايدج بكلمة ...
جتي و كالت نعم ... كتلها الله ينعم عليج بالعافية و الستر ...
فتحت العبا وهي كبالي واكفه وجان احاوطهة بذراعي و البسهة العبا ... كتلها هذا مهرج يا بنت الناس ... حرمت صخر لازم تكون نجمة بعيدة مو ياهو الجان و لمحها ...

ريم ...
من حاوطني بذراعه و لبسني العبا ... و كلي عبارته ... اني ما اعرف شصار بيه ... عيني دمعت ... و ردت ابجي .... حسسني اني جنت مو زينة و هو ستر عليه ...
ردت اكله هالاحساس ... بس هو فاجئني قرأ البعيني رأساً و كالي لا تظنين انه مستهان بيج ... بس انه خايف عليج من الناس السنتهم ما ترحم ... انه ادري انت تربية اصول ... و اهلج تعبانين عليج ... و انت رفعة راس ... بس جاري الي بيئة الي احنه بيها ... و احترمي مقامي... و ترة انه شوي عصبي ... اعرفيلي طبع ما احبن العواج ... و هسة رح اطلع انتظرج بالسيارة وانت روحي سلمي ع والدج حتى لا نتاخر ...
نفس نسمة السلام الي مرت على گلبي و بردته البارحة من حجة وياية ... اليوم هبت على قلبي ...و مسح جرح انوثتي والعري الي دا اشعر بي لما لبسني العبا و طيب خاطري بكلامه ...
كلي مسحي دموعج و لا تاذين ابوج بهالدميعات ... و جان يحط ايده على جتفي ... و يكلي ياله روحي و انه انتظرج ....
ابتسمت بس ابتسامة بحزن ... معقولة هالانسان تصرفه هيج ... يعني هو طيب عكس اسمه ...
رحت لبابا و بوسته كتله عفية لا تروح .. كلي ما رايح اريدج سبعة و قوية ... و  شيخ صخر رايد مصلحتج لا تخافين ...و الي اياذيج لا تسكتين اله و كولي لصخر هو يتصرف .. كتله اي بابا
كلي خابرني سامر سمع من امج بالحادثة و باجر جاي لان تخبل ومكدر اليوم يجي .. كمت ابجي اكثر ... كلي كومي بنتي كافي اني مأمن عليج وية الشيخ .. ظاهر هو عاقل و وازن الدنية ... بنتي لا تحتكين بامه ... سلمي عليها و بس .. اي سؤال لا تجاوبي ...
اشو بابا هم يحذرني من ام الشيخ .. بابا شمعرفه بيها ... كتله ليش تحذرني منها تعرفها ...؟
كلي هااا لا وين بس اني اعتقدتها عمة وكحة و اكثرية العمات ميحبن جناتهم ... وانت صخر اليوم رح يقدمج الهم فاكيد مستغربين .... كومي بابا روحي و لا تفكرين الله يسهل امرج ...

صخر ...
البارحة بالعرس لزمت امي على صفحهز و كتلها اني متزوج ترة و زوجتي من بغداد ... يتيمة و هدولياها ... بس خوش بنت و صارلي سنة متزوج بس ما كلت ... وجبتها البارحة تحضر عرس اخوي بس تعرضت للخطر من ورة هذا. راضي انت تعرفي هو يكرهنا ... وانه ضربته و رح افصله و بعد الفصل اريد اسوي زفة ....
امي من سمعت داخت ... كالت على كيفك وليدي مو تجفتهن كلهن ... چا انه ما افتهمت سووووكت تزوجت .؟ ومنو تعرض لمريتك .. ؟ و انه ليش ما ادري ... ؟
كعدت تسال و اعصابها فارت ... انه نصيت على واسها و بسته ... كتلها يمة انت تفرحيلي لو لا ... كالت وانه من جنت اكلك تزوج ليش رافض... مني هاي الي اخذتها و من يا عمام ... كتلهة يومة مريتي يتيمة و فقيرة .... ما عدها لا ابو و لا ام ... وبنت حلال و تحبني و احبها ... هذا موش مهم عندج ... كلتلي صخر انه هسة مخبوصة بعرس عقيل بس بعدين اتفرغلك ... هذا موش حجي شيوخ يالشيخ ... تزوج وحدة امك ما تدري بيها بنت من و من يا عمام ...؟ هذا صحيح يا الشيخ يا الصدر ديوان ....
كتلهة يمة لا تخليني اطلع من طوري ... انه قادر ما اجي اكلج و امشي بفالي ... بس انت امي و ما احب تغضبين علي... كالت و شنهو الفرق يا ولد جبار ... انه هسة ما راضية على السويته ... و مريتك هاي ما ادري مين جايبهة ... طبتها لهنا موش بزينة ... كتلها يمة هذا مو كته الحجي .. و بعدين البنت ناگعة بگلبي و ما اعوفنها ...
وطلعت من عندها ...
انه حذرت ريم و كتلها لا تجاوبين ... بس انه اعرف امي زين ما رح تسكت ... الله يهديها  ...
اجت ريم و صعدت بالسيارة و جان وجهها معقوچ و محومر ... كتلها بسسج عاد تر احنه مو لحرب رايحين ... باوعتلي و جان دكول اخوية سامر درى و رح يجي باجر ... كالت اني اذيت اهلي هواااية سامر تخبل من سمع ... بعد ما لي حيل احط عيني بعينهم ...
كتلها وباعصاب ... لا يا بنت الناس ... رفع راسج انت حرمت صخر و ما تلوكلج الحنية ... لا تحنين راسج وراج رجال و ابن شيوخ يهد الكاع لو تعرضلج واحد............