#قصه_حوريه_
للكاتبه فردوس عبد اللطيف
الجزء 2
صارت مسؤليه البيت وامى ومرضها كلهه على طبخ خبز تنظيف ملابس اخوانى وخدمتهم وابوى من الصبح لليل اشتغل غير امى على طول توكع وتلزمهه نوبه الصرع تهد حيلي وتقهرنى منطقتنا شعبيه بيوتهه مساحتهه صغيرة بس عدد ساكنيهه هواى اكثر من عاءله بالبيت الصغير هذا غير الاطفال كل متزوجين يتباهى بعدد اطفاله اقل شي 6 اطفال ...بعد فترة ابوى ترك زوجته الى بغداد ورجع يمنه اشتغل سايق بسيارة كوستر وكوة يطلع المصرف اخوانى صح يشتغلون بس يادوب شايلين مصرفهم وعلاج امى تدرون كلماتوكع اكدامنه شيصير بينه وهى بس تنقهر لو تعصب راسا توكع وانى واخوانى نتاذى تعرفون معزة الام وهى فقيرة صحيح تمر علينه ايام ماكو اكل بالبيت بس اهم شي عدنه بيت ملك والباقى يتدبر نستلم الحصه التموينيه اهم شي الطحين نخبز ومدبريهه بالكوة صحيح الحاجه الماديه تخلى الانسان ضعيف وتدمر نفسيته وخصوصا اذا كان شخص واحد متحمل المسوؤليه وهو لا وظيفه ولا مهنه وملتهى بنفسه
بمطقتنه عالشارع العام فتح مطعم زغير ومن نروح لبيت جدى نمر من يمه صحيح تتجمع شباب المنطقه يمه مطعم شعبي لفت انتباهى الى يشتغل بالمطعم من يشوفنى يعوف شغله ويصفن على اول مرة ما اهتميت بعدين اشو كلت خلى اباوع اشوف اشبي اشو حسيت دكات كلبي سريعه وهو مبتسم وده يجى يحاجينى بس انى من اتذكر ابوى عمامى تجينى رجفه ولج حوريه ياحب هذوله يكطعوج قطع ويذبوج للكلاب اشلون بي بس شنو انى صرت افكر بي عرفت من اخوى اسم الولد هاشم الله شكد حلو اسمه ياربي اشو ميروح من تفكيري بالبيت اشتغل والاغراض توكع من ايدي وبس افكر بي وكلسع مسويه حجه حتى اروح لبيت جدى لو ويه خالتى نروح للسوك مرات ويه زوجه عمي عصام ماصار عدهم اطفال وزوجته من تروح للسوك تاخذنى وياها وانى متونسه عالروحه والجيه..احجيلكم على عمى عصام صحيح انحرم من الاطفال بس من يشوف طفل يتعلق بي ويبقى يسولف وياه وتحسه ارق انسان لكن بطبيعته يحل مشاكله بالقتل بكل بساطه عنده قتل النفس مرة تعارك ويه جوارين بيت جدى وقتل الرجال واكثر من مرة يرتكب جريمه وتنحل بدفع الفصل ويتنازلو اهل الضحيه هذا حاله وهم عاطل عن العمل زوجته معلمه بس مامتعينه تدرس اطفال المنطقه ومطلعه المصرف وهو يوم يشتغل ويوم كاعد بالبيت
هاشم طول الوقت عينه على الطريق بلكت تمر حوريه
هاشم...حسين انت من المنطقه احجيلي منين هاى البيضا الحلوة بنت منة
حسين عليمن تقصد هذيج ام العبايه الشابع
اى ولك ذيج الغزال تخبل راح اموت عليهه
حسين..ولك انت مستغنى عن عمرك حبهه تدرى هاى منو هاى بنت سليم ابن شيخ هادى اذا يعرفون بيك يحركوك بمكانك عمى سد الموضوع
هاشم ولك هاى الحلوة بنت سليم المصلبخ اشو ابوها واخوانهه عمامهه كلهم مو حلوين عليمن هالحلاوة
عمى اسكت وجفينه شرهم ترى يلحكوك وين ماتروح ذوله شرانين لاتفكر بيهه احسنلك واخذهه نصيحه منى
هاشم... اشلون انساها وهى دخلت بكلبي وعشعشت ياربي انت تحلهه
وحوريه من تمر تخطف كلب هاشم يفقد وينسى كلشي من يشوفهه
حوريه... ياربي لو ما عمامى واخوانى لاروح يمك ياهاشم واسولف وياك ونطير بدنيا غير هاى الدنيا
شيخ هادى بالليل دز على ولده وبناته عنده بنات 2 متزوجات وجناينه كعدو سولفو وضحكو صار تالى الليل كلمن راح لمكانه ونامو بس الشيخ هادى نام وحده بغرفه الخطار مانام بغرفته
كعدت الصبح زوجته كالمعتاد سوتله ريوك ها حجى اجيبلك ماى تغسل
ولج وينج البارحه ليش ماجيتى يمى بالليل خليتينى وحيدي وملك الموت يفتر على
يا حجى اسم الله عليك لاتجيب سيرة الموت
ولج والله صدكينى
حجى مابيك شي تشكى من شي
اى شويه صدرى يوجعنى روحى كعدى عصام وحميد خلى يودونى للمشفى
صار حجى تدلل
بدل الشيخ لبس ملابسه وسلم على جناينه هاى اول مرة يسويهه كلههم فى امان الله انى رايح
طلعو بعد كل وحده توجهت لشغلهه
اجاهم اتصال من عصام لحكونه الشيخ توفى ذبحه صدريه والاطباء ما لحكو عليه
للحكايه بقيه f
