مشيت ننعس و ماقاداني فرحة من بعد مباركة واليديا
للفكرة ديالي .
أصبحنا و اصبح الملك لله .. نضت مبكر توضيت و صليت و لبست عليا و هزيت طموبيلتي باتجاه الكلينيك ..دزت عند الطبيب هو اللول باش نطمأن على حالة نور
-امتى يمكن ليها تخرج؟
راها كتجاوب معا العلاج بسرعة ... واحد السيمانة كحد اقصى و نعطيها الادن بالخروج.. و لكن خاصها الرعاية و المراقبة فالمدة الماجية
-غير تهنا ا دكتور
مشيت لغرفة نور لقيتها متكية و ساهية كتلعب بشعرها و مبتاسمة شافتني وهي تتقاد فالجلسة
-سلام
-سلام (بابتسامة)
-كيف بقيتي ؟
-لاباس لاباس حسن بزاف شكرا
-مزيان الحمد لله
-امتى غنخرج من هنا ؟
-قريب قريب راك كتبراي دغيا
-(حدرات راسها) آه
-امم مللي غتخرجي فين غتمشي؟
-ماعرفتش
-صافي انا عرفت
-كتشوف فيا بحزن) عافاك واخا نعرف نبقى فالزنقة ماترجعنيش عند راجل ماما انا كنترجاك اهئ اهئ(دارت وجهها بين يديها و كتبكي)
-(هزيت ليها راسها) واش ماكاتيقيش فيا؟
-لا لا بالعكس نتا لي عتقتيني انا مايمكن ليا الا نتيق فيك ثقة عمياء
-انا مستحيل نخليك ترجعي مازال لعند هاداك الراجل غير تهناي
-و فين غنمشي ؟
-غتمشي معايا
-فيين؟
-لدار عائلتي
-لا مايمكنش نتقل عليك كتر من هاكدا
-نووور !! ماتعصبينيش شكون قاللك هاد الهضرة تاني نتي مامتقلة عليا فوالو
-و لكن...
-ماكاين بو ولكن غتمشي معايا دارنا فخبارهم ووجدو ليك بيت تما نقدرو نقابلوك حتا تبراي
-واخا لي بغيتي شكرا بزاف على هادشي لي كتدير معايا كيف غندير نرجع ليك هاد الخير
-مابغيت منك والو ا نوور واالو غير صحتك
-(بخجل) شكرا على كولشي
بقيت معاها كنهضرو على مواضيع مختلفة و متنوعة... كتاشفت فيها البراءة و الطيبوبة ... انسانة باقية على فطرتها و سجيتها ماكتعرفش تحقد ولا تكره...طفلة صغيرة تأبى النضوج رغم قسوة الظروف .. و قلب كبير و نقي بيض بياض الثلج لم تدنسه الأيام.... شخصية راقية بفطرتها و عفويتها ... تحسها صادقة ففرحها و حزنها و خوفها و ارتياحها.. و مع دلك شابة فقمة الرقي و الرزانة ...بخلاصة فجميع حالاتها كتبقى انسانة متميزة و روح صافية مانصفاتهاش الايام ... كلما كنزيد نتعمق فشخصيتها الهادئة كلما كنزيد نتعلق بيها ... تعلقي بروحها تجاوز تعلقي بشكلها علما ان جمالها الخارجي لا يقل شأنا عن جمالها الداخلي.. عيون خضراء فاتحة و بشرة ناصعة البياض ... حروف سوداء هادئة .حواجب مرسومة و رموش كثيفة .. هي بحد ذاتها صورة متكاملة للجمال العربي الفتان لي كيخليك ساهي فكل تفصيل من تفاصيلو و كيشدك ليه بلا ما تشعر.
دازت الايام على هاد الحال حتى للنهار لي تقرر فيه خروجها من المشفى... طلبت من الخدامات يوجدو ليها بيتها و مشيت انا نجيبها
-صباح الخير
-صباح النور
-كيف صبحتي شوية؟؟
-( شدات فراسها) لاباس مابقاتش كتعطيني الصداع بزاف
-الحمد لله.. عندي ليك خبار زوين
-اممم بصح فرحني
-اليوم غتخرجي من هنا
-بصاح؟ ولكن..
-هاداك الموضوع سديناه أ نور .. كلشي فالدار كيتسناك ياله وجدي راسك
#H_W
