فقت نفطر ساعة لقيت الغدا موجود هههه توضيت صليت و نزلت نتغدا حتا وصلني ميساج-
انس : مبروك على صاحبي .. انا بغيت نعاود الاحتفال على طريقتنا نتلاقاو؟
-انا : وي اوف كورس حدد البلاصة و هانا عندك
دوزنا العشية على طريقتنا الضحك و النشاط بلا بروتوكولات و حرية تامة ههه رجعت معطل لقيت كلشي ناعس ههه حتا انا خاصني ننعس غدا غتبدا عندي الخدمة ديال بصح.
بدا يوم جديد و ايام كتيرة من وراه كتشبهلو .. الكل مشغول بالتحضيرات للعرس لي قررنا انا و نور مايكونش كبير و يتدار غير فالحديقة ديال الدار .. قتلني الستريس و الضغط ديال الخدمة لي عامرة مشاكل طاحو كاملين على راسي و زيد عليها الدار غير نور لي واقفة بجنبي و مسانداني و كتنفس عليا
نمشيو عند نور
سلام انا نور 20 عام قبطت الباك بزز و جلست فالدار، نتوما عارفين قصتي مانحتاجش نعاودها ليكم.عيبي الوحيد و الكبير هو اني حشومية كتر من القانون.. آدم اول شخص بغيتو و كنتمنا من كل قلبي نكمل معاه حياتي .. هو عتقني من اسوء حاجة ممكن تتعرض ليها شي بنت و انا من فوق حبي ليه مدينة ليه بحياتي كاملة و ربي شاهد كنبغيه لمجرد شخصو ماشي على ود فلوسو ولا حاجة أخرى علما انه اي وحدة تتمناه راجل كامل مكمول و الكمال لله .. زوين حروفو كحلين و زينو عربي ..مللي كيوقف شعرو و يلبس سبور احتمال يطير عقلك ههه اما مللي كيلبس كلاس كيهبل ...بصح عصبي شوية (غير شوويية) مي راجل بكل ما تحمل الكلمة من معنى .. كنحس بيه ديما كيخبي مشاعرو و التعب ديالو و كيوري الوجه الضاحك و الفرحان لكاع الناس مي انا كنحس بيه .
نهار حفل التنصيب كان اسعد نهار فحياتي .. ماتخايلوش كيفاش حسيت فاش طلب يدي قدام دوك الناس كاملين .. اخيرا حتا انا ضحكت ليا الدنيا فحال الناس ... مابقيتش باغية من هاد الدنيا غيرو.. تمنيتو ليا من نهار شفتو و ربي استاجب لدعائي الحمد لله .. غندير كل مافجهدي باش نسعدو لحقاش هو كيستاهل .
هاد الايام آدم ولا كيجي عيان بزاف من الخدمة .. الشركة كلها و مشاكلها طاحو فوق راسو الله يكون فعونو .. من جهتي كنحاول ماأمكن نخفف عليه و هادي أقل حاجة ممكن نديرها على ودو .. اما بالنسبة للتحضيرات دلعرس فخالتي و سوسن مامقصرينش مساكن كيعاونوني بلا قياس
*نرجعو عند ادم
اليوم عرسنا انا و نور .. فرحتي كبيرة و كبيرة بزاف ... مانعين عليا نشوف نور حتال عند العدول.. اما انس و رباعتو واقفين عليا لانهرب ههه . وجدنا و اخيرا غنشوف نور ركبت فطموبيلتي حتا كتبان ليا ماجية فجلابة فالغوز و فولارها جات مينيون ههه كسيريت بيها حتال عند العدول فاين غتولي مراتي رسميا
-العدل: المهم بما ماجيين هنا فنتوما باغيين تتزوجو مي ضروري من الرسميات ... آدم الوزاني واش قابل تكون..
-انا: آه قابل
-العدل : ههه .. نور الادريسي واش قابلة تكوني زوجة آدم الوزاني
الصمت يعم المكان نور كتدور فعينيها و انا كنبحلق فيها
-نور : لا
-انا :( حسيت بدماغي كيغلي وسط راسي ) كييييففففااااااااششش ( بالغوات)
-نور: بلا ماتعصب غير كنضحك انا قابلة قابلة
سنيت على العقد بالنترة بقوة الاعصاب و نور مكمشة حسات بغلطها حتى خرجنا
-نور : آدم والله حتى غير بغيت نضحك معاك
-انا: نوووور هاد الضحك ماتديريهش معايا كون تعطلتي دقيقة كنت غنغلط فيك ( مزير ليها على فكها و كنغوت)
نعاود مازال كنحلف ليك آييي
دموعها فيقوني و عرفت راسي زدت فيه
-انا : واش ضريتك؟
-نور: (كتمسح على فكها ) لا
-انا : خليني نشوف
لقيتها تجرحات شوية
-انا : عافاك سمحيلي ا نور
-نور: ماتديرش فبالك انا عصبتك
-انا: لا لا انا زدت فيه سمحيلي
- نور: (مسحات دموعها ) اصلا انا كاعما تقلقت عليك ... اليوم عرسنا طلق هاد التقليقة و ياله كلشي كيساينا
-انا: (بست ليها على راسها) الله يخليك ليا ا نور عينيا .. ياله نمشيو
كيف وصلنا طارو لي بنور و جروني انا لبيت معزول كيوجدو فينا زعما هههه وجدت انا و خرجت شربت قهوة و جمعت .... و نور مازال كاعما وجدات آش غيكونو كاع كيديرو ليها راها زوينة بلاش والله ههه .. هاهيا جايا كلشي وقف كيصفق الا انا .. فشلت بقوة الدهشة هههه تكشيطة خضراء جاتها فقمة الروعة
-انس: ههههههه واتقعد عند مراتك ا صاحبي بنادم كلو كيضحك عليك
-انا: اه اه واخا انا نايض
نضت بالخف شديت ليها بيدها و مازال مصدوم ...
-انا: نور عافاك لاما قرصيني
-نور : ويلي علاش( مستغربة )
-انا: غير باش نعرف واش راني خدام نحلم ولا هادشي دبصح
-نور: ههه لا لا والله ماراك كتحلم هادشي دبصح
- انا : تبارك الله ا نور والله ماقادر نتيق جيتي كتهبلي
-نور: شكرا حتى نتا كتحمق
دازت حفلة ولا فالاحلام ساليناها برقصة رائعة انا و نور ... بصح صدقات ماكتعرفش ههه ولكن عاونتها و كلشي كيقول بللي حنا كوبل متالي .
-انا: صباح الخير
-نور : امممم صباح النور (فيها النعاس )
-انا : بغيتي تكملي نعاسك ولا تمشي البرازيل؟ ؟
-نور:( نقزات ) اكيد بغيت نمشي للبرازيل
-انا: ههه اوا ياله جمعي حويجك خاصنا نكونو فالمطار من هنا لساعة
-نور :اوكي
ماكاملاش نص ساعة وقفات عليا نور
-نور : انا واجدة ياله
-انا : ههههه باقي الحال غير بشوية ( هزيت الشنطة ديالها ) ندورو شوية فالمدينة و من بعد نمشيو للمطار
-نور : اوكي (شداتلي فيدي و بستهاليها )
ضربنا دويرة خفيفة ضريفة على المدينة ختمناها
بوقفة عند البحر لي ولا مكاننا المفضل لينا بزوج ..
-نور : آدم مشا الحال
- انا : لا باقي
-نور : بغيت ندور حتا فالمطار عمري شفتو
-انا : آه علاش لا ولكن خاصني المقابل
طبعت بوسة خفيفة فحنكي و طارت بالجرى للطموبيل ولات كيف ماطيشة ههه
كسيريت للمطار دورت نور شوية حتى بداو كيناديو لرحلتنا و اتجاهنا للطيارة ديالنا
-نور : شاداني الخلعة ا آدم
- أنا : قبطيلي فيدي
شداتلي فيدي غير طلعات الطيارة طلقات منها و شداتلي فشعري لي كنت موقفو رجعاتني فحال الدجاجة المريشة ماطلقاتني حتى تقادات الطيارة .
-نور : ( دارت يديها على فمها حابسة الضحكة ) ويلي سمحلي على هاد الحالة
- انا :( مسمر كنشوف القدام باش ماتجينيش الضحكة ) ماعليش نعسي دابا و ماتفيقي حتى نوصلو و نفيقك انا باش ماتعاوديش هاد الحالة
-نور : واخا
نعسات و انا مقابلها كتبان فحال الملاك و كتبتاسم ... باينة كتحلم بواليديها .. ندفع نص عمري باش تبقا هاد الابتسامة على وجهها
-انا : نور ياله نوضي
-نور : امم وصلنا ؟
-انا : لا غير الطيارة وقفات تدير المازوط
-نور : (كتحلف عليا بعينيها ) بقا تسرهط عليا نتا ياله نهبطو
كانت اول وجهة لينا هي ريو ديجانيرو فالجنوب فاين لقينا شواطئ ساحرة الجمال فحال كوباكابانا ... اضافة للكرنافال للي لقيناه قائم تما .. دوزنا اسبوع رائعة تما و انتاقلنا لشلالات اوجازوا الخلابة و الساحرة على الحدود معا الارجنتين .... و اخيرا اتاجهنا لساوباولو المشهورة ... انا و نور سالينا الماكلة ديال كاع المطاعم تماك و ماخلينا غير لي نسينا هههه لكن دبصح الطبخ عندهم كتر من رائع و التقافة زوينة بلا قياس .. ماسخيناش بالبرازيل لكن الخدمة تنادي
-نور: عيطوليك من الخدمة ياك؟
-انا: آه سمحيليا بزاف ا نور خاصنا نرجعو
-نور : ماكاين حتا مشكل
-انا: لا انا واعدتك نكملو شهر هنا
- نور : المهم عندي نكون معاك و الله ما كيهمني فاين و امتى
-انا: (بست ليها راسها ) كنحماق عليك ا نور حياتي انا راه ربي كيبغيني حيت دارك فطريقي
-نور :حتا انا
شدينا اول طيارة و رجعنا للدار .. لقينا دار عمي مشاو مي زينب مابغاتش تمشي معاهم ياربي تصبرني
رجعت لخدمتي بنفس جديد ... ولا عندي هدف لحياتي أخيرا .. سوسن حتا هي جات تدوز سطاج فالشركة و منها نيت تعاوني و تتعلم ولابد من البسالة ههه... العشية مخصصها لمراتي كنسا الخدمة و كنلبس بدلة الاب و الاخ و الزوج لنور .. خاصني نلعب كل هاد الادوار بإتقان على ود عينين حياتي نور
*نمشيو عند نور
داز عرسي احسن بآلاف المرات من اي حاجة سبقلي تخايلتها .. حبي لآدم كيزيد نهار على نهار ... الايام لي دوزناها فالبرازيل كانت احسن ايام فحياتي اصلا انا عمري فت مدينتي لكن آدم واعدني بجولة فالمغرب بلادي الحبيبة واخا انا بغيتو يرتاح و يركز على خدمتو و عائلتو .. كنحاول نلعب دوري كزوجة واخا الحشمة ديالي مازال كتشكل عائق بيني و بين حبيبي آدم و دكرياتي مازال كتلاحقني ... حتا ليلة عرسي تفكرت مول القهوة و محاولة اغتصابو ليا و بديت كنغوت و نبكي و آدم مسكين فهمني و بقا كيواسيني و صبر عليا حتى قدرت ننساه .. او بالأحرى نتناساه .. داكشي لي دزت منو ماشي ساهل ربي لي شاهد كندير فوق جهدي باش نتجاوز هاد العقدة لكن آدم كيستاهل مني كتر و على ودو و على ود حبي ليه نقدر نعطي عمري كامل بلا تردد ..انا حاسة بالمجهود لي كيدير على ودي و ماكرهتش نمنعو لحقاش غير وجودو حدايا و معايا كيغنيني على الدنيا بللي فيها .دابا داز شهر على زواجنا و ختي زينب مازال معانا .. ماعرفتش علاش كيجيبلي الله فحالا ماحاملانيش و باغية آدم ليها .. كنتمنا من كل قلبي يكون هادشي غير تهيآت كيفما كتحاول سوسن تقنعني .. قلبي مامرتاحش حاسة بللي فرحتي ماغاتكملش و بان ليا حتا آدم عاد يوماين ماشي على طبيعتو مبرزط .. كنحاول نقنع راسي بللي راه غير الستريس ديال الخدمة حيت الا كانت شي حاجة أخرى نقدر نحماق هادشي قلتو ليه شحال من مرة و هو عارف بللي حياتي بلا بيه مستحيلة. خاصني ندير شي حاجة باش آدم يخرج ليا لي فقلبو لحقاش هو من النوع الكتوم و صعير يبوح ليك بللي كيدور فراسو .. لقيتهاا.. عشاء رومانسيي بمساعدة سوسن حيت كتفهم فداكشي.
-انا: ختي سوسن
-سوسن : وي حبيبة ياك لاباس
-انا : لا والو باس بغيتك غير تعاونيني الى جات على خاطرك
-سوسن : مرحبا على راسي و عيني اش حب خاطر مرات خويا الزين ديال الدار ؟
شرحت ليها داكشي لي بغيت ندير عاوناتني فالديكور اما الطياب فكلو عليا ماخليتش الخدامات يتدخلو... اضافة لانها قاداتني و عطاتني نصائح اهمها نحيد مني ديك الحشمة الزايدة.. انا دابا كنساين آدم مابقالو غير يدخل....
