وبعد ثلاث ساعات اجاني ابو فراس
.....لكيتلك وحدة وموجودة برة خلي اجيبها اشوفها
.....كتله يله جيبها اني توقعت
هي جبيرة بالعمر بس من دخلت تفاجئت لان جانت صغيرة وحلوة
باوعت عليها جانت ناعمه وبيضه وشكلها كلش نازك يمكن اذااعيط بية توكع
..... سلمي على استاذ سامر وجان اسمع صوت ناصي ورقيق كلش كالت مرحبا واني من ورة خشمي كتلها مراحب كتلها شنو اسمج كالت اسمي
نيران هزيت براسي كتلها اي زين
.....ابو فراس كللهه يله بنتي روحي للمطبخ وهسه اني اجيج
راحت كتله اني موكلتك لجيب وحدة صغيرة جيب مراة جبيرة
.....والله ياابني ياسامر مالكيت وهاي البنيه حالتها حاله وهي مسكينه هاي يتيمه وماعدها احد هاي عمرها سنتين امها ماتت وابوها رجال حاله على كدة يشتغل عماله وهو جبير وصاحب مرض وقبل خمس سنوات تخربط بالشغل ولمن وصل للمستشفى سلم روحه للعزيز الكريم الله يرحمه وهي من مات ابوها ماعدها احد غير عمها وعمها رجال فقير من اهل الله بس ياستار من زوجته نار ماتنكحم وهاي البنيه المسكينه جتي يم عمها ومرت عمها دمرتها كل يوم وضاربتها وطاردتها ومسويتها خدامه الها خطيه والبارحه بالليل سمعت صوتهم ساعه بالوحدة بالليل طاردتها بالشارع كمت جبتها يمي وفكرت بيها خطيه كلت خلي اجيبها تشتغل هنا ومن تجي ام علي ترجع تبقه يمها وهم اعتبرها في سبيل الله مسكينه وهل يطلع من يدك وتنطيها انعم الله
....صراحه من سولفلي ابو فراس عن وضعها كلش انقهرت
كتله يله بيقيه بس كللها على كل قوانين البيت وكللها لتتقرب من غرفتي ابد بس تنظفها من اني موموجود زين
.... ان شاءالله مثل متحب
سامر
كال يله اني. راح اروح واخليها تبدي اسوي اكل
...اي زين لان اني جوعان كلش
اليوم متريكت
وراح واني دخلت لغرفتي وكعدت اقرة بكتاب ونمت وشويه وكعدتوبعدين حسيت جوعان كلش
طبعا اني تعلمت وحدي اكعد بالكرسي وانزل من الكرسي للسرير
المهم طلعت من الغرفه اشتميت ريحه اكل طيبه
صحت ابو فراس جان ماموجود باوعت البيت جان نظيف ومرتب على غير العادة لان ام علي الخدامه كانت مرة جبيرة ومتكدر تشتغل هالكد
ولكن اليوم جان البيت وتنظيفه وترتيبه مختلف المهم ردت اصيحها راح اسمها عن بالي وعد شفتها اجتي كتلها انتي تعاي اجتي خجلانه ومدنكه راسها كتلها انتي شنو اسمج كالت اسمي نيران كتلها اوكي صار الاكل
... اي صار احضرة
.... وين ابو فراس
.... عمو ابو فراس طالع ماادري وين
... اوكي اني جوعان
.... ثواني احضر الاكل تغديت وكان الاكل كلش طيب هي متحجي ابد ومالها اي صوت بالبيت كامت تنام بغرفه بالطابق الثاني مالتنه يوم عن يوم بديت اتعلم على وجودها ومن تتاخر استفقدها مع العلم جنت هوايه احجي عليها واجرحها بكلامي بس هي دائما تسكت ومجاوبني
جنت انقهر عليها بس مجنت ابينلها انو اني انقهر عليها ابد حتى لاتاخذ وجه عليه
بس الي صار اليوم كلش زعجني
يتبع .......
#الكاتبه #روجمان
