وظليت ألوم بنفسي واحاسب روحي علمود نيران
ماااعرف شسوي وظليت فترة طويله اعتقد انو هي راح ترجع او اسمع خبر عنها وماكو شي وماوصلني شي
ومرت ايام وهلاايام صارت تلاث سنوات رجعت نسيت الضحكه و حسيت نيران غصه بكلبي
وجع مداكدر اتخلص منه عذاب ضمير ملاحقني
بعد ماراحت نيران تركت نور لان عرفت انو اني تافهه مثلها بمجرد انو قبلت ارجعلها وبمجرد انو حسيت بشعور ما
ولكن اكيد اني ماحسيت ويا نور بااي حب يمكن جانت عاطفتي جسديه ذكوريه ولكن موحب
لان اني تعلمت من نيران معنى الحب معنى الصدق
تعلمت من انسانه برغم بساطتها بكلشي ولكن هي عظيمه انسانه اني ماقدرتها وماقدرت الي سوته ويايه
اشعر بندم بس بعد شيفيد الندم
ولكن يبقى القدر والله واعلم شضاملنه
....سامر
هاابو فراس
.....راح اكلك فد خبر ماااعرف راح يفرحك راح يحزنك مااادري بس اليوم عرفته
....اني بعدم اهتمام اي خير شكو
... نيران
بمجرد مكلي نيران خليت الكلاص مال جاي من يدي وكمت كتله شنو نيران
....اي نيران اليوم شفتها وحجيت وياها
... صدك تحجي
....اي والله ياابني شفتها بالسوبر ماركت
.... اي سولفلي
....كلي سئلت وين راحت من. طلعت من بيتك
وين جانت خلال هاي لتلث سنوات
... اي سولفلي كلشي
... دخلي اكعد واسولفلك جريتله الكرسي
كتله يله اكعد واحجيلي
... من طالعه من عندك رايحه للمنطقه الي جانت كاعدة بيها هي وابوها الله يرحمه يم وحدة جوارينهم جبيرة بالعمر تشتغل خبازة
ورايحه يمها وكايلتلها ومسولفتلها والمرة مبقيتها يمها وسبحان الله مايبقي باب مسدود
جان اكو فد واحد يشتري خبز من هاي المرة ومرة مرتين شايف نيران ورايدها للزواج رجال عمرة ٦٠سنه
بس هو حالته زينه وزوجته متوفيه وميصير عندة اطفال
وهي لمن خاطبها موافقه ومزوجته واظاهر جانت عايشه خوش حيااة ولكن الرجال قبل اربع اشهر ميت اظاهر مامتحمل تعرف هي شابه وهو رجال جبير المهم هي هسه ارمله
بس والله صايرة مو هذيج نيران النعرفها تسوق سيارة وعدها بيت ودكول عافلي شقق اثنين اخذ منها ايجار وتقاعد مالته دكول الحمدلله مرتاحه
وشنو ماشاءالله صايرة كلش حلوة وكبرانه
هو يحجي واني اعصابي تلفت وكاعد على اعصابي
.... زين اندليت بيتها
.... اي دلتني بيتها
ونطتني رقم التلفون
....يله دليني وين بيتها كلي لويش
...اريدها
...سامر عوف البنيه بحالها نيران ترة صايرة غير نيران
موهذيج الفقيرة الدنيا مغيرتها
..... فدوة لعينك ابو فراس نطيني عنوانها
.... والله ماادري موهي كلتلي مااريد سامر يعرف بيه بس اني اعرف بيك قلق عليها ولهذا السبب كلتلك
...دنطيني العنوان فدوة
سكت وبعدين انطاني العنوان وصعدت بسرعه بدلت ملابسي وتعطرت
وصعدت سيارتي ورحت وصلت لنفس العنوان شفت بيت
بابه سودة ظليت واكف متردد
وبعدين دكيت البيت سمعت صوت وحدة دكول منو
جان مو صوت نيران
عد اني كتلها اني سامر كالت سامر منو كتلها نيران موجودة كالت شتريد كتلها اذا موجودة كوليلها سامر وهسه تعرفني
كلتلي لحظه ظليت واكف وشويه سمعت صوت والباب نفتحت
وطلعت نيران كلبي راح يطلع من مكانه بس باوعت عليها متغيرة صايرة حلوة وجسمها صاير احلى مغيرة لون شعرها ولابسه بنطرون اسود وليلك طويل اسود
باوعت عليها
.... هاي اني عود وصيته لاابو فراس
ميكلك اظاهر الخبر وصلك بالطيارة
... شلونج نيران
... من الله بخير
اي استاذ سامر انت اجيت لو الهوى الي جابك
.... جيت اشوفج
....وهسه شفتني روح منا اني ارمله مااريد يكعد احد يحجي عليه
.. اريد التقي ييج بمكان واحجي وياج
باعت عليه وجان تصحك وجان دكول عشتو وليش عيني تلتقي بيه
... عندي موضوع وياج
.. والله مابيناتنه مواضيع ابد ومااريد اشوفك مرة ثانيه يله روح منا شكول شكول
... نيران ليش هيج صايرة
.... اها ضجت انزعجت اي حقك مو مدتتحمل احجي هيج وياك موعبالك اني بعدني الخدامه مالتك
روح بابا روح منا
... نيران اني اعرف الي سويته وياج مو قليل بس سامحيني
باوعت عليه وبنطرة كلها حزن كالتلي اسامحك على شنو ولا على شنو
على تعبي وياك على مداراتي الك على كلبي الي وجعته لو اسامحك من طردتني بنص الليل بالشارع وكتلك ماعندي احد وين اروح كلتلي مو مشكلتي
ماهزك ضميرك ماخفت من ربك من شمرتني بالشارع نص الليل عفتني لكلاب الشوارع ينهشون بيه
روح لان اذا افتح الدفاتر القديمه تطلع انت مطلوب
وعوفني اني عشت حياتي وخلص
يتبع ....
#الكاتبه #روجمان
