بعد كم يوم هاي المرة ام احمد دزت خبر لعمتي نريدج بموضوع ممكن نتفضل يمكم كالتلها عمتي تفضلووو اهلا وسهلا بيكم طبعا ثاني يوم العصر
جوي ام احمد ومرته وسوالف وحجي واني شفتهم يريدون يحجون بس يمكن وجودي مضوجهم ترخصت منهم
وكمت رحت لغرفتي وبعد شويه عمتي صاحتني
كالتلي عيني فيروز صرتي عروسه وخطبوج اني سكتت
ورجل عمتي يضحك وحنان تباوع عليه
.....خير عمه
..... بيت ابو احمد رايديج ل ابن ابو احمد
.....منو هذا الي اجه وياهم هذاك اليوم
.... لا
....لعد منو
.... للشيخ ضرغام
....اني سكتت والله عمه بكيف الشيخ ابويه
.....اي هسه ادزلهم خبر واشوف ردهم مر يومين وأجه الرد من بيت اهلي انو احنا موافقين وخلي فيروز ترجع للبيت ويخطبوها من بيت ابوها وكايلين انو يجون بعد يومين ياخذوني
اني كيفت وبنفس الوكت ضجت
ومرت اليومين بسرعه كلش ويومين و اجه اخويه الصغيرة وبسته وحضنته وشتميت ريحته شكد مشتاقتله وهو باوعلي
وضحك كلي
....والله صايرة مثل بنات المدينه
وعمتي كالت اني رح اجي وياكم اني وحنان لحد مايجون العالم يخطبون فيروز ونرجع وهم مشتاقه لريحت ديرتنا
ومشتاقه لااخويه صابر
وسلمت على رجل عمتي وشكرته صدك انسان بمعنى الكلمه
وخلينه ورحناولما وصلنه شفنه ابويه واكف بالحديقه واخويه هم وياة
رحت ركض بست يد ابويه طبعا مباوع عليه بعدة ضايج مني
واخويه همين بعدة ضايج مني
المهم دخلنه وكعد ابويه يسولف ويا عمتي وبتها وبعد شويه عمتي وحنان صعدو ديرتاحون وصاحني ابويه
كلي
.....لاعبالج اني سامحتج وكل هاي الفترة اني ابد مارضيت عنج وهسه رح ازوجج حتى لسويلي بعد مصيبه هذا شيخ ضرغام اني مااحبه بس شسوي اريدج تزوجين وحتى ينصلح حالج سمعتي ومااريد اسمع حجي زايد ناقص بالبيت وباجر العالم رح يجون يخطبوج
دربالج اسويلي مشكله
....اي بويه الي تريدة
يصير بس الله يخليك لظل ضايج مني فدوة
مجاوبني عافني وراح
وثاني يوم جوي العالم العصر لبست كلابيه وحنان رتبتني
وطلعت جايه ام الشيخ ونسوان اثنين وياهم وكعدت اني وحنان وعمتي وصار حجي وام الشيخ كلسع تحجي ويايه
واني صراحه ماجنت ابد فرحانه لمن عرفت انو ابويه واخويه الجبير
يريدون يخلصون مني يخافون لااسويلهم فضيحه
يتبع .،،،،،
#الكاتبه #روجمان
