وثاني يوم جوي الزلم والمضيف نترس زلم وعدنا مايصير اشوف العريس وبعد دخلت الزلم بساعه صاحوني وكفوني ورة الباب جانو جايبين شيخ وعقدولي على الشيخ ضرغام
وابويه بعد ماراحو الزلم صاحني
كلي
......انتي هسه صرتي
مرت الشيخ ضرغام احنا بعد مالنا سلطه عليج بس الي
الي اريدة منج هالمرة تكونين بنت اصول صدك بيت الشيخ ولاتخلين الشيخ يشوف منج العيبه مااريد يجيبون طارينه بشين واحنا شيوخ فيروزة رفعي راسي ولطحين من عيني هالمرة والا يافيروزة اتبرة منج ليوم الدين
.... فدوة بويه
والله اني مااسويت شي وندمانه والي تريدة رح يصير وان شاءالله دوم رح يبقه راسك مرفوع وبسته من راسه
..... بعد باجر يجون ياخذوج الشيخ ضرغام ميريد زفه وهوسات يريد ياخذج بلاصوت وبيوم السابع يسوي عزيمه
للزلم يعزم الشيوخ واني ماكدرت اعارضه لان صار رجلج
وبسبب ظروفه هم
.... صار بويه الي تريدة
وخليت وصعدت للغرفه كلت لا يطلع هذا بي شي وجبير لو محلو وكلش قبيح اني مافكرت بهذا كله حتى محد
كلي شي عنه وشنو الظروف الي عندة بالبيت تمنعه
يسوي زفه وهو ماخذ بت شيخ ومعقوله بويه الشيخ
يكول ماكدرت اعارضه عجيب دخت بهاي السالفه وبعدين كلت
اني هسه صرت حرمته بعد مااكدر اعترض وبعد باجر كلشي يبين
والصبح كعدت وعمتي وحنان بعدهم موجودين وجنت داحضر ملابسي وحنان نطتني نفنوف من عدها وتنورة كصيرة كلتلي لبسيها لرجلج خلي يتخبل هههههه
وعمتي طلعت للسوك وجابتلي شغلات وخلصت ترتيب غراضي وكعدت وكالولي لازم ترتبين نفسج وتسوين الشغلات المحتاجتها كل عروسه
وظليت ملتهيه وبليل نمت من التعب بدون تفكير حسيت الصبح ويا طلعت الشمس والقلق اكلني ومتوترة كلش
المهم ظليت يمهم جوة وجوي عالم لبيتنه حتى مااعرفهم ونسوان وام الشيخ وصارت هوسه صعدت ظليت بغرفتي وجتي حنان كلتلي عرفت انتي رح تروحين بدون بدله مال عرس
وطلعت نفنوف كلتلي لبسي جان لونه احمر وكصير
ونطتني حذاء كلتلي لبسي وسوتلي شعري بالماشات وخلتلي مكياج هيج طلع شكلي حلوو ونزلت جوة واجه الشيخ وأخواني استغربو من شافوني
كلي
ابويه الشيخ
....صايرة حلوة فيروزة وضحك
هذا الشي الوحيد الي هون عليه شفت ابويه مضايج واخويه الجبير هم ابتسم وحجو ويايه وبعدها نزلت جوة وكبعوني بالعبايه وسدو وجهي وكادوني لان كمت مااباوع شي
وطلعوني سلموني للشيخ وسمعت صوت زلم هوايه وهوسه بس ماكو دك وزفه واني خلال هاي الفترة كلبي ينفض مااعرف شبيه حسيت نفسي داروح للمذبحه المهم وصلنه للبيت وطلعو وجهي وشفت نسوان هوايه واني مدنجه راسي وشفت واحد تقرب عليه لبسني كردان بركبتي
واخذ يدي خله بيها خمس بتوت
وانا ماكدرت ارفع وجهي ميته من الخوف والخجل وبعدين كامن النسوان يروحن
وجتي وحدة عليه كلتلي يله بنتي خلي نصعدج لغرفتج
وصعدت فوك دخلت لغرفه حلوة كلش وجبيرة ومرتبه ظليت اول شي كاعدة شفت محد اجه
كمت ذبيت عبايتي وكعدت وسمعت الباب تنفتح وتنسد واني اباوع بالكاع
اخاف اشيل راسي سمعت صوت يخبل كله رجوله صوت مال زلمه حوك كلي شنو اسمج الصوت بكوة طلع من حلكي
....فيروز ويكلولي فيروزة
....حلوو اسمج
....كومي فيروزة ورفعي راسج
وانا رجلي صارت مثل الخيوط مااعرف شلون وكفت
..... رفعي راسج
ورفعت راسي وجان انصدم
يتبع ......
#الكاتبه #روجمان
