ضمادة للروح

٤

مرت اسابيع والدكتور وبتو في القريه ، كان شهاب الدين مستمتع بالقعده ..... بقضي الوقت مع اهلو وناس البلد ....يتمشى في الحواشات .... و يقعد مع رجال القريه بعد المغرب في مضافة البلد ... زي الكان بحاول يعوض الوقت الضاع وهو بعيد من اهلو .

وفي يوم كان قاعد مع محجوب في حوش الديوان بشربو شاي العصر.........إلتفت عليو وقال ليو....
شهاب: مفروض بعد دا نشوف موضوع الورثه والارض قبل إجازتنا تنتهي ......إحنا لازم نرجع بعد شهر عشان جامعه تالين، عندها إجرااءت تسجيل ماخلصناهم
محجوب: خلاص يازول ....عديله تب ...من بكرة نمشي للمحامي في المدينه ونبدأ المعامله
شهاب: تمام ياأبو راشد

وبقو كل يوم من الصباح يمشو المدينه يخلصو الاوراق. من مكتب المحامي للمحكمه والمحليه .... ملفات ومعاملات وكلام كتير ....يرجعو المسا تعبانين على الاخر .....
اما تالين كانت بتضيع الوقت مع عمتها سعاد الكانت بتحكي ليها عن ابوها في طفولتو ..... ومع منار الكانت بتونسها عن صحباتها والمدرسه .....وطلبت منها تعلمها الانجليزي ... وفعلا كانو شغالين دروس مكثفه ولما يزهجو كانت منار بتطلب منها ترسم ليها وهي تتفرج وعاجباها رسومات تالين شديد ....
وفي يوم بالصباح شهاب الدين جا داخل البيت كان بفتش في بتو لقى ناديه قاعده في الهول بتشرب قهوة ........
شهاب: اتفضل معاك ولا ما حتفضليني
ناديه: البيت دا ياتو يوم حرم زادو على الناس ..... اتفضل يادكتور
قعد شهاب في السرير القصادها كبت ليو قهوة وناولتو الفنجان........
شهاب: مالك بتهربي مني؟
ناديه: البهربني شنو...
شهاب : من ماجيت ما حصل قعدتي معاي ..... مع اني كل يوم بكون مع سعاد في الحوش ......بتسلمي من بعيد وتمشي
ناديه : ابدا .. بس الخدمه مابتخلص والبنات مابعرفن شي الا اقيف معاهن
شهاب : اي والله ... من ما جينا ماقصرتي فينا ....... طول عمرك طبيخك غير
ناديه: الحمدلله في حاجه فيني بتعجبك
ابتسم وعاين ليها مسااااافه ...........
شهاب: انا ظلمتك معاي من غير ما أشعر .....أعفي لي ....الحصل كان لا بيدي ولا بيدك ....وأنا جيت مخصوص عشان أعتذر ليك ....
قالت ليو دقيقه..... مشت غرفتها جابت جواب قديم ادتو ليو
ناديه : تتذكر دا ... دا اول جواب يصلني منك بعد ما سافرت ....شلتو و جريت لسعاد ... البركه فيك علمتها القرايه ..انا مالقيت لي اخو يعلمني .....و قعدت تقرا لي كنت قايلاك حتكتب لي انك مشتاق والغربه صعبه عليك ... لقيتك بتقول لي، أنا مابقدر أعرسك اعفي لي يابت العم .... انا حعرس هنا و برسل ليك ورقتك .. وإن شالله تلقي البسعدك ويصونك ................. جوابك دا كان شهادة وفاتي ....ويوم لبسوني الحريره لمحجوب كان لبسوني الكفن .
عاين ليها بنظره مكسوره ودمعتو جرت ... قال ليها نااااااديه بصوت كلو وجع ...... عاينت ليو.......اووعك تبكي ياشهاب رجالنا دمعتهم عزيزة ....

محجوب كان واقف بعيد بعاين ليهم سمع الكلام كلو وعينو بقت تطلق شرار ....... جا جر ليو بنبر وقعد جنب ناديه .......
محجوب : تسقوني معاكم ولا الجبنه دي مخصوصه...
ناديه : متين البيت دا فيو جبنه نفرين
و قعدو يشربو كلهم .... شهاب قام قال ليهم ماشي اشوف تالين الوقت اتأخر لازم امشي بعد دا .......مشي ليها غرفتها لقاها لسا نايمه ...صحاها
شهاب : ياكسلانه صباح الخير
تالين: good morning dad
شهاب: يلا يافراشتي انا ماشي المدينه ...
تالين: dad i won't to go with you ........pleas
شهاب: تمشي تعملي شنو..... انا ماشي للمحامي وحنقضي اليوم كلو في الدوائر الحكوميه ...مافي شي ممتع ..والساعه6 بكون هنا إن شالله...... وقام حضنها وباسها بين عيونها ........... قلت ليك قبل كده أنك شريان حياتي وأغلى حاجه عندي
تالين: dad وانت كمان ياحبيبي أغلى حاجه عندي
شهاب: خلي بالك من نفسك ... وأنا في وانا مافي
قامت على ابوها حضنتو شديد مسكت قميصو بكل قوتها وختت راسها في صدرو ... رفعت راسها عاينت ليو..... وفضلو يعاينو في بعض مسافه...ابتسمت ..وباستو في راسو ...... ودعها ومشى ...... حست بإحساس غريب وقلبها اتقبض ....بقت ماسكه السلسل الفي رقبتها شديد وقالت ...خير اللهم اجعلو خير....

في الظهر وهي في غرفتها كان يداب طالعه من الحمام ....لابسه فستان سماوي قصير لحد الركبه واكمامو نص فيو فتحه بقدام على شكل رقم سبعه .....فاكه شعرها وبتسرح فيو .... جا محجوب داخل الغرفه فتح الباب و وقف قدامها بدون مايدقو حتى .... وقفت مخلوعه وبتعاين ليو...
تالين : معليش عمو بس كان مفروض تدق الباب
محجوب: كدي خلينا من حركات الخواجات .... في ورق كان مع ابوك امبارح شفتيو
تالين : no كل الورق مع dad
محجوب: اليوم كلو مدمدمه بالطرح والعبايات حارمانا من شوفه الجمال دا و الشعر الحرير ....كان بتكلم وبقرب منها وبعضي شفايفو بطريقه شهوانيه و الخبث بطلع من عيونو ... كانت بترجع لورا وبدت معالم الخوف تظهر عليها ....قرب عليها زياده مسك يدها من منطقه تحت الكتف وبقى ضاغط عليها وبمرر يدو التانيه بين خصلات شعرها ..... صرخت بصوت عالي و ضربتو بيدينها الاتنين في صدرو بعدتو منها ..........
what are you doing ....go out from my room now....
قال ليها ....هييي وطي صوتك .. وماترطني لينا كمان ........... انا حأكلم بابا لما يرجع .....جات ناديه على صوت تالين عاينت ليها ولفت راسها عاينت ليو وهاجت في محجوب
ناديه: ياراجل ياخايب ياعايب .....اخجل على شيبتك دي .....البت اصغر من بناتك
طلع مخلوع و متوتر وخايف منها تكلم ابوها ...
ناديه : دا شنو اللابساه كمان ولمي شعرك دا
تالين كانت بتبكي وقالت ليها......انا كنت في غرفتي والباب مقفول هو الجا داخل علي .... وانا مابطلع الا ولابسه طويل ومغطيه شعري
ناديه طلعت وهي بتهرج.... نلقاها من نسوان الحله ولا من بنات الحواشات ولا من الناس الجايين من برا ..... دي شنو البلوه دي ياربي ..

مر الوقت وتالين في غرفتها والساعه بقت8 وابوها لسا مارجع .....قلقت شديد ومشت لعمتها ....
تالين: عمتو بابا اتأخر شديد ...مفروض يجي من6
سعاد: يابتي الغايب حجتو معاو
تالين : بس هو قال ما حيتأخر .... وأنا خايفه عليو شديد
سعاد : مالك دايره تقلقي بي
جات ناديه داخله .... في شنو ياجماعه
سعاد: البت دي بتقول ابوها أتأخر
ناديه : عادي رجالنا طوالي بتأخرو بطلي دلع يابت
جا محجوب داخل....... مالكن بتنقنقن يانسوان
سعاد : شهاب لحد هسي مارجع وتالين خايفه عليو
تالين : عمو كيف نقدر نتواصل معاو هو ماعندو رقم سوداني
محجوب : دقيقه اضرب للسواق .........مالو تلفونو مقفول!!!....
سعاد : مالك مامشيت معاو ..... هسي اخوي بعرف البلد دي
محجوب : ياخ اناعندي شغل في الحواشه ...بعدين هو مشى يخلص اوراقو
ناديه: شغل شنو قاعد لل...... خليني ساكته ... ولوت خشمها
محجوب : ماوقتك انتي كمان
تالين : اتصل للمحامي طيب
محجوب ضرب ليو وقال ليو الجماعه ديل خلصو بدري ومرقو من 5 ..... معقول ماوصلو لسا
تالين : أنا والله خايفه
سعاد: قولي خير يابت
شويه كده وتلفون محجوب ضرب .....كان رقم غريب ...مرحب..... محجوب راشد الحاج ....... ايوا مين معاي ....

(مرهقون...... من الخوف ........ من الخوف من المجهول ...... من بعثرة المشاعر ....... من النصيب والقدر )
لنا لقاء أخر.......