ضمادة للروح

٢١

عدت الايام .....وأفتتاح المعرض قرب ... و كمان الامتحانات النهائيه على الابواب يعني كانت مضغوطه من الجهتين ....يوسف أتغير من اليوم داك والبسمه بقت مابتفارقو .... لدرجه أن كل الفي البيت لاحظوا التغير ....

في يوم الافتتاح كانت متوتره شديد ........وبتجهز نفسها عشان تمشي المعرض ... جاتها ريم تشوفها.....
تالين : جيتي في وقتك
ريم: خير مالك
تالين: ماقادره اعمل الاي لاينر يدي بترجف
ريم: واااي لكن كل دا توتر
تالين : لو ماعجبتهم لوحاتي
ريم : خلي عندك ثقه في نفسك بطلي هبل ..
يوسف كان بنده عليهم من برا ......بعد نص ساعه مفروض نطلع
ريم: يلا تعالي اخلص ليك الميك اب سريع
ولما جهزت نفسها وطلعو من الغرفه كان منتظرهم برا ....وكان بلبس ساعتو ، اول ماشافها اتجمد مكانو..... كانت لابسه فستان وطرحه رويال بلو وجزمه وشنطه بيج ...ومع الميك اب العملتو ريم ...طلعت رهيبه ...
هو كان لابس بدله كحلي داكن والقميص نفس الدرجه .... ريم قالت ليهم بالنسبه لتخاطر الالوان دي صدفه ولا مقصوده.......قال ليها اننننن ظريفه ....
بس لما شافت نظرات اخوها قالت ليهم امشو انتو بالأول انا بجي مع راويه ... ومشو
......في العربيه كان كل شويه يسرق منها نظره ويتبسم لا شعوريا .....

وصلو المعرض وخلصو التجهيزات الاخيره ..... وبدأ الضيوف في الحضور .... كانت لسا متوتره بس يوسف كان واقف جنبها طول السهره وبدعمها بعبارات تشجيعيه لما أختفى التوتر ورجعت طبيعه اندمجت مع الزوار وبدت تتكلم معاهم... وتشرح ليهم عن لوحاتها وتجاوب عن تساءلاتهم .....كان براقب سعادتها من بعيد وشاف عيونها بتلمع من الفرح .
بعد نهايه المؤتمر الصحفي شادي شكر كل القائمين على المعرض والجهه الراعيه للحفل ....كرم يوسف وطلب منو إلقاء كلمه .....كانت بتعاين ليو ومبهوره في طريقه كلامو ولباقتو وهيبتو ....ريم لكزتها قالت ليها ....اخوي دا بخرتي قبل ماتتطلعو شوفي البنات ديل انبرشو كيف.... اخيرا شادي كرم كل الهواه والمبتدئين على المجهود القدموه وسلمهم هدايا تذكاريه ..... و جا يبارك ليها....كانت واقفه تتكلم مع يوسف
يوسف: كنتي متوتره على الفاضي ... شايفه الناس أنبهرو بلوحاتك كيف
شادي : ماتصدقي كسير التلج دا ....اصلا اخترناك معانا لانك زوجه البووس ولو ما وافقت عليك ما كان المعرض اتعمل
تالين : what!!!!
شادي : هههههه بهظر معاك طبعا ..... انتي اضفتي للمعرض اضافه رائعه والنجاح الباهر دا سببو انتي وزمايلك ...... خلي عندك ثقه في قدراتك وانا متأكد انك لو استمريتي حتكوني فنانه مشهوره ..... ومتنبئ ليك بمستقبل مشرق
بعد ماخلصت السهره .....همس ليها يوسف في اذنها .....سهرتنا لسا مابدت ..... عاينت ليو بأستغراب قصدك شنو.......
يوسف: عازمك عشا احتفالا بالمناسبه دي
تالين : بس انت بكره شغال
يوسف : معقول ارجعك البيت بالفستان الحلو دا .... للدرجه دي ماعندي زوق
ريم من بعيد متابعه الحدث وشغاله تتبسم وترفع ليها حواجبها....

في اليوم التاني جاتها ريم من الصباح .....ماكان عندهم جامعه الاتنين ....
ريم : اها العشا كان كيف .......وغمزت ليها
تالين : اتعشينا ورجعنا
ريم : مكاره وغتيته .....احكي يابت
تالين : عايزه تعرفي شنو
ريم: يعني لسا القلوب مادقت
تالين : يوسف قال لي اعتبريني صديق او اخ وانا مستحيل اتجاوز الحاجه دي ...بعدين مافاضيه للكلام دا...
ريم : اخ مين ياجماعه انتو متزوجين .....عايزين تجننونا
تالين : انتي عارفه ظروف زواجنا صح ....تانيا انا احترمت رغبتو ومقدرة كل البعملو معاي
ريم : مشاعرك تجاهو شنو
تالين : هو انسان عزيز اوك ....من ناحيتي انا مابفكر الا في مستقبلي ومن ناحيتو هو قافل قلبو مع حبو الاول ... وانا ماعندي حق اتدخل في حياتو
ريم : حبو مين مرااام !!!....... شكلك فاهمه القصه غلط
تالين : كيف يعني
ريم: لما اتخرج ورجع من ماليزيا صاحبو عزمو حفله وهناك شاف الماتتسمى مرام ... عجبتو وحباها وبعد 6 شهور اتزوجها وكان طاير بيها السما .....ماكنا ساكنين هنا... أجر ليها شقه وفرشها احسن فرش وعمل ليها عرس خرااافي وسافرو تركيا شهر عسل ...ماقصر معاها خالص ....من البدايه كان ظاهر عليها ماديه بس هو كان بحبها لدرجه ماشايف غيرها ..... بعد 9 شهور من زواجهم قالت ليو ماشه عرس صاحبتي ...وهي كانت عارفه اليوم داك عندو عشا عمل مابقدر يمشي معاها ... بالصدفه لقاها في نفس المطعم الهو فيو ...قاعده مع واحد في طربيزه بعيده عن الناس ماسكين يدين بعض واخر ضحك وقله ادب .. وعينك ماتشوف الا النور ضربهم الاتنين وبالزعل داك شال سكينه من الطربيزه وطعنهم الاتنين ... الولد اصابتو كانت خطيره وقعد فتره في المستشفى بس ما مات ويوسف دخل السجن سنتين ....لما طلع حالتو كانت سيئه جدا وخش في حاله اكتئاب مخيفه ابراهيم قال ليو سافر من هنا رجع ماليزيا حضر الماجستير وجا احسن بس مارجع يوسف الزمان بقى عصبي و طوالي زهجان ... عملت ليو عقده خلتو يكره كل البنات ومايثق فيهم و رافض الزواج تماما انتي عارفه صعب على الراجل يتقبل خيانه زوجتو كانها بتطعنو في رجولتو ...مرت 8 سنوات وهو ما عايز يتجاوز الحصل ......
كلنا لاحظنا التغير الحصل ليو فجاه بعد ما دخلتي حياتو انتي ما لاحظتي كيف بقى هادي وبتونس وبتضحك ......
تالين : ابدا ماكنت مفتكره الحكايه كده ....اذا يوسف محتاج لي انا موجوده كأخت وصديقه زي ماعايز .....ياريت كلنا نفهم ونحترم الحدود الرسمها لحياتو ....

خلصت الامتحانات ....وجا يوم النتيجه ....كانو كلهم ماشين على البورت وقلبوهم في ايدينهم ....كلهم نجحو بس المفاجئه كانت ان تالين قفلت المجموع وطلعت اول الدفعه .... قعدت تبكي من فرحتها ..... بعد شويه تلفونها ضرب.... ردت بصوت واطي يوسف .......الاء وتسنيم بقو يحاكو صوتها يوووسف ويضحكو .....زحت منهم وقالت ليهم غياظات ...........خليك منهم وردي على عملتي شنو ....... نجحت و اول الدفعه كمان .......كنت واثق انك ما حتخذليني ....الف مبروك ...جاي عليك يلا اطلعي ..
مشو كلهم مع بعض .....اول ماطلعت جنب باب الجامعه ....شافت يوسف واقف جنب عربيتو ماسك بوكيه ورد وهديه ...... ختت يدها في وشها و قعدت تبكي .... تسنيم والاء قعدو يكوركو بصوت عالي لمو الجامعه كلها تقربيا والتصفيق والصفافير اشتغلو .... قرب منها وهي لسا واقفه متسمره مكانها ....قدم ليها الورد والهديه .... قعد تتبكي وتضحك وخجلانه ومتفاجئه وكلو .....(وصلكم الاحساس مش)....
يوسف : ممكن تفرحي بدون دموع عشان ما ازعل من نفسي اني بكيتك
تالين : ماعارفه اقول ليك شنو.....بس ربنا يخليك لي
تسنيم : كده اووفر وربي......كده انا امشي اقع البحر .... ياجماعه احنا سناجل راعو مشاعرنا
الاء : احسن تمشو سريع لان كميه المنفسنين في ازدياد
يوسف : ماشين خلاص ...... الله يبعد المنفسنين والمنفسنات
مسكها من يدها وفتح ليها الباب ركبت العربيه واتحركو .....

هشام كان متابع الحصل من الاول واقف بعيد وداير ينفجر من الغضب ...

في العربيه ....
يوسف : ماتتخيلي انا مبسوط بيك كيف .....حاسس انو انا النجحت
تالين : اي نجاح في حياتي انت السبب فيه..... ماعارفه ارد ليك جمايلك كيف
يوسف : رجعنا للكلام البزعل
تالين : خلاص سكت ........ممكن افتح الهديه
يوسف : اكيد
تالين : oh my god ....... داشنو
يوسف : السلسل بتاعك ... لما شفتك مابتلبسيه زعلت لاني عارفو عزيز عليك ...ريم قالت لي انو اتقطع وانتي راميه في الدرج...خليتها تجيبو لي وصلحتو...هسي البسيه و اوعديني ماتطلعيه من رقبتك ابدا .............بس دي ماهديتك
تالين: كيف
يوسف : افتحي الدرج القدامك
تالين: دي تذاكر!!.........و جوازاتنا .... احنامسافرين!..........دبي!!!
يوسف: حنسافر بعد بكره لمده شهر
تالين: دا كتير والله
يوسف :اصلا انا مسافر شغل .....وانتي حتمشي معاي ....مش متعودين تسافري معاي وين ما اروح .....يلا جهزي نفسك ...

جا يوم السفر .......وهم طالعين ريم مجهزه لسته طلبات ...حاجات العرس وبتوصي فيها لحد ماركبو العربيه .....مشو المطار ...... ركبو الطياره وسافرو.......

لنا لقاء أخر.....