ضمادة للروح

١٧

صرختها نزلت زي الصاقعه على مسمعو .......قام منها مخلوع وجسمو بتصبب عرق .....وقف وبقى يعاين ليها ومنطط عيونو ....زي الكان ما واعي ويداب فاق ..
قامت بصعوبه وبتحاول تستر نفسها بباقي ملابسها المقطعه .......كان لسا بعاين ليها مصدوم ونفسو قايم ...... شال التيشرت حقو وبلبس فيه بسرعه وطالع من غرفتها بسرعه و فتح باب الشقه لقى راويه وهيام في وشو نزل راسو ماقدر يعاين ليهم ونزل السلالم بسرعه ركب عربيتو ومشى.....
دخلو عليها لقوها قاعده في نص السرير و القسم العلوي من جسمها مكشوف .....شعرها منكوش .ضامه رجلينها بيدها وبترجف ...منزله راسها وبتبكي بأنين ....... راويه بقت تقول لا اله الا الله عمل فيك شنو ......هيام مخلوعه وقالت ليها ماقادره اصدق ان دا يوسف......... قربو منها .....راويه رفعت راسها ورجعت ليها شعرها لورا شافت كدمات وعلامات وجروح في وشها ورقبتها ويدينها ...... لما دمعت ولفت وشها الناحيه التانيه ........هيام مسكت يدها عشان ترفعها ...صرخت صرخه الم .....عاينت ليدها لقتها وارمه ومحمره دا المكان الكان مساكو وضاغطتو ومثبتها بيو ......هدوها شويه وجابو ليها مويه ...... دخلت معاها راويه الحمام ساعدتها وغيرت ليها ملابسها .....وهيام مشت جابت ليها حبه مهدئه من عندها ومسكن .......... حضنتها راويه شويه عشان تهدا ،كانت لسا بترجف .....تاني رقدتها في السرير وبقت تقرا عليها وتمسح راسها بيدها ......وقعدت معاها للصباح .....بس هيام رجعت عشان يزن صحى ....
كانت ساكته وسرحانه ..بتعاين للسقف ودموعها سايله على خدها وما نامت ابدا ....

في الصباح راويه قالت ليها امشي البيت اشوف الاولاد واجيك ..... وهي طالعه على باب الشارع صادفت يوسف راجع وكانت حالتو سيئه جدا ملابسو مبهدله شعرو مامرتب وعيونو محمره ........
راويه : تعال معاي
يوسف : ماداير اسمع ولا كلمه خلوني في حالي
راويه: حتجي وحتسمع ....تعال نتكلم في بيتي احسن
ساقتو من يدو ودخلو بيتها...... اولادها طلعو المدارس و راجلها مسافر.. والبيت كان فاضي .....دخلو الهول وقعدو ...... وقالت ليو ..انت يوسف اخوي ولا واحد تاني .... نزل راسو وسكت ...جات قعدت جنبو ورفعت ليو راسو لقت دموعو نازله ، حضنتو عليها وبقى يبكي زي الطفل الصغير ....خلتو لما خلص الفي قلبو كلو ........ مشت المطبخ وجابت مويه عصير ليمون ....جات لقتو هدا شويه .....كان قاعد بعاين للارض و خاتي يدينو في راسو ......
راويه : ليه كده
يوسف : انا والله تعبت
راويه : بت الناس ذنبها شنو
يوسف : مش هي الاشتكت ليكم عملت ليها العايزاه
راويه : اشتكت شنو دي مستحمله كلام امي وساكته
يوسف : امي قالت انها كلمتكم و ما عاجبها الوضع
راويه : ياخ امبارح امي جاراها زي الخروف كانت دايره توديها لدكتوره نساء وهي تبكي وساكته .... انا الكلمت امي عشان انجدها منها ...........ماعارفه امي قالت ليك شنو بس متأكده انو ما صحيح ...... وكان قصدها تستفزك ونجحت.
رفع راسو مخلوع .......يعني...
راويه : حرام عليك البت قربت تموت ....... من متين بقيت قاسي كده .....مشكلتك ماعايز تنسى الماضي ولا تتجاوز الحصل ولا عايز تبني حياتك من جديد ......... العندك في البيت دي ملاك والدنيا جارت عليها كتير ماتبقى عليها انت والزمن ..... مابقول ليك حبها بس كمان ماتظلمها .... ولو ما قادر خليها كفاها وجع ودموع......
رجع البيت و وقف قدام باب غرفتها سمع صوتها بتبكي بكى زول موجوع ومتألم ...وقف مسافه بسمع فيها من ورا الباب لما دموعو نزلت.....دخل غرفتو حاسس بتأنيب الضمير ......