ضمادة للروح

٧

محجوب عاين لناديه وقال ليها ......وسعاد؟ ......خليها علي أصلا الايام دي الضغط والسكري تاعبنها ورجينها من بعد البكى بقو يوجعوها شديد اليوم كلو في اوضتها

محجوب: استلم الارض وماعندي شغله بالبت
ناديه : جوازها وين
محجوب : ماعارف كان في شنطه المرحوم مع اوراقهم ...أظن راحت يوم الحادث بتسألي ليه؟.....
ناديه : ستو دايره
محجوب : عرس مابعرسها لكن كمان سفر مابسفرها ... اخر كلام
ناديه : خلاص كويس....كلم المحامي يحضر العقودات حقتها وحقتي وانا بجييها

عدا اسبوع وتالين تشيل تلفون رجاء كل يوم بالدس ..تضرب ل د/صديق وبديها مغلق لما خلاص يأست منو ويأست من الحياة كلها ومافي حاجه بقى ليها طعم ........
شهرين ودمعتها مانشفت لما عيونها اتورمت ...ضعفت ...و وشها بقى اصفر وشاحب ...
جاتها ناديه وقالت ليها ...خلاص اقنعت ليك عمك بالسفر وقريب بسفرك بس تسمعي الكلام ....طيب اعمل شنو ......
ناديه : اولا سعاد ماتعرف عارفاها مابترضى ...تانيا تعملي ليو توكيل زي ابوك زمان عشان شغلو مايقيف
تالين : حاضر ...بعمل كل حاجه ...بس الجواز وين
ناديه : الجواز عندو بسلمك ليو لما تجي قايمه .....هسي هو بجهر الاوراق يومين كده وبجيبهم تمضي عليهم ....و اووووعك سعاد تعرف بتخربي على روحك
...فرحت ونطت عل ناديه حضنتها.....شكرا خالتو .......خلاص فكيني يابت عندي شغل .....
هنا يداب الأمل رجع ليها ....وحست الخلاص قرب.....
.وفعلا بعد يومين جاتها ناديه قالت ليها عمك دايرك ....لبست عبايه ومشت معاها الديوان ....كان قاعد ومعاو راجل غريب ....قال ليها تعالي دا المحامي جايب الورق عشان تمضي عليو ....عارفه الموضوع مش .....ناولو ليها واداها قلم .....عاينت ليو بإستغراب ....بس دا كلو بالعربي
محجوب: اكيد بالعربي ...انتي قايله روحك وين
تالين: طيب اعرف كيف
المحامي : انا بوريك تمضي وين ....وعاين لمحجوب وابتسم ..........مضت كل الاوراق وطلعت .

بالمسا قالت لناديه خلاص عملت التوكيل ...حسافر متين ..... أصبري كم يوم...
لكن الجامعه مشي عليها كتير .....كل شي ملحوق
وعدا اسبوع ، وتاني سالتها مفروض اسافر بعد دا.... قالت ليها تعالي ومشو الحوش لمحجوب
ناديه : البت دي بتسألك حتسافر متين ....وغمزت ليو
محجوب : انتي عارفه عشان اسفرك لازم امشي معاك الخرطوم ...وهسي موسم حصاد ....اصبري شهر وبسفرك
تالين: شهر تاني .....its too much والله
محجوب : انا لو مشيت مافي زول يقيف في الارض وانتي مابترضي لي الخسارة
ناديه: القدم ليو رافع يابتي اصبري
تالين: خلاص ok

وتم الشهر القال عليو محجوب وتالين بتحسب الاسابيع والايام......وسعاد ماداريه بالدنيا والمخطط الخبيث العملوه ناديه ومحجوب في البت اليتيمه .......تالين شغاله تسألهم كل يوم عن السفر ....وكل شويه يطلع ليها بعذر...مره ماشي ابيع المحصول ....ومره ماشي المدينه اخلص معاملات ...ولا جايين تجار يشترو المحصول .........وهي خلاص الصبر فاض بيها .........

( ستواجه صنفا لا يفكر إلا في نفسه ، وستواجه صنفا يخذلك في نهايه الطريق ، وصنفا ينكر معروفك .......ستصفعك الحياة بمن وثقت بهم .....فتعلم أن لا تثق في الجميع)...

نطلع من قريتنا دي ونمشي العاصمه في حي من أحياء الخرطوم الراقيه ......
كان حاج أحمد نايم وشكلو كان بحلم .....يوسف .....يوسف ... تعال ....يوسف ...
ثريه صحتو ....ياحاج ..بسم الله مالك ......مافي شي ....خير اللهم اجعلو خير .... الصبح أذن .....لسا باقي ليو نص ساعه ....... خلاص اقوم اتوضى وامشي الجامع ...
مشى حاج أحمد صلى وجا راجع البيت لقى ولدو محمد منتظرو .....
محمد : حرما يا حاج
حاج أحمد : جمعا.
محمد : نشرب الشاي ونتحرك
حاج أحمد : يوسف وين
محمد : نايم في بيتو
حاج أحمد : أطلع ناديو
طلع محمد صحى اخوه وجو الاتنين نازلين
يوسف : صباح الخير ياحاج ..... خير ان شالله
حاج أحمد : حأسافر معاك أنت ....جهز نفسك ....خلينا نطلع بعد شويه
يوسف عاين لأبوه بأستغراب ....أنا مابقدر عندي اجتماع مهم الليله
حاج أحمد : كلم باش مهندس كمال ينوب عنك
يوسف : ياحاج الله يخليك .....شغله العقود والقروش دي اختصاص محمد ما اختصاصي
حاج أحمد : محمد خليه....مرتو بتتوحم يمشي يخليها وين ..........محمد قعد يضحك
يوسف : لو كل زول مرتو بتتوحم قعد معاها البمشي شغلو منو
محمد : كلك نظر ياحاج.....وبعدين انت معارض مالك امشي غير جو وتعال
يوسف : استغفرالله العظيم .....دا شنو اليوم البادي بالعكس
محمد : أنا طالع أكمل نومي ....أقصد أهتم بمرتي .......وقعد يضحك
يوسف.: بالله ماتنسى لما مرتك تضع ....تشيل ليك إجازه أمومه
محمد : بكتفي بساعه رضاعه بس ..الطمع شين
يوسف : بتستضرف حضرتك
حاج أحمد : يوسف أطلع جهز نفسك خلينا نتحرك.......

لنا لقاء أخر .......