#بك_اكتمل
الجزء الاول
Nada Hs
الساعة 3 الظهر ..بشهر حزيران(السادس) .. دنيا حارة وكهرباء ماكو.. گاعدين عمي وعمتي وحماتي الصغيره يعني اهل زوجي بالصاله ..ومرت حماي تسبح بجهالها بالطرمه..وحماي الصغير ستوه طلع يشوف ابو المولد ليش ماشغل..وحماي الخ الاصغر نايم بالاستقبال ع الحر.. اني چنت اشر ملابس نور بنتي ..لان من تغدت لوصت نفسها وغسلت الها...
كملت وخليت نور بحظني وبديت انيم بيها..
عمي:ميعاد؟ هم خابرتي جواد؟
-لا عمي.. دگيت علي قبل ساعة مجاوبني.. يجوز بالطريق..
عمتي:شو تأخر.. چا هو مو گال يجي الصبح.. خايبه شو دگومي دگي علي؟!
شلت نور وكمت امشي للدرج حتى تجيب تلفوني من غرفتي.. قبل لااخلي رجلي ع اول بايه اندگ الباب.. بس شنو الدگه وصوتها وحده يشلع الروح.. ومنا هدوء وكهرباء ماكو..
كلنا انلسعت گلوبنا بغير منعرف شكو.. مرت حماي اجت تركض
امال بوجه مخطوف وثوبها مبلل للنص وجهالهه يتراكضون لغرفتهم گالت:عمي! زلم بره ! وهوسه صار يم الباب..
عمي لبس شحاطته وطلع..
مااسمع بس عمي صاح بصوت عالي:يابويه! راح مني الولد!
طلعت عمتي ع الصوت وشويه وگبت العيطه... چانت اول مرة اسمع بيها صوت عمتي هيچ تعيط.. الصوت وحدة خلاني ارجف ودموعي تصب بغير مااعرف شكو...
طبت عمتي ودگت لطم وهي مگابلتني.. وهي تصرخ تگلي: خايبه دگي والطمي وياي.. راح العزيز راح مني..
واني ابجي اريدها تحچيلي:عمه شكو! عمه حاچيني!
گامت تخرط بخدودها وويه كل خرطه الدم صار ينبع وهي منا حمره ورديه:ولج جواد ماااات...
ظلت تعيط واني بعدني ممصدگتها! ظليت اسألها واهز بيها وهي متجاوبني بس تطلم.. عبالي نفسي بحلم.. مادري منين اجت النسوان وماادري اني شچنت اسوي بالضبط بس وعيت ع نسوان جيرانه لازماتني من اديه اثنينهن.. ودموعهن تصب وصوت البچي بكل مكان.. اريد اوخرهن مني واشوف عمي وينه اشوف جواد وينه!
ماكو مانطني مجال.. مچلبات بيه منا ومنا.. واني ماادري بروحي بس اعيط واگول عوفني !عوفني!
شفت عمتي تملخ بروحهه وهم مثلي النسوان دايره عليها تريد تلزمها ماكو.. لحد هل لحظه واني ممصدكه الي يصير واريد اي واحد من الزلم اسألهم وين جواد وصدگ الي سمعته لو چذب..
ظليت مثل الطير المذبوح بذيج الساعات ومااعرف شلون عدت ..
شفت عمي گاعد ومرتكي يم اباب المطبخ ..مدنگ ويبچي.. وخرت النسوان عني گوه وطلعتله اركض..
گابلته واگله:عمي جواد وين... عمي گلي چذب هذا السمعته.. عمي وين جواد!
لزم راسي بأيد وحده وهو ينحب جرني اله وزاد البچي مالته..
اني هم صرخاتي زادت والناس التمت علينا اني وعمي...
بعدين گال وهو يصرخ وگوه افهم علي:جواد احترگ.. جواد احترگ بالحقل ..
ماادري شصار بيه واني اتخيل شكله الحلو وطوله وبشاشه وجهه ..يعني كل هذا راح واحترگ؟ زين ليش ؟ وشلون؟ وشوكت؟
حسيت الدنيا دارت بيه واني بس اصرخ مااگدرت احچي.. صرخاتي وحدها چانت تحچي الي احس بي...
دخلني النسوان جوه وشويه وجابو التابوت.. ماگدرت اقترب واشوفه.. من بعيد ظليت احاچي وابچي.. لحد مافقدت...
صحيت لگيت النسوان يضربن ع وجهي ومنگعاتني مي.. اول مصحيت لعبت نفسي .. ركضت للحمام وتقيأت .. كلش دخلت ابالي انتحر بذيج اللحظه.. حياتي شنو من بعد جواد.. ومصيري وين.. كل شي حلو راح.. جواد راح.. احلامنه بقطعتنا الي ردنا نبنيها عن قريب راحت.. الحب والاحترام البينا راح.. نور ومستقبلها الي چنه نفكر نبني سوه..شلون كل هذا اگدر استوعبه واعيش كأن مصار شي..
بذاك اليوم حالي ماانحسد علي.. حتى بنتي مادريت بيها وين
اجت امي وگابلتني ودگيت دگ يمها.. اختي هم بين حايره بيه وبين حايره بنور.. شنو الي ممكن اسوي ويرجعلي جواد بذيج اللحظة ...ابالي شي واحد اموت نفسي ورا..
صار الليل واني نايمه ع رجل امي واصرخ.. حتى حيل مابقه بيه اگعد.. طشت الناس الغربه وبقن بس الگرايب وچنت اسمعهن يحچن بجواد.. شلون هو شاب محترم وخلوق وانحرم من شبابه اسمعهن وداخلي اتگطع ... لو بيدي چان خليتهم يدفنوني ويا..
فكرة دفنته ونومته جوه التراب مادخلت عقلي.. اتذكر من چنت اصرخ بأيام الفاتحة اعاتب بي ..ليش عفتني منو الي من بعدك ليش يتمت نور..
خلصت الفاتحة واني ممستوعبه وانتظر احد يگلي هذا مقلب لو انتظر هو يدخل عليه .. حتى چنت اركز بعيون اهله حتى تشوف اذا صدك هو ميت.. مادري شلون چنت افكر من الصدمه..
خواته نرجس وخنساء ظلن يمي ونتگابل بكل وقت ونبقه نبچي..
بس ياحيف يرجعه البچي...
بالليل دخل عمي يمنه..اقصد احنه النسوان.. خوات عمي وعمتي وخواتهه ونرجس وخنساء وامي هم يمنه.. امي بس دخل شمرت العبايه عليه.. سلم وگعد بطرف العرفه.. صوته بي غصه ونبرة مال واحد يريد يبچي بس گوه لازم نفسه..
عمي:الموت حق.. وكلنه لهذا الدرب..
عمتي گبل طگت بچي وگالت:چا حگ بس ع ابني ..ليش چا انه اشفت منه!
عاد هنا صار البجي والنحيب بس هو الصوت بلغرفه...
شوية ومسح دموعه وگام.. من وصل للباب اندار ع عمتي وگال: بالج ع ام نور.. امانه المرحوم هايه..
من طلع وسكتن النسوان شويه امي گعدت گبال عمتي وگالت
خيه.. بعد ميعاد اخذهه يمي.. تعرفين لازم تلزم عدة.. واريدهه ترتاح يمي.. ونور خطيه بس تصرخ تريد امهه وحته خالتهه ماتگدر تسكتهه..
عمتي:الشور بيد ميعاد وعمهه..
امي:خيه مايصير تلزم عدتهه يمكم.. حرام..
بعدين ادخلن عمات جواد وكالن مايصير لان عندي حموين و اني احتاج اطلع للحمام ،اغسل ملابس،اغسل لبنتي.. فمترهم وهمه موجودين.. من هل حچي عمتي گالت اخذيها..
امي راحت صعدت لغرفتي الي مگدرت ادخلها من يوم الفاتحه واي شي احتاجه من الغرفة ادز الموجودين يمي...
نزلت امي وبيدهه جنطتي الي دائما متعوده اروح بيها لاهلي..
ودگلها ابويه بالتلفون وطلعنه.. من طلعت حسيت الدنيا وحشه والشوارع تخنگ وفارغه احس الناس كلها حزنانه. وهي صدگ كلها حزنت ع جواد.. جواد الي تحلف الناس بأخلاقه.. چان الجار يتلاگا قبلنا.. خلص عمره يركض.. من دراسته الي چانت بغير محافظه لحد ما تعين مهندس نفط وهم مويمنه..
وياريت مااجه هذا اليوم ولاتعين وولا وصل الحقل هناك.. كلها متعجبه شون صارت حرگته وهو كلش حذر ومنتبه لاقل شي.. بس ملك الموت مارحمه ولاحمني ولا رحم طفلتي..
جواد چان اكبر مني ب8 سنوات.. اني 22 سنه وهو30.. زواجنه چان عن طريق الصدفة.. چنت اداوم معهد طبي واخته نرجس چانت موظفه بالمعهد ويوم عن يوم تتقربلي وصارت صديقتي بعين حچتلي ع اخوها.. مانطيت كلمه مني.. گلتلها اذا تردون احجو ويه ابويه.. وصدگ اجت مشية النسوان وبعدين الزلم وطلعو من منطقتنا وقبل فترة منتقلين بس هم قريب علينا وكلها الناس مدحتهم وخاصه جواد..
صارت القسمة وتزوجت ومثل كل عروس اول ايام مااخذت عليهم وچنت كلش اتحسس منهم بس بعدين صارو مثل اهلي حتى روحتي لاهلي قلت..عدا امال طبعا.. مرت محمد اخوهم الچبير..مااعرف ليش چانت تكرهني بس اني مااهتم الها ابد ولااعبرها.... حتى من تحچي اجاوبهه بكبرياء.. لان سوت مواقف وياي ماانساهه ابد.. مرة شوف عيني جابت زبالة جهالها وشمرتهن اباب غرفتي.. ومرة شرت ملابس وشافت ثوبي واگع بقت تروح وترحع ادوس علي..
ومرة فتحت الباب صدفه واشوف بتها الجبيرة بالباب .. دخلتها يمي وانطيتها صبغ اظافر وجرجرتها بالحچي گالت ماما دزتني اسمع شتگولين عليها لعمو جواد..
وهواي مواقف سوت وياي.. چنت البسها واخليها تموت بحرگتها وصلت بيها تحچي عليه يم عمتي.. وياما خلت عمتي تتغير عليه مااعرف ليش چانت هيچ تكرهني.. سولفت لجواد وگال تحملي بين مااكمل فلوس القطعه.. وصدگ اشترينه قطعه .. عاد هي مسكتت وقنعت زوجهه محمد واشترو بيت... احنه بقينه نجمع حتى نبني وهمه بدو يجهزون حتى ينتقلون لبيتهم الجديد..
ماادري ليش احسها عقل طفل وولا تنضج.. حتى ويه زوجهه تتقصد اسوي شكو شي يغثه وتخلي يصيح عليها ويمي شگد چانت تسبه وتغلط وتريدني بس احچي وياهه ..
طبعا اني من تزوجت جواد مقبل اقدم تعيين.. گال اذا تحتاجين ابيع ملابسي واعيشج.. وطبعا هو ممقصر وراتبه خير من الله وچان يفارگنه ايام وليالي علمود خبزتنه... ومااگول حياتي چانت مابيها مشاكل.. لا اكو ..ويه عمتي هواي وامال بعد اكثر..
اما جواد كشفته مره مراسل وحده ومغازلها .. اني تخبلت بيومهه وزعلت علي وچنت كلش مصدومه ... بقيت يم اهلي اسبوع وبعدهه جاب ابو واجوني.. گال هي البنيه لازكتله وهو خطأ وحلف بالقرآن بعد ميعيدها وكسر خطه گدام اهلي..
رجعت بس مو مثل الاول.. اكو شي مكسور بداخلي والخيانه متنسي بيوم وليلة.. هو سوه المستحيل حتى ارجع ويا مثل قبل..
وصدگ يوم عن يوم نسيت وتأكدت ماعنده شي رجعت مثل قبل احبه واكثر...
چان كل مايجي يجيبلي هديه.. لو محبس لو گلادة لو سوار بس من بدينا نجمع ع القطعه صارت الهدايا بسيطه.. يذكرني بثوب لو بسيت نوم لو دبدوب يدري بيه احب هيج شغلات...
من ولدت نور صارت هي روحه من الدنيا ويصيحها نونايتي.. حتى هي اول اسم لفظته بابا.. طبعا ماچان يگعد راحه ويفرق بينا ويشاقه وصدگ مرات اغار .. وبعدين ارجع اشكر الله ع نعمته وانسى الغيره ونتحاضن كلنا سوه..
ماچنت متخيله يجي هيج يوم ابد.. بحياتي كلها متوقعتها هل سالفه...راح وعافلي ذكريات اليمه وتوجع.. واكثر ذكرى منه هي نور... نور من اشوفها واتذكر هي بغير اب وراح تعيش يتيمه مااعرف شنو يصير بيه.. احس الحراره تصعد لراسي من اشوف نور تلعب وتگول بابا.. هي عمرها سنتين وتفهم ومرات تسألني وين بابا... بداخلي اگوللها شنو اگلج وشنو اجاوب..
امي حارت بيه مثل المي الي بصينيه.. وحتى اختي سعاد الچبيرة عافت بيتها وزوجهه واجت يمنه.. بقت ايام وبعدين اجاهه هشام زوجهه واخذهه بس هم ما گطعت رجلها مني.. ظلت تجييني.. واختي الاصغر مني وفاق ماتركتني ... خطيه كل وقتها يمي تسولف وتلعب بنور بس طبعا اني ذيج الفترة بالي مو يمها... هوايه چنت اصفن وافكر بأيامي ويه جواد واعد الايام يوم يوم بفراگه لحد مااحس بدموعي تنزل جمر ع خدودي..
صار يوم الاربعين ومخلوني اروح وياهم بحجة العده .. ماادري شلون اوصف حالي.. اني چنت منتظره اروح واشوف گبره بلكي گلبي يصدك انه جواد مات.. مخلوني اروح وبذاك اليوم شبه تخبلت تعاركت ويه امي وويه خواتي الاثنين وحتى ابويه... الى ان مرت ساعات النهار وتعبت من البچي والعياط وغفيت ماادري بنفسي.. حلمت يجواد حلم كلش حلو.. گاعد بحديقه اهله وبيده جدر وماشفت شنو يوزع.. كلما حاولت اقترب منه اتعب ومااوصل لحد مافزيت... من گعدت بچيت بچي راسي راد يطگ..
كل الناس چانت موبعيني ذيج الفتره.. خالاتي اجن ع امي وگعدن يمي وسولفن هوايه عن الصبر والموت وكلنا ع هل طريق بس عقلي ميقنع بالي يگولو.. لسه ماشبعت شوف من جواد ولا شبع من بنته ولا حققنه احلامنه سوه... جيران امي هم اجن عليه من اگعد يمهن احس نفسي مكسوره وحتى الكلمه ماتطلع مني
ماادري شلون عدت ذيج الفتره.. بس نص عمري ضاع بيها وبحزني..
وره الاربعين بدو عيالي يجون ع نور.. مره عمها الصغير اسعد اجه عليها وطبعا اني مااطلع الهم ..صح هو صغير ماعده ال18 سنه بس ميصير.. ومرة اجه عمي بنفسه ومن راد يطلع دز عليه دخلت اله لابسه العبايه ومغطيه وجهي بشالي.. سلم عليه ومن شفته عبالك كبران 10سنوات.. خله بيد نور فلوس وهم انطه لابويه گله هاي مصرف لميعاد.. ومرة اجه حمايه محمد وجايب ابنه ويا.. طلبو يشوفون نور وبعدين هي چلبت ويه ابن عمها وگامت بتچي.. مادري شلون بوقتها قبلت ياخذوها وياهم..
اخذوها من العصر لل11 بليل مجابوهه.. روحي رادت طتلع من جسمي عليها.. گلت لابويه يتصل عليهم يرجعوها مقبل..بحجة عيب وهمه اهلها وشوكت ميرجعوها هلا بيهم... يمكن لو ما العدة الي لازمته چان اني رحت جبتهه منهم.. الصبر طار مني والگعده معرفتها شنو بس افتر وگلبي مفرفح عليها.. لل11ونص اجه محمد وجاب نور انطاهه لابويه.. بس راح ركضت ع بنتي احضن بيها وابوسها واشتم ريحتها... چانت كلش نعسانه وماعرفت ليش بقوها لهيج وقت.. غسلت الها وخليتها بحضني ونمنا... ماارتاحيت اله صارت بحضني...
يتبع..
القصة طويله والتكملة تعتمد ع التشجيع😁 وبعدني اكتب ترا!
ومراح انشرها ع الفيس اله لمن تكمل حتى لحد يگول انشلعت گلوبنا😒
