#بك_اكتمل
الجزء الاخير
Nada Hs
اول موصلت الصالون مخليت وحده تلزمني.. گبل اتصلت ع محمد..
-مساء الخير..
محمد بدون اهتمام:مساء النور..
-عفيه تگدر تجيبها هسه؟ اني بالصالون وبعد ماعندي وقت اشوف نور غير هسه...
محمد:هاا؟ لالا.. هسه ظهر وهي نايمه واني همين تعبان... تگعد واجيبها.. انتي كملي شغلج لتعطلين نفسج.. بكل الاحوال راح اجيبها الج..
بلشت ام الصالون مكياج وتسريح واني گاعده ع نار مامهتمه بعرسي ولا بشكلي شلون صرت... كل الي افكر بي شوكت يجي محمد وشلون اطلع اشوفهم..دزيتله رساله ع عنوان الصالون وانتظرت منه يرد ماكو.... وفاق شافت القلق بعيوني وظلت تصبر بيه وتهديني...
ساعتين اني جوه اديهن.. اخر شي بقن الاظافر .. كلش طگت روحي وصارت الساعه عبالك تركض ركض... محمد سكته مااتصل بيه... باخر لحظات اتصلت بيه اخت خلف... گالت شوكت تكملين احنه منتظريج... گلتلها فد شويه ... من سديت التلفون شفت ايدي ترجف ودموعي صبت بدون ماادري..
وفاق:ميعاد لتبچين! راح تخربين مكياجج! شكو شصار..
-محمد ..ضحك عليه ومراح اشوف نور...خلاني اتأمل وغدرني يتقصد يجرح گلبي خاف ارتاح بهذا اليوم...
الي بالصالون انتبهن عليه واختي وفاق غطت عليه...
ايست من جية محمد وگومني حتى البس البدله .. لبستها وگوه لازمه نفسي ماابچي...
شويه وسمعت تلفوني يدگ..جابته وفاق.. شفته هذا نفسه رقم محمد الي اتصل منه البارحه...
جاوبت بقلق:راح تجيبها لو بس دتختبر صبري؟!
محمد:اطلعي وحدچ..اني بالسياره يم الصالون ونور يمي...
-مااگدر..لابسه..لابسه بدله...
محمد:بالسياره شوفيها وروحي..
-اوكي جايه..
-وفاق.. ساعديني اطلع..
وفاق:شبيچ تخبلتي! اني اطلع اجيب نور وشويه ورجعيها اله!
-لالا..ليروح يبطل ميخليني اشوفها..
الي بالصالون كلهن انتبهن عليه.. من دموعي الي صبت ومخابراتي كل شوي ونوب هسه راح اطلع وهمه بعدهم مجايين..
طلعت.. ورفعت البرنص عن عيني شويه..چان حيل نازل ع وجهي.. شفت محمد مخلي ايده ع الستيرن ويباوع ع جهه باب الصالون... من شافني فتحلي الباب الي يمه من داخل السيارة...
صعدت واني لسه ماشفت نور... التفت ع الكشن الخلفي ماكو
قبل لاالتفت علي واحچي داس بانزين وطارت السيارة اله شوي
صرخت:محمد! لا!!! رجعني!
محمد باوعلي بمكر ومبتسم :صدگتي نفسچ عروس؟ شو نزلي هذا الكبوس خل اشوفچ؟
-الله يخليك لاتفضحني بهذا اليوم! مو وقت التهور هسه! رجعني فدوة امي تموت اذا عرفت.. وفاق بقت وحدها بالصالون! شراح تگول وشراح تحچي؟!
محمد بكل هدوء:اشششش... كل ظنچ اخلي هذا الكلب يلزمچ.. حتى لو طلگتچ..محد يقربلچ غيري...
توسلت بي يرجعني وهو ولامهتم..يبتسم ويحچي بهدوء..
محمد:كافي..ميعاد انتي عروستي اليوم..
نزل الكبوس عن وجهي ومشه ايده ع خدي... كزبر جسمي من لمسني .. خايفه منه ومشتاقتله وخايفه من حچي الناس وخايفه ع امي ...
طول الطريق مدنگه ودموعي تصب... وصلنا ع فندق استقبله واحد هوايه رحب بي .. عرفت همه اصدقاء وهو الي مرتبله كل شي... صعدنا بالمصعد وعيني بعينه ومااگدر احچي شي..
وصلنا ع غرفة.. فتحلي الباب وعاملني مثل العروس...
دخلت وسد الباب ورايه... بقيت واگفه بمكاني مصدومه من الي ديصير.. اجه هو قرب عليه وحوط خصري بأثنين ادي...
محمد:انتي اليوم عروستي اني..محد راح يلمسج من بعدي.. اله واني جوه...
خليت ايدي ع حلگه وگلت:اششش ..ماريد اسمعها...
هو هم خله ادي ع خدودي وبحركه خفيفه منه مسح دموعي وباسني بگصتي..
محمد:تدرين..المفروض اشگگها لهاي البدله عليچ..لانها من ذاك الكلب..بس لايگه عليچ كلش لذلك مبقيها...
-محمد؟
محمد:روحه؟
-وين نور؟
محمد:يم امي..لتخافين عليها..اني اسف ع كل دمعه نزلت بسببي...
-اني خايفه..
محمد:مني؟
هزيت راسي بأي..
محمد:لتخافين ..واذا عصبت بس احضنيني وراح انسى كل شي.. انتي بيدچ تخليني اصير هادئ..
بعد لحظة صمت...
-ليش؟
محمد:رادت تصير..ومتتكرر ان شاء الله...
رفعت اديه وحوطت رگبته وجريته اليه.. احس روحي رجعتلي من حضنته... رفع راسي بيده وبوسني... احس نفسي انتهيت بيده
محمد:لهنا وكافي.. بعد مااگدر اتحمل...الليله ترجعين زوجتي وع ذمتي والي يقربلچ لو يمسچ بحچايه افرمه فرم..
طلع من الغرفة واني بقيت حايره اباوع ع نفسي بالمرايه والقلق ع اهلي ماكل گلبي... اكيد خلف تعارك ويه اهلي واكيد امي تخربطت وابويه يجوز نقلو مستشفى ... هيچ فكرت...
رجع محمد بعد ساعه واكثر... جايب ويا شيخ واثنين ولد.. واحد منهم الي لاگانا بالرسبشن... ردد كلمات العقد ووافقت.. وطلعو الشباب بقى بس الشيخ يمنه اني دايره وجهي منه وهو ومحمد گاعدين ع صفحه... حچه هوايه عن الصبر وعن المحبة بين الزوجين وعن المشاكل وشلون نحلها... بعدين طلع ويا محمد وصله ورجعلي... اني هنا ذبيت الكبوس ومسحت دموعي الي صارت خارطه ع وجهي من الكحل...
محمد:واخيرا...رجعتلي الحياة..
-وانته كل دنيتي...
محمد:سنة وسبع اشهر وخمس ايام...
-و10 ساعه...
محمد:لا عاد مو لهدرجة؟
-ههههه... الله لا يرجع ذيچ الايام..
محمد:ماترجع...والي صار ناس خربتنا..
وصار الي صار ورجعت زوجته رسمي وكل شي تمام وبذيچ الليله اثنينا مانمنه من الفرح...بقينه نحچي معاناتنه وشوگنا لبعض وسبب المشاكل الصارت والدرس الي تعلمنا من كل الي صار... ونور ...حچالي عن الايام الي مرت بيها بغيابي طبعا مذكرتني واعتذر مني لانه ماخلاني اشوفهه بس حتى يلوعني بيها لان كل ظنه اني مااحبه واكره..
حچالي كل سوالفها واشتاقيت الها وتمنيتها بذاك اليوم تكون ثالثتنا....
صار الصبح واحلى عرسان چنا... چان جيابلي ملابس ومخليها بالكنتور...لبست ونزلنا لمطعم الفندق وتريگنا...
رجعنا صعدنا وصارت سوالف العرسان الي تعرفوها هههه...
راد نبقى بعد يوم بالفندق بس اني مقبلت....
احس روحي رايحه مني ع نور... ومن جهه مااعرف شصار يم اهلي بعد...
للعصر طلعنا من الفندق والضحكة متفارگ حلوگنا... رحنه ع بيت اهل محمد وهنا اني چنت دافنه الماضي ودايسته بس من شفت البيت رجفت ... جبرني ادخل واسلم ع امه وابو...
دخلت وماصار شي من الي چنت خايفه منه...عن روح جواد وعن الذكريات القديمه بهذا البيت... بالعكس اخذتنا السوالف ونور بحضني ومانطيت مجال للسلبيات ترجعلي وتأثر ع حياتي...
عمي وعمتي طلعو يعرفون بمخطط محمد ومحاچين اهلي البارحه بالليل وطبعا ابويه زعلان عليهم ويگول فشلتوني ويه العالم ...بس بعدين مهدينه ومفهمي لخاطر بنتي و اني مراح انسعد اذا بعيده عنها ومحمد اني احبه واريده بس الصارت مشاكل عاديه كبرت بسبب العناد الي بينا....
رجعنا لبيت محمد ونور بحضني ومحمد لازم ايدي طول الطريق
الفرحة الي دخلت گلبي بذيچ الايام لمت كل جرح بيه وجبرت كسرات گلبي من سنوات...
رجعنا وامال استقبلتنا عادي ممهتمه ولامبين عليها ضايجة مني.. مادري حسيت كل الي صار بينا هي السبب بي ع الرغم مچنت اصدگ بالاعمال والسحر وهاي الامور...
صعدنا للطابق الفوگ وردت ادخل الغرفه القديمه مالتنه محمد اشرلي ع غير وحده... دخلت وچانت عبالك جنة مو غرفه...
كل شي بيها يجنن...الاثاث الاضاءة ووجود محمد بيها كلش كافي اصلا... رجع صاحني ع غرفة ثانيه.. فتحتها وچانت غرفة لنور... همين شي يجنن وذوق محمد لا يعلى عليه...
مرت ايام واني اعود نور عليه واصارت تحبني وتجي اليه من عدها شي ... حسيت نفسي چنت ميته قبل بدون محمد ونور
وبهاي الايام مشينا بعقد الزواج بالمحكمه وكملنا..، وصرت زوجته شرعا وقانونا ... المهر الي خلا بالعقد بالملايين وطبعا مو طلب مني هو راد هيچ گلي هذا اقل شي ممكن اقدمه الج...
وسالفه الحمل والاطفال مجبتها يمه وخفت الصراحه... لحد ماهو بيوم اجاني بالليل حضني واني نايمه...
محمد:حبيبتي... مو تردين طفل؟
مابديت اي رغبة وظليت ساكته...
محمد:شبيچ.. تره اني همين اريد طفل ...
-صدگ؟
محمد:اييي...يله گعدي صحصحي ويايه حتى نجيب محمد صغيرون يشلع گلب ماما...
-هههههه ماااا ماريد اذا هيچ بطلت....
محمد باسني وگال:اششش
مرت الايام وشهرين هم ماكو حمل ...بكل مرة اضوج بيها محمد يصبرني ويگلي اله مايجي ... وصدگ الشهر الثالث من زواجنه طلعت حامل... فرحتي چانت متنوصف.... محمد ماقصر ويايه ومداريني كلش حتى ملابسنه اني ونور مرات يخيليهن بالغساله ويغسلهن وطبخ لغيته كله من برا لو امال تطبخ النا وطبعا مناكل اله هو ياكل قبلنا يخاف علينا هههه...
واهلي اوف يااهلي.. خابرت امي مره ورزلتني رزاله من هاي التمام وليش عفتي ابو الخير ركضتي للي عنده اطفال ومره وانتي مو وجه نعمه واشفتي منه حتى ترجعيله ويوووو اكلت راسي...
امال ع طبعها ...تذب حچي وتبسمر بس مااهتم .. مشاكلهه هي ومحمد قلت مو مثل قبل... صرت اشوفها لبسته كلش... صارت ميكاج ودلال واهتمام بنفسها وطلعات ويا اقاربها وصديقاتها اني هم كيفت حتى لا تذب كل بلاهه عليه... حتى اطفالها اعتمدو ع نفسهم واخوهم وسام الصغير همه اهتمو بيه وربو...
نور دخلت مدرسه صف اول وقطعه الارض الي بقت من جواد بقت الها .. طبعا الدلال الي دللها محمد خلاها متمشي بالگاع طايره فوگ الريح... حتى ابني الي حامل بي مااهتم بي بگدها
يدرسها بنفسه ويجيبها ويوديها...ويگول بس تكبر شوي اعلمها تسوق وانطيها سياره...سمر لوتسمع تذبح ابوها وتذبح نور ههه
حملي كلش چان ثگيل وحتى الولادة موتني ومطلع اله عمليه
من صحيت شفت محمد اله شوي يبچي واصلا عيونه حمر يمكن باچي عليه ههه... امي بولادتي يله اجتني بس شنو كله تبسمر بمحمد وهو وين ولامهتم....
عمي وعمتي فرحو بجية علي وعبالك ماعدهم بس هو.. الي صار غيرهم وخلاهم يحبوني اكثر من قبل... احسهم بس يردون يسعدوني وميخلوني احس بمغثه...
وفاق اختي تقدملها ولد من الجامعه وماصدگت ع الله شوكت تنخطب وتخلص من عزام لان بقه گلبي يلعب منه... بس همزين عزام تزوج ووفاق هم عن قريب عرسها...
اكيد تسألون شنو مصير جهاز العرس مال خلف... الذهب كله رجعلهم وعرفت بعدين محمد دازلهم شكو صرفيات ذابهن عليه
ابو علوشي مقصر طلعني من حلگ السبع ههه...
احمد الله ع الي سواه محمد واله چان هسه دمعتي بعيني ومااشوف نور بحياتي كلها...
مرات واحد لازم يتجاوز صعوباته ويشوف الجانب الايجابي وميخلي نفسه حبيس ذكريات كلها وجع والم... لان اذا بقى هيچ راح يخسر الحاضر والمستقبل... الي صار ويايه بالرغم كل الوجع والتعب والقهر الي شفته فتحلي باب من السعاده ويه اغلى ناس... محمد ...نور...وعلي...
هذي حياتنا...قدر مكتوب ... ومنعرف بأي لحظة شوكت تتغير حياتنه... سواء لافضل او اسوء... بالنتيجة هذي ارادة اللهية..
ولازم نقبلها ونتحمل كل عواقبها...
النهاية....
والقادم اجمل بإذن الله...
ارائكم ؟؟؟
حبيت الي مستمرين ويايه تصويت وتعليق...الله يحفظكم ويحفظ هل عيون الحلوة الي دتقره😍😍😂😂😘😘
