#بك_اكتمل
الجزء الثاني
Nada Hs
كملت العدة ومابيها شي يذكر غير نوبات البچي والذكريات الي عايشه بيها واعيدها لحظه لحظه وسهر الليل الي چان كيل يوجع.. اهلي ينامون واني ابقه افتر بالبيت.. مثل المخبله.. ادوره بكل زاويه بالبيت ادوره بكل ركن حتى بأحلامي تمنيت اشوفه بعد مشفته ابد غير مره.. لحد مايطلع الضوه وتنشف عيوني من الدمع يله انام.. وشنو ماابقى نايمه الصبح.. لا .. حسبة ساعتين انام واگعد .. احس روحي نشطه وبيه حيل وبنفس الوقت مالي واهس بكل شي.. اي شي گدامي يذكرني بجواد... الماعون اذا اجيت اكل اتذكر من اصبله وياكل بلهفه لان جوعان وتعبان ومن يكمل شكرني ويكلي عاشت ايدج.. الحمام اذا دخلته اتذكر من يجي من الحقل وتبعان ادخله اني اليفله.. شعري اذا مشطته اتذكر من امشطه واني يمه ..يگلي لتگصي ..وهو مچان طويل شعري وكل مايطول شوي يتعب واضطر اگصه هوايه عالجته ومفاد ومات ومشاف شعري طويل.. كل شي بيه وبالعالم يذكرني بي.. امي يوميه تگول لابويه حتى يطلعني بليل وبعبايتي وبالسياره محد يشوفني بس مااقبل.. وحتى من خلصت العدة مگدرت اطلع.. ماردت اطلع وبغير ماهو وياي لو هو موجود..
قبل اذا چان مموجود وردت اطلع ..اتصل بي لمن يگلي روحي يله اروح..
خلصت العدة ومر شهرين وراهه وجيات عيالي كثرت عليه.. خاصه عمي.. يوميه العصر يمنه..مرات ياخذ نور ساعتين ويرجعها وبهل ساعتين اني روحي تطلع علما يرجعها.. ومرة من المرات جاب عمتي ويا.. دخلت حضنتني وظلينه نبچي.. حتى من گعدنه واستقبلتها امي وجابت المي والچاي ظلينه نبچي..
راحت عمتي وهم اخذو نور وياهم... اني هنا حسيت نور مو بنتي نور بتهم ويمكن يجي يوم ياخذوها ميرجعوها...
وصدگ مرت الايام والاشهر ونور اكثر الاوقات يمهم..يرجعوها بالليل وتنام گبل..احسها حتى تعودت عليهم وهي فعلا تعودت.. صارت من تگعد الصبح تسألني وين بيبي اگلها هاي بيبي ع امي تگلي لالا بيبي ذيج مو هاي..وحتى ع اطفال محمد تسأل ومتنساهم ابد ..ورمت گلبي حتى بيوم اني عصبيه وهي بس تبچي تريد ضي بنت محمد ضربتها وگطعتها تگطع..فقدت اعصابي عليها..اني اريد اشبع شوف منها لانو بالنهار يمهم وبس بالليل يمي وهي تصيح دي دي تقصد ضي..
اجتني امي جرتها مني وحتى غلط غلطت عليه..مادري شنو الجرالي بعدهه وانفجرت ابچي والوم جواد ..ظليت مبسطه وگاعده بالگاع واضرب ع رجليه.. لحد مااجت وفاق حضنتني وبچت وياي وتگلي عفيه لاتبچين والله تخوفيني من تسوين هيچ حضنتها وظليت ابچي بسكته..بس الدموع تصب..
بيوم اجتنه صديقتي قبل بالمعهد واهلها جيرانه بنفس الوقت .. ظلينه نسولف واثناء الحديث گالت..
اسراء:لج ميعاد قدمي وتعيني احسن مگاعده بالبيت..
-لا..مااگدر..صعبه..
اسراء:شنو الصعب! لعد تبقين طول عمرج حابسه نفسج بالغرفه؟ الحياة تمشي ومحد مات ورا احد..عيشي وشوفي حياتج.. شوفيني خير من الله راتبي واطلع واطب وراح اسحب قرض واشتري سياره ..وانتي تدرين كلش زين لوما الوظيفه ماتعرفت بحليم ولاتزوجنه..
-فلوس ممحتاجة وعمي ممقصر وحتى اهلي واذا ع الطلعه اني مااريد اطلع..وبعدين شنو يعني؟ ترديني اطلع حتى تجيني خطابه؟
اسراء:لج بعدج صغيره والف من يتمناج.. واذا تزوجتي قابل كفرني هل شي الله محلله!
-كافي اسراء! من دتحچين راسي وجعني! كل عقلج اتزوج وانسه جواد!
اسراء:هسه عوفي الزواج..انتي توظفي واعتمدي ع نفسج وبعدين تزوجي او ابقي ميهم..تذكري ترا عيالج واهلج الله يحفظهم محد دايم الج.. يعني شيردون يتحملوج؟ سنه؟ سنتين؟ وبعدهه ينطوج دفره..ياخيتي ع الاقل عيشي لبنتج!
-مادري..خل اشوف ابويه شيگول..
اسراء:اني متأكدة راح يفرح وهو بنفسه يقدملج..
سولفنه شويه وبعدهه اتصل عليها زوجها وراحت.. اني ظليت افكر بكلامهه واقتنعت بالتعيين مو الزواج لان شغله مستحيل اسويها.. بالليل حاچيت ابويه وطار من الفرح وگال هو بنفسه راح يقدملي..امي هم نفس الحال وكمشتها بالبسكوت تخابر بأختي سعاد وتگللها(ميعاد تشافت يمكن..وتريد تتعين..ولج يمه ماصدگه روحي..والله..ايي غير حتى گامت تضرب بتهه.. واني گمت اكيف يجون اهلها ياخذوهه...اي والله..ها؟ لالا ابوج هو الي قدملها...انتي هم تعاي وشجعيها حتى تطلعن سوه تشترن ملابس وگليلها هذا امر الله وبعد لازم تشوف حياتهه.. حبيبتي اي والله...الله يفرح گلوبنه دوم..)
حسيتها تحچي عني عبالك مريضه..وهي ماچذبت..اني چنت مريضه ومخبله كلش.. ثاني يوم چان جمعه واجه عمي كالعاده
ماادري امي شلون فلتتها گدامه وگايلتله ع التعيين.. اني مچنت يمهم..سمعت بس صوت عمي ارتفع .. دخلت عليهم للأستقبال ولگيت عمي صاير نار..
عمي:انتي صدك رايده تتعينين! ليش؟ شعايزج؟ فلوس؟ احرگ العدي والماعدي جوه رجلج انتي ونوره! بتي ليش تردين تعيين! احنه بشنو قصرنه وياج!
ابوي:ع كيفك حجي! تره ميعاد بعدهه طفله وانته تعرف .. ماله داعي هل حجي.. موزين ع الله ورجعت عافيتها .. حقها تشوف عالم تشوف ناس! قابل نحبسها؟
-عمي.. هذا حقي واني ماسويت شي غلط..
عمي:لالا هذا حجيج ماموزون! انتي العاقل الفاهم هيج تحجين شتحتاجين اني موجود ومحمد واسعد كلهم بخدمتج.. بس مال تعيين هاي مامرضيه منج..
امي:ع بختك ابو محمد.. ليش تظلمها وتظلم بختك.. هذا حقها مايصير تمنعونهه..ومو لان بتي هيج اكول.. لو اي وحده هيج اسمع بيهه ماارضه ع الي يمنعهه..
عمي:اني حجيت العدي.. ميعاد اذا داومت نور تظل يمنه.. وتشوفهه يوم واحد بس..
ابوي:هاا؟ هيج صارت حجي؟ تره البنيه من حق امهه! روح للمحاكم واسأل!
عمي:اني مااعترف لا بمحاكم ولا غيره! هذا العدي!
نفظ عباته عمي وگام.. طلع زعلان بسببي.. عمي بعمره ماغثني بحچايه اليوم زعل مني.. بس امي وابويه صارو نار وشرار بعد ماطلع .. همه ماحچو گدامه استحو وخلوله قيمه.. حتى اختي من اجت.. گلبت الدنيا ..
سعاد:هي شنو بكيفهم؟ هيته هي؟ والله احرگ بيتهم عليهم؟ شنو ياخذون نور! هي تايهه! فوگ ظليمه امهه!
امي:يمه ناس زايعينها! شنحچي وشنگول..
سعاد:شوفي ولج ميعاد! اذا بطلتي وماقدمتي اتفلي بگصتي اذا حاچيتج بعد! لاتخافين كلنه وياج ونور تظل يمج اكبر ضراط ميگدر ياخذهه..
صدگ حسيت سعاد تاخذلي حقي منهم.. وهي فعلا جريئه وماتسكت ع الباطل.. ومنا هي اعصاب يعني اذا طگت عدها تحرگ الاخضر واليابس..
مرت ايام وابويه مشه بالمعامله مال تعيين وعيالي مامنهم صوت.. حتى نور محد اجاهه بعد.. وبيوم اجونه عمي وعمتي... عمتي نار وشرار اطفر.. وحتى سلام ماسلمت.. وعمي گعد يم ابويه بس ماسمعنه صوت هوسه ولا صياح مثل ذيج المره..
عمتي:شوفي يبت الناس.. نور بتنه ومانخليهه يمج .. باچر عگبه اتعرسين وتاخذينهه للغريب واحنه موجودين..
-عمه شهل حچي اني مااتزوج بعد المرحوم!
عمتي:خليني اكمل لاتقاطعيني! احنه اليوم اجينه نخيرج.. يو ناخذ نور وتظل يمنه وانتي تعيني عرسي مالنه شغل.. يو تاخذين واحد من الولد وتردين يمنه..
ماصدگت السمعته وعبالي نفسي اتخيل عمتي حجت هيج شي بس من امي ردت عليها عرفت اني مجاي اتخيل وحتى امي سمعت..
امي:شنوو! ام محمد! بتي مو سلعه بين اديكم! شنو تخيروها شنو تاخذون بتها! انتي مو ام؟ مو انكسر گلبج ع ظناج؟ ميعاد هم ام وينكسر گلبها واني من اشوفهن هم ينكسر گلبي!
عمتي:هذه العدنه،..محمد گلب الدنيه يگول شلون تفكر اداوم واحنه موجودين.. وهي باينه اذا عافت بتهه يعني تريد رجل!
اني صبت دموعي معرفت شحچي.. وعمتي سكتت ظلت دايره وجهه من امي وامي تحچي وياهه وهي ولامهتمه...
شويه وصاح عمي (يله حجيه!) راحو هو عمتي وظليت اني مثل المتخبله! ذول صدگ يحچون؟ شلون ارجع لذاك البيت وبيا وجه! بوجه اني ماخذه اخو ! شلون يربي شلون.. الصدمة والحيرة كتلتني.. طبيت لغرفتي ومادريت بعدهه شصار.. محد دخل عليه من اهلي بس وفاق تفتر يمي لان غرفتنه سوه..
بالليل صاحتني امي ع العشا وتعشينه عادي كأن مصار شي العصر.. يومين مرن مصار بيهن شي واهلي مجابو طاري.. واني حچي عمتي مراح من بالي .. وكلمة (اذا عافت بتهه سعني تريد رجل)مافارگتني! يعني اذا قبلت اخذ واحد من ولدهه ماتسمى اريد رجل بس اذا تعينت وعفت بتي الهم اصبح اريد رجل! مادري شلون يفكرون! كلش صدموني! والكارثه جواد مباقي لسنويته غير شهر! نسو يمكن.. ونسو اني حرمته .. وكل همهم صار خاف اطلع واتزوج واني هل فكرة ابد مو ابالي.. چان ابالي اربي بنتي واشتري بيت بأسمها وشتريلها سياره من تكبر والبسها احسن لبس وادرسها بأحسن المدارس.. بس همه راح بالهم زايد..
بعد خمس ايام من جيه عمتي النا تفاجئت بأمي وابويه.. بعد ماكملنه الغده وگعدنه سوه.. ابويه گال لوفاق اخذي نور وروحي للغرفه..حسيت عنده حچي..
ابويه:ميعاد.. التعيين عوفي.. بيت ابو محمد مايخلوج ترتاحين اذا تعينتي.. ونور ياخذونهه..
-اي بابا.. اصلا اني شلت هل فكرة من راسي.. احسن شي اظل بالبيت حتى لا يسوولهم حجة..
امي:لا يمه.. حتى اذا گعدتي بالبيت عمرج كله راح ياخذونهه.. نور بتهم مو بتنه.. واحنه مادايمين الج.
-يعني؟
امي:اقبلي بواحد من ولدهم وجلبي نفسج.. ادري هي صعبه بس مو حرام ولاعيب.. انتي صغيره والعين عليج وهذا نصيبج من الدنيا شتسوين بعد!
-يمه شلون هيج تحچين!
ابوي:احنه فكرنه هواي.. وهذا انسب حل الج.. من تجي عمتج لاترفضين.. همه باچر لو عگبة يجون.. بنتي صيري عاقله مثل مااعرفج ولاتفشليني.. اني مالي بالمحاكم والشكاوي تالي عمري رجعيلهم واني متأكد ميقصرون وياج..
دنگت وصبت دموعي.. طلعو مقررين كل شي عني.. ظلو يحچون هوايه ويقنعون بيه بكل الطرق.. طبعا اني ايست منهم وغسلت ايدي اذا وگفو بصفي.. سكتت وگلت هو اني روحي وحياتي اندفنت ويه جواد الي راح اعيشه بس بالاسم موجود.. واله اني ماعايشه من صدگ الحياة انتهت بروحته.. ومااتوقع يجي واحد وياخذ مكانه لو بعد قرن زمان..
يتبع..
حياة ثانيه بأنتظار ميعاد..احداث حلوة وشيقه بالبارتات الجايه..
