#بك_اكتمل
الجزء الخامس
Nada Hs
بظرف يومين محمد طلع عمال وجاب كاونتر وبدو يشدون بي.. طباخ وسنك وثلاجة چبيرة وغساله كلهن جابهم فد مره.. حتى شغلات المطبخ..جداري مواعين خواشيك..فرحت من شفتهن واخيرا راح ارتاح من سالفه الاكل وغسل الملابس..
نور چانت مطلعه روحي..اكلها شويه شويه ووقت الريوگ متتريگ لازم وره شويه يله..يعني بالمختصر لازم اظل جوه يم امال .. بس هسه لا اختلفت.. كملو العمال شد وراحو..
دخلت للمطبخ چان محمد يرتب بالثلاجة ويفحصها..
محمد:هاا؟عجبج؟
-كلش حلو عاشت ايدك..مشكور ابو غيث..
محمد:باقي بس المسواگ ..بالليل اجيبلكم من ارجع..وين نور؟
-نايمه... هسه يله نامت من صوت الدريل..
محمد:ههه حبيبتي خافت منه؟
-اي هي جبانه ..
محمد دار وجهه وهمس:ع امها..
اني وجهي صار نار ..يمكن هو عباله مسمعته.. خليت وطلعت من المطبخ..لميت الهوسه الي عافوهه العمال مسحت الساحه..
شويه واشوف امال صعدت..
امال:محمد! محمد!
محمد:ها!
امال:شنو لزگت هنا! تعال تغده يله..
محمد:جاي..
باوعت ع المطبخ هزت ايدها ومگدرت تحچي لان محمد موجود..
مانزلت اله لمن راح وياهه يله..
اني هم اخذت راحتي بالتنظيف ورتبت كل شي.. صار المطبخ يجنن.. ظلت كلمة محمد ابالي..(ع امها).. يعني اني جبانه.. ليش شنو منتظر مني؟وشيتوقع مثلا؟ ظليت اضرب اخماس بأسداس..
مر يوم ورا الثاني وشويه ارتاحيت من النگ مال امال وماعدت اشوفها هواي مثل قبل..بس هم ماتركتني بحالي.. مرات تجي تصعد تفتر فوگ ترزلني وتنزل..مثل كل مره اني اغلس ومااحچي ... امي همين اجتني وفرحت بجيتها وكالعاده تريد تعرف علاقتي بمحمد طبيعيه لو لا..وتسألني عن امال شلونها وياي بس ماحچيت شي..ولا شكيت..لان اشوف امي تعبانه وكل همها اني انسعد..ماردت احسسها بشي..بيوم الي تجي اخلي الضحكه لأذاني وهي كلها چذب.. بس احسها مو مقتنعه بالي اگوله والاسوي...
شهرين مرن ع زواجي...وبعدني عايشه ع ذكرى جواد..انتبهت لنفسي ماعدت اذكره مثل اول..وليالي صارت تمر انام بدون ماابچي.. ومن اشوف الشي مااتذكر جواد..صرت اشوف كل شي طبيعي ويمكن عقلي رضه بالامر الواقع.. صارت الايام تمشي بسرعه ونور ماخذه كل وقتي.. صار ميلادها وعمها محمد ماقصر.. سوالها ميلاد يجنن وامال بيومها مقصرت ظلت ترگص گدام محمد وهو ولا داير الها بال..بنظراتهه عود تحاول تبين انها مو مهتمه بس هي بداخلها تريد تموت.. حتى لاهلها بعد مراحت.. وصارت تخابرهم وهمه يجونها.. وطبعا تتقصد ادز ع اخوانها ويظلون يفترون بالبيت ...صح اني ماانزل جوه هواي بس هم مرات احتاج انزل لو علمود نور لو اشر ملابس لان محمد ميقبل نطلع للسطح نشر.. وهي الله يسلمها ماقصرت يوم والثاني اخوتها يفترون بالبيت...ماادري شچانت تتخيل من هيچ تسوي تخوفني لو تهددني بيهم ماادري...
هم غلست وگلت ماادخل ولااحچي لمحمد..خاف تصير مشكله..
ومرة نزلت وبيدي السله مال ملابس اريد اشر لگيت امها گاعده بالصاله..سلمت عليها وبس ردت عليه..حتى ماخلتني الزم ايدها ولا اباوسها... لان قبل من چانت تجي نبوسها كلنا..
ام امال ظلت تباوعلي من فوگ ليجوه..ومتحچي.. بعدين نطقت
ام امال:شوكت تنزعين الاسود؟
دنگت وگلت بداخلي هو هذا هم سؤال ينسأل:بعد ..
ام امال:شوفي عيب عليچ تاخذين زلمه من مرته..حتى اذا اجاج محمد اطردي..گليله روح لمرتك..مرتك الصدگ..
-اي خاله..
ام امال بعد ماطمنت مني:امچ شلونهه؟.. هم تجيج؟
-الحمد لله زينه..اي مرات .. يله خاله اني عندي شغل ونور بقت وحدها فوگ..
ام امال:اي روحي..
گمت منهن وكملت شغلي ورحت لغرفتي.. شويه واندگ الباب .. كل ظني واحد من الجهال..فتحت بدون ماانتبه..شفت محمد فزيت..
محمد:هلو ميعاد..
-هلو.؟!
محمد:شبيچ خفتي شنو؟ تعالي جوعان شمسويه غده انتي؟
-ها؟ تبسي وتمن..
محمد:تعالي صبيلي..
انتبهت لنفسي بغير حجاب رحت لبست حجابي ولحكته ع المطبخ
فرشت عندي فرشه صغيره ناكل عليها امي جابتها..
محمد:شوف اني ناسيكم بدون ميز طعام..باچر اجيبلكم..
حميت التبسي ومباقي بي بس شوي لان مااكثر فد اني ونور والتمن لا ازيد لان نور تحبه بالعشا..سويت زلاطه وطلعت خبز ..صبيت وخليت الصينيه گدامه..
محمد:هاي الحقنه شوكت تروح؟(يقصد ام امال)
-مااعرف..
محمد:بيوم الي تجي امها متطبخ اطلع بايت واني عقلي يطير من الاكل البايت..لذلك اجيت هنا..
-وقت الي يعجبك تعال اكل هنا..
محمد اول مره يباوعلي بتمعن:جيبي نور وتعالي اكلي ويايه..
-هاا..لا اكلنه احنه..
محمد:ابقي هنا لتشردين.. اريد اسولف وياچ..
-هااا؟! عن شنو؟
محمد:عن شغلي.. عگب باچر اروح للسماوه علمود سياره هناك.. اذ تحبين اوديچ لأهلچ..
-صدگ..؟ اي ياريت والله..
محمد:وقت الي يعجبج گولي واوديچ..
-تسلم متقصر..
بقه هو ياكل واني رحت شفت نور لگيتها غافيه وحدها.. غطيتها ورجعت افتر ..اخاف يطلب شي واستحي ابقه گاعده يمه بنفس الوقت.. كمل اكل وقبل لينزل گال:عاشت ايدچ ع هل الاكل..
-يعيش غاليك..
رحت غسلت المواعين ولميت الفراش ومددت يم نور.. كل مااتذكر راح اروح لأهلي باچر افرح..صار شهرين ونص مشايفتهم ابيتهم.. المغربيه يله راحت ام امال..شفت واحد من اخوة امال طبگ سيارته بالباب واخذ امه..
بالليل محمد اجاني للغرفه گال بدلي دنطلع.. اني تعجبت بقيت فاكه حلگي وواگفه..
محمد:تعالي اختاري ميز الطعام الي تردي ومناك اوصلج لاهلج. هسه صارلي مجال يجوز باچر مالحك ..
شويه استوعبت وتحركت ع السريع لبست ردائي ولميت كم قطعه ملابس اليه ولنور.. امال شافتني من نزلنا ومحمد قبلنا يمشي.. ظلت بس تباوع وتخازر بيه متگدر تحچي شي...لوما محمد چان وضحت الها واحچيلها مطالعه حتى اتونس ويه رجلها.. صعد محمد قبلنا بالسياره وظل يباوع علينا..يمكن چان يريد اگعد ليگدام..
وصلنا ع معرض الاثاث وشي احلى من شي.. كل ما التفت لمحمد انتبه لنفسي اني دااضحك ارجع اگطع ابتسامتي.. گوه ثبتت ع واحد اختاريته نفس لون الكاونتر..
دفع وطلعنا..طول الطريق ساكتين..حتى نور سكته..الى ان گال
محمد:شگد تبقين يم اهلچ؟
-بكفيك..شوكت ترجع؟
محمد:نفس اليوم ارجع ..بالليل..
-هاا..بكيفك لعد مرلي من تجي..
ماادري ليش استعجلت وهيچ حچيت..اني لو بيدي ابقى شهر يم اهلي مااهتم..بس لساني نطقها بعد.. هو هم ابتسم واحس بداخله فرحه اكبر من گلتله هيچ..
وصلت لبيت اهلي ودخل هو گعد يم ابويه شويه وراح..بقيت اني ابوس بوفاق وامي وبعدين ابويه..خابرنه اختي سعاد وگلت الها تعالي باچر اريد اشوفچ..لان مشايفتهه من يوم الي تزوجت.. بينا بس التلفون ومو دائما نحچي..
بليلتها بقينه للفجر نسولف اني وامي واختي.. بحيث الصبح گوه گعدت من النعاس.. اجتنه سعاد والتمينه كلنا.. چان يوم يخبل حسيت براحه مو طبيعيه عبالك چنت محبوسه او مقيده ابيت محمد..صح كل شي وحدي وفوك..بس هم مماخذه راحتي واطلع كله بحجاب بعدني ممستوعبه هو زوجي.. ومثل اي اختين متزوجات گعدنه اني وسعاد سولفنه ومااقتنعت بالي حچيته الها عن محمد وعلاقتي بي لمن اعترفت بكل شي يله..هي تخبلت وكلش ضاجت..
سعاد:ولج ليش مگلتي محچيتي! لعد المن باقيه هناك هااا؟
-سعاد موبيدي! والله مااگدر اتخيله زوجي ابد.. وهو هم..
سعاد:اوف كون الزمج هسه اگطعج! يابه ضمني نفسج! خلفي منه وثبتي نفسج يمهم! ع الاقل ينطوج القطعه!
-مااگدر موبيدي! تعرفين شنو مااگدر! جواد ميروح من بالي.. مااتخيل احد يلمسني من بعد جواد..
سعاد:الي فات مات ومحد مات ورا احد! شنو تردين تخسرين شبابج وتخلين نور وحيده طول عمرها!
-مادري..بعدني مو جاهزه..
سعاد صرخت بيه:ولج شنو مو جاهزه! .. راح تسمعني امي وتروح بيها! شوفي انتي بيدج بعد..ظلي حزينه طول عمرج ولا راح تتهنين بشبابج ولا تخلين نور مرتاحه بحياتها!
مااهتميت بكلام سعاد ويايه ..لان محد يفهم عليه شنو احس ..
تصرفنه بقيه اليوم عادي يم امي خاف تحس ع شي..
صارت ليل تعشينا وسعاد راحت ومرت الساعات ونور نعست كلش ..اني أيست گلت بعد ميجي ..وتجهزت حتى انام لبست ثوبي مال نوم وخليت راسي بس منمت..بقيت اتگلب وشوية ودگ تلفوني..محمد المتصل..جاوبته ع كيف لان اختي ونور نايمات يمي..
-الو..هلو..
محمد:هلو ميعاد..اني بالباب اجيتكم..
-هاا..يله راح اطلع..
گمت لبست وشلت نور ..دگيت الباب ع امي وبلغتها احنه رايحين..
طلعت لگيت محمد نارل من السيارة وجگارته بيده ويروح ويرجع..
محمد:يله ..نايمه؟
-اي نامت..
محمد:هسه يله وصلت وبوجهي اجيتكم..
صعدنه وطول الطريق محمد يذب حسرات..استحيت اسأله شكو.. ومبين صاير اعصاب..وصلنه للبيت والكل چان نايم.. صعدت اني لغرفتنه وهو دخل يم امال..
خليت نور بالفراش واني نزعت ردائي واريد انام انتبهت اكو ع الگرانيت شعر وتراب.. دنگت اكثر لگيت الغرفه مليانه.. تخبلت شنو هذا حتى ريحة الغرفة مطيبه.. ظليت بحيره شسوي وشلون اتصرف..والله ماكو دقايق واني بحيرتي واسمع امال ومحمد عياطهم وصل يمي..نزلت يم الدرج شويه بعدين رجعت لغرفتي گلت هسه اني شعليه.. دخلت وطلعت مكناستي وحضرت الممسحه..اندگ الباب.. فتحت ومااشوف بس محمد صاير نار ومن الظلمه ومبين حمار وجهه وعيونه تجدح..
محمد وميباوع بوجهي:اگدر انام هنا اليوم..اني بالگاع وانتي اخذي راحتج..
ميعاد:اي..تفضل..راح انام بالمطبخ اني ونور..
دخل وگال:شنو تنامين بالمطبخ! اذا هيج اضيق عليكم اروح لاهلي احسن..
-لاااا مو قصه تضيق..بس نور تگعد مرات بالليل وتبچي...
محمد:ميهم.. گعد هو ع الچربايه وصوت النفس مالته يوصل يمي..اني هم جبت المكناسه وبديت انظف..
محمد:ليش دتنظفين هسه..ساعه12 تدرين لولا! وبعدين شنو هاي؟ من شوكت ممنظفه؟!
-والله ماادري..اني نظفتها بيوم الي وديتني ولگيتها هيچ من دخلت..
هو طفر من مكانه:شنو؟ شتگولين؟
-والله هذا الصار ومااگدر ابقيهه لباچر وهسه داانظف..
مادري شوكت گام وخطف بدون مااشوفه بس اسمع دويه ع الدرج من سرعته وصوت رجلي.. ماكو شويه واسمع صوت عياط امال شگ الحايط اله شوي..اني گلت ماادخل ولاانزل .. بس اشو صوتها صار كل شوي عيطه وتختفي وين يله ترجع تعيط.. صوت الجهال گامو يعيطون ويمكن هم ضربهم..
اني هنا متحملت ..خليت ونزلت.. لگيت الاطفال بالصاله ملتمين ويعيطون وامهم وابوهم بالغرفه.. دخلت واشوف منظر جمد الدم بيه .. محمد لازم المخده ويخنگ بأمال.. اني گبل ركضت لزمته من خصره وجريته كوه بعدته عنها
عطت بي:وخرررر عنهااا! راح تموتها!
محمد:لج اليوم اموتج والله! اني شفتهمت من حياتي بسببج!
هي عاد گامت مخنوگه وصوتها مبحوح وممتوبه:ولك شوف اليوم مايصبح صبح اذا مااخلي اخوتي يذبحوك!
محمد عاط كل صوته:ولج اليوم انعل ابوج لابو اخوتج وياج!
صار يتهدد عليها واني بالنص.. كل شويه اندار عليها اگلها ولج اسكتي ميفيد.. نوب انهدت بيه
امال:ولج انتي الدايحه الجابوج عليه هسه ادافعيلي! ام السحوره شجبتي وياج من اهلج وخليتي يتخبل عليه..
محمد:ميعاد اطعلي منا! دااكلج اطلعي مناااا!
صرخت-مااطلع! شنو انته مو بشر! شوف شمسوي بيها!
امال:انتو اثنينكم چلاب! هو چلب اخذج وانتي گح..
اني صافنه عليها شتگول وهي ورايه ومااحس اله محمد اجاهه ابوكس طير وجهه.. رجعت صرت بالنص الثوله ومااحس اله دفره ابطني.. حسيت شي انشلع بداخلي.. ماادري هي شنو من بشر حتى تتحمل هذا كله..
وگعت للگاع من الوجع..اخخخخ
محمد نصه يمي:ميعاد! ميعاد !
امال:هاا انكسر گلبك عليها؟ الله اليعلم شنو من عمل سوتلك!
محمد رجع گام الها يريد يضربها.. گمت اني من مكاني گبل دفعته من صدره:كافي! تخبلت! كافي اطلع منا..
بقيت ادفع بي وهو صافن بوجهي واني اصرخ وحتى دموعي نزلت..گوه طلعته من الغرفه.. اجو جهالهه يمهه وهي ظلت تبچي وتدعي.. رجعت الها وانطيتها كلنس تمسح الدم من حلگها وردت الم شعرها صاير كفشه مخلتني..
امال:اطلعي مني! جايه تشمتين بيه! والله اله اندمج ع يوم الجيتي بي!
شي دفعني احچي وياهه واله اني قبل مانطيها وجه.بس هلمره قهرتني وهي مثل الفريسه جوه ايده..مهما يكون مااقبل تنضرب
-امال..والله بالي مو يم الزواج ولارايده زوجج اني..كل همي ردت اتعين وعمي عمتي تخبلو وخيروني بين بنتي وبين التعيين.. انتي تگدرين تبقين بدون جهالج يوم؟
امال صكت سنونها وخزرتني:امشي اطلعي منا!
كمت منها وطلعت..مهما حجيت ماكو فايده..
يتبع..
بكل بيت بي چناين لازم تلگون وحده مثل امال😂 مو لو مومو؟؟
