#بك_اكتمل
الجزء العاشر
Nada Hs
سنة وخمس اشهر اني مشايفه نور..وممنوعه من اي محاولة حتى ارجعها لحضني..وكأن اهلي گوه متحمليني وميتحملون بنتي.. بيوم قررت اطلع حتى لو بدون علمهم..لان گلبي خلص انتهى مااتحمل بعد..اريد اشوف بنتي.. امي دخلت للحمام وابويه بدوامه ووفاق هم بدوامهه:. لبست عباتي وبوجهي لبيت محمد..
من شفت البيت گلبي صار يرعد..اباوع ع الطابق الفوگ الي بي كل ذكرياتنه اني ومحمد..مادري شلون تماسكت بوقتها ومصرخت.. شفت سيارة طابگه بالباب.. عبالي محمد موجود كيفت.. دگيت الباب طلعتلي امال..
امال:لا هله! شرايده!
-اريد بنتي..نور وينها؟
امال:مو هنا..
-لج شنو مو هنا؟ وين وديتيها!
امال:بلروضه..وولي منا لااخابرلج اخوتي يجوج!
دفعت الباب بلا وعي ودخلت جوه.. هي تعيط ورايه وتغلط مهتميت ولاسمعت شنو حچت..ظليت مفرفحه وادور ع نور بلغرف غرفة غرفة...مچان اكو احد بس امال وابنها الصغير.. الي ع وقتي چانت حامل بي..
طلعت خايبه من البيت بس متنازلت ورجعت لاهلي..بقيت گاعده بلباب..انتظر بنتي وانتظر محمد..
ساعه وساعتين وماكو..اني اصلا طالعه من وقت من البيت.. امال معافتني كل شوي تجي تذبلها حچايه وتروح.. هددتني تخابرلي الشرطه وهددتني بمحمد اذا عرف .. مهتميت الها وبقيت حالي حال المجدية بلباب..
صارت ظهر وحتى المارة خفت..وصوت السيارات قل.. سمعت صوت سياره طبگت قريب مني.. رفعت راسي شفت محمد نزل..
بقه صافن عليه واني همين.. فتح الباب الخلفي ونزلت نور..
گلبي انثلم من شفتها..كبرانه والضعف باين عليها ..جنطتها بظهرها وتباوع لعمها تگله بابا جوعانه... يمكن حتى نست اني امها.. محمد گادها ودخلها للبيت..ردت اقترب منها واحضنها بس ماگدرت..لارجليه تحركت ولا گدرت انطق اصيحها..
دخلها ورجع ميباوع بوجهي..
محمد:روحي منا لتسويلنا مشاكل..
-بس ساعه! بس ساعه ابقى يم بنتي.. لتحرمني منها الله يخليك
محمد:روحي ميعاد..خسرتي كل شي بيدچ..عوفينا مرتاحين
صرخت وصوتي مبحوح والدمع يطافر من عيني:مو ع كيفكم! مو ع كيفكم بنتي اخذهااا..اخذهاا رضيت ولما رضيت!
محاچني..بس مد ايده وجرني من ذراعي وخلاني بالسياره..
طارت بينا السياره طيور عبالك..واني بس ابچي مااگدر اسكت
-بنتي اريدها..انت واحد ظالم وحقير! والله اله اشتكي عليك وشوف شلون اخذها..ليش ياظالم ليش!
محمد ضرب ع الستيرن بيده ويصيح:لتغلطين! راح تجنين ع نفسج!
-الله ليوفقك انت واهلك..دمرتو حياتي..الله لينطيك!
محمد:كاااافي! راح اشمرچ من السياره والله! من طلعتي من البيت مفكرتي بهذا اليوم! فوگ الهم الي بداخلي كملتيها ردتي خلفه وردتي تبعدين نور منا بكل صوره! انتي الي ظلمتيني! مافكرتي بيه! ماحسبتي حساب اليه !
-لتصيح عليه! شذنبي اني! ذنبي حبيتك وداموت عليك وانته هيچ تعاملني!
محمد:چذابه! بحياتچ محبيتني ولاراح تحبيني! حتى من چنتي زوجتي چنت اشوف كرهچ الي بعيونچ! بس من حبي الچ محچيت ولاحسستچ اني اعرف شنو بداخلچ!
عمت السكته وماحچيت بعد..شويه ووگفت السياره..شلت راسي لگيت واصلين لبيت اهلي..
نزلت وعيني ع محمد وهو هم عينه عليه..واحد يريد الخ بس مادري شنو الي منعنا نكون سوه.. ماراح لحد كاتأكد اني دخلت يله.. اول مدخلت لگيت امي بالطرمه..
امي:عزه بعينج صخام بگصتج وين چنتي؟ شصخمتي ولج!
-رحت لنور ومخلوني اقرب منها..رجعت انفجرت بچي واشكي لامي..يمه محد خلاني احضنها..يمه نور كبرانه ومعرفتني من فاتت مني.. فقدت اعصابي كلش واذكر كلام محمد ازيد بالزايد بچي النوب.. طول اليوم بقيت بالغرفه لااكل ولاشرب.. بس دموع تجري..
ومرت الايام واحس شبابي يوم عن يوم يطفى وعمري ديضيع واني بعيده عن نور وعن محمد... امي صارت تتجاهلني من ابچي ومتهتم مثل قبل..هم حقها ملت مني.. لان كل ماتشوفني لو ابچي لو ابچي ماكو خيار ثاني.. وفاق هم اكثر وقتها تبچي وياي..واعرف بيها متبچي ع حزني..لا تبچي ع عزام..
حبته وهي متعرف بي نذل وساقط..
بيوم من الايام اجن خالاتي لامي مثل ما متعودات كل فترة يجنها وطبعا بكل جية لازم يغثني مغثه تكرهني بروحي.. ع ابو ها مرجعوها ها متزوجت ها صوج منها تركت البيت.. طبعا محد يفهم شنو المريت بي حتى تخبلت بذيچ الفترة ومگدرت اگعد بيت محمد دقيقه زياده... المهم من اجن خالاتي تغدن وشربن چاي
مددن بالصاله وگعدن يسولفن ويحشن بالعالم..
بنص السوالف مالتهن گالن لامي..
-ياا ولچ صدگ احنه شلون ناسين.. غير خلف طلگ مرته.. ليش مانسويلنه تسيوره عليهم ونشوف اذا يردون مره لولا..
امي:يااا..شو مادري شوكت طلگ وليش؟
-خيه غير مرته ماتخلف ..وفوگها مانه علي ومعاجبهه.. دخل نروحلهم ع يوم ونشوفهم ومنها نحچي بميعاد يمهم.. وبلكت يقبلون ياخذوهه..
امي:ي والله.. وين نلگه احسن من خلف.. ونعرفه ومنا وبينا.. بس كون يقبل.. انتن من ترحن لاتجيبن طاري زواجهه من محمد.. گولن بس ارملة وبعدين عود اذا صارت قسمة تحچيله..
-اي والله خلف ماكو منه..
سمعتهن خططن وقررن عني ..لا والمشكلة هنه الي رايحات يخطبن الولد اليه!! ... خلف يصير اقارب امي من بعيد... يطلع عمره بالاربعينات.. شايفته اني قبل.. وطبعا كتلن نفسهن علي لان زنگين عنده معامل مال طابوگ وحصو بيوت وعقارات كل شي عنده.. من راحن خالاتي حچيت ويه امي..
-انتي تردين تزوجيني؟
امي:اي.. لعد تبقين طول عمرچ هنا!
-ليش هيچ ثگيله عليكم اني؟ اصلا كل شي صار وياي انتم السبب..
امي:ولچ هسه من يگول خلف يقبل بيچ.. واذا قبل انتي مبخوته تخلفين وتنسين ضيم المريتي بي..يصير عندج بدل نور عشره اطبين اطلعين بزودج محد يحاچيچ.. ولچ ادعي من الله كون يقبل ويجون علينه..
سكتت من امي لان كلش مقتنعه چانت بالي تگوله.. وماهامها رأيي اصلا.. وصدگ مرت ايام وخالاتي رجعن لامي مكيفات وگالن سألين عليه.. وره ايام من جية خالاتي اجنا خوات خلف ومرت اخو.. سون جيتهن بالبدايه بحجة يشوفن امي..
بس شنو من اجن..حتى بگعدتهن راقيات وملابسهن تخبل ووجوهن تلمع والكحل واگع الهن..
بعدين من شافني وتأكدن اني مناسبه الهم من ناحية الشكل وخاف مخبله وخاف ارتل لو شي..كل هذا فحصنه بيه..
اخت خلف:ام سعاد..تردين الصدگ احنه عجبتنه ميعاد وهي سبب جيتنه.. نريدها لخلف.. تدرين بي ماخلف لهسه وضيع نص عمره ويه عذراء وماقبل يتزوج عليها..تالي هي دفرت النعمة بيدها وعافته..
امي بفرح:وين نلگه احسن من خلف..تشرفونه بأي وقت..
اخته الخ:وهي الحلوة شنو رأيها؟
اني باوعت لامي وسكتت.. عاد امي غيرت السيرة ولفتها عليهن..
مرت اخو:والله احنه جينه ع السمعه الطيبه والتربية الزينه وانتم منا وبينا ومانريد خيرنا للغربة.. واله هو خلف منو الي ماتتمنا..
ظلن يمدحن بي لحد ما اله شويه سونه نبي.. اني گاعده بنصهن واسمع ومعبالك اني الي يحچون عنها، ولا عبالك اني العروس..
طلعن وامي عوزها بس ماتهلهل.. حتى دزت ع چكليت وطشت عليه.. اني صافنه عليها ومادري شحچي وياهه...
بداخلي مچنت اعرف شريد؟ ارفض لو اقبل؟ بس عقلي يگلي اقبلي انتقام من محمد ومن العيشه العشتها قبل ومن اهلي ..
تمنيت اتزوج وبحياتي ماادخل بيت اهلي بعد.. گلت حتى اقاطعهم فد مرة وانسى كل شي يتعلق بالماضي.. ردت حياة جديدة..ردت انسى تعبي وقهري ..ردت انسى محمد ومعاناتي.. ردت وجعي يخف ع نور...ردت احس نفسي موجوده ع وجه الكرة الارضيه..
وره ايام اجه خلف..وچان لازم اتجهز واخلي مكياج والبس الفستان الي دزو اليه.. سويت كل شي مثل ماطلبو..
دخلت للاستقبال وچان گاعد مدنگ.. گعدني بصفه وهلاهل وصفگ.. اني اسمع الهلاهل واتذكر خطوبتي ويه جواد واختنگ مادري شلون تحملت لحد ما لبسنا الحلقات.. ومو بس حلقات.. لا يمكن بالكيلو ذهب جايبين وياهم..
خلف چان انسان عادي وبسيط وممبين علي هو زنيگين وولا شايف نفسه ع العالم ابد وكلش كريم.. ينطي للي يعرفه والي ميعرفه.. قبل لايطلع خله بصفي شدتين خمسه وعشرينات..وهمزين من حظي ماجايبين شيخ وياهم يعقدلنا...
امي ظلت فاكه حلگها وواگفه... خزرتها شويه يله حست ع نفسها...
راحو واني صافنه ع الحلقه.. قبلها بأيام اني نزعت حلقة جواد..
حتى من چنت متزوجة محمد الحلقه الي بيدي هي مال زواجي الاول.. بس هسه مگدرت ارجعلها..بقيت لابسه الحلقه..
كل يوم امي مطلعتلها شغله جديده ..ثياب فساتين ذهب مكياج رادت تشتري السوگ اله شويه..طبعا ماطلعت وياهن ولامره..
كله هنه يجيبنه ويخلنه گبالي واني كل واهس مالي بيهن..
ولا فكرت بالعرس ولافكرت بخلف... كأن شي عادي صار عندي
يوميه مزوجة ... بس هوايه حنيت لنور... تأملت بخلف يرفعلي دعوة لو يسويها عشاير وياهم واجيبها يمي... اهلي كلش مستجبنين من اهل محمد ومااعرف من شنو...
مرت الايام وقرب موعد العرس وحددو يوم العقد بالمحكمه وحددو الحاضر والغايب قبلها..
قبل لانعقد گلت ليش اضم سالفه محمد وزواجي منه .. صرت خيره وطلبت اشوف خلف ..هو ماصدگ اجاني وطلعنا وحدنا واول مرة چانت اطلع ويا... وبحضور اخته طبعا..حچيتله عن زواجي بمحمد والمشاكل الصارت بس محچيتله اني بفتره انجنيت ولا حچيتله عن حبي لمحمد... هو من عرف گال لنستعجل افضل.. خل ناخذ وقتنا يله
اني فرحت من گال هيچ.. صح چنت منتظره حياة جديدة بس بنفس الوقت خايفه.. خايفه من تجاربي السابقه الفاشله..
من يومها قلت جيات خوات خلف وماسمعت اخباره بعد...
وره شهر تقريبا دزو خبر لامي علمود العرس..
عاد امي طارت من الفرح بعد ماچان القلق ماكلها لان تأخرو وهي متعرف التأخير بسببي...
وبده العد التنازلي ليوم العرس وجهزولي احسن جهاز واحسن لبس بس كله موبعيني..كل مامر يوم اتذكر محمد وابچي مشتاقتله حيل ...خو نور مااحچي شصار بيه بسببها...
اجانه خلف بيوم بليل.. گعد يم امي شويه بعدين دز عليه.. تجهزت ولبست ودخلتله... حچه وياي خاف محتاجه شي ووين احب نسافر وعن العرس هوسه لو بسيط...
ماطلبت منه غير بس يكون العرس بسيط وبدون معازيم...
وسوه مثل مااريد بس طبعا ماتنازل عن البدله البيضه... دزولي بدله جديده ع ذوقهم... من شفتها بچيت.. مااعرف شصارلي
رعشة بجسمي كله.. وبنفس الوقت عقلي يگلي لتذكرين الماضي هذي حياتچ بعد...
بيوم الحنة اجن خالاتي وبناتهن وماقصرن...حتى مااحترمن وجودي ولافكرن بيه...گضنها رگص وصفگ... الجيران سمعو وعبالهم وفاق الي معرسه مو اني...
خلصت الحنة وكلمن راح ع بيته وامي ممصدكه نفسها عبالك هي المعرسه.... بليل ودگ تلفوني... چان رقم...
من فتحت خط وسمعت الالو گلبي انقبض..
محمد:الو... ميعاد؟
-ها
محمد:ع الخير.. سمعت راح تزوجين..؟
-اي..
محمد:هيچ طلع الحب عندچ؟ بهل سهولة بعتيني؟
شهگت وگلت:لااا
محمد:مااريد اسمع چذباتچ... اتصلت حتى اخليچ تشوفين نور باچر..
صبت دموعي ومعرفت شحچي:وين؟ شوكت؟ جيبها هسه يمي فدوه!
محمد:لا.. باچر اشوفچ واخذيها...العصر .. وها خليني اشوفج وحدچ..مو يجون اهلچ لو احد من اقاربچ..ماريد حچايه عليچ وعليه....يله ..باچر هم اتصل بيچ واگلچ وين اشوفچ... مع السلامة
ماصدگت الي سمعته...ظليت طايره من الفرحه... احس عبالك باچر اروح للجنة مو راح اشوف نور... وفاق چانت يمي من اتصل محمد وسمعت...
وفاق:لج شو گلبي ممرتاح.. يعني شنو الي خطرله حتى يقبل تشوفيها؟
-اكيد انقهر عليه ويعرف يجوز بعد مااشوفهه..
وفاق:زين شلون تشوفي العصر اكيد انتي بذاك الوقت ابيت خلف؟
-لااحاول اشوفه قبل لااروح..
وفاق:والله مااعرف شگولج..
-لتگولين شي.. بس غطي عليه بوقت اشوف نور..
وفاق:عيونچ راح تطلع ع كيفچ..
-لج ممصدگه..واخيرا.. يارب اكتبلي الي بي خير... كافي الي اتحملته لحد هسه...
ظليت احسب بالساعات ومانمت اله الفجر.. گعدت عيوني منفخات وسود من جوه.. امي كل شوي تجيب الثلج ترد اخلي ع عيوني خاف اطلع محلوة ههه...
الظهر ب2 ونص رحت للصالون..رحنه اني ووفاق..امي گالت من تكملون خابروني ادز ابوچن ..لان هي وسعادبقن بالبيت يرتبن وينظفن حتى يجون ياخذوني من البيت.. والصالون مو بعيد .. ورا بيتنا بشارعين..
يتبع...
