سيف جان بكل حركاته يتقصد يضوجني ويحرك دمي
واني برغم انو اعرف هو ديضوجني بس من اشوفه يلمس زوجته اتخبل احس نار وشبت بكلبي
شسوي ماعندي سيطرة على كلبي
والمشكله انو اني مااريد ابين لااحد انو اني مااريد اطلع ويا سيف وزوجته حتى ليكولون تغار ولاداكدر ابين شي
مثل الي بحلكه حجايه ودتوجعه لابي يبلعها ويطك ويموت ولابي يطلعها وينفضح واني هذا وضعي داتحمل سيف وتصرفاته
بس المشكله اني احبه واول مرة انظر لسيف بهاي النظرة
مكنت قبل هيج انظرله هسه كامت النظرة منه تموتني وتحيني
غريب من نعيش واحنا منحس بمشاعر شخص يحبنا وبعدين نكتشف انو احنا جنا دائما نحبه ونحبه اكثر من كلشي
اني من بعد ماشفت سيف يبوس يد زوجته صفنت واخذتني دنيا
وجابتني دنيا ومن باوعت عليه جان هو هم ديباوع عليه
وبهاي الاثناء مريم بت عمي كالت اريد اروح للحمام
وزوجته كالت اني هم اريد اروح اعدل مكياجي
وبقيت اني وسيف وحدنا
وجان ديريد يحجي وعفته وكمت وباوعت جانو اهلي وبيت عمي كاعدين شويه بعيد عنه اشرت لبابا انو اني راح اتمشى هنا
اشرلي ميخالف
جنت اريد اهرب من سيف لان جان اكيد راح هم يجرحني بكلماته
ردت ابتعد ونزلت من الدرجات مال مطعم ونزلت بسرعه وعثرت وشفت يد كمشتني وجانت يد سيف
...وين دتروحين
....اريد امشي شويه
.....وتريدين تتمشين وحدج ودنيا لليل
.... سيف اترجاك روح هسه مرتك دور عليك اني اريد ابقى وحدي
..... ليش عود
....لان اني هيجي اريد
وعفته ومشيت ولحكني وكام يمشي بصفي وشفته طلع التلفون وكام يكتب اظاهر كتب رساله لزوجته ورجع تلفونه بجيبه
وظلينا نمشي وبدون منحجي
وكلي
....ليش من شفتيني داحجي كمتي
...لان همين راح ادكلي شي يضوجني ويفور دمي
لهذا السبب ردت ابتعد عنك
...ها اني افور دمج لويش اني طبيعي وياج كلش
....ههههه صدك تحجي انت طبيعي ويايه
....اي لعد شنو بس هاي انتي تتخيلين شغلات
.وكفت ونداريت عليه
....شنو تريد تخبلني انت
سيف كافي عد ترة والله كلبي تعب اعرف اني غلطت بحقك
بس كافي تعذبني
....صدك دتتعذبين
....هوايه
حسيت عيونه لمعت بدمعه
....مااكدر
...شنو الي متكدر عليه
....مداكدر اسامج مداكدر انسى شلون جنت اني مغفل
وشلون جنتي انتي ادوسين بطني واني اسكت واتحمل واصبر
تذكرين مرة
من جنتي بيت خالج واجيت داخذج انتي وامج وبوقتها
طلع ابن خالج وراكم وهو ولد شاب واني بسرعه بين عليه
انو اني ضجت لان غرت عليج تذكرين
شسويتي بوقتها
كلتيلي كدام ابن خالج
هاي شبيك شنو هلتفيك الزايد وشنو شبي وجهك
كتلج بوقتها شبيج ريمان
كمتي تعلين صوتج ودكوليلي
اش كافي اسكت ميعجبك لتجي علينا بعد محد كايلك تعال
بوقتها انزعجت كلش ونقهرت بس اخذتها بساطه بسبب حبي الج ومنسيت النظرة الي جانت مرسومه على وجه ابن خالتج
صدك جنت غبي شلون سمحتلج هيج تحجين ويايه جان المفروض
تعرفين شسوي اضربج راجدي واجرج من شعرج
واعوفج ومااباوع بوجهج بس اني شسويت كعدت ابررلج
واكول ضايجه زعلانه تعبانه
هذا واحد من المواقف الي سويتها والباقي هوايه
....خجلت من نفسي وانقهرت عليه لان في يوم ما خليته
بهيج موقف
وكتله
.... اسفه بس كافي هالعذاب الي تعذبتة
.....ههههه اي
....ليش تضحك
....عليج داشوفج مهزوزة
...اني مومهزوزة وكتلك كافي سيف انت ازوجت شتريد بعد مني
وانت مبين مرتاح وسعيد وتحب زوجتك
.....تغارين
....لا طبعا
....متاكدة ليش لعد احس عيونج تريد تطلع من مكانها لمن اكعد يم مرتي ويدج دكوم ترجف
ها
ومد يدة وخلاها على كلبي
كوليلي هنا بكلبج شيصير من اشوفيني وياها
ها كوليلي
واني ظليت ساكته وكلبي يدك بسرعه
وهو حس بدكات كلبي
وحسيته جمد بمكانه وكام يتنفس بقوة
وبعدها سحب يدة بطئ
وكلي
....خلي نروح احسن ما اذكر انو اني عندي هوايه شغلات
يمج بعدني مماخذها واطلب انو اخذها
مثل انو اني مافد يوم حضنتج
يتبع ....
#الكاتبه #روجمان
