السلام عليكم يا حلوين ..❤
يارب دايماً بخير .
دلوقتي وخصوصا في الوقت الحاضر اتعودنا علي الشتيمة بشكل فظيع وحتي لو هزار .
"ايه دا ازيك يا جزمة عاملة ايه "
"بس يا حيوانة "
"فين المتخلفة صاحبتي "
"اختي دي زبالة وباردة " .
ودايما بناخد حجة ''العصبية " اللي هو انا لما بتعصب مبشوفش ادامي و هما اللي استفزوني و انا بهزر ودا هزارنا عشان صحاب ودي كلها حــــــجــــــج .
نبص أول حاجة لـلسبب الاول وهو 'العصبية ' انا مش ملاك ومش هقول مبشتمش بس نتعود مع بعض نصلح من نفسنا ، مثلا أختك عملت حاجة ضايقتك وزعلتك جامد وعصبتك وشتمتيها وبعدين ؟ عصبيتك قلت ؟ يمكن .
بس لو مسكنا نفسنا خمس ثواني بس وافتكرنا اننا دلوقتي بس اللي 'هتهدي من عصبيتك ' بس في نفس الوقت هتتكتبلك سيئة ، واحنا للأسف مش بنستغفر عن اغلب ذنوبنا ..فيرضيكوا نسيب الجنة عشان شتيمة ؟ او ندخل درجة اقل في الجنة عشان شتيمة !! روحوا شوفوا بارت الجنة اللي نزل قبل دا وشوفوا عايزين تبقوا في الجنة ولا لأ ؟💗
بس العصبية دي مش فينا بس دي كمان كانت في الصحابة رضي الله عنهم في حديث هيورينا ايه اللي بيحصل لما نتعصب ونشتم ..
" رجـلا شتـم أبا بكر والنبي صلى الله عليه وسلم جالـس ؛ فجعل النبي صلى الله عليه وسلم يعجبه ويتبسم ؛ فلما أكثــر رد عليه بعض قولــه !!
فغضـب النبي صلى الله عليه وسلم وقام ، فلحقـه ابو بكر فقال : يا رسول الله كان يشتمني وأنت جالس فلما رددت عليه بعض قوله غضبت وقمت ؟!
قال : إنه كان معك ملك يرد عنك فلما رددت عليه بعض قوله وقع الشيطان فلم أكن لأقعد مع الشيطان .."
المعني ايه بقي ، المعني ان ابو بكر الصديق رضي الله عنه وسيدنا النبي صلوات ربي وسلامه عليه كانوا قاعدين في مجلس مع بعض فدخل واحد شتم ابو بكر وابو بكر مبيردش وسيدنا النبي مبتسم ومعجب برد فعل ابو بكر .
والراجل اللي بيشتم زود الشتيمة فأبو بكر رد عليه الرسول ساعتها غضب ومشي وساب المجلس فأبو بكر من شدة حبه للرسول مشي وراه وقاله دا كان بيشتمني يا رسول الله ولما انا رديت مرة بس و مش شتيمة جامدة زيه انت غضبت وقومت ليه ؟؟
الرسول جاوبه ايه بقي الرسول قاله انت لما مكنتش بترد كان في ملك بيرد عنك ولما انت رديت الشيطان حضر ، وانا مقعدش مع شيطان 💙 صدقت يا سيدي يا حبيبي يا رسول الله .
أظن الحديث دا كافي اوي لحتة العصبية دي ، وعارفين ممكن لما تتعصبي تغيري قعدتك او تقفي او تغسلي وشك او تتجاهلي الشخصية اللي معصباكي ومتبصيلهاش حتي وكدا هتبينلها انك ارقي من انك تعلي صوتك او تشتمي .
لانه بالعقل كدا متبقاش الشخصية معصباني في الدنيا فاشتمها واتعاقب عليها في الاخرة 😂✋
تاني سبب وهو الهزار ..طب احنا صحاب اشطا؟ايه لازمتها اني اشتمك ؟دا تعبير اني بحبك اوي كصاحبتي مثلا؟؟؟
احنا صحاب فدا معناه اننا ساعد بعض علي الخير والا ملهاش لازمة صحوبيتنا .
الشتيمة بين الصحاب مش دليل ع الحب او ان دمك خفيف او اي حاجة 😌
في بقي حاجة تالتة ودي طالعة موضة 😑 البنات بتشتم زي الولاد و بتقول 'الشتيمة مش للولاد بس ' بصي يا حبيبتي مش عايزة افاجئك بس الشتيمة حرام ليكو انتوا الاتنين اصلا .
"ما يلفظ من قول إلا لديه رقيبٌ عتيد"
يعني انتي مقتنعة بحججك اصلا ؟؟ بجد والله ؟؟!
يعني لما تيجي تتحاسبي هتقولي لربنا "اصلي كنت متعصبة يارب ..سامحني"
او تقوليله أن الولاد اللي اخدتيهم قدوة دول مثلا بيشتموا فاشمعنا هما يشتموا وانا لأ !!!؟؟ بجد ؟؟
استقيموا يرحمكم الله 😌🌸 الموضوع بس محتاج منك تفكير من غير ما تنحازي لنفسك .. لومي نفسك انتي بدل ما هتلوميها غصب عنك في اليوم اللي باب التوبة بيتقفل فيه وساعتها مش هتعرفي تستغفرى .
في حديث تاني برضو أن النبي صلي الله عليه وسلم قال :"سباب المسلم فسوق وقتالُ كفر "
معني سباب المسلم يعني شتمه والتكلم في عرضه او العيب اللي فيه واي حاجة تزعله .
واللي بيشتم المسلم دا فسق شايفين ايه' فـــــســـــــــق ' يعني فجر وخرج عن الحق متخيلين الشتيمة اللي مستهنين بيها دي بتوصل لإيه ..
تمام يا جماعة .. دي ادلة بس وتوضيح للشتيمة بس هل دا معناه انه هنبطل نشتم في ساعتها ؟ لأ دا معناه اننا هنحاول لو الكلام اللي قولته اقنعكوا .❤
الكتاب دا محدش بيقراه بس لو جت صدفة وحد قراه😂 عايزين المرة الجاية نتكلم ع حاجة معينه ؟
والله لو واحدة بس بتقراها وبتستفاد هكمل عادي بس المهم الاستفادة لو حد شايف انو بقول بلح وكلام مبيقنعش اصلا ياريت تقولولي ✋😌
ولو دا لو بقي😂حد شايف انه من الكتاب استفادة ياريت تقولوا لصحابكوا عشان يستفادوا 💙
حفظكم الله وستركم 💗
اللهم ارزقنا الخير كله بما شئت وكيف شئت واني شئت ، واكفنا الشر كله بما شئت وكيف شئت وأني شئت. 💜
